ತಾಯಿಯಾದ ನಂತರ ಮೊದಲ ಬಾರಿಗೆ ಫೋಟೋ ಹಂಚಿಕೊಂಡ ಪ್ರಿಯಾಂಕಾ; ಫ್ಯಾನ್ಸ್ಗೆ ಮತ್ತೊಂದು ಖುಷಿ ಸುದ್ದಿ ನೀಡಿದ ನಟಿ
Priyanka Chopra | Ending Things: ಬಹುಭಾಷಾ ನಟಿ ಪ್ರಿಯಾಂಕಾ ಚೋಪ್ರಾ ಸದ್ಯ ಹಾಲಿವುಡ್ನಲ್ಲಿ ಬ್ಯುಸಿಯಾಗಿದ್ದಾರೆ. ಇತ್ತೀಚೆಗಷ್ಟೇ ಕುಟುಂಬಕ್ಕೆ ಹೊಸ ಸದಸ್ಯರನ್ನು ಸ್ವಾಗತಿಸಿರುವ ಅವರ ಬತ್ತಳಿಕೆಗೆ ಇದೀಗ ಹೊಸ ಸಿನಿಮಾ ಸೇರ್ಪಡೆಯಾಗಿದೆ.
ಬಾಲಿವುಡ್ನಲ್ಲಿ ಅಪಾರ ಜನಪ್ರಿಯತೆ ಪಡೆದ ನಂತರ ಪ್ರಿಯಾಂಕಾ ಚೋಪ್ರಾ (Priyanka Chopra) ಇದೀಗ ಹಾಲಿವುಡ್ನಲ್ಲಿ ನೆಲೆಯೂರುತ್ತಿದ್ದಾರೆ. ಸದ್ಯ ಬಾಲಿವುಡ್ ಹಾಗೂ ಹಾಲಿವುಡ್ ಎರಡರಲ್ಲೂ ಚಿತ್ರಗಳನ್ನು ಒಪ್ಪಿಕೊಂಡಿರುವ ಪ್ರಿಯಾಂಕಾ, ಕೆಲ ದಿನಗಳ ಹಿಂದಷ್ಟೇ ಕುಟುಂಬಕ್ಕೆ ಹೊಸ ಅತಿಥಿಯನ್ನು ಸ್ವಾಗತಿಸಿದ್ದರು. 2018ರ ಡಿಸೆಂಬರ್ನಲ್ಲಿ ಗೆಳೆಯ ನಿಕ್ ಜೋನಾಸ್ (Nick Jonas) ಜತೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದ ಪ್ರಿಯಾಂಕ, ಜನವರಿ 22ರಂದು ಕುಟುಂಬಕ್ಕೆ ಹೊಸ ಅತಿಥಿ ಆಗಮನವಾಗಿದ್ದನ್ನು ಘೋಷಿಸಿದ್ದರು. ಬಾಡಿಗೆ ತಾಯಿಯ ಮೂಲಕ ನಿಕ್- ಪ್ರಿಯಾಂಕಾ ಪೋಷಕರಾಗಿದ್ದರು. ತಾರಾ ಜೋಡಿಗೆ ಜನಿಸಿರುವುದು ಹೆಣ್ಣು ಮಗು ಹಾಗೂ ಅವಧಿಪೂರ್ವದಲ್ಲಿ ಜನಿಸಿದೆ ಎಂದು ಹಲವು ವರದಿಗಳು ಹೇಳಿದ್ದವು. ಆದರೆ ಈ ಕುರಿತು ಪ್ರಿಯಾಂಕಾ ಆಗಲಿ ಅಥವಾ ನಿಕ್ ಆಗಲಿ ಅಧಿಕೃತ ಮಾಹಿತಿ ಹಂಚಿಕೊಂಡಿಲ್ಲ. ಇದೀಗ ಪ್ರಿಯಾಂಕಾ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹೊಸ ಫೋಟೋ ಹಂಚಿಕೊಂಡಿದ್ದಾರೆ. ಇದು ಅವರು ತಾಯಿಯಾದ ನಂತರ ಹಂಚಿಕೊಳ್ಳುತ್ತಿರುವ ಮೊದಲ ಚಿತ್ರವಾಗಿದೆ. ಇದರ ಬೆನ್ನಲ್ಲೇ ಪ್ರಿಯಾಂಕಾ ವೃತ್ತಿ ಜೀವನದ ಕುರಿತು ಹೊಸ ಸಮಾಚಾರ ಹೊರಬಿದ್ದಿದೆ.
ಪ್ರಿಯಾಂಕಾ ಇನ್ಸ್ಟಾಗ್ರಾಂನಲ್ಲಿ ಹೊಸ ಫೋಟೋ ಹಂಚಿಕೊಂಡಿದ್ದಾರೆ. ಅದರಲ್ಲಿ ಅವರು ಕಾರಿನಲ್ಲಿ ಕುಳಿತು ಸೆಲ್ಫಿಗೆ ಭರ್ಜರಿ ಪೋಸ್ ನೀಡಿದ್ದಾರೆ. ಸನ್ಗ್ಲಾಸ್ ಧರಿಸಿಯೂ ಪ್ರಿಯಾಂಕಾ ಪೋಸ್ ನೀಡಿದ್ದು, ಚಿತ್ರಗಳು ಅಭಿಮಾನಿಗಳ ಮನಗೆದ್ದಿದೆ. ವಿಕ್ಕಿ ಕೌಶಲ್, ಅನುಷ್ಕಾ ಶರ್ಮಾ, ಮೇಘನಾ ರಾಜ್ ಸೇರಿದಂತೆ ಖ್ಯಾತ ತಾರೆಯರು ಪ್ರಿಯಾಂಕಾ ಫೋಟೋವನ್ನು ಇಷ್ಟಪಟ್ಟಿದ್ದಾರೆ. ಒಂಬತ್ತು ಗಂಟೆಗಳ ಹಿಂದೆ ಅಪ್ಲೋಡ್ ಆದ ಚಿತ್ರಕ್ಕೆ ಈಗಾಗಲೇ 12 ಲಕ್ಷಕ್ಕೂ ಅಧಿಕ ಜನರು ಲೈಕ್ ಮಾಡಿದ್ದಾರೆ.
