Kajol: ಮದುವೆ ಬಳಿಕ 2 ತಿಂಗಳಲ್ಲಿ 8 ಕೆಜಿ ತೂಕ ಜಾಸ್ತಿ ಆಗಿದ್ದಕ್ಕೆ ಅಸಲಿ ಕಾರಣ ತಿಳಿಸಿದ ಕಾಜೋಲ್​

ಮದುವೆ ನಂತರ ನಟಿಯರ ಬದುಕು ಬದಲಾಗುತ್ತದೆ. ಆದ್ಯತೆಗಳು, ಆಯ್ಕೆಗಳ ಜೊತೆಗೆ ದಿನಚರಿ ಕೂಡ ಚೇಂಜ್​ ಆಗುತ್ತದೆ. ತಮ್ಮ ಬದುಕಿನಲ್ಲಿ ಆದ ಬದಲಾವಣೆ ಕುರಿತು ನಟಿ ಕಾಜೋಲ್ (Kajol)​ ಅವರು ಈಗ ಹೇಳಿಕೊಂಡಿದ್ದಾರೆ. ಮದುವೆ ನಂತರವೂ ಅವರು ಸಿನಿಮಾಗಳಿಂದ ದೂರ ಉಳಿಯಲಿಲ್ಲ. ಇಂದಿಗೂ ಕಾಜೋಲ್​ ಬೇಡಿಕೆ ಉಳಿಸಿಕೊಂಡಿದ್ದಾರೆ. ವಯಸ್ಸಿಗೆ ಒಪ್ಪುವಂತಹ ಪಾತ್ರಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಾ ಇದ್ದಾರೆ. ಅಲ್ಲದೇ, ಪತಿ ಅಜಯ್​ ದೇವಗನ್​ ಅವರ ವೃತ್ತಿಜೀವನಕ್ಕೆ ಬೆಂಬಲವಾಗಿ ನಿಂತಿದ್ದಾರೆ. ಅಜಯ್​ ದೇವಗನ್​ (Ajay Devgn) ಜೊತೆ ಮದುವೆ ಆದ ನಂತರದ ಎರಡು ತಿಂಗಳಲ್ಲಿ ಕಾಜೋಲ್​ ಅವರ ದೇಹದ ತೂಕ ಬರೋಬ್ಬರಿ 8 ಕೆಜಿ ಹೆಚ್ಚಾಗಿತ್ತು. ಅದಕ್ಕೆ ಕಾರಣ ಏನು ಎಂಬುದನ್ನು ಅವರೀಗ ವಿವರಿಸಿದ್ದಾರೆ.

1999ರ ಫೆಬ್ರವರಿ 24ರಂದು ಕಾಜೋಲ್​ ಮತ್ತು ಅಜಯ್​ ದೇವಗನ್​ ಅವರ ಮದುವೆ ಆಯಿತು. ತುಂಬ ಸರಳವಾಗಿ ವಿವಾಹ ಸಮಾರಂಭ ನಡೆಯಿತು. ಮದುವೆ ಬಳಿಕ ಕಾಜೋಲ್​ ಅವರ ಆಹಾರ ಪದ್ಧತಿ ಬದಲಾಯಿತು. ಪ್ರತಿ ದಿನ ಅವರು ಬಗೆಬಗೆಯ ಪರೋಟ ತಿನ್ನಲು ಶುರು ಮಾಡಿದರು. 2 ತಿಂಗಳಲ್ಲಿ 8 ಕೆಜಿ ದೇಹದ ತೂಕ ಹೆಚ್ಚಾಗಲು ಅದೇ ಕಾರಣ ಎಂದು ಕಾಜೋಲ್​ ಹೇಳಿದ್ದಾರೆ.

