ವೈರಲ್ ಜ್ವರದ ಬಳಿಕವೂ ಕೆಮ್ಮು ಕಡಿಮೆಯಾಗದಿದ್ದರೆ ವೈದ್ಯರು ತಿಳಿಸಿರುವ ಈ ಸಲಹೆಗಳನ್ನು ಫಾಲೋ ಮಾಡಿ!

ವೈರಲ್ ಸೋಂಕಿನ ನಂತರ ಜ್ವರ, ಮೈಕೈ ನೋವು, ಗಂಟಲು ನೋವು ಹಾಗೂ ಮೂಗು ಕಟ್ಟುವಿಕೆ ಕಡಿಮೆಯಾದರೂ ಕೆಮ್ಮು ಮಾತ್ರ ಕೆಲವು ವಾರಗಳವರೆಗೆ ಮುಂದುವರಿಯುವುದು ಸಾಮಾನ್ಯವಾಗಿಬಿಟ್ಟಿದೆ. ಇದನ್ನು ಪೋಸ್ಟ್-ಇನ್ಫೆಕ್ಷಿಯಸ್ ಕಫ್ (Post-infectious cough) ಎಂದು ಕರೆಯಲಾಗುತ್ತದೆ. ವೈರಸ್ ದೇಹದಿಂದ ಹೊರಹೋದ ಬಳಿಕವೂ ಗಂಟಲು ಮತ್ತು ಉಸಿರಾಟದ ಮಾರ್ಗಗಳಲ್ಲಿ ಉರಿಯೂತ ಹಾಗೂ ಸಂವೇದನಾಶೀಲತೆ ಕೆಲಕಾಲ ಉಳಿಯಬಹುದು. ದೆಹಲಿ ಮ್ಯಾಕ್ಸ್ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಯ ಪ್ರಿನ್ಸಿಪಲ್ ಡೈರೆಕ್ಟರ್ ಆಗಿರುವ ಡಾ. ಮೀನಾಕ್ಷಿ ಜೈನ್ ಅವರು ಈ ಬಗ್ಗೆ ಹೆಚ್ಚಿನ ಮಾಹಿತಿ ನೀಡಿದ್ದು, ಕೆಮ್ಮು ಕಡಿಮೆಯಾಗದಿರುವುದಕ್ಕೆ ಕಾರಣ ಮತ್ತು ಅದನ್ನು ಕಡಿಮೆ ಮಾಡಲು ಏನು ಮಾಡಬಹುದು ಎಂಬುದನ್ನು ತಿಳಿಸಿದ್ದಾರೆ.

ತಣ್ಣನೆಯ ಗಾಳಿ, ಧೂಳು ಕೆಮ್ಮಿಗೆ ಕಾರಣವಾಗಬಹುದು

ವೈರಲ್ ಸೋಂಕಿನ ಬಳಿಕ ತಣ್ಣನೆಯ ಗಾಳಿ, ಧೂಳು, ಮಾತನಾಡುವುದು, ನಗುವುದು ಅಥವಾ ತೀವ್ರ ವಾಸನೆಯಂತಹ ಸಣ್ಣ ಪ್ರಚೋದನೆಗಳಿಗೂ ಕೆಮ್ಮು ಶುರುವಾಗಬಹುದು. ಸೋಂಕಿನ ಸಮಯದಲ್ಲಿ ಹೆಚ್ಚಾದ ಮ್ಯೂಕಸ್ ಕೂಡ ಕೆಮ್ಮಿಗೆ ಕಾರಣವಾಗಬಹುದು. ಮೂಗು ಅಥವಾ ಸೈನಸ್‌ನಿಂದ ಕಫ ಗಂಟಲಿನ ಹಿಂಭಾಗಕ್ಕೆ ಹರಿಯುವುದನ್ನು ಪೋಸ್ಟ್-ನೇಸಲ್ ಡ್ರಿಪ್ (Post-nasal drip) ಎನ್ನುತ್ತಾರೆ. ಇದು ವಿಶೇಷವಾಗಿ ರಾತ್ರಿ ವೇಳೆ ಗಂಟಲಿಗೆ ಕಿರಿಕಿರಿ ಉಂಟುಮಾಡಿ ಕೆಮ್ಮನ್ನು ಹೆಚ್ಚಿಸಬಹುದು.

