Shreyas Talpade: ಚಪ್ಪಲಿ ಹಾಕಿಕೊಂಡು ಓಂ ಚಿಹ್ನೆಯ ಮೇಲೆ ಕಾಲಿಟ್ಟ ಆರೋಪ; 11 ವರ್ಷದ ಬಳಿಕ ಕ್ಷಮೆ ಕೇಳಿದ ನಟ
Shreyas Talpade Viral Video: ಶ್ರೇಯಸ್ ತಲ್ಪಡೆ ಅವರು ಕ್ಷಮೆ ಕೇಳಿದ್ದಕ್ಕೆ ಅನೇಕರು ಮೆಚ್ಚುಗೆ ಸೂಚಿಸಿದ್ದಾರೆ. ಎಂದೋ ನಡೆದ ಘಟನೆಗೆ ಈಗ ಕ್ಷಮೆ ಕೇಳಿರುವುದು ಅವರ ವಿನಯತೆಗೆ ಸಾಕ್ಷಿ ಎಂದು ನೆಟ್ಟಿಗರು ಕಮೆಂಟ್ ಮಾಡಿದ್ದಾರೆ.
ಬಾಲಿವುಡ್ ನಟ ಶ್ರೇಯಸ್ ತಲ್ಪಡೆ (Shreyas Talpade) ಅವರು ಸಾಕಷ್ಟು ಜನಪ್ರಿಯತೆ ಗಳಿಸಿದ್ದಾರೆ. ಸಾಧ್ಯವಾದಷ್ಟು ಅವರು ವಿವಾದಗಳಿಂದ ದೂರ ಉಳಿದುಕೊಳ್ಳಲು ಬಯಸುತ್ತಾರೆ. ಆದರೆ ಈಗ ಅವರು ಹಿಂದೂಗಳ ಕ್ಷಮೆ ಕೇಳುವಂತಾಗಿದೆ. ಹಾಗಂತ ಅವರು ನಿನ್ನೆ ಮೊನ್ನೆ ಏನೋ ತಪ್ಪು ಮಾಡಿರಬಹುದು ಎಂದುಕೊಳ್ಳಬೇಡಿ. ಅವರಿಂದ ಅಚಾತುರ್ಯ ಆಗಿದ್ದು ಬರೋಬ್ಬರಿ 11 ವರ್ಷಗಳ ಹಿಂದೆ. ಹೌದು, 2012ರಲ್ಲಿ ತೆರೆಕಂಡ ‘ಕಮಾಲ್ ಧಮಾಲ್ ಮಾಲಾಮಾಲ್’ (Kamaal Dhamaal Malamaal) ಚಿತ್ರದಲ್ಲಿನ ಒಂದು ದೃಶ್ಯವನ್ನು ಇಟ್ಟುಕೊಂಡು ಈಗ ವಿವಾದ ಎಬ್ಬಿಸಲಾಗಿದೆ. ಆ ಚಿತ್ರದಲ್ಲಿನ ದೃಶ್ಯವೊಂದರಲ್ಲಿ ಓಂ ಚಿಹ್ನೆಯ (OM symbol) ಮೇಲೆ ಶ್ರೇಯಸ್ ತಲ್ಪಡೆ ಅವರು ಕಾಲಿಟ್ಟಿದ್ದರು ಎಂದು ಟ್ವಿಟರ್ನಲ್ಲಿ ಕೆಲವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಅದಕ್ಕಾಗಿ ಶ್ರೇಯಸ್ ತಲ್ಪಡೆ ಕ್ಷಮೆ ಕೇಳಿದ್ದಾರೆ.
‘ಕಮಾಲ್ ಧಮಾಲ್ ಮಾಲಾಮಾಲ್’ ಚಿತ್ರದಲ್ಲಿ ಶ್ರೇಯಸ್ ತಲ್ಪಡೆ ಅವರು ಕ್ರಿಸ್ಚಿಯನ್ ವ್ಯಕ್ತಿಯ ಪಾತ್ರ ಮಾಡಿದ್ದರು. ದೃಶ್ಯವೊಂದರಲ್ಲಿ ಎದುರಿನಿಂದ ಬರುತ್ತಿದ್ದ ವಾಹನವನ್ನು ಅವರು ತಡೆದು ನಿಲ್ಲಿಸಬೇಕಾಗುತ್ತದೆ. ಆಗ ಅವರು ಆ ವಾಹನದ ಮುಂಭಾಗಕ್ಕೆ ತುಳಿಯುತ್ತಾರೆ. ಆ ಜಾಗದಲ್ಲಿ ಹಿಂದೂಗಳ ಪವಿತ್ರ ಚಿಹ್ನೆಯಾದ ‘ಓಂ’ ಸ್ಟಿಕ್ಕರ್ ಇರುತ್ತದೆ. ಆ ವಿಡಿಯೋವನ್ನು ಈಗ ವೈರಲ್ ಮಾಡಲಾಗಿದೆ.
