‘ಮೈಸೂರು ಸ್ಟುಡಿಯೋ’ ಪೋಸ್ಟರ್ ರಿಲೀಸ್; ಗತವೈಭವದ ಘಮವಿರುವ ಸಿನಿಮಾ

‘ಪ್ರೇಮದ ಊರಲಿ’ ರೀತಿಯ ಸಿನಿಮಾಗಳಿಂದ ಕನ್ನಡ ಚಿತ್ರರಂಗದಲ್ಲಿ ಹೊಸತನದ ಅಲೆ ಎದ್ದಿದೆ. ಹೈ5 ಸ್ಟುಡಿಯೋಸ್, ಪಿಕೆ ಪಿಕ್ಚರ್ಸ್ ಮತ್ತು ಆರ್‌ಡಿ ಫಿಲ್ಮ್ಸ್ ಆ್ಯಂಡ್ ಮೀಡಿಯಾ ನಿರ್ಮಾಣದ ‘ಮೈಸೂರು ಸ್ಟುಡಿಯೋ’ ಆ ಅಲೆಗೆ ಮತ್ತಷ್ಟು ಚೈತನ್ಯ ತುಂಬುವ ಭರವಸೆ ಮೂಡಿಸಿದೆ. ವಿಜಯದಶಮಿಯ ಶುಭ ಸಂದರ್ಭದಲ್ಲಿ ಬಿಡುಗಡೆಯಾಗಿರುವ ಈ ಚಿತ್ರದ ಪೋಸ್ಟರ್, ಮೈಸೂರು ಮಹಾರಾಜರ ಕಾಲದ ನಂಟಿರುವ ಕಥೆಯ ಕುತೂಹಲಕಾರಿ ಝಲಕ್ ತೆರೆದಿಟ್ಟಂತಿದೆ. ಛಾಯಾಗ್ರಾಹಕರಾಗಿ ತಮ್ಮ ಕೆಲಸದ ಮೂಲಕ ಗುರುತಿಸಿಕೊಂಡು ಮೆಚ್ಚುಗೆ ಗಳಿಸಿರುವ ಪ್ರವೀಣ್ ಎಂ. ಪ್ರಭು ಈ ಚಿತ್ರದ ಮೂಲಕ ನಿರ್ದೇಶಕರಾಗಿ ಪಾದಾರ್ಪಣೆ ಮಾಡುತ್ತಿದ್ದಾರೆ.

150 ವರ್ಷಗಳ ಹಿಂದೆ ಮೈಸೂರು ಮಹಾರಾಜರಿಂದ ಕುಟುಂಬವೊಂದಕ್ಕೆ ಉಡುಗೊರೆಯಾಗಿ ಸಿಕ್ಕ ಅಪರೂಪದ ಕ್ಯಾಮೆರಾ, ಅದಕ್ಕಂಟಿಕೊಂಡೇ 4 ತಲೆಮಾರುಗಳನ್ನು ಬೆಳೆದು ಬಂದ ನೆನಪುಗಳು ಮತ್ತು ಹೊಸ ತಲೆಮಾರಿನ 10 ವರ್ಷದ ಹುಡುಗನ ಮನಸಲ್ಲಿ ಟಿಸಿಲೊಡೆಯುವ ಹಂಬಲ, ಸಾಮಾನ್ಯವಾಗಿ ಫೋಟೋಗಳ ನೆನಪುಗಳನ್ನು ಕಾಯ್ದಿಟ್ಟುಕೊಳ್ಳುತ್ತವೆ. ಅಂತಹ ಕೆಲವು ನೆನಪುಗಳು ಕೆಲವು ಅಚ್ಚರಿಗಳಿಗೂ ಕಾರಣವಾಗುತ್ತವೆ. ಇಂತಹ ಹಲವಾರು ತಲೆಮಾರುಗಳ ಗಟ್ಟಿ ಕಥೆಯೊಂದಿಗೆ ನಿರ್ದೇಶಕ ಪ್ರವೀಣ್ ಎಂ. ಪ್ರಭು ಈ ಸಿನಿಮಾವನ್ನು ರೂಪಿಸಿದ್ದಾರೆ. ಈ ಮೂಲಕ ಮೊದಲ ಹೆಜ್ಜೆಯಲ್ಲಿಯೇ ಸವಾಲಿನ ಸಂಕೀರ್ಣ ಕಥೆಯೊಂದನ್ನು ದೃಶ್ಯರೂಪಕ್ಕಿಳಿಸಿರುವ ಸುಳಿವು ಕೊಟ್ಟಿದ್ದಾರೆ.

