ಗೂಗಲ್ ಸರ್ಚ್​ನಲ್ಲಿರೋ ಟಾಪ್ 10 ಸಿನಿಮಾಗಳಿವು; ಕನ್ನಡದ ಯಾವ ಚಿತ್ರಕ್ಕೆ ಸ್ಥಾನ?

ನೋಡ ನೋಡುತ್ತಿದ್ದಂತೆ 2024ನೇ ಇಸ್ವಿ ಪೂರ್ಣಗೊಳ್ಳುವ ಹಂತಕ್ಕೆ ಬಂದಿದೆ. ಇನ್ನು 20 ದಿನ ಕಳೆದರೆ 2025 ಬರಲಿದೆ. ಚಿತ್ರರಂಗದ ಪಾಲಿಗೆ ಈ ವರ್ಷ ಆಶಾದಾಯಕವಾಗಿತ್ತು. ಹಲವು ಸಿನಿಮಾಗಳು ದೊಡ್ಡ ಮಟ್ಟದಲ್ಲಿ ಯಶಸ್ಸು ಕಂಡವು. ಈಗ ಗೂಗಲ್ ಟ್ರೆಂಡ್ಸ್ ಈ ವರ್ಷ ಸರ್ಚ್ ಆದ ಟಾಪ್ 10 ಸಿನಿಮಾಗಳ ಪಟ್ಟಿಯನ್ನು ರಿಲೀಸ್ ಮಾಡಿದೆ. ಈ ಪೈಕಿ ತೆಲುಗು, ತಮಿಳು, ಮಲಯಾಳಂ ಹಾಗೂ ಹಿಂದಿ ಸಿನಿಮಾಗಳು ಸ್ಥಾನ ಪಡೆದಿವೆ. ಕನ್ನಡದ ಯಾವುದೇ ಸಿನಿಮಾಗೂ ಸ್ಥಾನ ಸಿಕ್ಕಿಲ್ಲ.

ಈ ವರ್ಷ ‘ಸ್ತ್ರೀ 2’ ಚಿತ್ರ ಅತಿ ಹೆಚ್ಚು ಸರ್ಚ್​ ಆದ ಭಾರತೀಯ ಸಿನಿಮಾಗಳಲ್ಲಿ ಒಂದು. ಈ ಸಿನಿಮಾ ಬಾಲಿವುಡ್ ಬಾಕ್ಸ್ ಆಫೀಸ್​ನಲ್ಲಿ 600 ಕೋಟಿ ರೂಪಾಯಿ ಗಳಿಕೆ ಮಾಡಿದೆ. ಈ ಚಿತ್ರ ಅತಿ ಹೆಚ್ಚು ಸರ್ಚ್ ಆದ ಸಿನಿಮಾಗಳಲ್ಲಿ ಮೊದಲ ಸ್ಥಾನದಲ್ಲಿ ಇದೆ. ಈ ಚಿತ್ರದಲ್ಲಿ ಶ್ರದ್ಧಾ ಕಪೂರ್, ರಾಜ್​ಕುಮಾರ್ ರಾವ್, ಪಂಕಜ್ ತ್ರಿಪಾಠಿ ಮೊದಲಾದವರು ನಟಿಸಿದ್ದಾರೆ.

ಎರಡನೇ ಸ್ಥಾನದಲ್ಲಿ ‘ಕಲ್ಕಿ 2898 ಎಡಿ’ ಚಿತ್ರ ಇದೆ. ಈ ಸಿನಿಮಾದಲ್ಲಿ ದೊಡ್ಡ ಕಲಾವಿದರ ದಂಡೇ ಇದೆ. ಹಿಂದಿ ಹಾಗೂ ಟಾಲಿವುಡ್ ಕಲಾವಿದರು ಈ ಸಿನಿಮಾದಲ್ಲಿ ಇದ್ದಾರೆ. ಪ್ರಭಾಸ್, ಅಮಿತಾಭ್ ಬಚ್ಚನ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಆ ಬಳಿಕ ‘12^th ಫೇಲ್’ ಸಿನಿಮಾ ಇದೆ. ಕಡಿಮೆ ಬಜೆಟ್​ನಲ್ಲಿ ಸಿದ್ಧವಾದ ಈ ಸಿನಿಮಾಗೆ ಮೂರನೇ ಸ್ಥಾನ ಸಿಕ್ಕಿದೆ.

ಈ ಬಾರಿ ಆಸ್ಕರ್ ಅವಾರ್ಡ್​ ರೇಸ್​ಗೆ ಭಾರತದಿಂದ ಅಧಿಕೃತವಾಗಿ ಆಯ್ಕೆಯಾದ ಸಿನಿಮಾ, ‘ಲಾಪತಾ ಲೇಡೀಸ್’. ಈ ಚಿತ್ರಕ್ಕೆ ನಾಲ್ಕನೇ ಸ್ಥಾನ ಸಿಕ್ಕಿದೆ. ತೆಲುಗಿನ ‘ಹನುಮಾನ್’ ಐದನೇ ಸ್ಥಾನ, ಕಾಲಿವುಡ್​ನ ಸೂಪರ್ ಹಿಟ್ ಚಿತ್ರ ‘ಮಹರಾಜ’ ಆರನೇ ಸ್ಥಾನ ಅಲಂಕರಿಸಿದೆ. ಮಲಯಾಳಂನ ‘ಮಂಜುಮ್ಮೇಲ್ ಬಾಯ್ಸ್​’ ಚಿತ್ರಕ್ಕೆ ಏಳನೇ ಸ್ಥಾನ, ದಳಪತಿ ವಿಜಯ್ ನಟನೆಯ ‘GOAT’ ಚಿತ್ರಕ್ಕೆ ಎಂಟನೇ ಸ್ಥಾನ ‘ಸಲಾರ್’ ಚಿತ್ರಕ್ಕೆ 9ನೇ ಸ್ಥಾನ, ‘ಆವೇಶಂ’ ಚಿತ್ರಕ್ಕೆ 10ನೇ ಸ್ಥಾನ ಸಿಕ್ಕಿದೆ.

ಇದನ್ನೂ ಓದಿ: ‘ಸ್ತ್ರೀ 2’ ನಟನ ಕಿಡ್ನ್ಯಾಪ್ ಮಾಡಲು ಅವಾರ್ಡ್ ಫಂಕ್ಷನ್ ಆಯೋಜನೆ; 12 ಗಂಟೆ ಟಾರ್ಚರ್ ಅನುಭವಿಸಿ, ಹಣ ಕಳೆದುಕೊಂಡ ಕಲಾವಿದ

ಈ ಬಾರಿ ಹೆಚ್ಚು ಸರ್ಚ್ ಆದ ಬಹುತೇಕ ಸಿನಿಮಾಗಳು ದಕ್ಷಿಣ ಭಾರತದವು ಅನ್ನೋದು ವಿಶೇಷ. ಆದರೆ, ಇದರಲ್ಲಿ ಯಾವುದೇ ಕನ್ನಡದ ಸಿನಿಮಾಗಳು ಇಲ್ಲ ಎಂಬುದು ಬೇಸರದ ಸಂಗತಿ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.