‘ರಾಮಾಯಣ’ ಸಿನಿಮಾದಲ್ಲಿ ಸೀತೆಯ ಪಾತ್ರದ ಚಿತ್ರಣಕ್ಕೆ ಮುಕೇಶ್ ಖನ್ನಾ ಆಕ್ಷೇಪ

ರಣಬೀರ್ ಕಪೂರ್, ಸಾಯಿ ಪಲ್ಲವಿ, ಯಶ್ ಅಭಿನಯದ, ನಿತೇಶ್ ತಿವಾರಿ ನಿರ್ದೇಶನದ ‘ರಾಮಾಯಣ: ಪಾರ್ಟ್ 1’ ಸಿನಿಮಾ ಬಿಡುಗಡೆಯಾಗಿ ಬಾಕ್ಸ್ ಆಫೀಸ್‌ನಲ್ಲಿ ಧೂಳೆಬ್ಬಿಸುತ್ತಿದ್ದರೂ, ಮತ್ತೊಂದೆಡೆ ವಿವಾದಗಳು ಮುಂದುವರಿದಿವೆ. ಬಿಆರ್ ಚೋಪ್ರಾ ಅವರ ‘ಮಹಾಭಾರತ’ ಧಾರಾವಾಹಿಯಲ್ಲಿ ಭೀಷ್ಮ ಪಿತಾಮಹ ಪಾತ್ರದ ಮೂಲಕ ಜನಪ್ರಿಯರಾಗಿದ್ದ ಹಿರಿಯ ನಟ ಮುಕೇಶ್ ಖನ್ನಾ ಅವರು ಈಗ ‘ರಾಮಾಯಣ’ ಚಿತ್ರದಲ್ಲಿ ಸೀತಾ ಮಾತೆಯ ಪಾತ್ರವನ್ನು ತಪ್ಪಾಗಿ ಚಿತ್ರಿಸಲಾಗಿದೆ ಎಂದು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ತಮ್ಮ ಯೂಟ್ಯೂಬ್ ವ್ಲಾಗ್‌ನಲ್ಲಿ ಈ ಕುರಿತು ಮಾತನಾಡಿರುವ ಮುಕೇಶ್ ಖನ್ನಾ, ‘ಹಿಂದಿ ಚಿತ್ರರಂಗದ ನಿರ್ಮಾಪಕ-ನಿರ್ದೇಶಕರನ್ನು ನಾನು ಕೇಳಲು ಬಯಸುತ್ತೇನೆ. ವಾಲ್ಮೀಕಿ ರಾಮಾಯಣದಲ್ಲಿರುವ ಸತ್ಯಗಳನ್ನು ತಿರುಚಿ, ನಿಮ್ಮ ಕಲ್ಪನೆಗೆ ತಕ್ಕಂತೆ ತೋರಿಸುವುದು ಸರಿಯೇ? ಸಿನಿಮಾ ಬಿಡುಗಡೆಯಾದಾಗಿನಿಂದ ಜಾಲತಾಣಗಳಲ್ಲಿ ಚರ್ಚೆ ನಡೆಯುತ್ತಿದೆ. ಆದರೆ ಇಲ್ಲಿ ನಿರ್ಮಾಪಕರಿಗೆ ರಾಮಾಯಣದ ಕಥೆಯನ್ನು ಪ್ರಾಮಾಣಿಕವಾಗಿ ಹೇಳುವುದಕ್ಕಿಂತ, ಹೂಡಿಕೆ ಮಾಡಿರುವ 4,000 ಕೋಟಿ ರೂಪಾಯಿ ಬಜೆಟ್ ಹಿಂಪಡೆಯುವುದೇ ಮುಖ್ಯ ಅಜೆಂಡಾ ಆಗಿದೆ’ ಎಂದು ಟೀಕಿಸಿದ್ದಾರೆ.