‘ಪ್ರತಿ ದಿನ ನಮ್ಮ ಡೈನಿಂಗ್​ ಟೇಬಲ್​ ಮೇಲೆ ಬಗೆಬಗೆಯ ಪರೋಟ ಇರುತ್ತಿತ್ತು. ಗೋಬಿ ಪರೋಟ, ಪನೀರ್​ ಪರೋಟ, ಆಲು ಪರೋಟ. ಅದರ ಜೊತೆಗೆ ಬೆಣ್ಣೆ ಕೂಡ ಇರುತ್ತಿತ್ತು. ಆ ಸಮಯದಲ್ಲಿ ಹೇಗೆ ಡಯೆಟ್​ ಮಾಡಬೇಕು ಎಂಬುದು ಸಹ ನನಗೆ ತಿಳಿದಿರಲಿಲ್ಲ’ ಎಂದು ಕಾಜೋಲ್​ ಹೇಳಿದ್ದಾರೆ. ಆಹಾರಪ್ರಿಯೆ ಆಗಿರುವ ಅವರು ಮನೆಯಲ್ಲಿ ಈಗಲೂ ಬಗೆಬಗೆಯ ಅಡುಗೆ ಮಾಡುತ್ತಾರೆ.

ಇದನ್ನೂ ಓದಿ: Kajol: ಮಾಸ್ಕ್​ ತೆಗೆಯಬೇಕು ಎಂದು ಜಯಾ ಬಚ್ಚನ್​ಗೆ ಒತ್ತಾಯ ಮಾಡಿದ ಕಾಜೋಲ್​; ನೆಟ್ಟಿಗರ​ ಪ್ರತಿಕ್ರಿಯೆ ಏನು?

ಸಿನಿಮಾಗಳ ಆಯ್ಕೆಯಲ್ಲಿ ಕಾಜೋಲ್​ ಅವರು ತುಂಬ ಚ್ಯೂಸಿ ಆಗಿದ್ದಾರೆ. ತಮಗೆ ಇಷ್ಟ ಆಗುವಂತಹ ಸ್ಕ್ರಿಪ್ಟ್​ಗಳನ್ನು ಮಾತ್ರ ಅವರು ಒಪ್ಪಿಕೊಳ್ಳುತ್ತಿದ್ದಾರೆ. ಅವರನ್ನು ಮತ್ತೆ ಮತ್ತೆ ಪರದೆ ಮೇಲೆ ನೋಡಲು ಅಭಿಮಾನಿಗಳು ಬಯಸುತ್ತಿದ್ದಾರೆ. ಕಾಜೋಲ್​ ನಟಿಸಿರುವ ಹೊಸ ಸಿನಿಮಾ ‘ಸಲಾಂ ವೆಂಕಿ’ ಈ ವಾರ (ಡಿ.9) ಬಿಡುಗಡೆ ಆಗುತ್ತಿದೆ.

ಇದನ್ನೂ ಓದಿ: Kajol: ಒಟಿಟಿ ಜಗತ್ತಿಗೆ ನಟಿ ಕಾಜೋಲ್​ ಎಂಟ್ರಿ; ಪ್ರತಿ ಎಪಿಸೋಡ್​ಗೆ ಪಡೆಯುವ ಸಂಭಾವನೆ ಇಷ್ಟೊಂದಾ?

‘ಸಲಾಂ ವೆಂಕಿ’ ಚಿತ್ರಕ್ಕೆ ರೇವತಿ ನಿರ್ದೇಶನ ಮಾಡಿದ್ದಾರೆ. ಕಾಜೋಲ್​ ಜೊತೆ ವಿಶಾಲ್​ ಜೇತ್ವಾ ನಟಿಸಿದ್ದಾರೆ. ವ್ಹೀಲ್​ ಚೇರ್​ನಲ್ಲಿ ಇರುವ ಮಗನಿಗಾಗಿ ಕಷ್ಟಪಡುವ ತಾಯಿಯ ಪಾತ್ರವನ್ನು ಕಾಜೋಲ್​ ಮಾಡಿದ್ದಾರೆ. ಆಮಿರ್ ಖಾನ್​ ಅವರು ಅತಿಥಿ ಪಾತ್ರದಲ್ಲಿ ನಟಿಸಿರುವುದು ವಿಶೇಷ. ಚಿತ್ರದ ಟ್ರೇಲರ್​ ನೋಡಿದ ಸಿನಿಪ್ರಿಯರು ಮೆಚ್ಚಿಕೊಂಡಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.