‘ಬಿಗ್ ಬಾಸ್ 20’ ಪ್ರೋಮೋ ವೈರಲ್: ಪ್ರೀತಿ, ಮೋಸದ ಬಗ್ಗೆ ಮಾತನಾಡಿ ಅಚ್ಚರಿ ನೀಡಿದ ನಟಿ

ಖ್ಯಾತ ಪಂಜಾಬಿ ಗಾಯಕ ಮತ್ತು ರ‍್ಯಾಪರ್ ಬಾದ್‌ಶಾ ಅವರಿಂದ ಇತ್ತೀಚೆಗಷ್ಟೇ ಬೇರ್ಪಟ್ಟ ಪತ್ನಿ, ನಟಿ ಇಶಾ ರಿಖಿ ಅವರು ತಮ್ಮ ಮದುವೆ ಮತ್ತು ವೈಯಕ್ತಿಕ ಜೀವನದ ಕುರಿತು ಹಬ್ಬುತ್ತಿರುವ ಹೊಸ ವದಂತಿಗಳ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ತಾವೇ ಅಧಿಕೃತವಾಗಿ ಹೇಳಿಕೆ ನೀಡುವವರೆಗೆ ಯಾವುದೇ ಆಧಾರರಹಿತ ಸುದ್ದಿಗಳನ್ನು ನಂಬಬೇಡಿ ಎಂದು ಅವರು ಮಾಧ್ಯಮ ಹಾಗೂ ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ. ‘ಬಿಗ್ ಬಾಸ್ 20’ ರಿಯಾಲಿಟಿ ಶೋ ಪ್ರೋಮೋ ಬಿಡುಗಡೆಯಾದ ಬೆನ್ನಲ್ಲೇ ಈ ವದಂತಿಗಳು ವ್ಯಾಪಕವಾಗಿ ಹರಡಿದ್ದು, ಈ ಕುರಿತು ಇಶಾ ಸೋಶಿಯಲ್ ಮೀಡಿಯಾದಲ್ಲಿ ಸ್ಪಷ್ಟನೆ ನೀಡಿದ್ದಾರೆ.

ಇನ್ಸ್ಟಾಗ್ರಾಮ್‌ನಲ್ಲಿ ಸುದೀರ್ಘ ಟಿಪ್ಪಣಿ ಹಂಚಿಕೊಂಡ ಇಶಾ ರಿಖಿ, ‘ನನ್ನ ಮದುವೆಯ ಬಗ್ಗೆ ಅನೇಕ ವದಂತಿಗಳು ಹರಿದಾಡುತ್ತಿವೆ. ಕೆಲವು ಮಾಧ್ಯಮಗಳಲ್ಲಿ ಪ್ರಕಟವಾಗುತ್ತಿರುವ ವರದಿಗಳನ್ನು ನೋಡಿ ನನಗೆ ಆಘಾತವಾಗಿದೆ. ನನ್ನ ಮದುವೆ ಅಥವಾ ವಿಚ್ಛೇದನದ ಕುರಿತು ಯಾವುದೇ ಆಧಾರರಹಿತ ವದಂತಿಗಳನ್ನು ಹರಡಬೇಡಿ ಎಂದು ಮಾಧ್ಯಮಗಳಲ್ಲಿ ವಿನಂತಿಸುತ್ತೇನೆ. ಹಾಗೆಯೇ ಸಾರ್ವಜನಿಕರು ನನ್ನ ಅಧಿಕೃತ ಸಾಮಾಜಿಕ ಜಾಲತಾಣಗಳ ಮೂಲಕ ಮಾಹಿತಿ ಬರುವವರೆಗೆ ಯಾವುದನ್ನೂ ನಂಬಬಾರದು’ ಎಂದು ಬರೆದುಕೊಂಡಿದ್ದಾರೆ.

‘ಬಿಗ್ ಬಾಸ್ 20’ ರಿಯಾಲಿಟಿ ಶೋ ಪ್ರೋಮೋ:

ಬಿಗ್ ಬಾಸ್ ಪ್ರೋಮೋ ಮತ್ತು ಅನುಮಾನಗಳು:

