55 ರೂಪಾಯಿ ಬಾಡಿಗೆ ರೂಮಿನಲ್ಲಿ ವಾಸವಾಗಿದ್ದ ಸಲ್ಮಾನ್​ ಖಾನ್​ ತಂದೆ ಸಲೀಂ ಖಾನ್

ನಟ ಸಲ್ಮಾನ್​ ಖಾನ್​ ಅವರ ಬಳಿ ಬರೋಬ್ಬರಿ 2900 ಕೋಟಿ ರೂಪಾಯಿಗೂ ಅಧಿಕ ಹಣ ಇದೆ. ಭಾರತದ ಶ್ರೀಮಂತ ನಟರಲ್ಲಿ ಅವರು ಕೂಡ ಒಬ್ಬರು. ಸಲ್ಮಾನ್​ ಖಾನ್​ ಕುಟುಂಬದ ಶ್ರೀಮಂತಿಕೆ ಹೆಚ್ಚುತ್ತಲೇ ಇದೆ. ಆದರೆ ಒಂದು ಕಾಲದಲ್ಲಿ ಅವರ ಫ್ಯಾಮಿಲಿ ಬಡತನದಲ್ಲಿತ್ತು! ಹೌದು, ಈಗ ಬಹುಕೋಟಿ ರೂಪಾಯಿ ಬೆಲೆ ಬಾಳುವ ಬಂಗಲೆಗಳನ್ನು ಹೊಂದಿರುವ ಸಲ್ಮಾನ್​ ಖಾನ್​ ಅವರ ತಂದೆ ಸಲೀಂ ಖಾನ್​ ಕೇವಲ 55 ರೂಪಾಯಿ ಬಾಡಿಗೆಯ ರೂಮ್​ನಲ್ಲಿ ವಾಸವಾಗಿದ್ದರು. ‘ಆ್ಯಂಗ್ರಿ ಯಂಗ್​ ಮೆನ್​’ ಸಾಕ್ಷ್ಯಚಿತ್ರದಲ್ಲಿ ಅವರು ಈ ವಿಷಯ ಬಹಿರಂಗ ಮಾಡಿದ್ದಾರೆ.

ಬಾಲಿವುಡ್​ನ ಅನೇಕ ಸೂಪರ್​ ಹಿಟ್​ ಸಿನಿಮಾಗಳ ಹಿಂದೆ ಬರಹಗಾರನಾಗಿ ಕೆಲಸ ಮಾಡಿದವರು ಸಲೀಂ ಖಾನ್​. ಅವರ ಜೊತೆ ಜಾವೇದ್ ಅಖ್ತರ್ ಕೂಡ ಕೈ ಜೋಡಿಸಿದ್ದರು. ‘ಶೋಲೆ’ ರೀತಿಯ ಬ್ಲಾಕ್​ ಬಸ್ಟರ್​ ಸಿನಿಮಾಗಳ ಕಥೆ-ಚಿತ್ರಕಥೆ ಮೂಡಿಬಂದಿದ್ದು ಇದೇ ಸಲೀಂ-ಜಾವೇದ್​ ಜೋಡಿಯ ಲೇಖನದಲ್ಲಿ. ಈ ಸ್ಟಾರ್​ ಬರಹಗಾರರ ಜೀವನ ಮತ್ತು ಸಾಧನೆ ಬಗ್ಗೆ ‘ಆ್ಯಂಗ್ರಿ ಯಂಗ್​ ಮೆನ್​’ ಡಾಕ್ಯುಮೆಂಟರಿಯಲ್ಲಿ ವಿವರಿಸಲಾಗಿದೆ.

