ಓಟಿಟಿ ಮೇಲೆ ಹೆಚ್ಚಿತು ಸಿನಿ ಮಂದಿಯ ಪ್ರೀತಿ; ಬಹುನಿರೀಕ್ಷಿತ ಸಿನಿಮಾಗಳು ಬ್ಯಾಕ್ ಟು ಬ್ಯಾಕ್ ರಿಲೀಸ್
ಡಾಲಿ ಧನಂಜಯ, ವಿಕ್ಕಿ ಕೌಶಾಲ್, ಜ್ಯೋತಿಕಾ, ತಾಪ್ಸೀ ಪನ್ನು ಮುಂತಾದ ನಟ-ನಟಿಯರು ಓಟಿಟಿ ಪ್ರೇಕ್ಷಕರ ಮೇಲೆ ಭರವಸೆ ಇಟ್ಟುಕೊಂಡಿದ್ದಾರೆ. ಅಕ್ಟೋಬರ್ ತಿಂಗಳಲ್ಲಿ ಕೆಲವು ಬಹುನಿರೀಕ್ಷಿತ ಚಿತ್ರಗಳು ಓಟಿಟಿ ಮೂಲಕ ಜನರನ್ನು ರಂಜಿಸಲು ಬರುತ್ತಿವೆ.
ಚಿತ್ರಮಂದಿರಗಳಲ್ಲಿ ಕುಳಿತು, ನೂರಾರು ಪ್ರೇಕ್ಷಕರ ಜೊತೆ ಸಿನಿಮಾ ನೋಡುವ ಮಜವೇ ಬೇರೆ. ಆದರೆ ಬದಲಾದ ಈ ಕಾಲಘಟ್ಟದಲ್ಲಿ ಓಟಿಟಿ ಮೇಲೆ ಜನರು ಹೆಚ್ಚು ಆಸಕ್ತಿ ತೋರುತ್ತಿದ್ದಾರೆ. ಮನೆಯಲ್ಲೇ ಕುಳಿತು ಹೊಸ ಹೊಸ ಸಿನಿಮಾ ನೋಡಬೇಕು ಎಂದು ಬಯಸುವ ಪ್ರೇಕ್ಷಕರನ್ನೇ ಟಾರ್ಗೆಟ್ ಆಗಿಟ್ಟುಕೊಂಡು ಅನೇಕ ಓಟಿಟಿ ಪ್ಲಾಟ್ಫಾರ್ಮ್ಗಳು ಕೆಲಸ ಮಾಡುತ್ತಿವೆ. ಎಲ್ಲ ಭಾಷೆಯ ಚಿತ್ರರಂಗಗಳಲ್ಲೂ ಕೆಲವು ನಿರ್ಮಾಪಕರು ಓಟಿಟಿ ರಿಲೀಸ್ಗೆ ಹೆಚ್ಚು ಮಹತ್ವ ನೀಡುತ್ತಿದ್ದಾರೆ. ಪರಿಣಾಮವಾಗಿ ಅನೇಕ ಚಿತ್ರಗಳು ಆನ್ಲೈನ್ ಮೂಲಕ ಬ್ಯಾಕ್ ಟು ಬ್ಯಾಕ್ ಬಿಡುಗಡೆ ಆಗುತ್ತಿವೆ.
ಅ.22ಕ್ಕೆ ‘ರತ್ನನ್ ಪ್ರಪಂಚ’
ನಟ ಡಾಲಿ ಧನಂಜಯ ಅವರು ಎಲ್ಲ ಬಗೆಯ ಪಾತ್ರಗಳನ್ನೂ ಮಾಡುತ್ತ ಮುನ್ನುಗ್ಗುತ್ತಿದ್ದಾರೆ. ಅವರ ಹೊಸ ಸಿನಿಮಾ ‘ರತ್ನನ್ ಪ್ರಪಂಚ’ ಸಾಕಷ್ಟು ನಿರೀಕ್ಷೆ ಮೂಡಿಸಿದೆ. ಇದರ ಟ್ರೇಲರ್ಗೆ ಸಿನಿಪ್ರಿಯರಿಂದ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ. ಅ.22ರಂದು ಅಮೇಜಾನ್ ಪ್ರೈಂ ವಿಡಿಯೋ ಮೂಲಕ ‘ರತ್ನನ್ ಪ್ರಪಂಚ’ ಬಿಡುಗಡೆ ಆಗಲಿದೆ. ಈ ಚಿತ್ರಕ್ಕೆ ರೋಹಿತ್ ಪದಕಿ ನಿರ್ದೇಶನ ಮಾಡಿದ್ದಾರೆ.
