‘ನಮ್ಮ ಸಿನಿಮಾ RRR ಚಿತ್ರದ ಕಲೆಕ್ಷನ್ ಹಿಂದಿಕ್ಕಿದೆ; ಪಾಕಿಸ್ತಾನದ ಬಿಗ್ ಬಜೆಟ್ ಚಿತ್ರತಂಡದಿಂದ ಘೋಷಣೆ
ಚಿತ್ರದ ಹೆಸರು ‘ದಿ ಲೆಜೆಂಡ್ಸ್ ಆಫ್ ಮೌಲಾ ಜತ್’. ಈ ಚಿತ್ರದಲ್ಲಿ ಫವಾದ್ ಖಾನ್ ಹಾಗೂ ಮಹಿರಾ ಖಾನ್ ಮುಖ್ಯಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಚಿತ್ರ ದೊಡ್ಡ ಯಶಸ್ಸು ಕಾಣದೆ ಇದ್ದರೂ ತಂಡದವರು ಮಾತ್ರ ಬಡಾಯಿ ಕೊಚ್ಚಿಕೊಳ್ಳುತ್ತಿದ್ದಾರೆ.
Updated on: Nov 01, 2022 | 2:16 PM
‘ಆರ್ಆರ್ಆರ್’ ಸಿನಿಮಾ (RRR Movie) ಮಾಡಿದ ದಾಖಲೆಗಳು ತುಂಬಾ ದೊಡ್ಡದು. ‘ಕೆಜಿಎಫ್ 2’ ಸೇರಿ ಕೆಲವೇ ಕೆಲವು ಚಿತ್ರಗಳು ಈ ಚಿತ್ರದ ದಾಖಲೆಗಳನ್ನು ಮುರಿದಿವೆ. ಈಗ ಪಾಕಿಸ್ತಾನದ ಚಿತ್ರವೊಂದು ಎಸ್.ಎಸ್. ರಾಜಮೌಳಿ (RR Rajamouli) ಚಿತ್ರದ ದಾಖಲೆಗಳನ್ನು ಮುರಿದಿರುವುದಾಗಿ ಹೇಳಿಕೊಂಡು ಬೀಗಿದೆ. ಈ ಪೋಸ್ಟ್ ನೋಡಿ ಭಾರತೀಯರು ಸಖತ್ ಆಗಿ ಟ್ರೋಲ್ ಮಾಡಿದ್ದಾರೆ. ಸದ್ಯ ಪಾಕಿಸ್ತಾನದ ಸಿನಿಮಾ ತಂಡದವರು ಮಾಡಿರುವ ಪೋಸ್ಟ್ ವೈರಲ್ ಆಗುತ್ತಿದೆ.
ಆ ಚಿತ್ರದ ಹೆಸರು ‘ದಿ ಲೆಜೆಂಡ್ಸ್ ಆಫ್ ಮೌಲಾ ಜತ್’. ಈ ಚಿತ್ರದಲ್ಲಿ ಫವಾದ್ ಖಾನ್ ಹಾಗೂ ಮಹಿರಾ ಖಾನ್ ಮುಖ್ಯಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಚಿತ್ರವನ್ನು ವಿಶ್ವಾದ್ಯಂತ ರಿಲೀಸ್ ಮಾಡಲಾಗಿದೆ. ಈ ಚಿತ್ರ ದೊಡ್ಡ ಯಶಸ್ಸು ಕಾಣದೆ ಇದ್ದರೂ ತಂಡದವರು ಮಾತ್ರ ಬಡಾಯಿ ಕೊಚ್ಚಿಕೊಳ್ಳುತ್ತಿದ್ದಾರೆ. ಇಂಗ್ಲೆಂಡ್ನಲ್ಲಿ ನಾವು ‘ಆರ್ಆರ್ಆರ್’ ಚಿತ್ರದ ಕಲೆಕ್ಷನ್ನ ಹಿಂದಿಕ್ಕಿದ್ದೇವೆ ಎಂದು ಹೇಳಿಕೊಂಡಿದ್ದಾರೆ.
