ಚೆನ್ನೈನಲ್ಲಿ ‘ಟಾಕ್ಸಿಕ್’ ಪ್ರೀ-ರಿಲೀಸ್ ಈವೆಂಟ್; ತಮಿಳುನಾಡಿನಲ್ಲೂ ಯಶ್ ಹವಾ
ಯಶ್ ಅಭಿನಯದ ‘ಟಾಕ್ಸಿಕ್’ ಸಿನಿಮಾದ ಚೆನ್ನೈ ಪ್ರೀ-ರಿಲೀಸ್ ಈವೆಂಟ್ ಆಗಸ್ಟ್ 24ಕ್ಕೆ ಮರುನಿಗದಿಯಾಗಿದೆ. ಜವಾಹರಲಾಲ್ ನೆಹರೂ ಇಂಡೋರ್ ಕ್ರೀಡಾಂಗಣದಲ್ಲಿ ಅದ್ದೂರಿಯಾಗಿ ನಡೆಯಲಿರುವ ಈ ಕಾರ್ಯಕ್ರಮದಲ್ಲಿ ಯಶ್ ಭಾಗವಹಿಸಲಿದ್ದು, ಈ ಹಿಂದೆ ತಮಿಳಿನಲ್ಲಿ ಸರಾಗವಾಗಿ ಮಾತನಾಡಿ ಸೃಷ್ಟಿಸಿದ್ದ ಕ್ರೇಜ್ ಈವೆಂಟ್‌ನ ಯಶಸ್ಸಿಗೆ ಮತ್ತು ಚಿತ್ರದ ಪ್ರಚಾರಕ್ಕೆ ಭಾರಿ ನೆರವಾಗಲಿದೆ.
ಮುಖ್ಯಾಂಶಗಳು
- ಚೆನ್ನೈನಲ್ಲಿ ‘ಟಾಕ್ಸಿಕ್’ ಹವಾ
- ನೆಹರೂ ಇಂಡೋರ್ ಸ್ಟೇಡಿಯಂನಲ್ಲಿ ಮಾಸ್ ಈವೆಂಟ್
- ಆಗಸ್ಟ್ 24ಕ್ಕೆ ಈವೆಂಟ್ ಮರುನಿಗದಿ
ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ ‘ಟಾಕ್ಸಿಕ್’ ಸಿನಿಮಾದ ತಮಿಳು ಪ್ರೀ-ರಿಲೀಸ್ ಈವೆಂಟ್ ಇಂದು (ಆಗಸ್ಟ್ 24) ಚೆನ್ನೈನ ಪ್ರತಿಷ್ಠಿತ ಜವಾಹರಲಾಲ್ ನೆಹರೂ ಇಂಡೋರ್ ಸ್ಟೇಡಿಯಂನಲ್ಲಿ ನಡೆಯಲಿದೆ. ಈ ಮೊದಲು ಆಗಸ್ಟ್ 23ರಂದು ಈವೆಂಟ್ ನಡೆಯಬೇಕಿತ್ತು. ಕೊನೆಯ ಕ್ಷಣದಲ್ಲಿ ದಿನಾಂಕದಲ್ಲಿ ಬದಲಾವಣೆಯಾಗಿದೆ. ಈ ಹಿಂದೆ ನೋಂದಾಯಿಸಿಕೊಂಡಿದ್ದ ಅಭಿಮಾನಿಗಳ ಉಚಿತ ಪಾಸ್‌ಗಳು ಹಾಗೂ ಟಿಕೆಟ್‌ಗಳು ಮರುದಿನಕ್ಕೂ ಮಾನ್ಯವಾಗಿರಲಿವೆ.
