‘ನನ್ನಮ್ಮ ಸೂಪರ್ ಸ್ಟಾರ್​ ಜಡ್ಜ್​​ಗಳಿಗೆ ಸೃಜನ್ ಲೋಕೇಶ್​​ ವಿಶೇಷ ಗಿಫ್ಟ್’; ಗಳಗಳನೆ ಅತ್ತ ಅನುಪಮಾ ಗೌಡ​

ಕಲರ್ಸ್​ ಕನ್ನಡದಲ್ಲಿ ಪ್ರಸಾರವಾಗುತ್ತಿರುವ ‘ನನ್ನಮ್ಮ ಸೂಪರ್​ ಸ್ಟಾರ್​’ ರಿಯಾಲಿಟಿ ಶೋ ಹೆಚ್ಚು ಜನಪ್ರಿಯತೆ ಪಡೆದಿದೆ. ಕಿರುತೆರೆ ಲೋಕದಲ್ಲಿ ಈ ರಿಯಾಲಿಟಿ ಶೋಗೆ ದೊಡ್ಡ ವೀಕ್ಷಕ ಬಳಗ ಇದೆ. ಸೆಲೆಬ್ರಿಟಿ ಮಕ್ಕಳು ಮಾಡುವ ಕೀಟಲೆಗಳು ನೋಡುಗರಿಗೆ ಮಜ ನೀಡುತ್ತದೆ. ಅದರಲ್ಲೂ ಮಾಸ್ಟರ್​ ಆನಂದ್ ಮಗಳು ಆಡುವ ಚೂಟಿ ಮಾತುಗಳು ಸಖತ್​ ಮನರಂಜನೆ ನೀಡುತ್ತದೆ. ಇನ್ನು, ತಾರಾ ಅನುರಾಧ ಹಾಗೂ ಅನು ಪ್ರಭಾಕರ್​ ಹಾಗೂ ಸೃಜನ್​ ಲೋಕೇಶ್​ ಜಡ್ಜ್​ ಸ್ಥಾನದಲ್ಲಿ ಕೂತಿದ್ದಾರೆ. ಅನುಪಮಾ ಗೌಡ ಅವರು ತಮ್ಮ ನಿರೂಪಣೆ ಮೂಲಕ ಗಮನ ಸೆಳೆಯುತ್ತಿದ್ದಾರೆ. ಒಟ್ಟಾರೆ ಈ ಶೋ ಸಖತ್​ ಮನರಂಜನೆ ನೀಡುತ್ತಿದೆ. ಈ ವಾರ ಎಪಿಸೋಡ್​ ವಿಶೇಷವಾಗಿರಲಿದೆ ಎಂಬುದಕ್ಕೆ ಕಲರ್ಸ್​ ಕನ್ನಡ ವಾಹಿನಿ ಹಂಚಿಕೊಂಡಿರುವ ಪ್ರೋಮೋ ಸಾಕ್ಷಿ.

ಸೃಜನ್​ ಲೋಕೇಶ್​ ಅವರು ತೆರೆಯ ಮೇಲೆ ಹಾಗೂ ತೆರೆಯ ಹಿಂದೆ ಎಲ್ಲರನ್ನೂ ನಗಿಸುತ್ತಲೇ ಇರುತ್ತಾರೆ. ಇದು ಅನೇಕ ಬಾರಿ ಸಾಬೀತಾಗಿದೆ. ಈ ಕಾರಣಕ್ಕೆ ಅವರನ್ನು ಸಾಕಷ್ಟು ಮಂದಿ ಇಷ್ಟಪಡುತ್ತಾರೆ. ಸೃಜನ್​ ಲೋಕೇಶ್​​ ಅವರು ತಾರಾ, ಅನು ಪ್ರಭಾಕರ್​ ಹಾಗೂ ಅನುಪಮಾ ಜತೆ ಒಳ್ಳೆಯ ಒಡನಾಟ ಹೊಂದಿದ್ದಾರೆ. ಈ ಬಾರಿ ಇವರಿಗೆ ಸೃಜನ್​ ಕಡೆಯಿಂದ ವಿಶೇಷ ಗಿಫ್ಟ್​ ಸಿಕ್ಕಿದೆ. ಈ ಪ್ರೋಮೋ ನೋಡಿ ಕೆಲವರು ಭಾವುಕರಾಗಿದ್ದಾರೆ.

