ಮುತ್ತು ಕೊಟ್ಟ ಪತ್ರಕರ್ತನ ಕೆನ್ನೆಗೆ ಬಾರಿಸಿದ್ದ ವಿಲ್​ ಸ್ಮಿತ್​; ಆಸ್ಕರ್​ ಗಲಾಟೆ ಬಳಿಕ ಮತ್ತೊಂದು ವಿಡಿಯೋ ವೈರಲ್​

ನಟ ವಿಲ್​ ಸ್ಮಿತ್ (Will Smith) ಅವರು ಏಕಾಏಕಿ ಎಲ್ಲರ ಚರ್ಚೆಯ ಕೇಂದ್ರ ಬಿಂದು ಆಗಿದ್ದಾರೆ. ಸಿನಿಮಾದಲ್ಲಿ ಪ್ರೇಕ್ಷಕರನ್ನು ಮನರಂಜಿಸುವ ಅವರು ಸಾರ್ವಜನಿಕ ಜೀವನದಲ್ಲಿ ಯಾಕೋ ಕಿರಿಕ್​ ಮಾಡಿಕೊಂಡಿದ್ದಾರೆ. ಇತ್ತೀಚೆಗಷ್ಟೇ ಅವರಿಗೆ ‘ಅತ್ಯುತ್ತಮ ನಟ’ ಆಸ್ಕರ್​ ಪ್ರಶಸ್ತಿ ಸಿಕ್ಕಿದೆ. ಅದಕ್ಕಾಗಿ ಅವರು ಖುಷಿಪಡುವುದಕ್ಕಿಂತಲೂ ಹೆಚ್ಚಾಗಿ ವಿವಾದದ ಬಗ್ಗೆ ತಲೆ ಕೆಡಿಸಿಕೊಳ್ಳಬೇಕಾದ ಪರಿಸ್ಥಿತಿ ಬಂದಿದೆ. ಆಸ್ಕರ್​ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಸ್ಮಿತ್ ಪತ್ನಿ ಜೋಡಾ ಪಿಂಕೆಟ್​ ಸ್ಮಿತ್ (Jada Pinkett Smith)​ ಬಗ್ಗೆ ಹಾಸ್ಯ ನಟ ಕ್ರಿಸ್​ ರಾಕ್​ ಅವರು ಕಾಮಿಡಿ ಮಾಡಿದರು. ಅದರಿಂದ ಕೋಪಗೊಂಡ ವಿಲ್​ ಸ್ಮಿತ್​ ಅವರು ನೇರವಾಗಿ ವೇದಿಕೆಗೆ ತೆರಳಿ ಕ್ರಿಸ್​ ರಾಕ್​ (Chris Rock) ಅವರ ಕೆನ್ನೆಗೆ ಬಾರಿಸಿದರು. ಈ ವಿಡಿಯೋ ವಿಶ್ವಾದ್ಯಂತ ವೈರಲ್​ ಆಗಿದೆ. ಈ ರೀತಿ ಹಲ್ಲೆ ಮಾಡಿದ್ದಕ್ಕಾಗಿ ವಿಲ್​ ಸ್ಮಿತ್​ ಅವರು ಅನೇಕರಿಂದ ಟೀಕೆಗೆ ಒಳಗಾಗುತ್ತಿದ್ದಾರೆ. ಈ ಸಂದರ್ಭದಲ್ಲಿ ಅವರ ಇನ್ನೊಂದು ವಿಡಿಯೋ ವೈರಲ್​ ಆಗಿದೆ. ಈ ಹಿಂದೆ ಅವರು ಪತ್ರಕರ್ತನ ಕೆನ್ನೆಗೆ ಹೊಡೆದಿದ್ದ ವಿಚಾರ ಈಗ ಮತ್ತೆ ಸದ್ದು ಮಾಡುತ್ತಿದೆ.

2012ರಲ್ಲಿ ‘ಮೆನ್​ ಇನ್​ ಬ್ಲ್ಯಾಕ್​ 3’ ಸಿನಿಮಾ ತೆರೆಕಂಡಿತ್ತು. ಆ ಚಿತ್ರದ ಪ್ರೀಮಿಯರ್​ ಪ್ರದರ್ಶನದ ಸಂದರ್ಭದಲ್ಲಿ ನಡೆದ ಘಟನೆ ಇದು. ವಿಲ್​ ಸ್ಮಿತ್​ ಅವರು ರೆಡ್​ ಕಾರ್ಪೆಟ್​ನಲ್ಲಿ ಹೆಜ್ಜೆ ಹಾಕುತ್ತಿದ್ದಾಗ ಉಕ್ರೇನ್​ ಮೂಲದ ಓರ್ವ​ ರಿಪೋರ್ಟರ್​ ಮಿತಿ ಮೀರಿ ನಡೆದುಕೊಂಡಿದ್ದ. ಮೊದಲಿಗೆ ವಿಲ್​ ಸ್ಮಿತ್​ ಅವರನ್ನು ತಬ್ಬಿಕೊಂಡ ಆ ಪತ್ರಕರ್ತ ನಂತರದಲ್ಲಿ ಮುತ್ತು ಕೊಡಲು ಶುರು ಮಾಡಿದ. ಕೆನ್ನೆಗೆ ಕಿಸ್​ ಮಾಡಿದ ಬಳಿಕ ತುಟಿಗೂ ಮುತ್ತಿಡಲು ಪ್ರಯತ್ನಿಸಿದ. ಆಗ ವಿಲ್​ ಸ್ಮಿತ್​ ಅವರ ತಾಳ್ಮೆ ಕೆಟ್ಟಿತು. ಕೂಡಲೇ ಪತ್ರಕರ್ತನ ಕೆನ್ನೆಗೆ ಅವರು ಬಾರಿಸಿದರು. ಆ ವಿಡಿಯೋ ಈಗ ವೈರಲ್​ ಆಗುತ್ತಿದೆ.

