Angelina Jolie: ಆಫ್ಘನ್ನರಿಗಾಗಿ ಇನ್​​ಸ್ಟಾಗ್ರಾಮ್​ಗೆ ಎಂಟ್ರಿ ಕೊಟ್ಟ ಹಾಲಿವುಡ್ ಲೇಡಿ ಸೂಪರ್ ಸ್ಟಾರ್; 14 ಗಂಟೆಯಲ್ಲಿ 45 ಲಕ್ಷ ಫಾಲೋವರ್ಸ್

ಹಾಲಿವುಡ್​ನ ಹಾಟ್​ ಹಾಟ್ ನಟಿ ಆಂಜೆಲಿನಾ ಜೋಲಿ ಇನ್​ಸ್ಟಾಗ್ರಾಮ್​ಗೆ ಎಂಟ್ರಿ ಕೊಟ್ಟಿದ್ದಾರೆ. ಜಸ್ಟ್ 14 ಗಂಟೆಯೊಳಗೆ ಅವರ ಫಾಲೋವರ್ಸ್ ಸಂಖ್ಯೆ 45 ಲಕ್ಷ ಆಗಿದೆ. ಅದರಲ್ಲಿ ಫೇಸ್​ಬುಕ್​ನ ಚೀಫ್​ ಆಪರೇಟಿಂಗ್ ಆಫೀಸರ್ ಶೆರಿಲ್ ಸ್ಯಾಂಡ್​ಬರ್ಗ್​ ಕೂಡ ಇದ್ದಾರೆ. ಅಫ್ಘಾನಿಸ್ತಾನದ ಬೆಳವಣಿಗೆಯಿಂದ ತೀವ್ರವಾಗಿ ಆಗಿದೆ ಎಂದು ಹೇಳಿಕೊಂಡಿರುವ ಅವರು, ಅಲ್ಲಿರುವ ಜನರ ಧ್ವನಿಯನ್ನು ಈ ಪ್ಲಾಟ್​ಫಾರ್ಮ್​ ಮೂಲಕ ತಲುಪಿಸುವುದಾಗಿ ಹೇಳಿದ್ದಾರೆ. ಸೋಷಿಯಲ್​ ಮೀಡಿಯಾಗಳಲ್ಲಿ ತಮ್ಮ ಭಾವನೆಯನ್ನು ಮುಕ್ತವಾಗಿ ಹಂಚಿಕೊಳ್ಳುವುದಕ್ಕೆ ಸಾಧ್ಯವಾಗದಂತೆ ಆಗಿರುವ ಮತ್ತು ಆ ಸಂವಹನದ ಸಾಮರ್ಥ್ಯವನ್ನು ಕಳೆದುಕೊಂಡ ಅಫ್ಘಾನಿಸ್ತಾನದ ಜನರ ಬಗ್ಗೆ ತಮ್ಮ ಕಾಳಜಿ ವ್ಯಕ್ತಪಡಿಸಿದ್ದಾರೆ ಆಂಜೆಲಿನಾ ಜೋಲಿ. “ಜಗತ್ತಿನಾದ್ಯಂತ ತಮ್ಮ ಪ್ರಾಥಮಿಕ ಮಾನವ ಹಕ್ಕುಗಳಿಗಾಗಿ ಹೋರಾಟ ನಡೆಸುತ್ತಿರುವವರ ಪರವಾದ ಧ್ವನಿ ಹಾಗೂ ಕಥೆಯನ್ನು ಹಂಚಿಕೊಳ್ಳಲು ಇನ್​ಸ್ಟಾಗ್ರಾಮ್​ಗೆ ಬಂದಿದ್ದೇನೆ,” ಎಂದು 46 ವರ್ಷದ ಆಸ್ಕರ್ ಪ್ರಶಸ್ತಿ ವಿಜೇತೆ ಜೋಲಿ ಹೇಳಿದ್ದಾರೆ.

ಅವರ ಮೊದಲ ಪೋಸ್ಟ್ ಆಫ್ಘನ್​ನ ಹದಿಹರೆಯದ ಹೆಣ್ಣುಮಗಳೊಬ್ಬಳು ಬರೆದ ಪತ್ರವಾಗಿದೆ. ತಾಲಿಬಾನ್​ಗಳು ಕೈ ವಶ ಮಾಡಿಕೊಂಡ ದೇಶದಲ್ಲಿ ಹೇಗೆ ಭಯ ಮನೆ ಮಾಡಿದೆ ಎಂಬುದನ್ನು ಹೇಳಿಕೊಂಡ ಪತ್ರ ಅದು. ಅದರಲ್ಲಿ, ಈಗಿನ ಸನ್ನಿವೇಶಕ್ಕೆ ಅಫ್ಘಾನಿಸ್ತಾನದಲ್ಲಿ ತನ್ನ ಶಾಲೆಗೆ ಹೋಗುವುದು ಎಷ್ಟು ಕಷ್ಟ ಎಂಬುದನ್ನು ಆ ಹೆಣ್ಣುಮಗಳು ಹೇಳಿಕೊಂಡಿರುವುದು ಒಳಗೊಂಡಿದೆ. “ನಮಗೆಲ್ಲರಿಗೂ ಹಕ್ಕಿತ್ತು, ನಮ್ಮ ಹಕ್ಕುಗಳಿಗಾಗಿ ಮುಕ್ತವಾಗಿ ಎದುರಿಸಬಹುದಿತ್ತು. ಆದರೆ ಅವರು ಬಂದರು, ನಾವೆಲ್ಲ ಅವರಿಗೆ ಹೆದರುತ್ತಿದ್ದೇವೆ, ನಮ್ಮೆಲ್ಲ ಕನಸುಗಳು ಕಮರಿಹೋದವು ಎಂಬ ಚಿಂತೆ ಈಗ ನಮ್ಮನ್ನು ಆವರಿಸಿದೆ,” ಎಂದು ಆ ಹೆಣ್ಣುಮಗಳು ಬರೆದಿದ್ದಾರೆ.

