ಅಮೆರಿಕದಲ್ಲಿ ನೆಲೆಸಿರುವ ಯುವತಿ ಜತೆ ನಡೆಯಲಿದೆ ‘ಹನುಮಾನ್’ ನಟ ತೇಜ ಸಜ್ಜಾ ಮದುವೆ
ತೆಲುಗು ಚಿತ್ರರಂಗದ ಯುವ ನಟ ತೇಜ ಸಜ್ಜಾ ಅವರು ಹಸೆಮಣೆ ಏರಲು ಸಜ್ಜಾಗಿದ್ದಾರೆ. ತಮ್ಮನ್ನು ಮದುವೆ ಆಗುವ ಯುವತಿ ಯಾರು ಎಂಬ ಬಗ್ಗೆ ಅವರು ಹೆಚ್ಚು ಮಾಹಿತಿ ಬಿಟ್ಟುಕೊಟ್ಟಿಲ್ಲ. ಆದರೆ ಆ ಯುವತಿಯು ಅಮೆರಿಕದಲ್ಲಿ ನೆಲೆಸಿದ್ದಾರೆ ಎಂಬುದು ಗೊತ್ತಾಗಿದೆ. ನವೆಂಬರ್‌ನಲ್ಲಿ ನಿಶ್ಚಿತಾರ್ಥ ಹಾಗೂ ಡಿಸೆಂಬರ್‌ನಲ್ಲಿ ಮದುವೆ ನಡೆಯಲಿದೆ.
Updated on: Oct 22, 2026 | 3:17 PM
‘ಹನುಮಾನ್’ ಚಿತ್ರದ ಮೂಲಕ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಭಾರಿ ಯಶಸ್ಸು ಗಳಿಸಿರುವ ಯುವ ನಟ ತೇಜ ಸಜ್ಜಾ ಶೀಘ್ರದಲ್ಲೇ ವೈವಾಹಿಕ ಜೀವನಕ್ಕೆ ಕಾಲಿಡಲಿದ್ದಾರೆ. ತಮ್ಮ ವೈಯಕ್ತಿಕ ಜೀವನವನ್ನು ಸದಾ ಗೌಪ್ಯವಾಗಿಡುವ ಅವರು, ಅಮೆರಿಕ ಮೂಲದ ಟೆಕ್ಕಿ ಯುವತಿಯೊಂದಿಗೆ ಹಸೆಮಣೆ ಏರಲು ಸಿದ್ಧರಾಗಿದ್ದಾರೆ. ಹಿರಿಯರು ನಿಶ್ಚಯಿಸಿರುವ ಈ ಮದುವೆಯು ಡಿಸೆಂಬರ್‌ನಲ್ಲಿ ರಾಜಸ್ಥಾನದ ಉದಯಪುರದಲ್ಲಿ ಸರಳವಾಗಿ ನಡೆಯಲಿದೆ.
ನವೆಂಬರ್‌ನಲ್ಲಿ ನಿಶ್ಚಿತಾರ್ಥ ಸಮಾರಂಭ ಜರುಗಲಿದೆ. ಡಿಸೆಂಬರ್‌ನಲ್ಲಿ ರಾಜಸ್ಥಾನದ ಉದಯಪುರದಲ್ಲಿ ಅತಿ ಕಡಿಮೆ ಜನಸ್ತೋಮದೊಂದಿಗೆ ವಿವಾಹ ನಡೆಯಲಿದೆ. ಅಮೆರಿಕದಲ್ಲಿ ನೆಲೆಸಿರುವ ಟೆಕ್ಕಿ ಯುವತಿ ಜೊತೆ ತೇಜ ಸಜ್ಜಾ ಮದುವೆ ಆಗಲಿದ್ದಾರೆ. ಆ ಯುವತಿಯು ತಂದೆಯ ಜೊತೆ ಟೆಕ್ ವ್ಯವಹಾರದಲ್ಲಿ ತೊಡಗಿಸಿಕೊಂಡಿದ್ದಾರೆ. ಸಿನಿಮಾರಂಗದ ಗ್ಲಾಮರ್ ಜಗತ್ತಿನಿಂದ ಸಂಪೂರ್ಣ ದೂರವಿದ್ದಾರೆ.
