Priyanka Chopra: ಪ್ರಿಯಾಂಕಾ ಚೋಪ್ರಾ ಬರ್ತ್​ಡೇ: ದೇಸಿ ಗರ್ಲ್​ ನೋಡಿ ಫ್ಯಾನ್ಸ್​ ಕಲಿಯಬಹುದಾದ 5 ಪಾಠಗಳು

ನಟಿ ಪ್ರಿಯಾಂಕಾ ಚೋಪ್ರಾ (Priyanka Chopra) ಅವರು ಅನೇಕರಿಗೆ ಮಾದರಿ. ಬಣ್ಣದ ಲೋಕದಲ್ಲಿ ಅವರ ಸಾಧನೆ ಅಪಾರ. ಇಂದು (ಜುಲೈ 18) ಅವರಿಗೆ ಹುಟ್ಟುಹಬ್ಬದ ಸಂಭ್ರಮ. ಪ್ರಿಯಾಂಕಾ ಚೋಪ್ರಾ ಜನ್ಮದಿನಕ್ಕೆ (Priyanka Chopra Birthday) ಅಭಿಮಾನಿಗಳು, ಸೆಲೆಬ್ರಿಟಿಗಳು, ಆಪ್ತರು ಶುಭ ಕೋರುತ್ತಿದ್ದಾರೆ. ಚಿತ್ರರಂಗದಲ್ಲಿ ಬರೋಬ್ಬರಿ 20 ವರ್ಷಗಳ ಅನುಭವ ಅವರಿಗೆ ಇದೆ. ಈ ಜರ್ನಿಯಲ್ಲಿ ಹಲವು ಏಳು-ಬೀಳುಗಳನ್ನು ಅವರು ಕಂಡಿದ್ದಾರೆ. ಪ್ರಿಯಾಂಕಾ ಚೋಪ್ರಾ ಈಗ ಅಮೆರಿಕದಲ್ಲೇ ಸೆಟ್ಲ್​ ಆಗಿದ್ದಾರೆ. ಪತಿ ನಿಕ್​ ಜೋನಸ್​ (Nick Jonas) ಜೊತೆಗೆ ಅವರು ಹಾಯಾಗಿ ದಿನ ಕಳೆಯುತ್ತಿದ್ದಾರೆ. ಬಾಡಿಗೆ ತಾಯಿ ಮೂಲಕ ಈ ದಂಪತಿ ಮುದ್ದಾದ ಹೆಣ್ಣು ಮಗುವನ್ನು ಪಡೆದಿದ್ದಾರೆ. ಈವರೆಗಿನ ಸಿನಿಪಯಣದಲ್ಲಿ ಪ್ರಿಯಾಂಕಾ ಚೋಪ್ರಾ ಅವರನ್ನು ನೋಡಿ ಫ್ಯಾನ್ಸ್​ ಕಲಿಯಬಹುದಾದ ಕೆಲವು ಪಾಠಗಳಿವೆ..

ನಿಮ್ಮ ಮೂಲವನ್ನು ಮರೆಯದಿರಿ:
ಸಾಧನೆ ಮಾಡಿದ ಬಳಿಕ ತಮ್ಮ ಮೂಲವನ್ನು ಮರೆಯುವವರೇ ಹೆಚ್ಚು. ಆದರೆ ಪ್ರಿಯಾಂಕಾ ಚೋಪ್ರಾ ಹಾಗೆ ಮಾಡಿಲ್ಲ. ಬಾಲಿವುಡ್​ನಿಂದ ವೃತ್ತಿಜೀವನ ಆರಂಭಿಸಿ, ಹಾಲಿವುಡ್​ವರೆಗೆ ತಲುಪಿದರೂ ಕೂಡ ಅವರು ತಮ್ಮ ಮೂಲವನ್ನು ಮರೆತಿಲ್ಲ. ಭಾರತದ ಹಬ್ಬಗಳನ್ನು ಅವರು ಇಂದಿಗೂ ಆಚರಿಸುತ್ತಾರೆ. ತಾಯ್ನಾಡಿನ ಬಗ್ಗೆ ಕಾಳಜಿ ತೋರುತ್ತಾರೆ.