ಇತ್ತೀಚೆಗೆ ತಾಯಂದಿರಿಗೆ ಗಿಫ್ಟ್​ ನೀಡೋ ಕೆಲಸವನ್ನು ಮಕ್ಕಳಿಗೆ ನೀಡಲಾಗಿತ್ತು. ಮಕ್ಕಳು ತಮ್ಮ ಅಮ್ಮಂದಿರಿಗೆ ಕೆಲವು ಉಡುಗೊರೆಗಳನ್ನು ತೆಗೆದುಕೊಂಡು ಬಂದಿದ್ದರು. ಇದು ಸೃಜನ್​ಗೆ ಸ್ಫೂರ್ತಿಯಾಗಿದೆ. ಅವರು ಜಡ್ಜ್​ ಸ್ಥಾನದಲ್ಲಿ ಕುಳಿತ ಅನು ಹಾಗೂ ತಾರಾ ಅವರಿಗೆ ಗಿಫ್ಟ್​ ನೀಡಿದ್ದಾರೆ.

ಅನು ಪ್ರಭಾಕರ್​ ಅವರಿಗೆ ಸೃಜನ್​ ಸರ ಒಂದನ್ನು ಗಿಫ್ಟ್​ ಮಾಡಿದ್ದಾರೆ. ತಾರಾ ಅನುರಾಧಾಗೆ ಸೀರೆ ನೀಡಿದ್ದಾರೆ. ಸೀರೆಯನ್ನು ನೋಡಿ ತಾರಾ ಖುಷಿಪಟ್ಟಿದ್ದಾರೆ. ‘ನಮ್ಮ ಬಳಿ ಎಷ್ಟೇ ಸೀರೆ ಇದ್ದರೂ ಹೊಸ ಸೀರೆ ಬಂದಾಗ ಆಗುವ ಖುಷಿಯೇ ಬೇರೆ’ ಎಂದು ತಾರಾ ಅವರು ಸೀರೆಯನ್ನು ಮೈಮೇಲೆ ಹೊದ್ದುಕೊಂಡು ವೇದಿಕೆ ಮೇಲೆಯೇ ವಾಕ್​ ಮಾಡಿದ್ದಾರೆ.

ಅನು ಅವರಿಗೂ ಸೃಜನ್​ ಗಿಫ್ಟ್​ ಒಂದನ್ನು ನೀಡಿದ್ದಾರೆ. ಜತೆಗೆ ಅನು ಚಿತ್ರರಂಗಕ್ಕೆ ಬರುವುದಕ್ಕೂ ಮೊದಲು ಮಾಡಿದ ಸ್ಟ್ರಗಲ್​ಅನ್ನು ನೆನಪಿಸಿಕೊಂಡಿದ್ದಾರೆ. ‘ಅನುವಿನ ಸ್ಟ್ರಗಲ್​ ನೋಡಿದ್ದೇನೆ. ಚಿಕ್ಕ ವಯಸ್ಸಿನಲ್ಲಿ ಅವರ ತಾಯಿಯನ್ನು ನೋಡಿಕೊಂಡಿದ್ದಿರಬಹುದು, ತಂಗಿಯನ್ನು ನೋಡಿಕೊಂಡಿದ್ದಿರಬಹುದು. ಎಲ್ಲವನ್ನೂ ನಾನು ಹತ್ತಿರದಿಂದ ನೋಡಿದ್ದೇನೆ’ ಎಂದರು ಸೃಜನ್. ಇದನ್ನು ಹೇಳುತ್ತಿದ್ದಂತೆ ಅನುಪಮಾ ಅವರು ಗಳಗಳನೆ ಅತ್ತರು. ಸೃಜನ್​ ನೀಡಿದ ಗಿಫ್ಟ್ ನೋಡಿ ಅವರು ಖುಷಿಪಟ್ಟರು.

ಇದನ್ನೂ ಓದಿ: ‘ಇವನು ನನ್ನ ತಂದೆ ರೂಪ ಎಂದು ನಾನು ನಂಬಿದ್ದೇನೆ’; ಮಗ ಸುಕೃತ್​ ಬಗ್ಗೆ ಸೃಜನ್​ ಲೋಕೇಶ್​ ಮಾತು

‘ನನ್ನಮ್ಮ ಸೂಪರ್ ಸ್ಟಾರ್’ ಸ್ಪರ್ಧಿ, 6 ವರ್ಷದ ಬಾಲಕಿ ಸಮನ್ವಿ ಅಪಘಾತದಲ್ಲಿ ನಿಧನ