ತೆಲಂಗಾಣದಲ್ಲಿ ‘ಟಾಕ್ಸಿಕ್’ ಅಬ್ಬರ, ಗಂಟೆಯಲ್ಲೇ ಹೌಸ್ಫುಲ್
Toxic Movie Ticket Booking in Telangana: ‘ಟಾಕ್ಸಿಕ್’ ಸಿನಿಮಾದ ಅಡ್ವಾನ್ಸ್ ಬುಕಿಂಗ್ ದೇಶದಾದ್ಯಂತ ಬಲು ಜೋರಾಗಿದೆ. ಈಗಾಗಲೇ ‘ಧುರಂಧರ್’, ‘ಪಠಾಣ್’ ಇನ್ನಿತರೆ ಕೆಲವು ದೊಡ್ಡ ಸಿನಿಮಾಗಳ ದಾಖಲೆಯನ್ನು ‘ಟಾಕ್ಸಿಕ್’ ಮುರಿದು ಹಾಕಿದೆ. ಆದರೆ ತೆಲಂಗಾಣ ಟಿಕೆಟ್ ಬುಕಿಂಗ್ ಬಹಳ ತಡವಾಗಿ ಓಪನ್ ಆಗಿದ್ದು, ಓಪನ್ ಆದ ಗಂಟೆಯ ಒಳಗಾಗಿ ಹಲವು ಚಿತ್ರಮಂದಿರಗಳು ಹೌಸ್ಫುಲ್ ಆಗಿವೆ.
Updated on:Aug 25, 2026 | 5:24 PM
ಮುಖ್ಯಾಂಶಗಳು
- ತೆಲಂಗಾಣದಲ್ಲಿ ಟಾಕ್ಸಿಕ್ ಬುಕಿಂಗ್ ಓಪನ್ ಆಗಿದೆ.
- ಬುಕಿಂಗ್ ಓಪನ್ ಆದ ಗಂಟೆಯಲ್ಲೇ ಹಲವು ಶೋ ಹೌಸ್ಫುಲ್
- ಬುಕಿಂಗ್ ತಡವಾಗಿ ಓಪನ್ ಆದರೂ ಟಾಕ್ಸಿಕ್ ಅಬ್ಬರಿಸುತ್ತಿದೆ.
‘ಟಾಕ್ಸಿಕ್’ (Toxic) ಸಿನಿಮಾ ನಾಳೆ (ಆಗಸ್ಟ್ 26) ಬಿಡುಗಡೆ ಆಗುತ್ತಿದೆ. ಸಿನಿಮಾದ ಟಿಕೆಟ್ ಬುಕಿಂಗ್ ಓಪನ್ ಆಗಿ ಮೂರು ದಿನಗಳಿಗೂ ಹೆಚ್ಚು ಸಮಯವಾಗಿದ್ದು, ಅಡ್ವಾನ್ಸ್ ಟಿಕೆಟ್ ಬುಕಿಂಗ್ನಲ್ಲಿ ಈಗಾಗಲೇ ‘ಧುರಂಧರ್’, ‘ಪಠಾಣ್’ ಸಿನಿಮಾಗಳನ್ನೂ ಸಹ ‘ಟಾಕ್ಸಿಕ್’ ಹಿಂದಿಕ್ಕಿದೆ. ಆದರೆ ತೆಲುಗು ರಾಜ್ಯಗಳಲ್ಲಿ ಸಿನಿಮಾದ ಅಡ್ವಾನ್ಸ್ ಬುಕಿಂಗ್ ಓಪನ್ ಆಗಿರಲಿಲ್ಲ. ತೆಲಂಗಾಣ ಮತ್ತು ಆಂಧ್ರ ಪ್ರದೇಶಗಳಲ್ಲಿ ಸಿನಿಮಾದ ಅಡ್ವಾನ್ಸ್ ಬುಕಿಂಗ್ ಓಪನ್ ಆಗಿರಲಿಲ್ಲ. ಆದರೆ ಇಂದು ಮಧ್ಯಾಹ್ನದ ಬಳಿಕ ‘ಟಾಕ್ಸಿಕ್’ ಸಿನಿಮಾದ ಟಿಕೆಟ್ ದರ ಹೆಚ್ಚಳಕ್ಕೆ ಸರ್ಕಾರ ಅನುಮತಿ ನೀಡಿದ ಬಳಿಕ ಬುಕ್ ಮೈ ಶೋನಲ್ಲಿ ಟಿಕೆಟ್ ಬುಕಿಂಗ್ ಓಪನ್ ಆಗಿದ್ದು, ಗಂಟೆಯ ಒಳಗಾಗಿ ಹಲವಾರು ಶೋಗಳು ಮುಂಗಡವಾಗಿ ಬುಕ್ ಆಗಿವೆ.
