ಸ್ಕರ್ಟ್​ ಧರಿಸಿ ಯೋಗ ಮಾಡಿದ ಸ್ಟಾರ್​ ನಟನ ಪತ್ನಿ? ನೆಟ್ಟಿಗರಿಂದ ಹಿಗ್ಗಾಮುಗ್ಗಾ ಟ್ರೋಲ್​

ಸೆಲೆಬ್ರಿಟಿ ಆಗಿರುವುದು ಅಷ್ಟು ಸುಲಭದ ಕೆಲಸ ಅಲ್ಲ. ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುವ ಅವರನ್ನು ಜನರು ಆಗಾಗ ಟ್ರೋಲ್​ ಮಾಡುತ್ತಿರುತ್ತಾರೆ. ಸೆಲೆಬ್ರಿಟಿಗಳ ಕುಟುಂಬದ ಸದಸ್ಯರಿಗೂ ಈ ಕಾಟ ತಪ್ಪಿದ್ದಲ್ಲ. ಬಾಲಿವುಡ್​ನ ಸ್ಟಾರ್​ ನಟ ಶಾಹಿದ್​ ಕಪೂರ್​ ಅವರ ಪತ್ನಿ ಮೀರಾ ರಜಪೂತ್​ ಅವರು ಹಲವು ಬಾರಿ ಟ್ರೋಲ್​ಗೆ ಒಳಗಾದ ಉದಾಹರಣೆಗಳು ಇವೆ. ಈಗ ಅವರು ತಮ್ಮ ಬಟ್ಟೆಯ ಕಾರಣಕ್ಕಾಗಿ ಮತ್ತೆ ಟ್ರೋಲ್​ ಆಗುತ್ತಿದ್ದಾರೆ. ಯೋಗ ಮಾಡಲು ತೆರಳುವಾಗ ಅವರು ಸ್ಕರ್ಟ್​ ಧರಿಸಿದ್ದರು ಎಂಬುದನ್ನೇ ಗುರಿಯಾಗಿಸಿಕೊಂಡು ನೆಟ್ಟಿಗರು ಟ್ರೋಲ್​ ಮಾಡುತ್ತಿದ್ದಾರೆ.

ಇತ್ತೀಚೆಗೆ ಮೀರಾ ರಜಪೂತ್​ ಅವರು ಮುಂಬೈನಲ್ಲಿ ಕಾಣಿಸಿಕೊಂಡರು. ಪಾಪರಾಜಿಗಳ ಕ್ಯಾಮೆರಾದಲ್ಲಿ ಸೆರೆಯಾದ ಅವರ ಫೋಟೋಗಳು ಇಂಟರ್​ನೆಟ್​ನಲ್ಲಿ ಹರಿದಾಡುತ್ತಿವೆ. ಮೀರಾ ಯೋಗ ಮಾಡಲು ತೆರಳುತ್ತಿರುವಾಗ ಕ್ಲಿಕ್ಕಿಸಿದ ಫೋಟೋಗಳಿವು ಎಂದು ಹೇಳಲಾಗಿದೆ. ಅದಕ್ಕೆ ಬಂದಿರುವ ಕಮೆಂಟ್​ಗಳನ್ನು ನೋಡಿದರೆ, ನೆಟ್ಟಿಗರಿಗೆ ಮೀರಾ ಮೇಲೆ ಯಾಕಿಷ್ಟು ಕೋಪ ಎಂಬ ಪ್ರಶ್ನೆ ಮೂಡುವುದು ಸಹಜ.

‘ಇಂಥ ಸ್ಕರ್ಟ್​ ಧರಿಸಿ ಯಾರಾದರೂ ಯೋಗ ಮಾಡುತ್ತಾರಾ? ಯಾರು ಈಕೆ? ನಟಿ ಅಲ್ಲ, ಗಾಯಕಿಯೂ ಅಲ್ಲ. ಒಬ್ಬ ನಟನನ್ನು ಮದುವೆ ಆಗಿದ್ದಾಳೆ ಎಂಬುದಷ್ಟೇ ನಮಗೆ ಗೊತ್ತು. ಇಂಥವರನ್ನೆಲ್ಲ ಯಾಕೆ ಸುಮ್ಮನೆ ಫೇಮಸ್​ ಮಾಡುತ್ತೀರಿ?’ ಎಂಬಿತ್ಯಾದಿ ಕಮೆಂಟ್​ಗಳು ಬಂದಿವೆ. ‘ಪಾಪ ಅವರು ತುಂಬ ಉದ್ದನೆಯ ಸ್ಕರ್ಟ್​ ಧರಿಸಿದ್ದಾರೆ’ ಎಂದು ವ್ಯಂಗ್ಯವಾಗಿಯೂ ಕಮೆಂಟ್​ ಮಾಡಲಾಗಿದೆ.