ಪದೇ ಪದೇ ಈ ರೀತಿ ಮಾಡುತ್ತಿರುವುದಕ್ಕೆ ವಿಲ್​ ಸ್ಮಿತ್​ ಅವರನ್ನು ಜನರು ಟೀಕಿಸಿದ್ದಾರೆ. ಆದರೆ ಕೆಲವರು ಸ್ಮಿತ್​ ಪರವಾಗಿ ಮಾತನಾಡಿದ್ದಾರೆ. ಈ ಎರಡೂ ಸಂದರ್ಭಗಳು ಬೇರೆ ಬೇರೆ ಆಗಿವೆ. ಎರಡನ್ನೂ ಒಂದೇ ರೀತಿಯಲ್ಲಿ ನೋಡಲು ಸಾಧ್ಯವಿಲ್ಲ ಎಂದು ನೆಟ್ಟಿಗರು ಕಮೆಂಟ್​ ಮಾಡುತ್ತಿದ್ದಾರೆ.

ವಿಲ್​ ಸ್ಮಿತ್​ ವರ್ತನೆ ಬಗ್ಗೆ ತಾಯಿ ಪ್ರತಿಕ್ರಿಯೆ:

ವಿಲ್​ ಸ್ಮಿತ್​ ಕುರಿತು ಅವರ ತಾಯಿ ಕೆರೋಲಿನ್​ ಸ್ಮಿತ್​ ಅವರು ಹೊಂದಿರುವ ಭಾವನೆಯೇ ಬೇರೆ. ‘ಆತ ತುಂಬ ಸ್ನೇಹಜೀವಿ. ಎಲ್ಲರ ಜೊತೆ ಬೆರೆಯುತ್ತಾನೆ. ಅವನು ಈ ರೀತಿ ವರ್ತಿಸಿದ್ದನ್ನು ನಾನು ಕಂಡಿದ್ದು ಇದೇ ಮೊದಲು. ಅವನ ಜೀವನದಲ್ಲೇ ಇದು ಮೊದಲ ಬಾರಿ ಆಗಿರುವುದು. ಈ ಘಟನೆಯಿಂದ ನನಗೆ ಅಚ್ಚರಿ ಆಗಿದೆ. ಅವನು ಎಂದೂ ಕೂಡ ಈ ರೀತಿ ಮಾಡಿರಲಿಲ್ಲ’ ಎಂದು ಕೆರೋಲಿನ್​ ಸ್ಮಿತ್​ ಹೇಳಿದ್ದಾರೆ.

ಆಸ್ಕರ್​ ವೇದಿಕೆಯಲ್ಲಿ ನಡೆದ ಘಟನೆಯ ಕುರಿತು ಜೇಡಾ ಪಿಂಕೆಟ್​ ಸ್ಮಿತ್​ ಅವರು ಯಾವುದೇ ನೇರ ಪ್ರತಿಕ್ರಿಯೆ ನೀಡಿಲ್ಲ. ಸೋಶಿಯಲ್​ ಮೀಡಿಯಾದಲ್ಲಿ ಅವರು ಸೂಚ್ಯವಾಗಿ ಕೆಲವು ಪೋಸ್ಟ್​ಗಳನ್ನು ಹಂಚಿಕೊಂಡಿದ್ದಾರೆ. ‘ಇದು ಚೇತರಿಸಿಕೊಳ್ಳುವ ಕಾಲ. ಅದಕ್ಕಾಗಿಯೇ ನಾನು ಇಲ್ಲಿದ್ದೇನೆ’ ಎಂಬ ಸಾಲನ್ನು ಅವರು ಪೋಸ್ಟ್​ ಮಾಡಿದ್ದಾರೆ.

ಇದನ್ನೂ ಓದಿ:

Oscars 2022 Winners: ವಿಲ್​ ಸ್ಮಿತ್​ಗೆ ಅತ್ಯುತ್ತಮ ನಟ ಆಸ್ಕರ್​ ಪ್ರಶಸ್ತಿ; ‘ಕೋಡಾ’ ಅತ್ಯುತ್ತಮ ಸಿನಿಮಾ

ಕಪ್ಪು ಸೀರೆ ಧರಿಸಿ ‘ಪ್ರೀ ಆಸ್ಕರ್​ ಪಾರ್ಟಿ’ಯಲ್ಲಿ ಮಿಂಚಿದ ‘ದೇಸಿ ಗರ್ಲ್​’ ಪ್ರಿಯಾಂಕಾ ಚೋಪ್ರಾ