10 ವರ್ಷದಿಂದೀಚೆಗೆ ಛಾಯಾಗ್ರಾಹಕನಾಗಿ ಚಿತ್ರರಂಗದ ಭಾಗವಾಗಿದ್ದವರು ಪ್ರವೀಣ್ ಎಂ. ಪ್ರಭು. ಛಾಯಾಗ್ರಾಹಕರಾಗಿ ಅವರು ಕಾರ್ಯನಿರ್ವಹಿಸಿದ್ದ ‘ರಂಕಲ್ ರಾಟೆ’, ‘ಕಪಾಲ’, ‘ಮತ್ಸ್ಯಗಂಧ’ ಮುಂತಾದ ಚಿತ್ರಗಳು ಸಿನಿಮಾಟೋಗ್ರಫಿ ವಿಚಾರದಲ್ಲಿ ಗಮನ ಸೆಳೆದಿದ್ದವು. ಈ ನಡುವೆ ನಿರ್ದೇಶಕರಾಗುವ ಇರಾದೆಯಿಂದ ಎರಡು ಕಿರುಚಿತ್ರಗಳನ್ನೂ ಪ್ರವೀಣ್ ನಿರ್ದೇಶನ ಮಾಡಿದ್ದರು. ಅದರಲ್ಲೊಂದಕ್ಕೆ ಅತ್ಯುತ್ತಮ ಕಥೆ ವಿಭಾಗದಲ್ಲಿ ಪ್ರಶಸ್ತಿ ಸಿಕ್ಕಿತ್ತು. ಆ ಕಥೆಯನ್ನೇ ‘ಮೈಸೂರು ಸ್ಟುಡಿಯೋ’ ಚಿತ್ರವಾಗಿಸಿದ್ದಾರೆ.

ಈಗ ಈ ಸಿನಿಮಾ ತಂಡ ಸಂಪೂರ್ಣವಾಗಿ ಚಿತ್ರೀಕರಣ ಮುಗಿಸಿಕೊಂಡಿದೆ. ಸಂಗೀತಕ್ಕೆ ಸಂಬಂಧಿಸಿದ ಕೆಲಸ ಕಾರ್ಯಗಳು ಪ್ರಗತಿಯಲ್ಲಿವೆ. ಪ್ರವೀಣ್ ಕವಿತಾ, ಸತ್ಯ ಶ್ರೀನಿವಾಸನ್, ದಿವಾಕರ್ ದಯಾಳ್ ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದಾರೆ. ಪ್ರವೀಣ್ ಎಂ. ಪ್ರಭು ಸಹನಿರ್ಮಾಪಕರಾಗಿ ಜೊತೆಯಾಗಿದ್ದಾರೆ. ರಿಷಿಕೇಶ್, ಧನಂಜಯ್, ಯುದಿತ್ ಶೆಟ್ಟಿ, ದಿವ್ಯಶ್ರೀ, ಗೌರವ್ ಮಹಾಂತೇಶ್ ಹಿರೇಮಠ, ಮಾಸ್ಟರ್ ಪೀಸ್ ಅನಂತ್, ಮೂಗು ಸುರೇಶ್, ಡ್ಯಾನಿ ಕಣಿಕರಾಜ್ ಮುಂತಾದವರು ನಟಿಸಿದ್ದಾರೆ.

ಇದನ್ನೂ ಓದಿ: ವೆಬ್ ಸಿರೀಸ್ ಆಗಬೇಕಿದ್ದ ‘ಪ್ರೇಮದ ಊರಲಿ’ ಕಥೆ: ಇಲ್ಲಿದೆ ಅಚ್ಚರಿಯ ವಿಷಯ

ಲಿಂಗರಾಜ್ ಇತಿಹಾಸ್, ಅವಿನಾಶ್ ಕಳಸ, ಪ್ರವೀಣ್ ಎಂ. ಪ್ರಭು ಸಂಭಾಷಣೆ ಬರೆದಿದ್ದಾರೆ. ಅಜಿತ್ ಕೇಶವ ಅವರ ಸಾಹಿತ್ಯ, ಕೆ. ಯೇಸು ಅವರ ಸಂಕಲನ ಈ ಚಿತ್ರಕ್ಕಿದೆ. ‘ಎಲ್ಟು ಮುತ್ತ’, ‘ಹುಬ್ಳಿ ಹಂಟರ್ಸ್’ ಮುಂತಾದ ಸಿನಿಮಾಗಳ ಮೂಲಕ ಗಮನ ಸೆಳೆದಿರುವ ಪ್ರಸನ್ನ ಕೇಶವ ಕೆ.ಎಸ್. ಅವರು ಸಂಗೀತ ನೀಡಿದ್ದಾರೆ. ಪ್ರವೀಣ್ ಎಂ. ಪ್ರಭು ಅವರೇ ಛಾಯಾಗ್ರಹಣದ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.

Published On - 5:15 pm, Fri, 23 October 26