‘ಧುರಂಧರ್’ ಚಿತ್ರಕ್ಕೆ ಶಶಿ ತರೂರ್ ವಿಮರ್ಶೆ: ಹಿಂಸಾಚಾರ, ಪ್ರೊಪಗಾಂಡ ಬಗ್ಗೆ ಅಸಮಾಧಾನ

ಕಾಂಗ್ರೆಸ್ ಸಂಸದ ಶಶಿ ತರೂರ್ ಅವರು ರಣವೀರ್ ಸಿಂಗ್ ಅಭಿನಯದ ಬಹುಚರ್ಚಿತ ಸ್ಪೈ ಥ್ರಿಲ್ಲರ್ ‘ಧುರಂಧರ್’ ಸಿನಿಮಾಗಳ ಮೇಕಿಂಗ್ ಹಾಗೂ ನಟನೆಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ಆದರೆ, ಚಿತ್ರದಲ್ಲಿರುವ ಅತಿರೇಕದ ಹಿಂಸಾಚಾರ ಮತ್ತು ಪ್ರೊಪಗಾಂಡ ಕುರಿತು ಅವರು ಕೆಲವು ಗಂಭೀರ ಪ್ರಶ್ನೆಗಳನ್ನು ಎತ್ತಿದ್ದಾರೆ. ಆದಿತ್ಯ ಧರ್ ನಿರ್ದೇಶನದ ಈ ಎರಡು ಭಾಗಗಳ ಸಿನಿಮಾಗಳನ್ನು ವೀಕ್ಷಿಸಿರುವ ಶಶಿ ತರೂರ್, ಮೊದಲ ಭಾಗಕ್ಕಿಂತ ಎರಡನೇ ಭಾಗವಾದ ‘ಧುರಂಧರ್: ದಿ ರಿವೆಂಜ್’ ಚಿತ್ರ ತಮಗೆ ಹೆಚ್ಚು ಇಷ್ಟವಾಯಿತು ಎಂದು ಅಭಿಪ್ರಾಯಪಟ್ಟಿದ್ದಾರೆ. 2025ರ ಡಿಸೆಂಬರ್ ಹಾಗೂ 2026ರ ಮಾರ್ಚ್‌ನಲ್ಲಿ ಬಿಡುಗಡೆಯಾದ ಈ ಎರಡು ಚಿತ್ರಗಳು ವಿಶ್ವದಾದ್ಯಂತ 3,100 ಕೋಟಿ ರೂ.ಗಳಿಗೂ ಅಧಿಕ ಹಣ ಗಳಿಕೆ ಮಾಡಿವೆ.

‘ಧುರಂಧರ್’ ಚಿತ್ರದಲ್ಲಿ ತೋರಿಸಲಾಗಿರುವ ಹಿಂಸಾಚಾರದ ಬಗ್ಗೆ ಕಟುವಾಗಿ ಟೀಕಿಸಿರುವ ಶಶಿ ತರೂರ್ ಅವರು, ನಿರ್ದೇಶಕರು ಇಷ್ಟು ಪ್ರಮಾಣದ ಹಿಂಸೆಯ ದೃಶ್ಯಗಳಿಲ್ಲದೆಯೂ ಕಥೆಯನ್ನು ಹೇಳಬಹುದಿತ್ತು ಎಂದಿದ್ದಾರೆ. ‘ಚಿತ್ರದಲ್ಲಿ ಅತಿ ಹೆಚ್ಚಿನ ಪ್ರಮಾಣದ ರಕ್ತಪಾತ, ಕ್ರೌರ್ಯ ಹಾಗೂ ಭಾರತೀಯ ಸಿನಿಮಾದಲ್ಲೇ ಎಂದೂ ಕಾಣದಂತಹ ಅಸಹ್ಯಕರ ದೃಶ್ಯಗಳಿವೆ. ಇದರ ಯಾವುದೇ ಅಗತ್ಯವಿರಲಿಲ್ಲ’ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದಾರೆ.

ಭಾರತ-ಪಾಕಿಸ್ತಾನ ಸಂಬಂಧಗಳ ಚಿತ್ರಣ ಮತ್ತು ಸಿನಿಮಾದಲ್ಲಿ ಅಡಕವಾಗಿರುವ ಪ್ರೊಪಗಾಂಡ ಬಗ್ಗೆಯೂ ಶಶಿ ತರೂರ್ ಮಾತನಾಡಿದ್ದಾರೆ. ಪಾಕಿಸ್ತಾನ ಮತ್ತು ಕೆಲವು ಗಲ್ಫ್ ರಾಷ್ಟ್ರಗಳಲ್ಲಿ ಈ ಚಿತ್ರವನ್ನು ನಿಷೇಧಿಸಿರುವುದನ್ನು ಉಲ್ಲೇಖಿಸಿರುವ ಅವರು, ‘ಇದು ಭಾರತೀಯರು ಮತ್ತು ಪಾಕಿಸ್ತಾನಿಗಳ ನಡುವೆ ಅನಗತ್ಯ ದ್ವೇಷವನ್ನು ಸೃಷ್ಟಿಸಬಹುದು ಎಂಬ ಆತಂಕವಿರುವುದರಿಂದ ಆ ದೇಶಗಳ ನಿಲುವನ್ನು ನಾನು ಅರ್ಥಮಾಡಿಕೊಳ್ಳಬಲ್ಲೆ’ ಎಂದಿದ್ದಾರೆ.

ಇದನ್ನೂ ಓದಿ: ಪತಿ ನಿರ್ದೇಶಿಸಿದ್ದ ‘ಧುರಂಧರ್ 2’ನಲ್ಲಿ ನಟಿಸಲು ನಟಿ ಯಾಮಿ ಪಡೆದ ಸಂಭಾವನೆ ಎಷ್ಟು?

ಅಲ್ಲದೆ, ರಣವೀರ್ ಸಿಂಗ್ ನಿರ್ವಹಿಸಿರುವ ಜಸ್ಕೀರತ್ ಸಿಂಗ್ ರಂಗಿ ಅಲಿಯಾಸ್ ಹಮ್ಜಾ ಅಲಿ ಮಜಾರಿ ಪಾತ್ರದ ಬಗ್ಗೆ ಮಾತನಾಡುತ್ತಾ, ತಮ್ಮ ನೈಜ ಜೀವನದ ಗುಪ್ತಚರ ಅಧಿಕಾರಿಗಳ ಭೇಟಿಗೂ ಸಿನಿಮಾದಲ್ಲಿ ತೋರಿಸಿರುವ ರಹಸ್ಯ ಕಾರ್ಯಾಚರಣೆಗಳಿಗೂ ಯಾವುದೇ ಸಂಬಂಧವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ಅವರಿಂದ ಪ್ರೇರಿತರಾಗಿರುವ ಆರ್. ಮಾಧವನ್ ಅವರ ಪಾತ್ರದ ಕಾಲಮಿತಿಯ ಬಗ್ಗೆಯೂ ಅವರು ಕೆಲವು ತಾರ್ಕಿಕ ಪ್ರಶ್ನೆಗಳನ್ನು ಎತ್ತಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.