ಕುಟುಂಬದ 4 ಜನ ಮಲ್ಟಿಪ್ಲೆಕ್ಸ್​ಗೆ ಹೋದರೆ 10 ಸಾವಿರ ರೂ. ಬೇಕು: ಕರಣ್​ ಜೋಹರ್​

ಸಿಂಗಲ್​ ಸ್ಕ್ರೀನ್​ ಚಿತ್ರಮಂದಿರಗಳಿಗೆ ಹೋಲಿಸಿದರೆ ಮಲ್ಟಿಪ್ಲೆಕ್ಸ್​ಗಳಲ್ಲಿ ಸಿನಿಮಾದ ಟಿಕೆಟ್​ ಬೆಲೆ ಹೆಚ್ಚಿರುತ್ತದೆ. ಅಲ್ಲದೇ, ಅಲ್ಲಿ ಸಿಗುವ ತಿನಿಸು ಮತ್ತು ಪಾನೀಯಗಳ ಬೆಲೆ ಕೂಡ ದುಬಾರಿ ಆಗಿರುತ್ತದೆ. ಆ ಕಾರಣದಿಂದ ಅನೇಕರು ಮಲ್ಟಿಪ್ಲೆಕ್ಸ್​ ಎಂದರೆ ಹಿಂದೇಟು ಹಾಕುತ್ತಾರೆ. ಮಲ್ಟಿಪ್ಲೆಕ್ಸ್​ನಲ್ಲಿ ಸಿನಿಮಾ ನೋಡಲು ಹೋಗಿ ಪಾಪ್​ಕಾರ್ನ್​ ಖರೀದಿಸಿದರೆ ಬಡವರ ಮತ್ತು ಮಧ್ಯಮ ವರ್ಗದವರ ಕೈ ಸುಟ್ಟು ಹೋಗುತ್ತದೆ. ಇಡೀ ಫ್ಯಾಮಿಲಿ ಹೋದರೆ ಜೇಬಿಗೆ ಕತ್ತರಿ ಬೀಳುತ್ತದೆ. ಆ ಬಗ್ಗೆ ಕರಣ್​ ಜೋಹರ್​ ಅವರು ಇತ್ತೀಚೆಗೆ ಮಾಧ್ಯಮವೊಂದಕ್ಕೆ ಪ್ರತಿಕ್ರಿಯೆ ನೀಡಿದ್ದಾರೆ. ಆದರೆ ಅವರ ಲೆಕ್ಕವನ್ನು ಮಲ್ಟಿಪ್ಲೆಕ್ಸ್​ನವರು ಒಪ್ಪಿಕೊಂಡಿಲ್ಲ.

ಚಿತ್ರರಂಗದಲ್ಲಿ ನಿರ್ದೇಶಕನಾಗಿ ಮತ್ತು ನಿರ್ಮಾಪಕನಾಗಿ ಕರಣ್​ ಜೋಹರ್​ ಅವರು ಹಲವು ವರ್ಷಗಳಿಂದ ಸಕ್ರಿಯರಾಗಿದ್ದಾರೆ. ಅವರಿಗೆ ಇರುವ ಅನುಭವ ಅಪಾರ. ಆದರೆ ಅವರು ಮಲ್ಟಿಪ್ಲೆಕ್ಸ್​ನಲ್ಲಿನ ದುಡ್ಡಿನ ಬಗ್ಗೆ ಮಾತನಾಡುವಾಗ ಲೆಕ್ಕ ತಪ್ಪಿದ್ದಾರಾ ಎಂಬ ಪ್ರಶ್ನೆ ಹುಟ್ಟಿಕೊಂಡಿದೆ. ಯಾಕೆಂದರೆ, ಒಂದು ಫ್ಯಾಮಿಲಿಯ ನಾಲ್ಕು ಜನರು ಸಿನಿಮಾ ನೋಡಲು ಮಲ್ಟಿಪ್ಲೆಕ್ಸ್​ಗೆ ಹೋದರೆ ಹತ್ತು ಸಾವಿರ ರೂಪಾಯಿ ಬೇಕಾಗುತ್ತದೆ ಎಂದು ಕರಣ್​ ಜೋಹರ್​ ಹೇಳಿದ್ದಾರೆ. ಆದರೆ ಅವರ ಈ ಲೆಕ್ಕಕ್ಕೆ ‘ಮಲ್ಟಿಪ್ಲೆಕ್ಸ್​ ಅಸೋಸಿಯೇಷನ್​ ಆಫ್​ ಇಂಡಿಯಾ’ ತಕರಾರು ತೆಗೆದಿದೆ.