ವಿಕ್ಕಿ ಕೌಶಕ್ ಅಭಿಮಾನಿಗಳಿಗೆ ಸರ್ದಾರ್ ಉದ್ಧಮ್:
ಬಾಲಿವುಡ್ನಲ್ಲಿ ನಟ ವಿಕ್ಕಿ ಕೌಶಲ್ ಯಶಸ್ವಿ ಹೀರೋ ಆಗಿದ್ದಾರೆ. ‘ಉರಿ’ ಚಿತ್ರದ ಬಳಿಕ ಅವರು ಸ್ಟಾರ್ ನಟನಾಗಿದ್ದಾರೆ. ವಿಕ್ಕಿ ನಟಿಸಿರುವ ‘ಸರ್ದಾರ್ ಉದ್ಧಮ್’ ಸಿನಿಮಾ ಅ.16ರಂದು ಅಮೇಜಾನ್ ಪ್ರೈಂ ವಿಡಿಯೋದಲ್ಲಿ ಪ್ರಸಾರ ಆರಂಭಿಸಲಿದೆ. ಸ್ವಾತಂತ್ರ್ಯ ಹೋರಾಟಗಾರ ಉದ್ಧಮ್ ಸಿಂಗ್ ಜೀವನವನ್ನು ಆಧರಿಸಿ ಈ ಸಿನಿಮಾ ತಯಾರಾಗಿದೆ. ಈ ಚಿತ್ರವನ್ನು ನೋಡಲು ಅಭಿಮಾನಿಗಳು ಕಾಯುತ್ತಿದ್ದಾರೆ.
‘ರಶ್ಮಿ ರಾಕೆಟ್’ಗಾಗಿ ತಾಪ್ಸೀ ಫ್ಯಾನ್ಸ್ ಕಾತರ:
ನಟಿ ತಾಪ್ಸೀ ಪನ್ನು ಅವರು ಸಿನಿಮಾಗಳ ಆಯ್ಕೆಯಲ್ಲಿ ತಮ್ಮತನ ಕಾಯ್ದುಕೊಂಡಿದ್ದಾರೆ. ಬರೀ ಗ್ಲಾಮರ್ಗೆ ಸೀಮಿತವಾಗದೇ, ಗಟ್ಟಿ ವಸ್ತುವಿಷಯ ಇರುವಂತಹ ಸಿನಿಮಾಗಳಲ್ಲಿ ಅವರು ನಟಿಸುತ್ತಿದ್ದಾರೆ. ತಾಪ್ಸೀ ಅಭಿನಯದ ‘ರಶ್ಮಿ ರಾಕೆಟ್’ ಚಿತ್ರ ಅ.15ರಂದು ಜೀ5 ಮೂಲಕ ವೀಕ್ಷಣೆಗೆ ಲಭ್ಯವಾಗಲಿದೆ. ಈ ಸಿನಿಮಾಗಾಗಿ ಅವರು ಬಾಡಿ ಟ್ರಾನ್ಸ್ಫಾರ್ಮೇಷನ್ ಮಾಡಿಕೊಂಡಿದ್ದಾರೆ.
ಓಟಿಟಿಯಲ್ಲಿ ಜ್ಯೋತಿಕಾ ಮತ್ತೆ ಅದೃಷ್ಟ ಪರೀಕ್ಷೆ:
ಕಾಲಿವುಡ್ ನಟಿ ಜ್ಯೋತಿಕಾ ಅವರು ಕಳೆದ ವರ್ಷ ‘ಪೊನ್ಮಗಳ್ ವಂದಾಳ್’ ಚಿತ್ರದಲ್ಲಿ ನಟಿಸಿದ್ದರು. ಆ ಸಿನಿಮಾ ಅಮೇಜಾನ್ ಪ್ರೈಂ ವಿಡಿಯೋ ಮೂಲಕ ಬಿಡುಗಡೆಯಾಗಿತ್ತು. ಈಗ ಅವರು ನಟಿಸಿರುವ ಹೊಸ ಚಿತ್ರ ‘ಉಡನ್ಪಿರಪ್ಪೆ’ ಕೂಡ ಅಮೇಜಾನ್ ಪ್ರೈಂ ವಿಡಿಯೋನಲ್ಲಿ ಅ.14ರಿಂದ ವೀಕ್ಷಣೆಗೆ ಲಭ್ಯವಾಗುತ್ತಿದೆ. ಈಗಾಗಲೇ ಟ್ರೇಲರ್ ಮೂಲಕ ಈ ಸಿನಿಮಾ ಗಮನ ಸೆಳೆದಿದೆ.
ಸನ್ನಿ ಕೌಶಾಲ್, ರಾಧಿಕಾ ಮದನ್, ಮೋಹಿತ್ ರೈನಾ ಮುಂತಾದವರು ನಟಿಸಿರುವ ‘ಶಿದ್ಧತ್’ ಸಿನಿಮಾ ಡಿಸ್ನಿ ಪ್ಲಸ್ ಹಾಟ್ ಸ್ಟಾರ್ನಲ್ಲಿ ಅ.1ರಂದು ಬಿಡುಗಡೆ ಆಗಿದೆ. ಈ ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ.
ಇದನ್ನೂ ಓದಿ:
ಸೋತು ಸುಣ್ಣವಾದ ಶಾರುಖ್ಗೆ ಈಗ ಓಟಿಟಿ ಅನಿವಾರ್ಯ; ಸತ್ಯ ಒಪ್ಪಿಕೊಂಡು ವಿಡಿಯೋ ಶೇರ್ ಮಾಡಿದ ನಟ
ನ.2ರಂದು ‘ಜೈ ಭೀಮ್’ ಸಿನಿಮಾ ರಿಲೀಸ್; ಮತ್ತೆ ಓಟಿಟಿ ಮೇಲೆ ಭರವಸೆ ಇಟ್ಟ ಸೂರ್ಯ