ಪಟಾಕಿ, ಹಾಲಿನ ಅಭಿಷೇಕ ಇಲ್ಲ; ಬಡಮಕ್ಕಳಿಗೆ ಪುಸ್ತಕ ಕೊಟ್ಟು ‘ಭಜರಂಗಿ 2’ ಸ್ವಾಗತಿಸಿದ ಹುಬ್ಬಳ್ಳಿಯ ಶಿವಣ್ಣನ ಫ್ಯಾನ್ಸ್​

ಸ್ಟಾರ್​ ಸಿನಿಮಾ ರಿಲೀಸ್​ ಆದರೆ ಥಿಯೇಟರ್​ ಮುಂದೆ ಹಬ್ಬದ ವಾತಾವರಣ ನಿರ್ಮಾಣ ಆಗುತ್ತದೆ. ಶಿವರಾಜ್​ಕುಮಾರ್ ಅಭಿನಯದ ‘ಭಜರಂಗಿ 2’ ಸಿನಿಮಾ ಇಂದು (ಅ.29) ಬಿಡುಗಡೆ ಆಗಿದ್ದು, ಎಲ್ಲೆಡೆ ಸಂಭ್ರಮ ಕಳೆಕಟ್ಟಿದೆ. ಬಹುತೇಕ ಎಲ್ಲ ಚಿತ್ರಮಂದಿರಗಳ ಎದುರು ಕಟೌಟ್​ಗೆ ಹಾಲಿನ ಅಭಿಷೇಕ ಮಾಡಿ, ಪಟಾಕಿ ಸಿಡಿಸಿ ಸಂಭ್ರಮಿಸಲಾಗಿದೆ. ಆದರೆ ಹುಬ್ಬಳ್ಳಿಯಲ್ಲಿರುವ ಶಿವಣ್ಣನ ಫ್ಯಾನ್ಸ್​ ಹೊಸ ಹಾದಿ ಹಿಡಿದಿದ್ದಾರೆ. ಬಡಮಕ್ಕಳಿಗೆ ಪಠ್ಯಪುಸ್ತಕ ವಿತರಿಸುವ ಮೂಲಕ ‘ಭಜರಂಗಿ 2’ ಚಿತ್ರವನ್ನು ಭರ್ಜರಿಯಾಗಿ ಸ್ವಾಗತಿಸಿದ್ದಾರೆ. ಅವರ ಈ ಕೆಲಸ ಎಲ್ಲರಿಗೂ ಮಾದರಿ ಆಗುವಂತಿದೆ.

‘ಜೈ ರಾಜವಂಶ’ ಅಭಿಮಾನಿಗಳಿಂದ ಈ ಮಹತ್ವದ ಕಾರ್ಯ ಆಗಿದೆ. ಒಳ್ಳೆಯ ಕೆಲಸದ ಮೂಲಕ ಅವರು ಅಭಿಮಾನ ಮೆರೆದಿದ್ದಾರೆ. ಹಾರ, ಪಟಾಕಿ, ಹಾಲಿನ ಅಭಿಷೇಕಕ್ಕೆ ದುಂದು ವೆಚ್ಚ ಮಾಡುವ ಬದಲು ಸಮಾಜಮುಖಿ ಕೆಲಸದ ಮೂಲಕ ‘ಹ್ಯಾಟ್ರಿಕ್​ ಹೀರೋ’ಗೆ ಹೆಮ್ಮೆ ತರುವಂತೆ ಮಾಡಿದ್ದಾರೆ ಅವರ ಫ್ಯಾನ್ಸ್​. ಕನಸು ಎಂಬ ಗ್ರಂಥಾಲಯ ಹಾಗೂ ಸ್ಪರ್ಧಾತ್ಮಕ ಪರೀಕ್ಷಾ ಅಧ್ಯಯನ ಕೇಂದ್ರಕ್ಕೆ ಪುಸ್ತಕ ವಿತರಣೆ ಮಾಡಲಾಗಿದೆ. ಇದರಿಂದ ಬಡಮಕ್ಕಳ ವಿದ್ಯಾಭ್ಯಾಸಕ್ಕೆ ಅನುಕೂಲ ಆಗಲಿದೆ. ಈ ಪುಸ್ತಕಗಳು ಸಾವಿರಾರು ರೂಪಾಯಿ ಮೌಲ್ಯದ್ದಾಗಿವೆ. ವಿವಿಧ ಪಠ್ಯ ಹಾಗೂ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಸಂಬಂಧಿಸಿದ ಪುಸ್ತಕಗಳನ್ನು ನೀಡಲಾಗಿದೆ.