ಕೆಮ್ಮು ಸಾಮಾನ್ಯವಾಗಿ ಎಷ್ಟು ದಿನಗಳವರೆಗೆ ಇರುತ್ತದೆ ?

ಸಾಮಾನ್ಯವಾಗಿ ವೈರಲ್ ಉಸಿರಾಟದ ಸೋಂಕಿನ ನಂತರ 3ರಿಂದ 8 ವಾರಗಳ ವರೆಗೆ ಇರುವ ಕೆಮ್ಮನ್ನು ಪೋಸ್ಟ್-ಇನ್ಫೆಕ್ಷಿಯಸ್ ಅಥವಾ ಸಬ್‌ಅಕ್ಯೂಟ್ ಕಫ್ ಎಂದು ಪರಿಗಣಿಸಲಾಗುತ್ತದೆ. ಸಾಮಾನ್ಯವಾಗಿ ಇದು ಕ್ರಮೇಣ ಕಡಿಮೆಯಾಗುತ್ತದೆ. ಆದರೆ 8 ವಾರಗಳಿಗಿಂತ ಹೆಚ್ಚು ಸಮಯ ಕೆಮ್ಮು ಇದ್ದಲ್ಲಿ ವೈದ್ಯಕೀಯ ತಪಾಸಣೆ ಅಗತ್ಯವಾಗಬಹುದು. ಆಸ್ತಮಾ, ಆಸಿಡ್ ರಿಫ್ಲಕ್ಸ್, ದೀರ್ಘಕಾಲದ ಮೂಗಿನ ಸಮಸ್ಯೆಗಳು ಅಥವಾ ಇತರ ಶ್ವಾಸಕೋಶದ ಕಾಯಿಲೆಗಳಂತಹ ಕಾರಣಗಳನ್ನು ಪರಿಶೀಲಿಸಬೇಕಾಗಬಹುದು.

ಇದನ್ನೂ ಓದಿ: ಮಕ್ಕಳ ರೋಗನಿರೋಧಕ ಶಕ್ತಿಗೆ ಬೇಕು ಪೌಷ್ಟಿಕ ಆಹಾರ; ಪ್ಲೇಟ್ಅಲ್ಲಿ ತಪ್ಪದೆ ಈ 5 ಫುಡ್ಸ್ ಇರಲಿ

ಕೆಮ್ಮಿಗೆ ಆ್ಯಂಟಿಬಯಾಟಿಕ್ ಬೇಕೇ?

ವೈರಲ್ ಸೋಂಕಿನ ಬಳಿಕ ಕಂಡು ಬರುವ ಕೆಮ್ಮಿಗೆ ನೀವೇ ಆ್ಯಂಟಿಬಯಾಟಿಕ್ ತೆಗೆದುಕೊಳ್ಳಬಾರದು. ವೈರಸ್ ವಿರುದ್ಧ ಆ್ಯಂಟಿಬಯಾಟಿಕ್ ಕೆಲಸ ಮಾಡುವುದಿಲ್ಲ. ಅನಗತ್ಯ ಬಳಕೆಯಿಂದ ಅಡ್ಡಪರಿಣಾಮಗಳು ಉಂಟಾಗುವುದರ ಜೊತೆಗೆ ಆ್ಯಂಟಿಬಯಾಟಿಕ್ ರೆಸಿಸ್ಟೆನ್ಸ್ ಅಪಾಯವೂ ಹೆಚ್ಚಬಹುದು. ಬ್ಯಾಕ್ಟೀರಿಯಲ್ ನ್ಯುಮೋನಿಯಾ, ಬ್ಯಾಕ್ಟೀರಿಯಲ್ ಸೈನಸೈಟಿಸ್ ಅಥವಾ ವೂಪಿಂಗ್ ಕಫ್ ಇರಬಹುದು ಎಂಬ ಅನುಮಾನವಿದ್ದಾಗ ಮಾತ್ರ ವೈದ್ಯರ ಸಲಹೆ ಪಡೆದು ಆ ಬಳಿಕ ಆ್ಯಂಟಿಬಯಾಟಿಕ್ ಸೇವನೆ ಮಾಡಬಹುದು.