ಮಧ್ಯಾಹ್ನದ ಬಳಿಕ ಬುಕ್ಮೈ ಶೋನಲ್ಲಿ ‘ಟಾಕ್ಸಿಕ್’ ತೆಲುಗು ಬುಕಿಂಗ್ ಓಪನ್ ಆಯ್ತು. ಒಂದೇ ಗಂಟೆಯ ಒಳಗಾಗಿ ಬಿಸಿ ದೋಸೆಯಂತೆ ಟಿಕೆಟ್ಗಳು ಬಿಕರಿ ಆಗಿವೆ. ಹಲವು ಮಲ್ಟಿಪ್ಲೆಕ್ಸ್ಗಳಲ್ಲಿ ಈಗಾಗಲೇ ದಿನದ ಎಲ್ಲ ಶೋಗಳು ಹೌಸ್ಫುಲ್ ಆಗಿದ್ದು, ಬುಕ್ ಮೈ ಶೋನಲ್ಲಿ ಕೇಸರಿ ಬಣ್ಣವೇ ಕಾಣುತ್ತಿದೆ. ಹೈದರಾಬಾದ್ನ ಪ್ರಮುಖ ಮಲ್ಟಿಪ್ಲೆಕ್ಸ್ಗಳಾದ ಪ್ರಸಾದ್, ಎಎಎ ಸಿನಿಮಾಸ್, ಅಲ್ಲು ಸಿನಿಮಾಸ್, ಮಹೇಶ್ ಬಾಬು ಅವರ ಎಎಂಬಿ ಸಿನಿಮಾಸ್, ಎಆರ್ಟಿ ಸಿನಿಮಾಸ್ ಎಲ್ಲವೂ ಹೌಸ್ಫುಲ್ ಆಗಿವೆ.
ತೆಲುಗು ರಾಜ್ಯಗಳಲ್ಲಿ ಯಶ್ ಅವರಿಗೆ ದೊಡ್ಡ ಸಂಖ್ಯೆಯ ಅಭಿಮಾನಿಗಳಿದ್ದಾರೆ. ಇತ್ತೀಚೆಗಷ್ಟೆ ತೆಲುಗು ಸಿನಿಮಾ ಪ್ರೇಮಿಗಳನ್ನು ಗುರಿಯಾಗಿರಿಸಿಕೊಂಡೇ ಹೈದರಾಬಾದ್ನ ಮಲ್ಲಾ ರೆಡ್ಡಿ ಯೂನಿವರ್ಸಿಟಿ ಮೈದಾನದಲ್ಲಿ ‘ಟಾಕ್ಸಿಕ್’ ತಂಡವು ಅದ್ಧೂರಿ ಪ್ರೀ ರಿಲೀಸ್ ಕಾರ್ಯಕ್ರಮವನ್ನು ಸಹ ಆಯೋಜಿಸಿತ್ತು. ಅದರ ಫಲಿತಾಂಶ ಈಗ ಬುಕ್ ಮೈ ಶೋನಲ್ಲಿ ಸ್ಪಷ್ಟವಾಗಿ ಕಾಣುತ್ತಿದೆ. ತೆಲುಗು ಸಿನಿಮಾ ಪ್ರೇಮಿಗಳು ಮುಗಿಬಿದ್ದು ‘ಟಾಕ್ಸಿಕ್’ ಸಿನಿಮಾ ಟಿಕೆಟ್ ಖರೀದಿ ಮಾಡುತ್ತಿದ್ದಾರೆ.