ಹುಬ್ಬಳ್ಳಿಯ ಈ ಅಭಿಮಾನಿಗಳ ಕೆಲಸ ನಿಜಕ್ಕೂ ಶ್ಲಾಘನೀಯ. ಸಂಭ್ರಮದ ನೆಪದಲ್ಲಿ ಹಾಲಿನ ಅಭಿಷೇಕ, ಹಾರ, ಪಟಾಕಿ ಮುಂತಾದ ವಸ್ತುಗಳಿಗೆ ದುಡ್ಡು ಖರ್ಚು ಮಾಡಿದರೆ ಆ ಸಂಭ್ರಮ ಒಂದೇ ದಿನಕ್ಕೆ ಮುಗಿದುಹೋಗುತ್ತದೆ. ಆದರೆ ಅದೇ ದುಡ್ಡಿನಲ್ಲಿ ಶಿವಣ್ಣನ ಅಭಿಮಾನಕ್ಕಾಗಿ ಈ ರೀತಿ ಪಠ್ಯ ಪುಸ್ತಕಗಳನ್ನು ವಿತರಿಸಿದರೆ ಅದರಿಂದ ಎಷ್ಟೋ ಮಕ್ಕಳ ಭವಿಷ್ಯಕ್ಕೆ ಅನುಕೂಲ ಆಗುತ್ತದೆ. ಅಂಥ ಕೆಲಸ ಮಾಡಿರುವ ಹುಬ್ಬಳಿಯ ಶಿವರಾಜ್​ಕುಮಾರ್​ ಅಭಿಮಾನಿಗಳು​ ಎಲ್ಲರಿಗೂ ಮಾದರಿ ಆಗಿದ್ದಾರೆ. ಹೀಗೆ ಅರ್ಥಪೂರ್ಣವಾಗಿ ‘ಭಜರಂಗಿ 2’ ಚಿತ್ರವನ್ನು ಸ್ವಾಗತಿಸಲಾಗಿದೆ.

ಈ ಸಿನಿಮಾಗೆ ನಿರ್ದೇಶಕ ಎ. ಹರ್ಷ ಆ್ಯಕ್ಷನ್​-ಕಟ್​ ಹೇಳಿದ್ದಾರೆ. ಭಾವನಾ ಮೆನನ್​​, ಭಜರಂಗಿ ಲೋಕಿ, ಶ್ರುತಿ, ಚೆಲುವರಾಜು, ಕುರಿ ಪ್ರತಾಪ್​ ಮುಂತಾದವರು ಅಭಿನಯಿಸಿದ್ದಾರೆ. ತಾಂತ್ರಿಕವಾಗಿ ‘ಭಜರಂಗಿ 2’ ಶ್ರೀಮಂತವಾಗಿ ಮೂಡಿಬಂದಿದೆ. ಚಿತ್ರಕ್ಕೆ ಎಲ್ಲೆಡೆಯಿಂದ ಉತ್ತಮ ಪ್ರತಿಕ್ರಿಯೆ ಸಿಗುತ್ತಿದೆ. ಬೆಂಗಳೂರಿನಲ್ಲಿ ಅಭಿಮಾನಿಗಳ ಜೊತೆ ಕುಳಿತು ಶಿವರಾಜ್​ಕುಮಾರ್​ ಫಸ್ಟ್​ ಡೇ ಫಸ್ಟ್​ ಶೋ ನೋಡಿದ್ದಾರೆ.

ಇದನ್ನೂ ಓದಿ:

Bhajarangi 2 Movie Review: ಫ್ಯಾಂಟಸಿ ಲೋಕದ ‘ಭಜರಂಗಿ 2’ ಕಥೆಯಲ್ಲಿ ಶಿವಣ್ಣನ ಎನರ್ಜಿಯೇ ಹೈಲೈಟ್

Bhajarangi 2: ಫ್ಯಾನ್ಸ್​ ಜತೆ ಕುಳಿತು ‘ಭಜರಂಗಿ 2’ ನೋಡಿದ ಶಿವಣ್ಣನ ಮೊದಲ ಪ್ರತಿಕ್ರಿಯೆ ಏನು?