ಕೆಮ್ಮು ಕಡಿಮೆ ಮಾಡಲು ಏನು ಮಾಡಬಹುದು?

ಸಾಕಷ್ಟು ನೀರು ಕುಡಿಯುವುದು, ಆಗಾಗ ಬೆಚ್ಚಗಿನ ಪಾನೀಯವನ್ನು ಕುಡಿಯುವುದು ಮತ್ತು ಹೊಗೆಯಿಂದ ದೂರವಿರುವುದು ಕೆಮ್ಮು ಕಡಿಮೆ ಮಾಡಲು ಸಹಾಯ ಮಾಡಬಹುದು. ಒಂದು ವರ್ಷಕ್ಕಿಂತ ಮೇಲ್ಪಟ್ಟ ಮಕ್ಕಳಿಗೆ ಮತ್ತು ವಯಸ್ಕರಿಗೆ ಜೇನುತುಪ್ಪವನ್ನು ಬಳಸಬಹುದು. ಮೂಗಿನ ಸಮಸ್ಯೆ ಇದ್ದರೆ ಸಾಲೈನ್ ನಾಸಲ್ ರಿನ್ಸ್ ಸಹ ಉಪಯುಕ್ತವಾಗಬಹುದು. ಸ್ಟೀಮ್ ಕೆಲವರಿಗೆ ಆರಾಮ ನೀಡಬಹುದು, ಆದರೆ ಬಿಸಿ ನೀರಿನಿಂದ ಸುಟ್ಟ ಗಾಯಗಳಾಗದಂತೆ ಎಚ್ಚರಿಕೆ ವಹಿಸಬೇಕು.

ಈ ಲಕ್ಷಣಗಳಿದ್ದರೆ ವೈದ್ಯರನ್ನು ಸಂಪರ್ಕಿಸಿ

ಕೆಮ್ಮು ಕ್ರಮೇಣ ಕಡಿಮೆಯಾಗದೆ ಹೆಚ್ಚಾಗುತ್ತಿದ್ದರೆ ಅಥವಾ ಮೂರು ವಾರಗಳ ನಂತರವೂ ಸುಧಾರಣೆ ಕಾಣದಿದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ. ಕೆಮ್ಮಿನೊಂದಿಗೆ ಉಸಿರಾಟದ ತೊಂದರೆ, ಎದೆನೋವು, ವೀಸಿಂಗ್, ಹೆಚ್ಚಿನ ಜ್ವರ, ಕಫದಲ್ಲಿ ರಕ್ತ, ಕಾರಣವಿಲ್ಲದೆ ತೂಕ ಇಳಿಕೆ, ಧ್ವನಿ ಬದಲಾವಣೆ ಅಥವಾ ತೀವ್ರ ದೌರ್ಬಲ್ಯ ಕಂಡುಬಂದರೆ ವಿಶೇಷವಾಗಿ ವೈದ್ಯಕೀಯ ತಪಾಸಣೆ ಅಗತ್ಯ. ಕೆಲವರಿಗೆ ವೈದ್ಯರು ಅಗತ್ಯವಿದ್ದರೆ ಎದೆ ಎಕ್ಸ್-ರೇ, ಕ್ಲಿನಿಕಲ್ ಪರೀಕ್ಷೆ ಅಥವಾ ಲಂಗ್ ಫಂಕ್ಷನ್ ಟೆಸ್ಟ್‌ಗಳನ್ನು ಸೂಚಿಸಬಹುದು.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