‘ನಾನು ಶೂಟ್​ ಮಾಡಿದ ಸ್ಥಳಗಳಲ್ಲಿ ಈಗ ಬಾಂಬ್​ ಸಿಡಿಯುತ್ತಿದೆ’; ಬಾಲಿವುಡ್​ ನಿರ್ದೇಶಕನ ಬೇಸರ

ರಷ್ಯಾ (Russia) ದಾಳಿಗೆ ಸಿಲುಕಿರುವ ಉಕ್ರೇನ್​ಗೂ (Ukraine) ಹಾಗೂ ಭಾರತದ ಚಿತ್ರರಂಗಕ್ಕೂ ಒಂದು ನಂಟಿದೆ. ಭಾರತದ ಅನೇಕ ಸಿನಿಮಾಗಳನ್ನು ಉಕ್ರೇನ್​ನಲ್ಲಿ ಶೂಟ್​ ಮಾಡಲಾಗಿದೆ. ಆದರೆ, ಈಗ ಉಕ್ರೇನ್​ನಲ್ಲಿ ಪರಿಸ್ಥಿತಿ ಮೊದಲಿನ ರೀತಿ ಇಲ್ಲ. ಸಿನಿಮಾಗಳನ್ನು ಶೂಟ್​ ಮಾಡಿದ ಸುಂದರ ತಾಣಗಳಲ್ಲಿ ರಷ್ಯಾದ ಮಿಲಿಟರಿ ವಾಹನಗಳು ಓಡಾಡುತ್ತಿವೆ. ಅನೇಕ ಕಟ್ಟಡಗಳು ಮಿಸೈಲ್​ ಹೊಡೆತಕ್ಕೆ ಸಿಲುಕಿ ನಾಶವಾಗಿವೆ. ಈ ಬಗ್ಗೆ ನಿರ್ದೇಶಕ ವಿಶ್ವೇಶ್​ ಕೃಷ್ಣಮೂರ್ತಿ ಅವರು ಬೇಸರ ಹೊರಹಾಕಿದ್ದಾರೆ. ಅವರ ಮೊದಲ ಸಿನಿಮಾ ‘99 ಸಾಂಗ್ಸ್​​’ ಚಿತ್ರದ (99 Songs Movie) ಶೂಟಿಂಗ್​ ಉಕ್ರೇನ್​ನಲ್ಲೇ ನಡೆದಿತ್ತು.

‘ನನಗೆ ಉಕ್ರೇನ್​ನಲ್ಲಿ ಅನೇಕ ಗೆಳೆಯರಿದ್ದಾರೆ. ಅವರು ನಮ್ಮ ಸಿನಿಮಾದಲ್ಲಿ ತಾಂತ್ರಿಕ ವರ್ಗದಲ್ಲಿ ಕೆಲಸ ಮಾಡಿದ್ದರು. ಅವರು ನೀಡುವ ಅಪ್​ಡೇಟ್​ಗಳನ್ನು ಓದಲು ತುಂಬಾನೇ ಕಷ್ಟವಾಗುತ್ತದೆ. ಒಳ್ಳೆಯ ತಂತ್ರಜ್ಞರ ಜತೆ ಸಿನಿಮಾ ಮಾಡೋದು ನಿಜಕ್ಕೂ ಭಾವನಾತ್ಮಕ ಪಯಣ’ ಎಂದಿದ್ದಾರೆ ವಿಶ್ವೇಶ್​.

‘ನಾವು ಇಲ್ಲಿ ಕುಳಿತು ಮಾತನಾಡುತ್ತೇವೆ. ಆದರೆ, ಅಲ್ಲಿ ಏನಾಗುತ್ತಿದೆ ಎಂಬುದನ್ನು ನೋಡಲು ಸಂಕಟ ಆಗುತ್ತದೆ. ನಾವು ಶೂಟ್​ ಮಾಡಿದ ಕೆಲವು ಸ್ಥಳಗಳಲ್ಲಿ ಮಿಲಿಟರಿ ಕಾರ್ಯಾಚರಣೆ ನಡೆಯುತ್ತಿದೆ. ನಾವು ಚಿತ್ರೀಕರಿಸಿದ ಅನೇಕ ಸ್ಥಳಗಳು ಬಾಂಬ್​ನಿಂದ ನಾಶಗೊಂಡಿವೆ. ನಾವು 2022ರಲ್ಲಿ ಇದ್ದೇವೆ. ಆದಾಗ್ಯೂ ಯುದ್ಧ ನಡೆಯುತ್ತಿದೆ ಎಂಬುದನ್ನು ನಾವು ಊಹಿಸಲು ಸಾಧ್ಯವಿಲ್ಲ’ ಎಂದು ಬೇಸರ ಹೊರಹಾಕಿದ್ದಾರೆ ವಿಶ್ವೇಶ್.