ಪ್ರಿಯಾಂಕಾ ಹಂಚಿಕೊಂಡ ಪೋಸ್ಟ್ ಇಲ್ಲಿದೆ:
ಪ್ರಿಯಾಂಕಾ ಬತ್ತಳಿಕೆ ಸೇರಿತು ಮತ್ತೊಂದು ಚಿತ್ರ; ಫ್ಯಾನ್ಸ್ ಖುಷಿಪಡುವ ಸುದ್ದಿ ಇಲ್ಲಿದೆ
ಪ್ರಿಯಾಂಕಾ ಸದ್ಯ ಒಂದರ ಹಿಂದೊಂದು ಹಾಲಿವುಡ್ ಚಿತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇತ್ತೀಚೆಗಷ್ಟೇ ‘ದಿ ಮ್ಯಾಟ್ರಿಕ್ಸ್: ರಿಸರೆಕ್ಷನ್ಸ್’ನಲ್ಲಿಸತಿ ಪಾತ್ರದಲ್ಲಿ ಪ್ರಿಯಾಂಕಾ ಕಾಣಿಸಿಕೊಂಡಿದ್ದರು. ‘ಸಿಟಾಡೆಲ್’ ಸೀರೀಸ್ನ ಚಿತ್ರೀಕರಣವನ್ನು ನಟಿ ಮುಗಿಸಿದ್ದಾರೆ. ‘ಟೆಕ್ಸ್ಟ್ ಫಾರ್ ಯೂ’ನಲ್ಲಿ ಪ್ರಿಯಾಂಕಾ ಕಾಣಿಸಿಕೊಳ್ಳುತ್ತಿದ್ದಾರೆ. ಬಾಲಿವುಡ್ಗೂ ಕಮ್ಬ್ಯಾಕ್ ಮಾಡಲಿರುವ ನಟಿ, ‘ಜೀ ಲೇ ಜರಾ’ ಚಿತ್ರದಲ್ಲಿ ಕತ್ರಿನಾ ಕೈಫ್ ಹಾಗೂ ಆಲಿಯಾ ಭಟ್ ಜತೆ ತೆರೆ ಹಂಚಿಕೊಳ್ಳಲಿದ್ದಾರೆ.
ಇದೀಗ ಪ್ರಿಯಾಂಕಾ ಬತ್ತಳಿಕೆಗೆ ಹೊಸ ಚಿತ್ರ ಸೇರ್ಪಡೆಯಾಗಿದೆ.ಖ್ಯಾತ ನಟ ಆಂಟೊನಿ ಮ್ಯಾಕಿ ಅವರೊಂದಿಗೆ ಪ್ರಿಯಾಂಕಾ ಕಾಣಿಸಿಕೊಳ್ಳಲಿದ್ದಾರೆ. ಕೆವಿನ್ ಸಲಿವಾನ್ ನಿರ್ದೇಶನದ ಆಕ್ಷನ್ ಚಿತ್ರ ‘ಎಂಡಿಂಗ್ ಥಿಂಗ್ಸ್’ ಪ್ರಿಯಾಂಕಾ ಒಪ್ಪಿಕೊಂಡಿರುವ ಲೇಟೆಸ್ಟ್ ಚಿತ್ರವಾಗಿದೆ. ಮ್ಯಾಕಿ ಈಗಾಗಲೇ ಮಾರ್ವೆಲ್ ಸರಣಿಯ ಚಿತ್ರಗಳಲ್ಲಿ ಕಾಣಿಸಿಕೊಂಡು ಅಪಾರ ಅಭಿಮಾನಿ ಬಳಗ ಹೊಂದಿದ್ದಾರೆ. ಇದೀಗ ಪ್ರಿಯಾಂಕಾ ಅವರೊಂದಿಗೆ ತೆರೆ ಹಂಚಿಕೊಳ್ಳುತ್ತಿರುವುದು ಚಿತ್ರದ ಕುರಿತು ಕುತೂಹಲ ಹೆಚ್ಚಿಸಿದೆ.
ಇದನ್ನೂ ಓದಿ:
ಪುನೀತ್ ನಿವಾಸಕ್ಕೆ ಭೇಟಿ ನೀಡಲಿರುವ ಅಲ್ಲು ಅರ್ಜುನ್; ಹೇಗಿರಲಿದೆ ಇಂದಿನ ಅವರ ವೇಳಾಪಟ್ಟಿ?
ನಟಿಯ ಫೋಟೋವನ್ನು ಅಶ್ಲೀಲವಾಗಿ ಎಡಿಟ್ ಮಾಡಿದ ಕಿಡಿಗೇಡಿಗಳು; ಇಲ್ಲಿದೆ ಒರಿಜಿನಲ್ ಫೋಟೋ