ತಾತನ 77 ವರ್ಷ ಹಳೆಯ ನಿರ್ಮಾಣ ಸಂಸ್ಥೆಯ ಜವಾಬ್ದಾರಿ ವಹಿಸಿಕೊಂಡ ರಣ್ಬೀರ್ ಕಪೂರ್

ಆರ್​​ಕೆ ಸ್ಟುಡಿಯೋ (RK Studio) 1948ರಲ್ಲಿ ರಾಜ್ ಕಪೂರ್ ನಿರ್ಮಾಣ ಮಾಡಿದರು. ಮುಂಬೈನ ಚೆಂಬುರ್​​ನಲ್ಲಿರುವ ಈ ಐತಿಹಾಸಿಕ ಸ್ಟುಡಿಯೋನಲ್ಲಿ ಹಲವಾರು ಬಾಲಿವುಡ್ ಸಿನಿಮಾಗಳು ಚಿತ್ರೀಕರಣಗೊಂಡಿವೆ. ಇದೇ ಸ್ಟುಡಿಯೋನಲ್ಲಿ ಆರ್​​ಕೆ ಫಿಲಮ್ಸ್ ನಿರ್ಮಾಣ ಸಂಸ್ಥೆಯನ್ನು ಸಹ ರಾಜ್ ಕಪೂರ್ ಪ್ರಾರಂಭ ಮಾಡಿದ್ದರು. 2017 ರಲ್ಲಿ ರಾಜ್ ಕಪೂರ್ ಸ್ಟುಡಿಯೋಕ್ಕೆ ಬೆಂಕಿ ಬಿದ್ದು ಭಾರಿ ನಷ್ಟ ಉಂಟಾಯ್ತು, ರಾಜ್ ಕಪೂರ್ ಸೇರಿದಂತೆ ಹಲವು ದಿಗ್ಗಜರಿಗೆ ಸೇರಿದ್ದ ಅಮೂಲ್ಯ ವಸ್ತುಗಳು ನಾಶವಾದವು, ಸೆಟ್​ಗಳು ನಾಶವಾದವು. ಕೊನೆಗೆ 2019 ರಲ್ಲಿ ಆರ್​​ಕೆ ಸ್ಟುಡಿಯೋ ಅನ್ನು ಗೋದ್ರೆಜ್​​ಗೆ ಮಾರಾಟ ಮಾಡಲಾಯ್ತು. ಆದರೆ ಇದೀಗ ರಣ್​ಬೀರ್ ಕಪೂರ್ ಆರ್​​ಕೆ ಫಿಲಮ್ಸ್ ಅನ್ನು ಮತ್ತೆ ಪ್ರಾರಂಭಿಸಲು ಮುಂದಾಗಿದ್ದಾರೆ.

ಸ್ಟುಡಿಯೋ ಇದ್ದ ಜಾಗದಲ್ಲಿ ಗೋದ್ರೆಜ್ ಅಪಾರ್ಟ್​​ಮೆಂಟ್​​ಗಳನ್ನು ನಿರ್ಮಾಣ ಮಾಡುತ್ತಿದೆ. ಆದರೆ ಆರ್​ಕೆ ಫಿಲಮ್ಸ್ ಅನ್ನಾದರೂ ಉಳಿಸಿಕೊಳ್ಳುವ ಮತ್ತು ಅದನ್ನು ಭಾರತದ ಪ್ರಮುಖ ನಿರ್ಮಾಣ ಸಂಸ್ಥೆಯನ್ನಾಗಿ ರೂಪಿಸುವ ಯೋಜನೆಯನ್ನು ರಾಜ್ ಕಪೂರ್ ಅವರ ಮೊಮ್ಮಗ ರಣ್​ಬೀರ್ ಕಪೂರ್ ಕೈಗೆತ್ತಿಕೊಂಡಿದ್ದಾರೆ. ನಿರ್ಮಾಣ ಸಂಸ್ಥೆಯನ್ನು ತಾವೇ ನಿರ್ದೇಶಿಸಲಿರುವ ಸಿನಿಮಾದ ಮೂಲಕ ರೀ ಲಾಂಚ್ ಮಾಡಲಿದ್ದಾರೆ.

