‘ದೃಶ್ಯಗಳನ್ನು ರೆಕಾರ್ಡ್ ಮಾಡಬೇಡಿ’: ಟಾಕ್ಸಿಕ್ ಬಿಡುಗಡೆಗೂ ಮುನ್ನ ಜನರಿಗೆ ಯಶ್ ಮನವಿ
‘ರಾಕಿಂಗ್ ಸ್ಟಾರ್’ ಯಶ್ ಅವರು ‘ಟಾಕ್ಸಿಕ್’ ಸಿನಿಮಾದ ಬಿಡುಗಡೆಗೂ ಮುನ್ನ ಅಭಿಮಾನಿಗಳಲ್ಲಿ ವಿಶೇಷ ಮನವಿ ಮಾಡಿಕೊಂಡಿದ್ದಾರೆ. ಚಿತ್ರಮಂದಿರದಲ್ಲಿ ಸಿನಿಮಾ ನೋಡಲು ಬರುವ ಪ್ರೇಕ್ಷಕರು ಯಾವುದೇ ದೃಶ್ಯಗಳನ್ನು ಮೊಬೈಲ್ನಲ್ಲಿ ರೆಕಾರ್ಡ್ ಮಾಡಬಾರದು ಎಂದು ಅವರು ವಿನಂತಿಸಿಕೊಂಡಿದ್ದಾರೆ. ಆಗಸ್ಟ್ 26ರಂದು ‘ಟಾಕ್ಸಿಕ್’ ಚಿತ್ರ ವಿಶ್ವಾದ್ಯಂತ ತೆರೆಕಾಣುತ್ತಿದೆ.
Updated on: Aug 25, 2026 | 9:44 PM
ಭಾರಿ ನಿರೀಕ್ಷೆ ಮೂಡಿಸಿರುವ ‘ಟಾಕ್ಸಿಕ್’ (Toxic) ಸಿನಿಮಾ ಭರ್ಜರಿಯಾಗಿ ತೆರೆಕಾಣುತ್ತಿದೆ. ಈ ಸಿನಿಮಾದ ಮೇಲೆ ಜನರಿಗೆ ಇರುವ ಕ್ರೇಜ್ ಅಷ್ಟಿಷ್ಟಲ್ಲ. ಮೊದಲ ದಿನ ಮೊದಲ ಶೋ ನೋಡಿ ಎಂಜಾಯ್ ಮಾಡಲು ಲಕ್ಷಾಂತರ ಅಭಿಮಾನಿಗಳು ಸಜ್ಜಾಗಿದ್ದಾರೆ. ಸಿನಿಮಾದ ಬಿಡುಗಡೆಗೆ ಕೆಲವೇ ಗಂಟೆಗಳು ಬಾಕಿ ಇರುವಾಗ ಯಶ್ ಅವರು ಸೋಶಿಯಲ್ ಮೀಡಿಯಾ ಮೂಲಕ ಪ್ರೇಕ್ಷಕರಲ್ಲಿ ಮನವಿ ಮಾಡಿಕೊಂಡಿದ್ದಾರೆ. ಚಿತ್ರಮಂದಿರಗಳಲ್ಲಿ ಯಾವುದೇ ದೃಶ್ಯವನ್ನು ರೆಕಾರ್ಡ್ ಮಾಡಬಾರದು ಹಾಗೂ ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಳ್ಳಬಾರದು ಎಂದು ಯಶ್ (Yash) ಹೇಳಿದ್ದಾರೆ. ಅವರು ಮಾಡಿರುವ ಪೋಸ್ಟ್ ಈ ರೀತಿ ಇದೆ..
‘ಟಾಕ್ಸಿಕ್: ಎ ಫೇರಿ ಟೇಲ್ ಫಾರ್ ಗ್ರೋನ್-ಅಪ್ಸ್ ಎನ್ನುವುದು ನಮಗೆ ಕೇವಲ ಒಂದು ಸಿನಿಮಾವಷ್ಟೇ ಅಲ್ಲ; ಇದು ನಾವು ಪ್ರತಿ ಫ್ರೇಮ್, ಪ್ರತಿ ದೃಶ್ಯ ಹಾಗೂ ಪ್ರತಿಯೊಂದು ಆಯ್ಕೆಯನ್ನು ಅತ್ಯಂತ ಜಾಗರೂಕತೆಯಿಂದ ಸೃಷ್ಟಿಸಿ, ವರ್ಷಗಳ ಕಾಲ ನಮ್ಮ ಹೃದಯವನ್ನು ಧಾರೆ ಎರೆದು ಕಟ್ಟಿದ ಒಂದು ಜಗತ್ತು. ಈ ಸಿನಿಮಾದ ನಿರ್ಮಾಣ ಮತ್ತು ಬಿಡುಗಡೆಯ ಪ್ರಕ್ರಿಯೆಯಲ್ಲಿ ತೊಡಗಿಸಿಕೊಂಡಿರುವ ಪ್ರತಿಯೊಬ್ಬ ತಂತ್ರಜ್ಞ, ಕಲಾವಿದ ಮತ್ತು ತಾಂತ್ರಿಕ ವರ್ಗದ ಸಿಬ್ಬಂದಿಯ ಆಶಯವೂ ಒಂದೇ – ನೀವೆಲ್ಲರೂ ಚಿತ್ರಮಂದಿರಗಳಲ್ಲಿ ದೊಡ್ಡ ಪರದೆಯ ಮೇಲೆ ಒಂದು ಸಮುದಾಯವಾಗಿ ಜೊತೆಯಾಗಿ ಕುಳಿತು ಈ ಅದ್ಭುತ ಅನುಭವವನ್ನು ಪಡೆದುಕೊಳ್ಳಬೇಕು ಎಂಬುದಾಗಿದೆ.’
