ಬಾಯಿಗೆ ರುಚಿ ಕೊಡುವ ಮೊಸರಿನ ಪ್ರಯೋಜನಗಳ ಬಗ್ಗೆ ನಿಮಗೆಷ್ಟು ಗೊತ್ತು?

ಮೊಸರು ಸಾಮಾನ್ಯವಾಗಿ ಎಲ್ಲರಿಗೂ ಇಷ್ಟವಾಗುತ್ತದೆ. ಅನ್ನಕ್ಕೆ ಮೊಸರು ಹಾಕಿಕೊಂಡು ಊಟ ಮಾಡಿದರೆ ಸಾಕು ಅದರ ರುಚಿ ಯಾವ ರೆಸ್ಟೊರೆಂಟ್ ಊಟಕ್ಕೂ ಕಡಿಮೆ ಅಂತ ಅನಿಸಲ್ಲ. ಜೊತೆಗೆ ಊಟಕ್ಕೆ ಒಂದು ಚಿಕ್ಕ ಉಪ್ಪಿನಕಾಯಿ ಇದ್ದರೆ ಬಿಡಿ, ಊಟ ಅದ್ಭುತವಾಗುತ್ತದೆ. ಬಾಯಿಗೆ ರುಚಿ ನೀಡುವ ಮೊಸರು, ಆರೋಗ್ಯಕ್ಕೂ ತುಂಬಾ ಒಳ್ಳೆಯದು. ವಿಟಮಿನ್ ಬಿ 2, ವಿಟಮಿನ್ ಬಿ 12, ಪೊಟ್ಯಾಸಿಯಮ್ ಮತ್ತು ಮೆಗ್ನೀಷಿಯಂ ಪೋಷಕಾಂಶಗಳನ್ನು ಹೊಂದಿರುವ ಮೊಸರನ್ನು ದೈನಂದಿನ ಊಟದೊಂದಿಗೆ ಬಳಸಬೇಕು. ಇಲ್ಲದಿದ್ದರೆ ದಿನಕ್ಕೆ ಒಂದು ಬಾರಿಯಾದರು ಒಂದ ಕಪ್ ಮೊಸರನ್ನು ಸೇವಿಸಬೇಕು.

ತೂಕ ಇಳಿಸುವುದರಿಂದ ಹಿಡಿದು ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸುವವರೆಗೆ ಮೊಸರು ಅನೇಕ ಆರೋಗ್ಯ ಪ್ರಯೋಜನಗಳನ್ನು ಹೊಂದಿದೆ. ಜೊತೆಗೆ ಇದು ಸೌಂದರ್ಯವನ್ನು ಹೆಚ್ಚಿಸುವ ಗುಣಗಳನ್ನೂ ಹೊಂದಿದೆ.

* ಮುಖದ ಕಾಂತಿ ಹೆಚ್ಚಿಸುತ್ತದೆ ಹಲವರು ಮೊಡವೆ ಕಲೆಗಳಿಂದ ಮುಜುಗರಕ್ಕೆ ಒಳಗಾಗಿರುತ್ತಾರೆ. ಇನ್ನು ಕೆಲವರು ಚರ್ಮದ ಇತರೆ ಸಮಸ್ಯೆಗಳನ್ನ ಹೊಂದಿರುತ್ತಾರೆ. ಅಂತವರು ಮೊಸರನ್ನು ಬಳಸಬಹುದು. ಇದು ಮುಖದ ಕಾಂತಿಯನ್ನು ಹೆಚ್ಚಿಸುತ್ತದೆ. ಬಿಸಿಲಿಗೆ ಮುಖದ ಕಾಂತಿ ಕಡಿಮೆಯಾಗಿದ್ದರೆ ಇದು ಮದ್ದಾಗಿ ಕಾರ್ಯನಿರ್ವಹಿಸುತ್ತದೆ.

* ಮೊಡವೆಗೆ ಪರಿಹಾರ ಮೊಸರು ಚರ್ಮವನ್ನು ಹೊಳೆಯುವಂತೆ ಮಾಡುವುದು ಮಾತ್ರವಲ್ಲದೇ ಮೊಡವೆ ಸಮಸ್ಯೆಯನ್ನು ನಿವಾರಿಸುವ ಔಷಧೀಯ ಗುಣಗಳನ್ನು ಹೊಂದಿದೆ. ಇದು ಬ್ಯಾಕ್ಟೀರಿಯಾ ವಿರೋಧಿ ಮತ್ತು ಆಂಟಿಫಂಗಲ್ ಗುಣಗಳಿಂದ ಕೂಡಿದೆ.

