RRR Movie: ‘ಆರ್​ಆರ್​ಆರ್​’ ರಿಲೀಸ್ ಆಗಿ ಇಂದಿಗೆ ಒಂದು ವರ್ಷ; ರಾಜಮೌಳಿ ಸಿನಿಮಾ ಮಾಡಿದ ಸಾಧನೆಯ ವಿವರ ಇಲ್ಲಿದೆ

‘ಆರ್​ಆರ್​ಆರ್​’ ಸಿನಿಮಾ (RRR Movie) ರಿಲೀಸ್ ಆಗಿ ಇಂದಿಗೆ (ಮಾರ್ಚ್​ 24) ಒಂದು ವರ್ಷ. ಎಸ್​ಎಸ್​​ ರಾಜಮೌಳಿ ನಿರ್ದೇಶನದ, ಜೂ.ಎನ್​ಟಿಆರ್​, ರಾಮ್ ಚರಣ್ (Ram Charan), ಅಜಯ್ ದೇವಗನ್, ಆಲಿಯಾ ಭಟ್ ಮೊದಲಾದವರು ನಟಿಸಿದ ಈ ಸಿನಿಮಾ ಸೂಪರ್ ಹಿಟ್ ಆಯಿತು. ಸಾಮಾನ್ಯವಾಗಿ ಸಿನಿಮಾ ರಿಲೀಸ್ ಆದ ಒಂದು ತಿಂಗಳಿಗೆ ಸದ್ದು ಕಡಿಮೆ ಆಗಿ ಬಿಡುತ್ತದೆ. ಆದರೆ, ‘ಆರ್​ಆರ್​ಆರ್’ ಸಿನಿಮಾ ಒಂದು ವರ್ಷ ಕಳೆದರೂ ಪ್ರಚಲಿತದಲ್ಲಿದೆ. ಈ ಚಿತ್ರ ಮಾಡಿದ ಸಾಧನೆ ತುಂಬಾನೇ ದೊಡ್ಡದು. ಆ ಬಗ್ಗೆ ಇಲ್ಲಿದೆ ವಿವರ.

ಭರ್ಜರಿ ಕಲೆಕ್ಷನ್

‘ಆರ್​ಆರ್​ಆರ್​’ ಸಿನಿಮಾ ರಿಲೀಸ್ ಆಗಿ ಸೂಪರ್ ಹಿಟ್ ಆಯಿತು. ಮಾರ್ಚ್​ 23ರ (2022) ರಾತ್ರಿಯಿಂದಲೇ ಸಿನಿಮಾ ಪ್ರದರ್ಶನ ಕಾಣೋಕೆ ಆರಂಭವಾಯಿತು. ಇದರಿಂದ ಚಿತ್ರಕ್ಕೆ ಮೊದಲ ದಿನ ಭರ್ಜರಿ ಕಲೆಕ್ಷನ್ ಆಯಿತು. ಮೇಕಿಂಗ್, ಗ್ರಾಫಿಕ್ಸ್, ಸಾಹಸ ದೃಶ್ಯಗಳು ಚಿತ್ರದಲ್ಲಿ ಹೈಲೈಟ್ ಆಯಿತು. ಇದರಿಂದ ಸಿನಿಮಾ ಸೂಪರ್ ಹಿಟ್ ಆಯಿತು. ಕಳೆದ ವರ್ಷ ಜಪಾನ್​ನಲ್ಲಿ ರಿಲೀಸ್ ಆಗಿ ಸಿನಿಮಾ ಗೆದ್ದಿದೆ. ಚಿತ್ರದ ಒಟ್ಟಾರೆ ಗಳಿಕೆ 1200 ಕೋಟಿ ರೂಪಾಯಿ ಸಮೀಪಿಸಿದೆ.

