ಆಶಿಕಾ ರಂಗನಾಥ್​ ಸಹೋದರಿ ಅನುಷಾ ಮದುವೆ; ಚಂದದ ಫೋಟೋಸ್​ ಹಂಚಿಕೊಂಡ ನಟಿ

ಖ್ಯಾತ ನಟಿ ಆಶಿಕಾ ರಂಗನಾಥ್​ (Ashika Ranganath) ಅವರ ಮನೆಯಲ್ಲಿ ಸಂಭ್ರಮದ ವಾತಾವರಣ ನಿರ್ಮಾಣ ಆಗಿದೆ. ಆಶಿಕಾ ಅವರ ಸಹೋದರಿ ಅನುಷಾ ರಂಗನಾಥ್​ (Anusha Ranganath) ಈಗ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಾರೆ. ರೆಸಾರ್ಟ್​ವೊಂದರಲ್ಲಿ ಕುಟುಂಬದವರು, ಸ್ನೇಹಿತರು ಮತ್ತು ಆಪ್ತರ ಸಮ್ಮುಖದಲ್ಲಿ ಈ ಮದುವೆ ನೆರವೇರಿದೆ. ಸಾಫ್ಟ್​ವೇರ್​ ಇಂಜಿನಿಯರ್​ ಆರ್​. ಶ್ರವಣ್​ ಎಂಬುವವರ ಜೊತೆ ಅನುಷಾ ರಂಗನಾಥ್​ ಅವರ ಮದುವೆ (Anusha Ranganath Marriage) ನೆರವೇರಿದೆ. ವಿವಾಹ ಸಮಾರಂಭದಲ್ಲಿ ಆಶಿಕಾ ರಂಗನಾಥ್​ ಅವರು ಖುಷಿಯಿಂದ ಭಾಗಿ ಆಗಿದ್ದಾರೆ. ಆ ಸಂದರ್ಭದ ಫೋಟೋಗಳನ್ನು ಅವರು ಸೋಶಿಯಲ್​ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.

ಆಶಿಕಾ ರಂಗನಾಥ್​ ರೀತಿಯೇ ಅವರ ಅಕ್ಕ ಅನುಷಾ ರಂಗನಾಥ್​ ಕೂಡ ನಟಿಯಾಗಿ ಗುರುತಿಸಿಕೊಂಡಿದ್ದಾರೆ. ಕಿರುತೆರೆ ಸೀರಿಯಲ್​ ಹಾಗೂ ಕನ್ನಡ ಕೆಲವು ಸಿನಿಮಾಗಳಲ್ಲಿ ನಟಿಸುವ ಮೂಲಕ ಅವರು ಜನರಿಗೆ ಪರಿಚಯ ಆಗಿದ್ದಾರೆ. ಈಗ ಅವರು ದಾಂಪತ್ಯ ಜೀವನಕ್ಕೆ ಎಂಟ್ರಿ ನೀಡಿದ್ದಾರೆ. ಆಶಿಕಾ ರಂಗನಾಥ್​ ಅವರ ಅಕ್ಕನ ವಿವಾಹಕ್ಕೆ ಚಂದನವನದ ಅನೇಕರು ಸಾಕ್ಷಿ ಆಗಿದ್ದಾರೆ.

ಸೋಶಿಯಲ್​ ಮೀಡಿಯಾದಲ್ಲಿ ಅನುಷಾ ರಂಗನಾಥ್​ ಅವರ ಮದುವೆ ಫೋಟೋಗಳು ವೈರಲ್​ ಆಗಿವೆ.

ಕಿರುತೆರೆ ಮತ್ತು ಹಿರಿತೆರೆ ಎರಡರಲ್ಲೂ ಅನುಷಾ ರಂಗನಾಥ್​​ ಅವರು ಕೆಲಸ ಮಾಡಿದ್ದಾರೆ. ‘ಲೈಫ್​ 360’, ‘10’, ‘ಒನ್ಸ್​ ಮೋರ್​ ಕೌರವ’, ‘ಅಂದವಾದ’, ‘ದಿ ಗ್ರೇಟ್​ ಸ್ಟೋರಿ ಆಫ್​ ಸೋಡಾಬುಡ್ಡಿ’ ಮುಂತಾದ ಸಿನಿಮಾಗಳಲ್ಲಿ ಅವರು ನಟಿಸಿದ್ದಾರೆ. ನಟನೆಯ ಮೂಲಕ ಅವರು ಗಮನ ಸೆಳೆದಿದ್ದಾರೆ. ವೈವಾಹಿಕ ಜೀವನ ಆರಂಭಿಸಿರುವ ಅವರಿಗೆ ಅಭಿಮಾನಿಗಳು, ಸೆಲೆಬ್ರಿಟಿಗಳು, ಆಪ್ತರು ಅಭಿನಂದನೆ ತಿಳಿಸುತ್ತಿದ್ದಾರೆ.

ಆಶಿಕಾಗಾಗಿ ಮತ್ತೆ ಮತ್ತೆ ‘ನಾ ಸಾಮಿ ರಂಗ’ ಚಿತ್ರ ನೋಡಿದ ಫ್ಯಾನ್ಸ್​

ಮದುವೆಗೂ ಮುನ್ನ ಅನುಷಾ ರಂಗನಾಥ್​ ಅವರು ಸ್ನೇಹಿತರಿಗಾಗಿ ಪಾರ್ಟಿ ಆಯೋಜಿಸಿದ್ದರು. ಆ ಸಂದರ್ಭದ ಫೋಟೋಗಳನ್ನು ಕೂಡ ಅವರ ಆಪ್ತರು ಹಂಚಿಕೊಂಡಿದ್ದಾರೆ. ಸುಷ್ಮಿತಾ ಗೌಡ, ತೇಜಸ್ವಿನಿ ಶರ್ಮಾ ಸೇರಿದಂತೆ ಹಲವ ಸೆಲೆಬ್ರಿಟಿಗಳು ಪಾರ್ಟಿಯಲ್ಲಿ ಭಾಗಿ ಆಗಿದ್ದರು. ಆಶಿಕಾ ರಂಗನಾಥ್​ ಅವರ ಜೀವನದಲ್ಲಿ ಎಲ್ಲವೂ ಶುಭವಾಗುತ್ತಿದೆ. ಇತ್ತೀಚೆಗೆ ಬಿಡುಗಡೆಯಾದ ತೆಲುಗಿನ ‘ನಾ ಸಾಮಿ ರಂಗ’ ಚಿತ್ರದಲ್ಲಿ ಅವರ ನಟನೆಗೆ ಮೆಚ್ಚುಗೆ ಸಿಕ್ಕಿದೆ. ಈಗ ಅಕ್ಕನ ಮದುವೆ ನೆರವೇರಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