‘ಈಗ ನಡೆಯುತ್ತಿರುವ ಘಟನೆ ಬಗ್ಗೆ  ಹೇಳಲು ನನ್ನಲ್ಲಿ ಅಷ್ಟು ಮಾಹಿತಿ ಇಲ್ಲ. ಆದರೆ, ಉಕ್ರೇನ್​ ನನಗೆ ವಿಶೇಷ ಸ್ಥಳ. ದೇಶದ ಅನೇಕ ಸ್ಥಳಗಳು ನನ್ನ ಸಿನಿಮಾದಲ್ಲಿ ಇವೆ. ನನ್ನ ಸಿನಿಮಾದ ಕಥೆಗೆ ಉಕ್ರೇನ್​ ಒಂದು ಅದ್ಭುತ ಸ್ಥಳವಾಗಿತ್ತು’ ಎಂದಿದ್ದಾರೆ ವಿಶ್ವೇಶ್.

2021ರ ಏಪ್ರಿಲ್​ 16ರಂದು ’99 ಸಾಂಗ್ಸ್​’ ಸಿನಿಮಾ ತೆರೆಗೆ ಬಂದಿತ್ತು. ಇಹಾನ್​ ಭಟ್​ ಹಾಗೂ ಎಡಿಲ್ಸಿ ವರ್ಗಾಸ್ ಈ ಚಿತ್ರದಲ್ಲಿ ನಟಿಸಿದ್ದಾರೆ. ಎ.ಆರ್​. ರೆಹಮಾನ್​ ಈ ಸಿನಿಮಾಗೆ ಸಂಗೀತ ನಿರ್ದೇಶನ ಮಾಡಿದ್ದರು. ವಿಶೇಷ ಎಂದರೆ ರೆಹಮಾನ್​ ಅವರೇ ಈ ಸಿನಿಮಾಗೆ ಕಥೆ ಬರೆದಿದ್ದಾರೆ. 2011ರಲ್ಲಿ ಈ ಚಿತ್ರದ ಕಥೆಯನ್ನು ರೆಹಮಾನ್​ ಸಿದ್ಧಪಡಿಸಿದ್ದರು. 2013ರಲ್ಲಿ ಈ ಸಿನಿಮಾವನ್ನು ಎರೋಸ್ ಸಂಸ್ಥೆ​ ನಿರ್ಮಾಣ ಮಾಡಲು ಮುಂದೆ ಬಂದಿತ್ತು. ಆದರೆ, ನಂತರ ಈ ಪ್ರಾಜೆಕ್ಟ್​ನಿಂದ ಹಿಂದೆ ಸರಿದಿತ್ತು. ನಂತರ ಐಡಿಯಲ್ ಎಂಟರ್​ಟೇನ್​ಮೆಂಟ್ ಈ ಸಿನಿಮಾವನ್ನು ನಿರ್ಮಾಣ ಮಾಡಿತ್ತು.

ಇದನ್ನೂ ಓದಿ: Radhika Pandit: ಜನ್ಮದಿನಕ್ಕೂ ಮುನ್ನ ಸುಂದರ ಫೋಟೋ ಹಂಚಿಕೊಂಡ ರಾಧಿಕಾ ಪಂಡಿತ್​; ಹೇಳಿದ್ದೇನು?

ರಿಲೀಸ್​ಗೆ ಸಿದ್ಧವಿರುವ ‘ಆರ್​ಆರ್​ಆರ್​’ ಚಿತ್ರಕ್ಕೆ ಸಂಕಷ್ಟ; ಎದುರಾಗಲಿದೆ ಕಾನೂನಿನ ದೊಡ್ಡ ತೊಡಕು?