ಬಾಲಿವುಡ್​ನಲ್ಲೂ ಸದ್ದು ಮಾಡಿದ ಸಿನಿಮಾ

‘ಆರ್​ಆರ್​ಆರ್​’ ಸಿನಿಮಾ ಬಾಲಿವುಡ್​ನಲ್ಲೂ ಸದ್ದು ಮಾಡಿತ್ತು. ಅಲ್ಲಿಯೂ ನೂರಾರು ಕೋಟಿ ರೂಪಾಯಿ ಗಳಿಕೆ ಮಾಡಿ ರಾಜಮೌಳಿ ಚಿತ್ರ ಭೇಷ್ ಎನಿಸಿಕೊಂಡಿತು. ‘ಬಾಹುಬಲಿ’ ಸರಣಿ ನೋಡಿ ರಾಜಮೌಳಿ ಅವರನ್ನು ಹಿಂದಿಯವರು ಮೆಚ್ಚಿಕೊಂಡಿದ್ದರು. ‘ಆರ್​ಆರ್​ಆರ್​’ ಚಿತ್ರದಿಂದ ಅವರ ಜನಪ್ರಿಯತೆ ದುಪ್ಪಟ್ಟಾಯಿತು.

ರಾಜಮೌಳಿಗೆ ಹಾಲಿವುಡ್ ಮಂದಿ ಮೆಚ್ಚುಗೆ

‘ಆರ್​ಆರ್​ಆರ್​’ ಚಿತ್ರವನ್ನು ಹಾಲಿವುಡ್ ಮಂದಿಯೂ ಮೆಚ್ಚಿಕೊಂಡಿದ್ದಾರೆ. ‘ಟೈಟಾನಿಕ್​’, ‘ಅವತಾರ್​’ ರೀತಿಯ ಸಿನಿಮಾ ನಿರ್ದೇಶನ ಮಾಡಿದ್ದ ಜೇಮ್ಸ್ ಕ್ಯಾಮೆರಾನ್ ಸೇರಿದಂತೆ ಅನೇಕರು ಚಿತ್ರವನ್ನು ನೋಡಿ ಹೊಗಳಿದರು.

‘ಆಸ್ಕರ್’ ಸಾಧನೆ

ಭಾರತದಲ್ಲೇ ಸಿದ್ಧವಾದ ಹಾಡಿಗೆ ಈವರೆಗೆ ಆಸ್ಕರ್ ಸಿಕ್ಕಿರಲಿಲ್ಲ. ‘ಆರ್​ಆರ್​ಆರ್​’ ಚಿತ್ರದ ‘ನಾಟು ನಾಟು..’ ಹಾಡಿಗೆ ಈ ಅವಾರ್ಡ್ ಸಿಕ್ಕಿತು. ಈ ತಿಂಗಳಲ್ಲಿ ನಡೆದ ಅಕಾಡೆಮಿ ಅವಾರ್ಡ್​ನಲ್ಲಿ ಈ ಚಿತ್ರದ ಹಾಡಿಗೆ ಪ್ರಶಸ್ತಿ ಸಿಕ್ಕಿತು. ಈ ಮೂಲಕ ರಾಜಮೌಳಿ ಇತಿಹಾಸ ನಿರ್ಮಿಸಿದರು. ಇದಲ್ಲದೆ, ಗೋಲ್ಡನ್ ಗ್ಲೋಬ್ ಮೊದಲಾದ ಪ್ರಶಸ್ತಿಗಳು ಚಿತ್ರಕ್ಕೆ ಸಿಕ್ಕಿತ್ತು.

ವರ್ಷ ಪೂರ್ತಿ ಪ್ರಚಲಿತದಲ್ಲಿದ್ದ ಸಿನಿಮಾ

‘ಆರ್​ಆರ್​ಆರ್​’ ಸಿನಿಮಾ ರಿಲೀಸ್ ಆಗಿ ಒಂದು ವರ್ಷ ಕಳೆದರೂ ಪ್ರಚಲಿತದಲ್ಲೇ ಇದೆ. ಜನರು ಈ ಚಿತ್ರವನ್ನು ಆಗಾಗ ನೆನಪಿಸಿಕೊಳ್ಳುವ ಘಟನೆ ನಡೆಯುತ್ತಲೇ ಇತ್ತು ಅನ್ನೋದು ವಿಶೇಷ.

ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