ಅಫ್ಘಾನಿಸ್ತಾನದ ಅಧ್ಯಕ್ಷರಾಗಿದ್ದ ಅಶ್ರಫ್ ಘನಿ ದೇಶ ಬಿಟ್ಟು ಹೋದ ಮೇಲೆ, ಕಳೆದ ಭಾನುವಾರ ಕಾಬೂಲ್​ ಅನ್ನು ತಾಲಿಬಾನ್​ಗಳು ತಮ್ಮ ವಶಕ್ಕೆ ಪಡೆದರು. ಕಳೆದ ಎರಡು ದಶಕಗಳಿಂದ ಅಮೆರಿಕ ಸೇರಿದಂತೆ ಅದರ ಮಿತ್ರ ರಾಷ್ಟ್ರಗಳು ಅಫ್ಘಾನಿಸ್ತಾನದಲ್ಲಿ ತರಲು ಯತ್ನಿಸಿದ ಬದಲಾವಣೆಗಳು ಹೊಳೆಯಲ್ಲಿ ಹುಣಸೇಹಣ್ಣು ಕಿವುಚಿದಂತಾಗಿದೆ. ಅಂದಹಾಗೆ ಅಂಜೆಲಿನಾ ಜೋಲಿ 20 ವರ್ಷಗಳ ಹಿಂದೆ, 9/11ಗೂ ಮುನ್ನ ಅಫ್ಘಾನಿಸ್ತಾನ ಗಡಿಯಲ್ಲಿ ಎರಡು ವಾರಗಳ ಕಾಲ ತಾವು ಇದ್ದದ್ದನ್ನು, ತಾಲಿಬಾನ್​ಗೆ ಹೆದರಿ ನಿರಾಶ್ರಿತರಾಗಿ ಓಡಿ ಬಂದಿದ್ದವರನ್ನು ಭೇಟಿ ಆಗಿದ್ದ ಕ್ಷಣಗಳನ್ನು ಆಕೆ ನೆನಪು ಮಾಡಿಕೊಂಡಿದ್ದಾರೆ. ಹೇಗೆ ಬದ್ಧತೆಯಿಂದ ಇತರರು ಅವರಿಗಾಗಿ ಶ್ರಮ ಪಡುತ್ತಿದ್ದಾರೋ ನಾನು ಕೂಡ ಶ್ರಮಿಸುತ್ತೇನೆ. ಮತ್ತು ನೀವು ಸಹ ನನ್ನ ಜತೆಗೆ ಸೇರಿಕೊಳ್ಳುತ್ತೀರಿ ಅಂತ ಅಂದುಕೊಳ್ಳುತ್ತೇನೆ ಎನ್ನುತ್ತಾ ತಮ್ಮ ಪೋಸ್ಟ್​ ಕೊನೆಗೊಳಿಸಿದ್ದಾರೆ ಜೋಲಿ.

ಇನ್​ಸ್ಟಾಗ್ರಾಮ್​ಗೆ ಜೋಲಿ ಎಂಟ್ರಿ ಕೊಟ್ಟಾಗಿನಿಂದ ಹತ್ತಿರಹತ್ತಿರ 15 ಲಕ್ಷ ಲೈಕ್ಸ್​ಗಳು ಬಂದಿವೆ. ಆಕೆ ಕೂಡ ಇನ್​ಸ್ಟಾಗ್ರಾಮ್​ ಸ್ಟೋರಿ ಹಂಚಿಕೊಂಡಿದ್ದಾರೆ. ಅಫ್ಘಾನಿಸ್ತಾನದಲ್ಲಿನ ಮಹಿಳೆಯರು ಮತ್ತು ಮಕ್ಕಳ ಸ್ಥಿತಿಯನ್ನು ಹಂಚಿಕೊಂಡಿದ್ದಾರೆ. ಇನ್ನು ಆಫ್ಘನ್ ಹೆಣ್ಣುಮಗಳ ಪೂರ್ತಿ ಪತ್ರ ಹಾಗೂ ಅದರ ಜತೆಗೆ ಕ್ಯಾಮೆರಾಗೆ ಬೆನ್ನು ತೋರಿಸಿ ನಿಂತಿರುವ ಏಳು ಮಹಿಳೆಯರ ಫೋಟೋ ಕೂಡ ಜೋಲಿ ಹಂಚಿಕೊಂಡಿದ್ದಾರೆ.

ಇದನ್ನೂ ಓದಿ: ಪ್ರಾಣ ಉಳಿಸಿಕೊಳ್ಳಲು ಅಫ್ಘಾನಿಸ್ತಾನದ ರಸ್ತೆಗಳಲ್ಲಿ ಭಯದಿಂದ ಓಡಿದ ನಿರ್ದೇಶಕಿ; ವಿಡಿಯೋ ವೈರಲ್​  

(Hollywood Actress Angelina Jolie Debut In to Instagram To Support Afghan People Got 45 Lakhs Followers Within 14 hours)