‘ಬಿಗ್ ಬಾಸ್ 20’ ಶೋನ ಹೊಸ ಪ್ರೋಮೋದಲ್ಲಿ ಮಹಿಳಾ ಸ್ಪರ್ಧಿಯೊಬ್ಬರ ಮುಖವನ್ನು ಮರೆಮಾಚಿ ತೋರಿಸಲಾಗಿತ್ತು. ಆ ವಿಡಿಯೋದಲ್ಲಿ ಆ ಮಹಿಳೆ, ‘ನಾನು ಪ್ರೀತಿಸಿದೆ… ಆದರೆ ಕೆಲವು ಸಂಬಂಧಗಳಲ್ಲಿ ನಂಬಿಕೆ ಮುರಿದುಬಿದ್ದಾಗ…’ ಎಂದು ಭಾವುಕರಾಗಿ ಮಾತನಾಡುವುದು ಕೇಳಿಸಿದೆ. ಈ ಪ್ರೋಮೋ ವೈರಲ್ ಆಗುತ್ತಿದ್ದಂತೆ, ಆ ಸ್ಪರ್ಧಿ ಇಶಾ ರಿಖಿ ಇರಬಹುದು ಎಂದು ವೀಕ್ಷಕರು ಊಹಿಸಲು ಪ್ರಾರಂಭಿಸಿದ್ದರು. ಆದರೆ ಬಿಗ್ ಬಾಸ್ ತಂಡವಾಗಲಿ ಅಥವಾ ಇಶಾ ಅವರಾಗಲಿ ಶೋನಲ್ಲಿ ಭಾಗವಹಿಸುವ ಬಗ್ಗೆ ಯಾವುದೇ ಸ್ಪಷ್ಟನೆ ನೀಡಿಲ್ಲ.

Isha Rikhi Post

ಮಾರ್ಚ್‌ನಲ್ಲಷ್ಟೇ ಮದುವೆಯಾಗಿದ್ದ ಜೋಡಿ:

ಬಾದ್‌ಶಾ ಮತ್ತು ಇಶಾ ರಿಖಿ ಕೇವಲ 5 ತಿಂಗಳ ಹಿಂದೆ, ಅಂದರೆ 2026ರ ಮಾರ್ಚ್‌ನಲ್ಲಿ ಆಪ್ತರ ಸಮ್ಮುಖದಲ್ಲಿ ಸರಳವಾಗಿ ಮದುವೆಯಾಗಿದ್ದರು. ಇಶಾ ಅವರ ತಾಯಿ ಮದುವೆಯ ಫೋಟೋಗಳನ್ನು ಹಂಚಿಕೊಂಡಾಗ ಈ ವಿಷಯ ಜಗತ್ತಿಗೆ ತಿಳಿದಿತ್ತು. ಆದರೆ, ಇತ್ತೀಚೆಗಷ್ಟೇ (ಸೆಪ್ಟೆಂಬರ್ 1) ಇಬ್ಬರೂ ಪರಸ್ಪರ ಒಪ್ಪಂದದ ಮೂಲಕ ಬೇರ್ಪಡುತ್ತಿರುವುದಾಗಿ ಇನ್ಸ್ಟಾಗ್ರಾಮ್‌ನಲ್ಲಿ ಜಂಟಿ ಹೇಳಿಕೆ ನೀಡಿದ್ದರು.

ಇದನ್ನೂ ಓದಿ: ಬಾದ್​ಶಾ -ಇಶಾ ರಿಖಿ ದಾಂಪತ್ಯ ಅಂತ್ಯ; ಅಧಿಕೃತವಾಗಿ ಘೋಷಣೆ ಮಾಡಿದ ರಾಪರ್

‘ನಾನು ಮತ್ತು ಇಶಾ ರಿಖಿ ಪರಸ್ಪರ ಗೌರವದಿಂದ ಬೇರೆಯಾಗಲು ನಿರ್ಧರಿಸಿದ್ದೇವೆ. ಈ ಕಷ್ಟದ ಸಮಯದಲ್ಲಿ ನಮ್ಮ ಖಾಸಗಿತನವನ್ನು ಗೌರವಿಸಿ. ಈ ವಿಷಯದಲ್ಲಿ ಇದುವೇ ನಮ್ಮ ಅಂತಿಮ ಹೇಳಿಕೆ’ ಎಂದು ಬಾದ್‌ಶಾ ಬರೆದುಕೊಂಡಿದ್ದರು. ಆದರೆ ಈಗ ಬಿಗ್​ ಬಾಸ್ ಪ್ರೋಮೋ ವೈರಲ್ ಆದ ಬಳಿಕ ಇಶಾ ಅವರು ಇನ್​ಸ್ಟಾಗ್ರಾಮ್​ನಲ್ಲಿ ಹಂಚಿಕೊಂಡ ಹೇಳಿಕೆಯೇ ಬೇರೆ ರೀತಿ ಇರುವುದರಿಂದ ಜನರಿಗೆ ಗೊಂದಲ ಉಂಟಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.