ನಿಮಗೆ ನೀವೇ ಮಿತಿ ಹೇರಿಕೊಳ್ಳಬೇಡಿ:
‘ಮಿಸ್ ವರ್ಲ್ಡ್​’ ಕಿರೀಟ ಗೆದ್ದ ಬಳಿಕ ಪ್ರಿಯಾಂಕಾ ಚೋಪ್ರ ಸುಮ್ಮನಾಗಲಿಲ್ಲ. ಬಾಲಿವುಡ್​ನಲ್ಲಿ ಅದೃಷ್ಟ ಪರೀಕ್ಷೆ ಮಾಡಿಕೊಂಡರು. ನಂತರ ಹಾಲಿವುಡ್​ಗೂ ಕಾಲಿಟ್ಟು ಗುರುತಿಸಿಕೊಂಡರು. ತಮ್ಮ ಸಾಮರ್ಥ್ಯದ ವ್ಯಾಪ್ತಿ ವಿಸ್ತರಿಸಿಕೊಳ್ಳುವ ವಿಚಾರದಲ್ಲಿ ಅಭಿಮಾನಿಗಳಿಗೆ ಅವರು ಮಾದರಿ ಆಗಿದ್ದಾರೆ.

ರಿಸ್ಕ್​ ತೆಗೆದುಕೊಳ್ಳಲು ಹಿಂಜರಿಯಬೇಡಿ:
ವೃತ್ತಿಜೀವನದಲ್ಲಿ ಅನೇಕ ರಿಸ್ಕ್​ಗಳನ್ನು ಪ್ರಿಯಾಂಕಾ ಚೋಪ್ರಾ ತೆಗೆದುಕೊಂಡಿದ್ದಾರೆ. ಪಾತ್ರಗಳ ಆಯ್ಕೆ, ತಮಗಿಂತ ಕಿರಿಯ ವ್ಯಕ್ತಿ ಜೊತೆ ಮದುವೆ, ವೃತ್ತಿಜೀವನದ ಉತ್ತುಂಗದಲ್ಲಿ ಇರುವಾಗ ಮಗು ಪಡೆದಿದ್ದು.. ಹೀಗೆ ಅನೇಕ ವಿಚಾರಗಳಲ್ಲಿ ಪ್ರಿಯಾಂಕಾ ರಿಸ್ಕ್​ ತೆಗೆದುಕೊಂಡಿದ್ದಾರೆ.

ಆಡಿಕೊಳ್ಳುವವರ ಮಾತಿಗೆ ಕಿವಿಗೊಡಬೇಡಿ:
ಪ್ರಿಯಾಂಕಾ ಚೋಪ್ರಾ ಅವರ ಬಗ್ಗೆ ಕೇಳಿಬಂದ ಗಾಸಿಪ್​ಗಳು ಒಂದೆರಡಲ್ಲ. ಇನ್ನು, ಅವರನ್ನು ಟ್ರೋಲ್​ ಮಾಡುವವರಿಗೂ ಕೊರತೆ ಇಲ್ಲ. ಆದರೆ ಅಂಥವರ ಮಾತುಗಳಿಗೆ ಕಿವಿಗೊಡುವ ಬದಲು ಕೆಲಸದ ಮೇಲೆ ಪ್ರಿಯಾಂಕಾ ಗಮನ ಹರಿಸಿದ್ದೇ ಹೆಚ್ಚು.

ತಪ್ಪುಗಳಿಂದ ಕಲಿತುಕೊಳ್ಳಿ:
ಇಷ್ಟು ವರ್ಷಗಳ ವೃತ್ತಿಜೀವನದಲ್ಲಿ ಪ್ರಿಯಾಂಕಾ ಚೋಪ್ರಾ ತಪ್ಪುಗಳೇ ಮಾಡಿಲ್ಲ ಎಂದೇನೂ ಅಲ್ಲ. ಆದರೆ ಅವುಗಳಿಂದಲೂ ಅವರು ಪಾಠ ಕಲಿತುಕೊಂಡು ಮುಂದೆ ಸಾಗಿದ್ದಾರೆ. ಈ ಎಲ್ಲ ಕಾರಣಗಳಿಂದ ಅವರು ಯಶಸ್ವಿ ಮಹಿಳೆಯಾಗಿ ಅನೇಕರಿಗೆ ಮಾದರಿ ಆಗಿದ್ದಾರೆ.