ಸಾಯಿ ಧರಮ್ ತೇಜ್ ಬೈಕ್ ಅಪಘಾತ: ಅಪಶಕುನ ನುಡಿದ ಹಿರಿಯ ನಟನ ವಿರುದ್ಧ ಭಾರಿ ಆಕ್ರೋಶ
‘ಈ ಹಿಂದೆಯೂ ಅನೇಕ ಸೆಲೆಬ್ರಿಟಿಗಳು ಬೈಕ್ ಅಪಘಾತದಲ್ಲಿ ತಮ್ಮ ಆಪ್ತರನ್ನು ಕಳೆದುಕೊಂಡಿದ್ದುಂಟು’ ಎಂದು ನರೇಶ್ ಹೇಳಿದ್ದಾರೆ. ಸಾಯಿ ಧರಮ್ ತೇಜ್ ಚಿಕಿತ್ಸೆ ಪಡೆಯುತ್ತಿರುವಾಗಲೇ ನರೇಶ್ ಇಂಥ ಹೇಳಿಕೆ ನೀಡಿರುವುದು ಎಲ್ಲರ ಆಕ್ರೋಶಕ್ಕೆ ಕಾರಣ ಆಗಿದೆ.
ತೆಲುಗು ಚಿತ್ರರಂಗದ ಯುವ ನಟ ಸಾಯಿ ಧರಮ್ ತೇಜ್ ಅವರು ಬೈಕ್ ಅಪಘಾತಕ್ಕೆ ಒಳಗಾಗಿ ಐಸಿಯುನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅವರು ಆದಷ್ಟು ಬೇಗ ಚೇತರಿಸಿಕೊಳ್ಳಲಿ ಎಂದು ಅಭಿಮಾನಿಗಳು ಮತ್ತು ಸೆಲೆಬ್ರಿಟಿಗಳು ಪ್ರಾರ್ಥಿಸುತ್ತಿದ್ದಾರೆ. ಸೆ.10ರಂದು ರಾತ್ರಿ 8 ಗಂಟೆಗೆ ಸ್ಪೋರ್ಟ್ಸ್ ಬೈಕ್ನಲ್ಲಿ ತೆರಳುತ್ತಿದ್ದಾಗ ಸಾಯಿ ಧರಮ್ ತೇಜ್ ಅಪಘಾತಕ್ಕೆ ಒಳಗಾದರು. ಆ ಬಗ್ಗೆ ಟಾಲಿವುಡ್ನ ಹಿರಿಯ ನಟ ನರೇಶ್ ಒಂದು ವಿಡಿಯೋದಲ್ಲಿ ಮಾತನಾಡಿದ್ದಾರೆ. ಆದರೆ ಅವರ ಮಾತುಗಳಿಗೆ ಅನೇಕರಿಂದ ತೀವ್ರ ಆಕ್ಷೇಪ ವ್ಯಕ್ತವಾಗುತ್ತಿದೆ. ಇಂಥ ಸೂಕ್ಷ್ಮ ವಿಚಾರಗಳ ಬಗ್ಗೆ ಮಾತನಾಡುವಾಗ ಅವರು ಹೆಚ್ಚು ಎಚ್ಚರಿಕೆ ವಹಿಸಬೇಕು ಎಂದು ಎಲ್ಲರೂ ಛೀಮಾರಿ ಹಾಕುತ್ತಿದ್ದಾರೆ. ಅಷ್ಟಕ್ಕೂ ನರೇಶ್ ಹೇಳಿದ್ದೇನು?