ಅಂದಹಾಗೆ, ಮೀರಾ ರಜಪೂತ್​ ಟ್ರೋಲ್​ ಆಗುತ್ತಿರುವುದು ಇದೇ ಮೊದಲೇನಲ್ಲ. ಈ ಹಿಂದೆ ಅವರು ತಮ್ಮ ಫೋಟೋವೊಂದಕ್ಕೆ split personality ಎಂದು ಕ್ಯಾಪ್ಷನ್​ ನೀಡಿದ್ದರು. ಆಗಲೂ ಅವರನ್ನು ನೆಟ್ಟಿಗರು ತರಾಟೆಗೆ ತೆಗೆದುಕೊಂಡಿದ್ದರು. ಈ ರೀತಿ ಕ್ಯಾಪ್ಷನ್​ಗಳನ್ನು ಬಳಸುವುದು ಮಾನಸಿಕ ರೋಗಿಗಳಿಗೆ ಅವಮಾನ ಮಾಡಿದಂತೆ ಎಂದು ಒಂದಷ್ಟು ಮಂದಿ ವಾದ ಮಾಡಿದ್ದರು. ಟ್ರೋಲ್ ಕಾಟ ಏನೇ ಇರಲಿ, ಮೀರಾ ರಜಪೂತ್​ ಅವರಿಗೆ ಸೋಶಿಯಲ್​ ಮೀಡಿಯಾದಲ್ಲಿ ದೊಡ್ಡ ಫ್ಯಾನ್ ಫಾಲೋಯಿಂಗ್​ ಇದೆ. ಇನ್​ಸ್ಟಾಗ್ರಾಮ್​ನಲ್ಲಿ ಅವರನ್ನು 27 ಲಕ್ಷ ಮಂದಿ ಫಾಲೋ ಮಾಡುತ್ತಿದ್ದಾರೆ.

ಬಾಲಿವುಡ್​ನ ಸ್ಟಾರ್​ ನಟ ಶಾಹಿದ್​ ಕಪೂರ್​ ಜೊತೆ 2015ರಲ್ಲಿ ಮೀರಾ ರಜಪೂತ್​ ಮದುವೆ ನಡೆದಿತ್ತು. ಈ ಜೋಡಿಗೆ ಇಬ್ಬರು ಮಕ್ಕಳಿದ್ದಾರೆ. ಸೋಶಿಯಲ್​ ಮೀಡಿಯಾದಲ್ಲಿ ಹೆಚ್ಚು ಆ್ಯಕ್ಟೀವ್​ ಆಗಿರುವ ಮೀರಾ ಫಿಟ್ನೆಸ್​, ಸೌಂದರ್ಯಾ, ಮಕ್ಕಳ ಪಾಲನೆ ಮುಂತಾದ ವಿಚಾರಗಳ ಬಗ್ಗೆ ಆಗಾಗ ಟಿಪ್ಸ್​ ಹಂಚಿಕೊಳ್ಳುತ್ತಿರುತ್ತಾರೆ.

ಇದನ್ನೂ ಓದಿ:

ಉದ್ದನೆಯ ಕೂದಲು, ವಿಚಿತ್ರ ಬಟ್ಟೆ, ಅರ್ಧ ಕೆಜಿ ಚಿನ್ನ; ಟ್ರೋಲ್​ ಆದ ರಣವೀರ್​ ಸಿಂಗ್​ ಹೊಸ ಅವತಾರ

ರಿಯಾಲಿಟಿ ಶೋ ಸುಳ್ಳು ಅನ್ನೋದಕ್ಕೆ ಮತ್ತೊಂದು ಸಾಕ್ಷಿ? ಹಿಗ್ಗಾಮುಗ್ಗ ಟ್ರೋಲ್​ ಮಾಡಿದ ನೆಟ್ಟಿಗರು