‘17 ದಿನಗಳಲ್ಲಿ ನಾವು ಆರ್ಆರ್ಆರ್ ಚಿತ್ರದ ಇಂಗ್ಲೆಂಡ್ ಕಲೆಕ್ಷನ್ನ ಬೀಟ್ ಮಾಡಿದ್ದೇವೆ’ ಎಂದು ತಂಡದವರು ಪೋಸ್ಟರ್ ಒಂದನ್ನು ಹಂಚಿಕೊಂಡಿದ್ದಾರೆ. ಇದಕ್ಕೆ ಪಾಕ್ ಅಭಿಮಾನಿಗಳು ಸಂತಸ ವ್ಯಕ್ತಪಡಿಸಿದ್ದಾರೆ. ‘ಸಿನಿಮಾ ಉತ್ತಮ ಗುಣಮಟ್ಟ ಹೊಂದಿದೆ. ಬಾಲಿವುಡ್ ಸಿನಿಮಾಗಳಿಗೆ ಹೋಲಿಕೆ ಮಾಡಿದರೆ ಈ ಸಿನಿಮಾ ಕಡಿಮೆ ಬಜೆಟ್ನಲ್ಲಿ ಸಿದ್ಧವಾಗಿದೆ. ನಮ್ಮ ಹೀರೋಗಳು ಸಹಜವಾಗಿಯೇ ಸುಂದರವಾಗಿ ಕಾಣುತ್ತಾರೆ. ಒಳ್ಳೆಯ ನಿರ್ಮಾಪಕರು ಸಿಕ್ಕರೆ ನಮ್ಮವರೂ ಉತ್ತಮ ಸಿನಿಮಾ ಮಾಡುತ್ತಾರೆ’ ಎಂದು ಪಾಕ್ ಅಭಿಮಾನಿಯೋರ್ವ ಹೇಳಿದ್ದಾನೆ.
View this post on Instagram
‘ಆರ್ಆರ್ಆರ್’ ಸಿನಿಮಾ ಇಂಗ್ಲೆಂಡ್ನಲ್ಲಿ 100 ಕೋಟಿ ರೂಪಾಯಿ ಗಳಿಕೆ ಮಾಡಿದೆ. ‘ದಿ ಲೆಜೆಂಡ್ಸ್ ಆಫ್ ಮೌಲಾ ಜತ್’ ತಂಡದವರು ಹೇಳುವ ಪ್ರಕಾರ ಅವರ ಚಿತ್ರ 150 ಕೋಟಿ ರೂಪಾಯಿ ಬಾಚಿಕೊಂಡಿದೆಯಂತೆ. ‘ದಿ ಲೆಜೆಂಡ್ಸ್ ಆಫ್ ಮೌಲಾ ಜತ್’ ಸಿನಿಮಾ 50 ಕೋಟಿ ರೂಪಾಯಿ ಬಜೆಟ್ನಲ್ಲಿ ಸಿದ್ಧವಾಗಿದೆ ಎನ್ನಲಾಗಿದೆ. ಬಜೆಟ್ ವಿಚಾರದಲ್ಲೂ ಕೆಲವರು ಈ ಸಿನಿಮಾವನ್ನು ಟೀಕೆ ಮಾಡಿದ್ದಾರೆ. ‘ಕಡಿಮೆ ಬಜೆಟ್ನಲ್ಲಿ ಸಿನಿಮಾ ರೆಡಿ ಮಾಡಿ ಹೆಚ್ಚಿನ ಬಜೆಟ್ ಸಿನಿಮಾ ಎಂದು ಹೇಳಿಕೊಳ್ಳುತ್ತಿದ್ದಾರೆ’ ಎಂದು ಕೆಲವರು ಆರೋಪಿಸಿದ್ದಾರೆ.