ಇದನ್ನೂ ಓದಿ:ಟಾಕ್ಸಿಕ್ ಬಿಡುಗಡೆಗೂ ಮುನ್ನ ಧರ್ಮಸ್ಥಳದಲ್ಲಿ ಯಶ್ ವಿಶೇಷ ಪೂಜೆ
ಹೈದರಾಬಾದ್ನ ಹಲವಾರು ಚಿತ್ರಮಂದಿರಗಳಲ್ಲಿ ‘ಟಾಕ್ಸಿಕ್’ ಸಿನಿಮಾಕ್ಕೆ ಶೋಗಳನ್ನು ನೀಡಲಾಗಿದೆ. ತೆಲುಗಿನ ‘ಇರುಮುಡಿ’ ಸಿನಿಮಾ ಒಳ್ಳೆಯ ಪ್ರದರ್ಶನ ಕಾಣುತ್ತಿದ್ದು, ಅದರ ನಡುವೆಯೂ ‘ಟಾಕ್ಸಿಕ್’ ಸಿನಿಮಾಕ್ಕೆ ಸಾಕಷ್ಟು ಸಂಖ್ಯೆಯಲ್ಲಿ ಶೋಗಳು ದೊರೆತಿವೆ. ಇನ್ನು ಹೈದರಾಬಾದ್ನಲ್ಲಿ ತೆಲುಗಿನಲ್ಲಿ ಮಾತ್ರವೇ ಅಲ್ಲದೆ ಕನ್ನಡ ಮತ್ತು ಹಿಂದಿ ಆವೃತ್ತಿಯ ಶೋಗಳನ್ನು ಸಹ ಪ್ರದರ್ಶಿಸಲಾಗುತ್ತಿದೆ. ಕನ್ನಡಕ್ಕೆ ಆರು ಶೋ ಹಾಗೂ ಹಿಂದಿಗೆ ಸುಮಾರು 15ಕ್ಕೂ ಹೆಚ್ಚು ಶೋಗಳು ದೊರೆತಿರುವುದು ವಿಶೇಷ.
‘ಟಾಕ್ಸಿಕ್’ ಸಿನಿಮಾದ ಟಿಕೆಟ್ ಬೆಲೆ ಹೆಚ್ಚಳಕ್ಕೆ ಹಾಗೂ ಶೋಗಳ ಸಂಖ್ಯೆ ಹೆಚ್ಚಳಕ್ಕೆ ತೆಲಂಗಾಣ ಸರ್ಕಾರ ಅನುಮತಿ ನೀಡಿದೆ. ಮಲ್ಟಿಪ್ಲೆಕ್ಸ್ಗಳ ಟಿಕೆಟ್ ಬೆಲೆಯನ್ನು 100 ರೂಪಾಯಿ ಹಾಗೂ ಸಿಂಗಲ್ ಸ್ಕ್ರೀನ್ ಚಿತ್ರಮಂದರಗಳ ಟಿಕೆಟ್ ಬೆಲೆಯನ್ನು 50 ರೂಪಾಯಿ ಹೆಚ್ಚಳ ಮಾಡುವುದಕ್ಕೆ ಸರ್ಕಾರ ಅನುಮತಿ ನೀಡಿದೆ. ಆದರೆ ಒಂದು ಕೋಟಿ ರೂಪಾಯಿ ಮೊತ್ತವನ್ನು ಸಿನಿಮಾ ಕಾರ್ಮಿಕರ ಕಲ್ಯಾಣ ನಿಧಿಗೆ ನೀಡುವಂತೆ ಷರತ್ತು ಸಹ ಹಾಕಿದೆ. ಇದೀಗ ಹೈದರಾಬಾದ್ನಲ್ಲಿ ‘ಟಾಕ್ಸಿಕ್’ ಸಿನಿಮಾದ ಸರಾಸರಿ ಟಿಕೆಟ್ ದರ 350 ರೂಪಾಯಿಗಳಿದೆ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 4:42 pm, Tue, 25 August 26