ಆರ್​​ಕೆ ಫಿಲಮ್ಸ್ 1948ರಲ್ಲೇ ಪ್ರಾರಂಭವಾದರೂ ಸಹ ದೊಡ್ಡ ಸಂಖ್ಯೆಯ ಸಿನಿಮಾಗಳನ್ನು ನಿರ್ಮಾಣ ಮಾಡಿಲ್ಲ. ಈ ವರೆಗೆ ಕೇವಲ 21 ಸಿನಿಮಾಗಳನ್ನಷ್ಟೆ ನಿರ್ಮಾಣ ಮಾಡಲಾಗಿದೆ. ಕಪೂರ್ ಕುಟುಂಬಕ್ಕೆ ಸೇರಿದವರು ನಟಿಸಿದ ಅಥವಾ ನಿರ್ದೇಶನ ಮಾಡಿದ ಸಿನಿಮಾಗಳನ್ನಷ್ಟೆ ‘ಆರ್​​ಕೆ ಫಿಲಮ್ಸ್ ಮೂಲಕ ನಿರ್ಮಾಣ ಮಾಡಲಾಗಿತ್ತು. 1999 ರಲ್ಲಿ ರಿಶಿ ಕಪೂರ್ ನಿರ್ದೇಶಿಸಿದ್ದ ‘ಆ ಅಬ್ ಲೌಟ್ ಚಲೆ’ ಸಿನಿಮಾ, ಆರ್​​ಕೆ ಫಿಲಮ್ಸ್​​ನ ಕೊನೆಯ ಸಿನಿಮಾ ಆಗಿತ್ತು. ಇದೀಗ 26 ವರ್ಷಗಳ ಬಳಿಕ ರಣ್​ಬೀರ್ ಕಪೂರ್ ತಮ್ಮದೇ ನಿರ್ದೇಶನದ ಮೂಲಕ ಆರ್​​ಕೆ ಫಿಲಮ್ಸ್ ಅನ್ನು ರೀಲಾಂಚ್ ಮಾಡುತ್ತಿದ್ದಾರೆ.

ಇದನ್ನೂ ಓದಿ:ಬಾಲಿವುಡ್ಡಿಗರ ಹಾಲೋವೀನ್ ಪಾರ್ಟಿ: ಯಾರ್ಯಾರಾದಿದ್ದಾರೆ ನೋಡಿ

ಅದು ಮಾತ್ರವೇ ಅಲ್ಲದೆ ತಮ್ಮದೇ ನಟನೆಯ ಎರಡು ಸಿನಿಮಾಗಳನ್ನು ಆರ್​​ಕೆ ಫಿಲಮ್ಸ್ ಮೂಲಕ ನಿರ್ಮಾಣವನ್ನೂ ಮಾಡುತ್ತಿದ್ದಾರೆ. ‘ಬ್ರಹ್ಮಾಸ್ತ್ರ 2’ ಮತ್ತು ಅನುರಾಗ್ ಬಸು ನಿರ್ದೇಶಿಸಲಿರುವ ಇನ್ನೊಂದು ಸಿನಿಮಾವನ್ನು ಸಹ ಆರ್​​ಕೆ ಫಿಲಮ್ಸ್ ಮೂಲಕವೇ ನಿರ್ಮಾಣ ಮಾಡಲು ರಣ್​​ಬೀರ್ ಕಪೂರ್ ಮುಂದಾಗಿದ್ದಾರೆ. ಕೇವಲ ಹಿಂದಿಯಲ್ಲಿ ಮಾತ್ರವೇ ಅಲ್ಲದೆ ಭಾರತದ ಬೇರೆ ಕೆಲವು ಭಾಷೆಗಳಲ್ಲಿಯೂ ಸಿನಿಮಾ ನಿರ್ಮಾಣ ಮಾಡುವ ಗುರಿಯನ್ನು ರಣ್​​ಬೀರ್ ಕಪೂರ್ ಹೊಂದಿದ್ದಾರಂತೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