ಇನ್ಸ್ಟಾಗ್ರಾಂ ವಿಡಿಯೋ ನೋಡಿ ಸಿನಿಮಾನಲ್ಲಿ ಅವಕಾಶ ಕೊಟ್ಟ ವಿಜಯ್ ದೇವರಕೊಂಡ
Vijay Deverakonda-Rashmika Mandanna: ಯಾವುದೇ ಹಿನ್ನೆಲೆ ಇಲ್ಲದೆ ಬಂದ ಸ್ಟಾರ್ ಆದ ವಿಜಯ್ ದೇವರಕೊಂಡ ಈಗ ತನ್ನಂತೆ ಪ್ರತಿಭೆ ಇರುವ ಆದರೆ ಗಾಡ್ ಫಾದರ್ಗಳಿಲ್ಲದ ಯುವಕರಿಗೆ ಸಹಾಯ ಮಾಡುತ್ತಾ ಬರುತ್ತಿದ್ದಾರೆ. ಇದೀಗ ಇನ್ಸ್ಟಾಗ್ರಾಂನಲ್ಲಿ ವಿಡಿಯೋ ಮಾಡುತ್ತಾ ಸಿನಿಮಾ ಅವಕಾಶಕ್ಕಾಗಿ ಹುಡುಕಾಡುತ್ತಿದ್ದ ಯುವಕನೊಬ್ಬನಿಗೆ ವಿಜಯ್ ದೇವರಕೊಂಡ ಸಿನಿಮಾನಲ್ಲಿ ಅವಕಾಶ ಕೊಟ್ಟು, ಆತನ ಕನಸು ನನಸು ಮಾಡಿದ್ದಾರೆ.
Updated on: Mar 27, 2026 | 7:01 PM
ವಿಜಯ್ ದೇವರಕೊಂಡ (Vijay Deverakonda) ಈಗ ಟಾಲಿವುಡ್ನ ಸ್ಟಾರ್ ನಟರಲ್ಲಿ ಒಬ್ಬರು. ಯಾವುದೇ ಗಾಡ್ಫಾದರ್ಗಳಿಲ್ಲದೆ ತೀರ ಸಣ್ಣ ಪುಟ್ಟ ಪಾತ್ರಗಳಲ್ಲಿ ನಟಿಸುತ್ತಾ ಒಂದೊಂದೇ ಮೆಟ್ಟಿಲು ಏರಿ ಈಗ ಸ್ಟಾರ್ ಆದವರು. ಸ್ಟಾರ್ ಆದ ಬಳಿಕ ತನ್ನಂತೆ ಪ್ರತಿಭೆ ಇರುವ ಆದರೆ ಗಾಡ್ ಫಾದರ್ಗಳಿಲ್ಲದ ಯುವಕರಿಗೆ ಸಹಾಯ ಮಾಡುತ್ತಾ ಬರುತ್ತಿದ್ದಾರೆ. ಇದೀಗ ಇನ್ಸ್ಟಾಗ್ರಾಂನಲ್ಲಿ ವಿಡಿಯೋ ಮಾಡುತ್ತಾ ಸಿನಿಮಾ ಅವಕಾಶಕ್ಕಾಗಿ ಹುಡುಕಾಡುತ್ತಿದ್ದ ಯುವಕನೊಬ್ಬನಿಗೆ ವಿಜಯ್ ದೇವರಕೊಂಡ ಸಿನಿಮಾನಲ್ಲಿ ಅವಕಾಶ ಕೊಟ್ಟು, ಆತನ ಕನಸು ನನಸು ಮಾಡಿದ್ದಾರೆ.
ಜೀವನ್ ಹೆಸರಿನ ಯುವಕನೊಬ್ಬ ನಟನಾಗುವ ಕನಸು ಹೊಂದಿ, ಇನ್ಸ್ಟಾಗ್ರಾಂನಲ್ಲಿ ತನ್ನ ವಿಡಿಯೋಗಳನ್ನು ಅಪ್ಲೋಡ್ ಮಾಡುತ್ತಿದ್ದ. ಯಾವುದೇ ಆಡಿಷನ್ ಪ್ರಕಟಣೆ ಬಂದರೂ ಅದಕ್ಕೆ ಸೀನ್ ಬರೆದು, ನಟಿಸಿ ಆ ವಿಡಿಯೋವನ್ನು ಇನ್ಸ್ಟಾಗ್ರಾಂನಲ್ಲಿ ಹಾಕಿಕೊಳ್ಳುತ್ತಿದ್ದ. ಇತ್ತೀಚೆಗೆ ವಿಜಯ್ ದೇವರಕೊಂಡ ಮತ್ತು ರಶ್ಮಿಕಾ ನಟನೆಯ ಹೊಸ ಸಿನಿಮಾ ‘ರಣಬಲಿ’ಗೆ ಹೊಸ ನಟರು ಬೇಕಾಗಿದ್ದಾರೆಂಬ ಆಡಿಷನ್ ಪ್ರಕಟಣೆ ಹೊರಡಿಸಲಾಗಿತ್ತು. ಅದಕ್ಕೆ ಯುವಕ ಜೀವನ್ ವಿಡಿಯೋ ಒಂದನ್ನು ಕಳಿಸಿದ್ದ.