ಚಿತ್ರದಲ್ಲಿ ಸಾಯಿ ಪಲ್ಲವಿ ಅಭಿನಯದ ಸೀತಾ ಮಾತೆಯ ಪಾತ್ರವನ್ನು ಕತ್ತಿ ಹಿಡಿದು ಹೋರಾಡುವ ಯೋಧಳಂತೆ ತೋರಿಸಿರುವುದಕ್ಕೆ ಮುಕೇಶ್ ಖನ್ನಾ ತೀವ್ರ ವಿರೋಧ ವ್ಯಕ್ತಪಡಿಸಿದ್ದಾರೆ. ‘ಝಾನ್ಸಿ ರಾಣಿಯಂತೆ ಸೀತೆ 2-3 ರಾಕ್ಷಸರ ವಿರುದ್ಧ ಹೋರಾಡುವುದನ್ನು ಜನರು ವಿರೋಧಿಸುತ್ತಿದ್ದಾರೆ. ನಾನು ವಾಲ್ಮೀಕಿ ರಾಮಾಯಣವನ್ನು ಪರಿಶೀಲಿಸಿದ್ದೇನೆ. ಅದರಲ್ಲಿ ಇಂತಹ ಯಾವುದೇ ಉಲ್ಲೇಖವಿಲ್ಲ. ನನಗೆ ತಿಳಿದ ಮಟ್ಟಿಗೆ ಸೀತಾ ಮಾತೆ ಎಂದಿಗೂ ಯುದ್ಧ ಮಾಡಿಲ್ಲ. ಆಕೆ ಯೋಧಳಾಗಿದ್ದರೆ, ರಾವಣ ಅಪಹರಿಸಲು ಬಂದಾಗ ಆತನ ವಿರುದ್ಧವೇ ಹೋರಾಡುತ್ತಿದ್ದಳು. ರಾವಣ ಅಷ್ಟು ಸುಲಭವಾಗಿ ಅಪಹರಿಸಲು ಹೇಗೆ ಸಾಧ್ಯವಾಗುತ್ತಿತ್ತು?’ ಎಂದು ಪ್ರಶ್ನಿಸಿದ್ದಾರೆ.

ಚಿತ್ರತಂಡದ ಸ್ಪಷ್ಟನೆಗೆ ತಿರುಗೇಟು ನೀಡಿದ ಮುಕೇಶ್ ಖನ್ನಾ ಅವರು, ‘ಈ ದೃಶ್ಯವನ್ನು ವಾಲ್ಮೀಕಿ ರಾಮಾಯಣದಿಂದ ತೆಗೆದುಕೊಂಡಿಲ್ಲ, ‘ಅದ್ಭುತ ರಾಮಾಯಣ’ ಎಂಬ ಗ್ರಂಥದಿಂದ ಪಡೆಯಲಾಗಿದೆ ಎಂದು ನಿರ್ಮಾಪಕರು ಸಮರ್ಥಿಸಿಕೊಂಡಿರುವುದು ನನಗೆ ಆಘಾತ ತಂದಿದೆ. ಮೂಲ ರಾಮಾಯಣ ಎಂದರೆ ಅದು ವಾಲ್ಮೀಕಿ ಬರೆದಿರುವುದು ಒಂದೇ. ಅದಕ್ಕಿಂತ ಎರಡು ಹೆಜ್ಜೆ ಮುಂದೆ ಹೋಗಲು ಯಾರಿಗೂ ಅಧಿಕಾರವಿಲ್ಲ. ನಿರ್ಮಾಪಕರಿಗೆ ಕುರಾನ್ ಅಥವಾ ಬೈಬಲ್ ಕಥೆಯನ್ನು ಬದಲಾಯಿಸುವ ಧೈರ್ಯವಿದೆಯೇ? ಇಲ್ಲ ಎಂದಾದರೆ ರಾಮಾಯಣವನ್ನು ಬದಲಾಯಿಸಲು ಅವರಿಗೆ ಎಷ್ಟು ಧೈರ್ಯ ಇರಬೇಕು?’ ಎಂದು ತೀವ್ರವಾಗಿ ವಾಗ್ದಾಳಿ ನಡೆಸಿದ್ದಾರೆ.

ಇದನ್ನೂ ಓದಿ: ‘ರಾಮಾಯಣ’ ವಿಡಿಯೋ ವೈರಲ್ ಮಾಡುವವರಿಗೆ ಚಿತ್ರತಂಡದಿಂದ ಕ್ರಿಮಿನಲ್ ಪ್ರಕರಣದ ಎಚ್ಚರಿಕೆ

ಹಿಂದೆ ಏಕ್ತಾ ಕಪೂರ್ ಅವರು ತಾವು ನಿರ್ಮಿಸಿದ ‘ಮಹಾಭಾರತ’ ಧಾರಾವಾಹಿಯಲ್ಲಿ ಸತ್ಯವತಿ ಪಾತ್ರವನ್ನು ಬದಲಾಯಿಸಿದಂತೆ, ಇಲ್ಲಿ ರಾಮಾಯಣದ ನಿರ್ಮಾಪಕರು ಸೀತೆಯ ಪಾತ್ರವನ್ನು ಬದಲಾಯಿಸಿದ್ದಾರೆ ಎಂದು ಮುಕೇಶ್ ಖನ್ನಾ ಹೋಲಿಕೆ ಮಾಡಿ ಬೇಸರ ವ್ಯಕ್ತಪಡಿಸಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.