Kajol: ಒಟಿಟಿ ಜಗತ್ತಿಗೆ ನಟಿ ಕಾಜೋಲ್ ಎಂಟ್ರಿ; ಪ್ರತಿ ಎಪಿಸೋಡ್ಗೆ ಪಡೆಯುವ ಸಂಭಾವನೆ ಇಷ್ಟೊಂದಾ?
ನಟಿ ಕಾಜೋಲ್ ಅವರು ಒಟಿಟಿ ಕ್ಷೇತ್ರಕ್ಕೆ ಎಂಟ್ರಿ ನೀಡುತ್ತಿದ್ದಾರೆ. ಚೊಚ್ಚಲ ವೆಬ್ ಸರಣಿಗಾಗಿ ಅವರು ಭರ್ಜರಿ ಸಂಭಾವನೆ ಪಡೆಯುತ್ತಿರುವ ಬಗ್ಗೆ ಮಾಹಿತಿ ಕೇಳಿಬಂದಿದೆ.
Updated on: Jul 13, 2022 | 7:15 AM
ಒಟಿಟಿ ಕ್ಷೇತ್ರದ ವ್ಯಾಪ್ತಿ ದಿನದಿಂದ ದಿನಕ್ಕೆ ಹಿರಿದಾಗುತ್ತಿದೆ. ಅನೇಕ ಸ್ಟಾರ್ ಕಲಾವಿದರು ಈಗ ಒಟಿಟಿ (OTT platform) ಸಂಸ್ಥೆಗಳ ಜೊತೆ ನಂಟು ಬೆಳೆಸಿಕೊಂಡಿದ್ದಾರೆ. ಬಾಲಿವುಡ್ನ ಅನೇಕ ನಟಿಯರು ವೆಬ್ ಸಿರೀಸ್ಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದಾರೆ. ಒಂದು ಕಾಲದಲ್ಲಿ ಹಿಂದಿ ಚಿತ್ರರಂಗದ ಟಾಪ್ ಹೀರೋಯಿನ್ ಆಗಿದ್ದವರೆಲ್ಲ ಈಗ ಒಟಿಟಿ ದುನಿಯಾದಲ್ಲಿ ಗೆಲುವು ಕಾಣುತ್ತಿದ್ದಾರೆ. ಮಾಧುರಿ ದೀಕ್ಷಿತ್ ಅವರು ‘ದಿ ಫೇಮ್ ಗೇಮ್’ ವೆಬ್ ಸರಣಿಯಲ್ಲಿ ಮಿಂಚಿದರು. ‘ಅರಣ್ಯಕ್’ ವೆಬ್ ಸಿರೀಸ್ನಲ್ಲಿ ರವೀನಾ ಟಂಡನ್ ನಟಿಸಿದರು. ಈಗ ನಟಿ ಕಾಜೋಲ್ (Kajol) ಅವರಿಗೆ ಒಟಿಟಿ ಸಂಸ್ಥೆಯಿಂದ ದೊಡ್ಡ ಆಫರ್ ಬಂದಿದೆ. ಅವರು ಕೂಡ ವೆಬ್ ಸಿರೀಸ್ನಲ್ಲಿ ನಟಿಸಲಿದ್ದು ಭರ್ಜರಿ ಸಂಭಾವನೆ (Kajol Remuneration) ಪಡೆಯುವ ಬಗ್ಗೆ ವರದಿ ಆಗಿದೆ.
ಮೂಲಗಳ ಪ್ರಕಾರ, ‘ಡಿಸ್ನಿ ಪ್ಲಸ್ ಹಾಟ್ ಸ್ಟಾರ್’ನಲ್ಲಿ ಕಾಜೋಲ್ ಅವರ ವೆಬ್ ಸರಣಿ ಪ್ರಸಾರ ಆಗಲಿದೆ. ಮುಂಬೈನಲ್ಲಿ ಜುಲೈ 11ರಂದು ಇದರ ಶೂಟಿಂಗ್ ಕೂಡ ಆರಂಭ ಆಗಿದೆ. ಇದರ ಪ್ರತಿ ಎಪಿಸೋಡ್ಗೆ ಕಾಜೋಲ್ ಅವರು 5 ಕೋಟಿ ರೂಪಾಯಿ ಸಂಭಾವನೆ ಪಡೆಯುತ್ತಾರೆ. ಕನಿಷ್ಠ 8 ಎಪಿಸೋಡ್ ಇದ್ದರೆ, 40 ಕೋಟಿ ರೂಪಾಯಿ ಸಿಕ್ಕಂತೆ ಆಗುತ್ತದೆ. ಆದರೆ ಈ ವಿಚಾರದ ಬಗ್ಗೆ ಎಲ್ಲಿಯೂ ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲ. ಬರೀ ಅಂತೆ-ಕಂತೆಗಳು ಹರಿದಾಡುತ್ತಿವೆ.
ಒಂದು ಕಾಲದಲ್ಲಿ ಕಾಜೋಲ್ ಅವರು ಬಹುಬೇಡಿಕೆಯ ನಟಿ ಆಗಿದ್ದರು. ಈಗ ಅವರು ನಟನೆಯಿಂದ ಕೊಂಚ ದೂರ ಉಳಿದುಕೊಂಡಿದ್ದಾರೆ. ಅಪರೂಪಕ್ಕೆ ಕೆಲವು ಪ್ರಾಜೆಕ್ಟ್ಗಳನ್ನು ಒಪ್ಪಿಕೊಳ್ಳುತ್ತಾರಷ್ಟೇ. ಈಗ ಅವರು ವೆಬ್ ಸಿರೀಸ್ನಲ್ಲಿ ನಟಿಸುತ್ತಿರುವ ವಿಷಯ ಕೇಳಿ ಫ್ಯಾನ್ಸ್ ಖುಷಿ ಆಗಿದ್ದಾರೆ. ಆದಷ್ಟು ಬೇಗ ಈ ವೆಬ್ ಸಿರೀಸ್ ಪ್ರಸಾರ ಆಗಲಿ ಎಂದು ಅಭಿಮಾನಿಗಳು ಹಂಬಲಿಸಿದ್ದಾರೆ. ಸುಪರ್ಣ್ ವರ್ಮಾ ಅವರು ಇದಕ್ಕೆ ನಿರ್ದೇಶನ ಮಾಡುತ್ತಿದ್ದಾರೆ.
ಮೊದಲ ಲಾಕ್ಡೌನ್ ಸಂದರ್ಭದಲ್ಲಿ ಒಟಿಟಿ ಸಂಸ್ಥೆಗಳಿಗೆ ಹೆಚ್ಚು ಬೇಡಿಕೆ ಬಂತು. ಈಗ ಹೊಸ ಹೊಸ ಕಂಟೆಂಟ್ಗಳನ್ನು ನಿರ್ಮಿಸುವಲ್ಲಿ ಎಲ್ಲ ಒಟಿಟಿಗಳ ನಡುವೆ ಪೈಪೋಟಿ ಇದೆ. ಹಾಗಾಗಿ ಬಹುಕೋಟಿ ರೂಪಾಯಿ ಬಂಡವಾಳ ಹೂಡಲು ಸಿದ್ಧವಾಗಿವೆ. ಒಟ್ಟಿನಲ್ಲಿ ಪ್ರೇಕ್ಷಕರನ್ನು ತಮ್ಮತ್ತ ಸೆಳೆದುಕೊಳ್ಳಲು ಹಲವು ಪ್ರಯತ್ನಗಳು ನಡೆಯುತ್ತಿವೆ.