ಆಡಿಷನ್ ವಿಡಿಯೋಗೆ ತಾನೇ ಚಿತ್ರಕತೆ ಬರೆದು, ತಾನೇ ಕಾಸ್ಟ್ಯೂಮ ರೆಡಿ ಮಾಡಿ, ರಕ್ತ ಇನ್ನಿತರೆಗಳನ್ನು ತಾನೇ ಮನೆಯಲ್ಲೇ ತಯಾರು ಮಾಡಿಕೊಂಡು, ಮೊಬೈಲ್ನಲ್ಲಿ ಶೂಟ್ ಮಾಡಿ ವಿಡಿಯೋ ಮಾಡಿದ್ದ ಜೀವನ್ ಆ ವಿಡಿಯೋವನ್ನು ‘ರಣಬಲಿ’ ಸಿನಿಮಾ ತಂಡಕ್ಕೆ ಕಳಿಸುವ ಜೊತೆಗೆ ಇನ್ಸ್ಟಾಗ್ರಾಂನಲ್ಲಿಯೂ ಹಂಚಿಕೊಂಡಿದ್ದ. ವಿಡಿಯೋ ಗಮನಿಸಿದ ವಿಜಯ್ ದೇವರಕೊಂಡ ಖುದ್ದಾಗಿ ವಿಡಿಯೋಕ್ಕೆ ಮೆಸೇಜ್ ಮಾಡಿದ್ದಾರೆ.
ಇದನ್ನೂ ಓದಿ:ರಶ್ಮಿಕಾ ಮಂದಣ್ಣ, ವಿಜಯ್ ದೇವರಕೊಂಡ ಹಳದಿ ಶಾಸ್ತ್ರದ ಕಲರ್ಫುಲ್ ಫೋಟೋ ಗ್ಯಾಲರಿ
‘ಅದ್ಭುತವಾದ ಪ್ರತಿಭೆ, ಈಗಲೇ ನಿನ್ನನ್ನು ಕಾಸ್ಟ್ ಮಾಡೋಣ, ನಮ್ಮ ಜೊತೆ ಸಂಪರ್ಕದಲ್ಲಿರು’ ಎಂದು ವಿಜಯ್ ದೇವರಕೊಂಡ ಕಮೆಂಟ್ ಮಾಡಿದ್ದಾರೆ. ಕಮೆಂಟ್ ಮಾಡಿದ್ದು ಮಾತ್ರವೇ ಅಲ್ಲದೆ, ತಮ್ಮ ‘ರಣಬಲಿ’ ತಂಡಕ್ಕೆ ಹೇಳಿ ಜೀವನ್ ಅವರನ್ನು ಸಂಪರ್ಕಿಸುವಂತೆ ಸಹ ಸೂಚಿಸಿದ್ದರಂತೆ. ಅದರಂತೆ ‘ರಣಬಲಿ’ ತಂಡದವರು ಜೀವನ್ ಅನ್ನು ಇನ್ಸ್ಟಾಗ್ರಾಂ ಮೂಲಕ ಸಂಪರ್ಕ ಮಾಡಿ, ಆತನ ನಂಬರ್ ಪಡೆದುಕೊಂಡಿದ್ದಾರೆ.
View this post on Instagram
ಈ ಕುರಿತು ಪ್ರತ್ಯೇಕ ವಿಡಿಯೋನಲ್ಲಿ ಹೇಳಿಕೊಂಡಿರುವ ಯುವಕ ಜೀವನ, ವಿಜಯ್ ದೇವರಕೊಂಡ ಅವರಿಗೆ ಧನ್ಯವಾದ ಹೇಳಿದ್ದಾನೆ. ಆ ಯುವಕ ಜೀವನ್, ಹಲವಾರು ವಿಡಿಯೋಗಳನ್ನು ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದು, ತಾನೊಬ್ಬ ನಟನಾಗಬೇಕು ಎಂಬುದೇ ಆತನ ಕನಸಾಗಿತ್ತು. ಇದೀಗ ವಿಜಯ್ ದೇವರಕೊಂಡ ಅವರಿಂದ ಆ ಕನಸು ನನಸಾಗುತ್ತಿದೆ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