* ಡಾರ್ಕ್ ಸರ್ಕಲ್​ಗೆ ಪರಿಹಾರ ಅನೇಕ ಕಾರಣಗಳಿಂದ ಕಣ್ಣಿನ ಕೆಳಗೆ ಡಾರ್ಕ್ ಸರ್ಕಲ್ ಆಗುತ್ತದೆ. ಮುಖದ ಸೌಂದರ್ಯವನ್ನು ಹಾಳು ಮಾಡುವ ಡಾರ್ಕ್ ಸರ್ಕಲ್ ಕಡಿಮೆಗೊಳಿಸಲು ಮೊಸರನ್ನು ಬಳಸಿ. ಮೊಸರು ಉರಿಯೂತದ ಗುಣಗಳನ್ನು ಹೊಂದಿದ್ದು, ಕಪ್ಪು ಕಲೆ ಅಥವಾ ಡಾರ್ಕ್ ಸರ್ಕಲ್ ಹೋಗಲಾಡಿಸಲು ಸಹಾಯ ಮಾಡುತ್ತದೆ. ಪ್ರತಿ ರಾತ್ರಿ ಮಲಗುವ ಮುನ್ನ ಸ್ವಲ್ಪ ಮೊಸರನ್ನು ಹಚ್ಚಿ ಮರುದಿನ ಬೆಳಿಗ್ಗೆ ತೊಳೆಯಿರಿ.

* ಕೂದಲು ಉದುರುವಿಕೆ ತಡೆಯುವುದು ವಿಪರೀತವಾಗಿ ಕೂದಲು ಉದುರುತ್ತಿದ್ದರೆ ಮೊಸರನ್ನು ಬಳಸಬಹುದು. ಮೊಸರು ಕೂದಲನ್ನು ಆರೋಗ್ಯಕರವಾಗಿ, ಮೃದುವಾಗಿ ಮತ್ತು ಹೊಳೆಯುವಂತೆ ಮಾಡುತ್ತದೆ. ಇದರಲ್ಲಿರುವ ವಿಟಮಿನ್ ಬಿ 5 ಮತ್ತು ಡಿ, ಕೂದಲು ಉದುರುವುದನ್ನು ನಿಯಂತ್ರಿಸುತ್ತದೆ. ಅಲ್ಲದೇ ಮೊಸರನ್ನು ವಾರಕ್ಕೊಮ್ಮೆ ಕೂದಲಿಗೆ ಹಚ್ಚುವುದರಿಂದ ಕೂದಲಿನ ಬೆಳವಣಿಗೆಗೆ ಸಹಾಯವಾಗುತ್ತದೆ. ಹಾಗೇ, ಕೂದಲನ್ನು ಆರೋಗ್ಯಕರವಾಗಿ, ಮೃದುವಾಗಿ ಮತ್ತು ಹೊಳೆಯುವಂತೆ ಮಾಡುತ್ತದೆ.

* ತಲೆ ಹೊಟ್ಟು ನಿಯಂತ್ರಿಸುತ್ತದೆ ಬಹುತೇಕರಿಗೆ ತಲೆ ಹೊಟ್ಟಿನ ಸಮಸ್ಯೆ ಇರುತ್ತದೆ. ಅಂತವರು ಯಾವುದೇ ಭಯವಿಲ್ಲದೆ ಮೊಸರನ್ನು ಬಳಸಬಹುದು. ಮೊಸರು ಅನೇಕ ವಿಟಮಿನ್ ಮತ್ತು ಖನಿಜಾಂಶಗಳನ್ನು ಹೊಂದಿದ್ದು, ನೆತ್ತಿಯನ್ನು ತೇವಗೊಳಿಸಿ ಪೋಷಿಸುತ್ತದೆ.

ಇದನ್ನೂ ಓದಿ

Digestive Issues: ನಿಮಗೆ ಅಜೀರ್ಣ ಸಮಸ್ಯೆ ಉಂಟಾ? ಆಹಾರವನ್ನು ಹೀಗೆ ಸೇವಿಸಬಾರದು

ಯಾವ ಯಾವ ಕಾರಣಕ್ಕೆ ಕಾಲಿಗೆ ಕಪ್ಪು ದಾರ ಕಟ್ಟುತ್ತಾರೆ? ತಿಳಿದುಕೊಳ್ಳಿ

(Benefits of Yoghurt for skin and hair)