ಇದನ್ನೂ ಓದಿ: Urfi Javed: ‘ಇಂಥ ಬಟ್ಟೆ ಹಾಕಿದ್ದಕ್ಕೆ ಮುಸ್ಲಿಮರು ಮನೆ ಕೊಡ್ತಿಲ್ಲ, ನಾನು ಮುಸ್ಲಿಂ ಅಂತ ಹಿಂದೂಗಳು ಮನೆ ಕೊಡಲ್ಲ’: ಉರ್ಫಿ
ಈ ವಿಚಾರಕ್ಕೆ ಸಂಬಂಧಿಸಿದಂತೆ ಶ್ರೇಯಸ್ ತಲ್ಪಡೆ ಅವರು ಟ್ವಿಟರ್ನಲ್ಲಿ ಕ್ಷಮೆ ಕೋರಿದ್ದಾರೆ. ‘ಶೂಟಿಂಗ್ ನಡೆಯುವಾಗ ಸಾಕಷ್ಟು ಅಂಶಗಳು ಇರುತ್ತವೆ. ಸಾಹಸ ದೃಶ್ಯಗಳ ಸಂದರ್ಭದಲ್ಲಿನ ಮನಸ್ಥಿತಿ, ನಿರ್ದೇಶಕರ ಬೇಡಿಕೆ, ಸಮಯದ ಒತ್ತಡ ಮತ್ತು ಇನ್ನೂ ಹಲವು ವಿಷಯಗಳು ಇರುತ್ತವೆ. ನೀವು ವಿಡಿಯೋದಲ್ಲಿ ನೋಡಿದ್ದನ್ನು ನಾನು ಸಮರ್ಥನೆ ಮಾಡಿಕೊಳ್ಳುತ್ತಿಲ್ಲ. ಅದು ಉದ್ದೇಶಪೂರ್ವವಲ್ಲದೇ ಆಗಿದ್ದು. ಅದಕ್ಕಾಗಿ ನಾನು ಕ್ಷಮೆ ಕೇಳುತ್ತೇನೆ’ ಎಂದು ಶ್ರೇಯಸ್ ತಲ್ಪಡೆ ಹೇಳಿದ್ದಾರೆ.
ಇದನ್ನೂ ಓದಿ: ಹಿಂದೂ ಕಾರ್ಯಕರ್ತರನ್ನ ಅಣಬೆಗೆ ಹೋಲಿಸಿದ ಪುತ್ತೂರು ಬಿಜೆಪಿ ಶಾಸಕರ ವಿರುದ್ಧ ಭುಗಿಲೆದ್ದ ಆಕ್ರೋಶ, ಮುತ್ತಿಗೆ
‘ಅದನ್ನು ನಾನು ಗಮನಿಸಿ, ನಿರ್ದೇಶಕರಿಗೆ ತಿಳಿಸಬೇಕಿತ್ತು. ಅದರ ಹೊರತಾಗಿ ನಾನು ಉದ್ದೇಶಪೂರ್ವಕವಾಗಿ ಯಾರ ಭಾವನೆಗೂ ನೋವುಂಟು ಮಾಡಿಲ್ಲ. ಹೀಗೆ ಮತ್ತೆಂದೂ ಮಾಡುವುದಿಲ್ಲ’ ಎಂದು ಶ್ರೇಯಸ್ ತಲ್ಪಡೆ ಅವರು ಟ್ವಿಟ್ ಮಾಡಿದ್ದಾರೆ. ಅವರ ಈ ಪ್ರತಿಕ್ರಿಯೆಗೆ ಅನೇಕರು ಮೆಚ್ಚುಗೆ ಸೂಚಿಸಿದ್ದಾರೆ. ಎಂದೋ ನಡೆದ ಘಟನೆಗೆ ಈಗ ಕ್ಷಮೆ ಕೇಳಿರುವುದು ಅವರ ದೊಡ್ಡಗುಣ ಮತ್ತು ವಿನಯತೆಗೆ ಸಾಕ್ಷಿ ಎಂದು ನೆಟ್ಟಿಗರು ಕಮೆಂಟ್ ಮಾಡಿದ್ದಾರೆ.
Apologies ? https://t.co/zEKBEN92qY pic.twitter.com/jr6w3Mku6n
— Shreyas Talpade (@shreyastalpade1) February 13, 2023
2002ರಿಂದಲೂ ಶ್ರೇಯಸ್ ತಲ್ಪಡೆ ಅವರು ಬಣ್ಣದ ಲೋಕದಲ್ಲಿ ಸಕ್ರಿಯರಾಗಿದ್ದಾರೆ. ಅನೇಕ ಸೂಪರ್ ಹಿಟ್ ಸಿನಿಮಾಗಳಲ್ಲಿ ನಟಿಸಿದ ಖ್ಯಾತಿ ಅವರಿಗೆ ಸಲ್ಲುತ್ತದೆ. ಈಗ ಕಂಗನಾ ರಣಾವತ್ ನಿರ್ದೇಶನದ ‘ಎಮರ್ಜೆನ್ಸಿ’ ಸಿನಿಮಾದಲ್ಲಿ ಶ್ರೇಯಸ್ ಅವರು ಅಟಲ್ ಬಿಹಾರಿ ವಾಜಪೇಯಿ ಪಾತ್ರ ಮಾಡುತ್ತಿದ್ದಾರೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 8:11 pm, Fri, 17 February 23