ಇಂದೋರ್​ನಿಂದ ಮುಂಬೈಗೆ ಬಂದಿದ್ದ ಸಲೀಂ ಖಾನ್​ ಅವರು ಕಷ್ಟ ದಿನಗಳನ್ನು ಕಂಡಿದ್ದರು. ಅವರು ಮುಂಬೈಗೆ ಹೋಗುವುದು ಅವರ ಅಣ್ಣನಿಗೆ ಇಷ್ಟ ಇರಲಿಲ್ಲ. ‘ನೀವು ಖಂಡಿತಾ ವಾಪಸ್​ ಓಡಿ ಬರುತ್ತೀಯ’ ಎಂದು ಅಣ್ಣ ಹೇಳಿದ್ದರು ಸಲೀಂ ಅವರ ಮನಸ್ಸಿನಲ್ಲಿ ಅಚ್ಚೊತ್ತಿತ್ತು. ಹಾಗಾಗಿ ಎಷ್ಟೇ ಕಷ್ಟ ಆದರೂ ಪರವಾಗಿಲ್ಲ, ವಾಪಸ್​ ಮುಂಬೈ ಬಿಟ್ಟು ಮನೆಗೆ ಹೋಗಬಾರದು ಎಂಬುದು ಸಲೀಂ ಹಠವಾಗಿತ್ತು.

ಇದನ್ನೂ ಓದಿ: ಬಾಲಿವುಡ್​ ದಿಗ್ಗಜರ ಸಾಕ್ಷ್ಯಚಿತ್ರದಲ್ಲಿ ರಾಕಿಂಗ್​ ಸ್ಟಾರ್​ ಯಶ್​; ಇದು ಯಶಸ್ಸು

ಆರಂಭದಲ್ಲಿ ತಮಗೆ ಸಿಕ್ಕ ಎಲ್ಲ ಅವಕಾಶಗಳನ್ನು ಸಲೀಂ ಖಾನ್​ ಒಪ್ಪಿಕೊಂಡರು. ನಂತರ ತಮಗೆ ನಟನೆಗಿಂತಲೂ ಕ್ಯಾಮೆರಾ ಹಿಂದೆ ಕೆಲಸ ಮಾಡುವ ಸಾಮರ್ಥ್ಯ ಚೆನ್ನಾಗಿದೆ ಎಂಬುದು ಅವರಿಗೆ ತಿಳಿಯಿತು. ಹಾಗಾಗಿ ಕಥೆ-ಚಿತ್ರಕಥೆ ಬರಹಗಾರನಾಗಿ ಮುಂದುವರಿಯಲು ಅವರು ನಿರ್ಧರಿಸಿದರು. ಜಾವೇದ್ ಅಖ್ತರ್​ ಜೊತೆ ಸೇರಿಕೊಂಡು ಸಲೀಂ ಖಾನ್​ ಅವರು ‘ಶೋಲೆ’, ‘ದೀವಾರ್​’, ‘ಝಂಜೀರ್​’, ‘ಡಾನ್​’, ‘ಮಿಸ್ಟರ್​ ಇಂಡಿಯಾ’ ಮುಂತಾದ ಸಿನಿಮಾಗಳಿಗೆ ಕಥೆ ಬರೆದರು. ಕನ್ನಡದ ‘ರಾಜ ನನ್ನ ರಾಜ’ ಮತ್ತು ‘ಪ್ರೇಮದ ಕಾಣಿಕೆ’ ಸಿನಿಮಾಗಳಿಗೆ ಕಥೆ ಬರೆದಿದ್ದು ಕೂಡ ಸಲೀಂ ಮತ್ತು ಜಾವೇದ್​.

‘ಆ್ಯಂಗ್ರಿ ಯಂಗ್​ ಮೆನ್​’ ಸಾಕ್ಷ್ಯಚಿತ್ರದಲ್ಲಿ ಯಶ್, ಸಲ್ಮಾನ್​ ಖಾನ್, ಕರಣ್​ ಜೋಹರ್​, ಆಮಿರ್​ ಖಾನ್​ ಮುಂತಾದ ನಟರ ಸಂದರ್ಶನ ಇದೆ. ‘ಅಮೇಜಾನ್​ ಪ್ರೈಂ ವಿಡಿಯೋ’ ಒಟಿಟಿಯಲ್ಲಿ ಆಗಸ್ಟ್​ 20ರಂದು ಈ ಡಾಕ್ಯುಮೆಂಟರಿ ಬಿಡುಗಡೆ ಆಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.