ತಮಿಳುನಾಡಿನಲ್ಲಿ ಈ ಸಮಾರಂಭವು ಅತ್ಯಂತ ವಿಜೃಂಭಣೆಯಿಂದ ನೆರವೇರಲಿದ್ದು, ಕಾಲಿವುಡ್‌ನ ಪ್ರಮುಖ ಗಣ್ಯರು ಹಾಗೂ ಸಾವಿರಾರು ಅಭಿಮಾನಿಗಳು ಭಾಗವಹಿಸುವ ನಿರೀಕ್ಷೆಯಿದೆ.ತೆಲುಗಿನಲ್ಲಿ ಶನಿವಾರ (ಆಗಸ್ಟ್ 22) ‘ಟಾಕ್ಸಿಕ್’ ಈವೆಂಟ್ ನಡೆದಿದೆ. ಈ ವೇಳೆ ಸಾವಿರಾರು ಅಭಿಮಾನಿಗಳು ನೆರೆದಿದ್ದರು. ಸ್ಪೀಕರ್ ಬಿದ್ದು ಸಣ್ಣ ಅವಘಡ ಸಂಭವಿಸಿತ್ತು. ಅದು ಚೆನ್ನೈನಲ್ಲಿ ಮರುಕಳಿಸದಂತೆ ನೋಡಿಕೊಳ್ಳಬೇಕಿದೆ.
His Tamil feels more fluent than Telugu!#Yash #ToxicTheMovie https://t.co/z8FvKHMvsD
— 有毒 ☣️ (@danameisDileep) August 23, 2026
ಈ ಹಿಂದೆ ‘ಕೆಜಿಎಫ್ 2’ ಸಿನಿಮಾಗಳ ಪ್ರಚಾರ ಹಾಗೂ ಸಂದರ್ಶನಗಳ ಸಮಯದಲ್ಲಿ ಯಶ್ ಅವರು ಅತ್ಯಂತ ಸರಾಗವಾಗಿ ತಮಿಳು ಭಾಷೆಯಲ್ಲಿ ಮಾತನಾಡಿ ತಮಿಳು ಪ್ರೇಕ್ಷಕರ ಮನ ಗೆದ್ದಿದ್ದರು. ಅವರ ಈ ಭಾಷಾ ಪ್ರೌಢಿಮೆ ಮತ್ತು ಜನಪ್ರಿಯತೆ ಚೆನ್ನೈನಲ್ಲಿ ನಡೆಯಲಿರುವ ಈವೆಂಟ್ ಯಶಸ್ಸಿಗೆ ಹಾಗೂ ಅಲ್ಲಿನ ಮಾರುಕಟ್ಟೆಯಲ್ಲಿ ‘ಟಾಕ್ಸಿಕ್’ ಸಿನಿಮಾದ ಕ್ರೇಜ್ ಮತ್ತಷ್ಟು ಹೆಚ್ಚಿಸಲು ದೊಡ್ಡ ಮಟ್ಟದಲ್ಲಿ ಸಹಕಾರಿಯಾಗಲಿದೆ.
ಇದನ್ನೂ ಓದಿ: ತೆಲುಗು ರಾಜ್ಯಗಳಲ್ಲಿ ‘ಟಾಕ್ಸಿಕ್’ ಬುಕಿಂಗ್ ಓಪನ್ ಆಗಿಲ್ಲ ಏಕೆ? ಇಲ್ಲಿದೆ ಕಾರಣ
‘ಟಾಕ್ಸಿಕ್’ ಚಿತ್ರ ಆಗಸ್ಟ್ 26ಕ್ಕೆ ಕನ್ನಡ, ತಮಿಳು, ತೆಲುಗು ಸೇರಿದಂತೆ ಹಲವು ಭಾಷೆಗಳಲ್ಲಿ ರಿಲೀಸ್ ಆಗಲಿದೆ. ಈ ಸಿನಿಮಾ ನೋಡಲು ಫ್ಯಾನ್ಸ್ ಕಾದಿದ್ದಾರೆ. ಮಲಯಾಳಂ ನಿರ್ದೇಶಕಿ ಗೀತು ಮೋಹನ್ದಾಸ್ ಅವರ ಮೊದಲ ಕನ್ನಡ ಸಿನಿಮಾ ಇದಾಗಿದೆ. ಹಿಂದಿ ಹಾಗೂ ಕನ್ನಡ ಕಲಾವಿದರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ಯಶ್ ಅವರ ದ್ವಿಪಾತ್ರ ಸಿನಿಮಾದ ಹೈಲೈಟ್.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
Published On - 10:54 am, Mon, 24 August 26