ಕರಣ್ ಜೋಹರ್​ ಅಭಿಪ್ರಾಯ ಏನು?

‘ಮಲ್ಟಿಪ್ಲೆಕ್ಸ್​ಗೆ ಹೋದಾಗ ಮಕ್ಕಳು ಪಾಪ್​ಕಾರ್ನ್​ ಅಥವಾ ಬೇರೆ ಏನನ್ನಾದರೂ ಕೇಳಿದರೆ ಕೊಡಿಸೋಕೆ ಆಗಲ್ಲ ಅಂತ ಹೇಳಲು ಬೇಸರ ಆಗುತ್ತದೆ ಎಂದು ಫ್ಯಾಮಿಲಿ ಪ್ರೇಕ್ಷಕರು ಹೇಳ್ತಾರೆ. ಅದರ ಬದಲು ಅವರು ಯಾವುದಾದರೂ ರೆಸ್ಟೋರೆಂಟ್​ಗೆ ಹೋಗಿ ಊಟಕ್ಕೆ ಮಾತ್ರ ಹಣ ನೀಡುತ್ತಾರೆ. 4 ಜನರು ಇರುವ ಒಂದು ಕುಟುಂಬಕ್ಕೆ ಮಲ್ಟಿಪ್ಲೆಕ್ಸ್​ನಲ್ಲಿ ಸಿನಿಮಾ ನೋಡಲು 10 ಸಾವಿರ ರೂಪಾಯಿ ಬೇಕು. ಅದನ್ನು ಭರಿಸಲು ಅವರಿಗೆ ಸಾಧ್ಯವಿಲ್ಲ’ ಎಂದು ಕರಣ್​ ಜೋಹರ್​ ಹೇಳಿದ್ದಾರೆ.

ಇದನ್ನೂ ಓದಿ: ಅವಕಾಶಕ್ಕಾಗಿ ಕರಣ್​ ಜೋಹರ್​ ಕಾರಿನ ಹಿಂದೆ ಓಡಿದ್ದ ನಟ ತಹ ಶಾ; ಈಗ ಹೇಗಿದೆ ಜೀವನ?

ಮಲ್ಟಿಪ್ಲೆಕ್ಸ್​ ಮಂದಿ ಹೇಳೋದೇನು?

ಕರಣ್​ ಜೋಹರ್​ ಅವರ ಹೇಳಿಕೆಗೆ ‘ಮಲ್ಟಿಪ್ಲೆಕ್ಸ್​ ಅಸೋಸಿಯೇಷನ್​ ಆಫ್​ ಇಂಡಿಯಾ’ ಪ್ರತಿಕ್ರಿಯೆ ನೀಡಿದೆ. ‘2023ರಲ್ಲಿ ಒಂದು ಸಿನಿಮಾದ ಸರಾಸರಿ ಟಿಕೆಟ್​ ಬೆಲೆ 130 ರೂಪಾಯಿ. 2023-24ರಲ್ಲಿ ಪಿವಿಆರ್​-ಐನಾಕ್ಸ್​ ಪ್ರಕಾರ ಸಿನಿಮಾ ಟಿಕೆಟ್​ನ ಸರಾಸರಿ ಬೆಲೆ 258 ರೂಪಾಯಿ. ಪ್ರತಿ ವ್ಯಕ್ತಿಯ ಪಾನೀಯ ಮತ್ತು ತಿಂಡಿಯ ಬೆಲೆ 132 ರೂಪಾಯಿ. ಸಿನಿಮಾ ಮತ್ತು ತಿಂಡಿ-ಪಾನೀಯದ ಬೆಲೆ 4 ಜನರಿಗೆ ಒಟ್ಟು 1560 ರೂಪಾಯಿ ಮಾತ್ರ ಆಗುತ್ತದೆ’ ಎಂದು ಹೇಳಿಕೆ ಬಿಡುಗಡೆ ಮಾಡಲಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.