ನಡುಕ ಹುಟ್ಟಿಸುವ ಹಾರರ್​ ಸಿನಿಮಾ ‘ಶೈತಾನ್​’; ಒಟಿಟಿ ಎಂಟ್ರಿಗೆ ಸಮಯ ನಿಗದಿ

ಈ ವರ್ಷ ಬಿಡುಗಡೆಯಾಗಿ ಸೂಪರ್ ಹಿಟ್​ ಎನಿಸಿಕೊಂಡ ಕೆಲವೇ ಸಿನಿಮಾಗಳಲ್ಲಿ ‘ಶೈತಾನ್​’ (Shaitaan) ಕೂಡ ಇದೆ. ಅಜಯ್​ ದೇವಗನ್​ (Ajay Devgn), ಆರ್​. ಮಾಧವನ್​, ಜ್ಯೋತಿಕಾ, ಜಾನಕಿ ಬೋಡಿವಾಲಾ ಮುಂತಾದವರು ನಟಿಸಿದ ಈ ಸಿನಿಮಾದಲ್ಲಿ ಹಾರರ್​​ ಕಥಾಹಂದರ ಇದೆ. ಯುವತಿಯನ್ನು ವಶೀಕರಣ ಮಾಡುವ ಕಥೆಯನ್ನು ಕೇಂದ್ರವಾಗಿಟ್ಟುಕೊಂಡು ‘ಶೈತಾನ್​’ ಸಿನಿಮಾ ಮೂಡಿಬಂದಿದೆ. ಚಿತ್ರಮಂದಿರದಲ್ಲಿ ಗೆದ್ದು ಬೀಗಿದ ಈ ಸಿನಿಮಾ ಈಗ ಒಟಿಟಿಗೆ (Shaitaan OTT Release) ಎಂಟ್ರಿ ನೀಡುತ್ತಿದೆ. ನೆಟ್​ಫ್ಲಿಕ್ಸ್​ನಲ್ಲಿ ಮೇ 4ರಿಂದ ‘ಶೈತಾನ್​’ ಸಿನಿಮಾ ವೀಕ್ಷಣೆಗೆ ಲಭ್ಯವಾಗಲಿದೆ.

ಟ್ರೇಲರ್​ ಬಿಡುಗಡೆ ಆಗುವ ತನಕ ‘ಶೈತಾನ್​’ ಬಗ್ಗೆ ಅಷ್ಟೇನೂ ಹೈಪ್​ ಇರಲಿಲ್ಲ. ಆದರೆ ಟ್ರೇಲರ್​ ರಿಲೀಸ್​ ಆದ ನಂತರ ಪ್ರೇಕ್ಷಕರಲ್ಲಿ ಭಾರಿ ನಿರೀಕ್ಷೆ ಮೂಡಿತು. ಹಾರರ್​ ಸಿನಿಮಾಗಳನ್ನು ಇಷ್ಟಪಡುವ ಪ್ರೇಕ್ಷಕರಿಗೆ ‘ಶೈತಾನ್​’ ಅತ್ಯುತ್ತಮ ಆಯ್ಕೆ. ಮಾರ್ಚ್​ 8ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆದ ಈ ಚಿತ್ರಕ್ಕೆ ಬರೋಬ್ಬರಿ 149 ಕೋಟಿ ರೂಪಾಯಿ ಕಲೆಕ್ಷನ್​ ಆಯಿತು.

ಇದನ್ನೂ ಓದಿ: ನೆಟ್​ಫ್ಲಿಕ್ಸ್​ ಟ್ರೆಂಡಿಂಗ್​ನಲ್ಲಿ ನಂಬರ್​ ಒನ್​ ಆಯ್ತು ‘ಲಾಪತಾ ಲೇಡೀಸ್​’ ಸಿನಿಮಾ

ಕೆಲವರು ಥಿಯೇಟರ್​ನಲ್ಲಿ ‘ಶೈತಾನ್​’ ಚಿತ್ರವನ್ನು ಮಿಸ್​ ಮಾಡಿಕೊಂಡಿದ್ದಾರೆ. ಅಂಥವರೆಲ್ಲ ಒಟಿಟಿಯಲ್ಲಿ ನೋಡಲು ಕಾದಿದ್ದರು. ಈಗ ಒಟಿಟಿ ಪ್ರೇಕ್ಷಕರಿಗೆ ಚಿತ್ರತಂಡದ ಕಡೆಯಿಂದ ಗುಡ್​ ನ್ಯೂಸ್​ ಸಿಕ್ಕಿದೆ. ‘ಶೈತಾನ್​’ ಸಿನಿಮಾದ ಒಟಿಟಿ ಪ್ರಸಾರ ಹಕ್ಕುಗಳು ನೆಟ್​ಫ್ಲಿಕ್​ ಪಾಲಾಗಿವೆ. ಮೇ 3ರ ಮಧ್ಯ ರಾತ್ರಿಯಿಂದಲೇ ಇದರ ಪ್ರಸಾರ ಆರಂಭ ಆಗಲಿದೆ. ಒಟಿಟಿ ಪ್ರೇಕ್ಷಕರು ಈ ಚಿತ್ರಕ್ಕೆ ಯಾವ ರೀತಿ ಪ್ರತಿಕ್ರಿಯೆ ನೀಡುತ್ತಾರೆ ಎಂಬುದನ್ನು ತಿಳಿಯುವ ಸಮಯ ಬಂದಿದೆ.

ಮಗಳನ್ನು ರಕ್ಷಿಸಿಕೊಳ್ಳಲು ಹೋರಾಡುವ ತಂದೆಯ ಪಾತ್ರವನ್ನು ಅಜಯ್​ ದೇವಗನ್​ ಅವರು ‘ದೃಶ್ಯಂ’ ಸಿನಿಮಾದಲ್ಲಿ ಮಾಡಿದ್ದರು. ಈಗ ‘ಶೈತಾನ್​’ ಸಿನಿಮಾದಲ್ಲೂ ತಂದೆ-ಮಗಳ ಪಾತ್ರ ಹೈಲೈಟ್​ ಆಗಿದೆ. ಆದರೆ ಈ ಸಿನಿಮಾದಲ್ಲಿ ಹಾರರ್​ ಅಂಶಗಳು ಹೈಲೈಟ್​ ಆಗಿವೆ. ವಶೀಕರಣಕ್ಕೆ ಒಳಗಾದ ಮಗಳನ್ನು ರಕ್ಷಿಸಿಕೊಳ್ಳಲು ಕಥಾನಾಯಕ ಕಷ್ಟಪಡತ್ತಾನೆ. ಮಗಳ ಪಾತ್ರಕ್ಕೆ ಜಾನಕಿ ಬೋಡಿವಾಲ ಬಣ್ಣ ಹಚ್ಚಿದ್ದಾರೆ. ವಿಲನ್​ ಪಾತ್ರದಲ್ಲಿ ಆರ್​. ಮಾಧವನ್​ ಕಾಣಿಸಿಕೊಂಡಿದ್ದಾರೆ. ನಟ ಅಜಯ್​ ದೇವಗನ್​ ಅವರಿಗೆ ಈ ಸಿನಿಮಾದಿಂದ ಗೆಲುವು ಸಿಕ್ಕಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.