ಕೇವಲ ಕುಟುಂಬದವರು ಮತ್ತು ಅತ್ಯಂತ ಆಪ್ತ ಸ್ನೇಹಿತರ ಉಪಸ್ಥಿತಿಯಲ್ಲಿ ವಿವಾಹ ಸಮಾರಂಭ ಜರುಗಲಿದೆ. ನಂತರ ಹೈದರಾಬಾದ್‌ನಲ್ಲಿ ಚಿತ್ರರಂಗದ ಸ್ನೇಹಿತರಿಗಾಗಿ ವಿಶೇಷ ರಿಸೆಪ್ಷನ್ ಆಯೋಜಿಸಲು ತೇಜ ಸಜ್ಜಾ ತೀರ್ಮಾನಿಸಿದ್ದಾರೆ. ಇದು ಸಂಪೂರ್ಣವಾಗಿ ಪೋಷಕರು ನಿಶ್ಚಯಿಸಿದ ಅರೇಂಜ್ಡ್ ಮ್ಯಾರೇಜ್ ಎಂದು ತೇಜ ಸಜ್ಜಾ ಅವರು ಮಾಧ್ಯಮವೊಂದಕ್ಕೆ ಮಾಹಿತಿ ನೀಡಿದ್ದಾರೆ.
ಮಾಧ್ಯಮಗಳೊಂದಿಗೆ ಮಾತನಾಡಿದ ತೇಜ ಸಜ್ಜಾ, ತಮ್ಮ ಭಾವಿ ಪತ್ನಿಯು ಸಿನಿಮಾಗಳ ಲೈಮ್‌ಲೈಟ್‌ನಿಂದ ದೂರವಿರುವುದೇ ತಮಗೆ ಅತ್ಯಂತ ಇಷ್ಟವಾದ ವಿಷಯ ಎಂದು ತಿಳಿಸಿದ್ದಾರೆ. ‘ಅವರು ಅಮೆರಿಕದಲ್ಲಿ ಬೆಳೆದವರು ಮತ್ತು ಸಿನಿಮಾರಂಗದ ಪ್ರಪಂಚದ ಬಗ್ಗೆ ಯಾವುದೇ ಅರಿವಿಲ್ಲದೆ ಸಂಪೂರ್ಣವಾಗಿ ಸರಳ ಜೀವನ ನಡೆಸುತ್ತಿದ್ದಾರೆ. ನನಗೆ ಅವರ ಈ ಗುಣವೇ ತುಂಬಾ ಇಷ್ಟವಾಯಿತು ಮತ್ತು ಮುಂದೆಯೂ ಅದನ್ನು ಹಾಗೆಯೇ ಕಾಪಾಡಿಕೊಳ್ಳಲು ಬಯಸುತ್ತೇನೆ’ ಎಂದು ಅವರು ತಿಳಿಸಿದ್ದಾರೆ.
ಇದನ್ನೂ ಓದಿ: ‘ಹನುಮಾನ್’ ಚಿತ್ರಕ್ಕಾಗಿ 75 ಸಿನಿಮಾಗಳ ಅವಕಾಶ ಕೈಚೆಲ್ಲಿದ್ದ ನಟ ತೇಜ ಸಜ್ಜಾ
ತಮ್ಮ ವೈಯಕ್ತಿಕ ಜೀವನವನ್ನು ಎಂದಿಗೂ ಪ್ರಚಾರದಿಂದ ದೂರವಿಟ್ಟಿರುವ ತೇಜ ಸಜ್ಜಾ ಅವರು ಈಗ ಮದುವೆಯ ವಿಚಾರದಲ್ಲೂ ಅದೇ ಗೌಪ್ಯತೆಯನ್ನು ಕಾಯ್ದುಕೊಳ್ಳುವುದಾಗಿ ಸ್ಪಷ್ಟಪಡಿಸಿದ್ದಾರೆ. ಈ ವರ್ಷದ ಮಾರ್ಚ್ ತಿಂಗಳಲ್ಲಿ ಮದುವೆಯ ಸುದ್ದಿಗಳು ಹರಿದಾಡಿದಾಗ ಅವರು ಅದನ್ನು ನಗುವಿನೊಂದಿಗೆ ತಳ್ಳಿಹಾಕಿದ್ದರು ಮತ್ತು ತಾವೇ ಅಧಿಕೃತವಾಗಿ ಸುದ್ದಿ ಹಂಚಿಕೊಳ್ಳುವುದಾಗಿ ಹೇಳಿದ್ದರು.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