‘ಈ ಸಿನಿಮಾಗೆ ನೀವು ಈಗಾಗಲೇ ತೋರಿಸುತ್ತಿರುವ ಅಪಾರ ಪ್ರೀತಿ, ತೋರುತ್ತಿರುವ ಉತ್ಸಾಹ ಮತ್ತು ಮುಂಗಡ ಬುಕಿಂಗ್ ಮೂಲಕ ನೀಡುತ್ತಿರುವ ಭರ್ಜರಿ ಬೆಂಬಲಕ್ಕೆ ಧನ್ಯವಾದ ಹೇಳಲು ನಮಗೆ ಪದಗಳು ಸಾಲುತ್ತಿಲ್ಲ. ನಮ್ಮ ಈ ಇಡೀ ಪ್ರಯಾಣಿಯುದ್ದಕ್ಕೂ ನೀವು ನೀಡಿದ ನಿರಂತರ ಬೆಂಬಲಕ್ಕೆ ನಾವು ಸದಾ ಕೃತಜ್ಞರು. ಈ ಕ್ಷಣದಲ್ಲಿ ನಾವು ನಿಮ್ಮಲ್ಲಿ ಅತ್ಯಂತ ವಿನಮ್ರವಾಗಿ ಒಂದು ಮನವಿ ಮಾಡಿಕೊಳ್ಳುತ್ತಿದ್ದೇವೆ.’
View this post on Instagram
‘ಈ ಸಿನಿಮಾ ಯಾವ ರೀತಿ ನಿಮಗಾಗಿ ರೂಪುಗೊಂಡಿದೆಯೋ, ಅದೇ ರೀತಿಯಲ್ಲಿ ಪ್ರೇಕ್ಷಕರ ಮುಂದೆ ಅನಾವರಣಗೊಳ್ಳಲು ಬಿಡಿ. ಚಿತ್ರಮಂದಿರಗಳಲ್ಲಿ ಸಿನಿಮಾ ವೀಕ್ಷಿಸುವಾಗ ದೃಶ್ಯಗಳನ್ನು ರೆಕಾರ್ಡ್ ಮಾಡಿ ಸೋಶಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಬೇಡಿ. ಸಿನಿಮಾದ ಪ್ರಮುಖ ಕಥಾಹಂದರ ಹಾಗೂ ಟ್ವಿಸ್ಟ್‌ಗಳನ್ನು ಬಿಟ್ಟುಕೊಟ್ಟು ಇತರರ ವೀಕ್ಷಣೆಯ ಅನುಭವವನ್ನು ಕೆಡಿಸಬೇಡಿ.’
ಇದನ್ನೂ ಓದಿ: ‘ಟಾಕ್ಸಿಕ್’ ಹಿಂದಿ ಆವೃತ್ತಿಗೆ ಸಿಬಿಎಫ್‌ಸಿ ಕತ್ತರಿ: ಕೆಲವು ಸಂಭಾಷಣೆ, ಡ್ರಗ್ಸ್ ದೃಶ್ಯಕ್ಕೆ ಆಕ್ಷೇಪ
‘ನೀವು ಹೇಗೆ ಯಾವುದೇ ಸುಳಿವು ಇಲ್ಲದೆ ಈ ಹೊಸ ಪ್ರಪಂಚಕ್ಕೆ ಕಾಲಿಟ್ಟಿರೋ, ಅದೇ ರೀತಿ ನಿಮಗಿಂತ ನಂತರ ಬರುವ ಪ್ರೇಕ್ಷಕರೂ ಸಹ ಅದೇ ಕುತೂಹಲದೊಂದಿಗೆ ‘ಟಾಕ್ಸಿಕ್’ ಪ್ರಪಂಚವನ್ನು ಅನುಭವಿಸಲು ಅವಕಾಶ ಮಾಡಿಕೊಡಿ’ ಎಂದು ಯಶ್ ಅವರು ಪೋಸ್ಟ್ ಮಾಡಿದ್ದಾರೆ. ‘ಟಾಕ್ಸಿಕ್’ ಚಿತ್ರತಂಡದ ಬಹುತೇಕ ಕಲಾವಿದರು ಮತ್ತು ತಂತ್ರಜ್ಞರು ಇದೇ ಪೋಸ್ಟ್ ಹಂಚಿಕೊಂಡಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