ಅಪಘಾತ ಆಗುವುದಕ್ಕೂ ಕೆಲವೇ ಗಂಟೆಗಳ ಮುನ್ನ ನರೇಶ್ ಮನೆಗೆ ಸಾಯಿ ಧರಮ್ ತೇಜ್ ಭೇಟಿ ನೀಡಿದ್ದರಂತೆ. ಆ ಕುರಿತು ನರೇಶ್ ವಿವರಿಸಿದ್ದಾರೆ. ‘ನನ್ನ ಮಗ ನವೀನ್ ಮತ್ತು ಸಾಯಿ ಧರಮ್ ತೇಜ್ ಆಪ್ತ ಸ್ನೇಹಿತರು. ನಿನ್ನೆ (ಸೆ.10) ಸಂಜೆ ನಮ್ಮ ಮನೆಯಿಂದಲೇ ಅವರಿಬ್ಬರು ಬೈಕ್ನಲ್ಲಿ ತೆರಳಿದ್ದರು. ಅವರನ್ನು ತಡೆಯಬೇಕು ಎಂಬ ಮನಸ್ಸಾಯಿತು. ಆದರೆ ಅಷ್ಟರಲ್ಲಾಗಲೇ ಅವರು ಹೊರಟುಹೋಗಿದ್ದರು. ಕೇವಲ ನಾಲ್ಕು ದಿನದ ಹಿಂದೆ ಅವರಿಗೆ ಬೈಕ್ ರೈಡಿಂಗ್ ಬಗ್ಗೆ ಬುದ್ಧಿ ಹೇಳಬೇಕು ಅಂದುಕೊಂಡಿದ್ದೆ’ ಎಂದಿದ್ದಾರೆ ನರೇಶ್.
‘ಮದುವೆ ಮತ್ತು ವೃತ್ತಿಜೀವನದ ಬಗ್ಗೆ ಗಮನ ಹರಿಸಲು ಇದು ಅವರಿಗೆ ಸರಿಯಾದ ಸಮಯ. ಈ ವೇಳೆ ಅವರು ಸ್ಪೋರ್ಟ್ಸ್ ಬೈಕ್ ಓಡಿಸುವಂಥ ರಿಸ್ಕ್ ತೆಗೆದುಕೊಳ್ಳಬಾರದು. ಒಂದು ಅಪಘಾತ ಆದ ಬಳಿಕ ನಾನು ಕೂಡ ಬೈಕ್ ಓಡಿಸುವುದಿಲ್ಲ ಅಂತ ಅಮ್ಮನ ಬಳಿ ಪ್ರಮಾಣ ಮಾಡಿದ್ದೆ. ಈ ಹಿಂದೆಯೂ ಅನೇಕ ಸೆಲೆಬ್ರಿಟಿಗಳು ಬೈಕ್ ಅಪಘಾತದಲ್ಲಿ ತಮ್ಮ ಆಪ್ತರನ್ನು ಕಳೆದುಕೊಂಡಿದ್ದುಂಟು. ಅಂಥವರ ಕುಟುಂಬ ಕಣ್ಣೀರಿನಲ್ಲಿದೆ’ ಎಂದು ನರೇಶ್ ಹೇಳಿದ್ದಾರೆ.
ಸಾಯಿ ಧರಮ್ ತೇಜ್ ಅವರು ಇನ್ನೂ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವಾಗಲೇ ಸತ್ತ ವ್ಯಕ್ತಿಗಳಿಗೆ ಹೋಲಿಸಿ ಅವರ ಬಗ್ಗೆ ನರೇಶ್ ಮಾತನಾಡಿರುವುದು ಅನೇಕರ ಕೋಪಕ್ಕೆ ಕಾರಣ ಆಗಿದೆ. ನಿರ್ಮಾಪಕ ಬಂಡ್ಲಾ ಗಣೇಶ್, ಹಿರಿಯ ನಟ ಶ್ರೀಕಾಂತ್ ಸೇರಿದಂತೆ ಹಲವರು ಈ ಹೇಳಿಕೆಯನ್ನು ಖಂಡಿಸಿದ್ದಾರೆ. ಮಾತನಾಡುವುದಕ್ಕಿಂತ ಮುನ್ನ ನರೇಶ್ ಎಚ್ಚರಿಕೆ ವಹಿಸಬೇಕು ಎಂದು ಅವರೆಲ್ಲ ಟೀಕಿಸಿದ್ದಾರೆ.
ಇದನ್ನೂ ಓದಿ:
ಡಿಕೆ ರವಿ ಬಗ್ಗೆ 2 ದಿನದ ಹಿಂದೆ ಮಾತಾಡಿದ್ದ ಸಾಯಿ ಧರಮ್ ತೇಜ್ಗೆ ಭೀಕರ ಅಪಘಾತ; ಏನಿದು ಕಾಕತಾಳೀಯ?
ಚಿರಂಜೀವಿ ಅಳಿಯ ಸಾಯಿ ಧರಮ್ ತೇಜ್ ಆಕ್ಸಿಡೆಂಟ್ನ ಸಿಸಿಟಿವಿ ದೃಶ್ಯ; ಹೆಲ್ಮೆಟ್ನಿಂದ ಬಚಾವ್