ರೊಬೊಟಿಕ್ ಶಸ್ತ್ರಚಿಕಿತ್ಸೆ: ಗೂನು ಬೆನ್ನು ಇರುವ ಮಕ್ಕಳಿಗೆ ಹೊಸ ಭರವಸೆ

ಬೆನ್ನುಮೂಳೆಯ ವಿರೂಪಗಳು ಜನ್ಮಜಾತ (Spinal Deformities) ಅಥವಾ ಬಹಿರಂಗ ಅಥವಾ ನೈಸರ್ಗಿಕ ಅಂಶಗಳಿಂದ ಪ್ರೇರಿತವಾಗಿ ಉಂಟಾಗಬಹುದು. ಜೊತೆಗೆ, ದೀರ್ಘಕಾಲದವರೆಗೆ ಮೊಬೈಲ್ ಫೋನ್‌ನಲ್ಲಿ ಅಥವಾ ಕಂಪ್ಯೂಟರ್ ಗೇ‍ಮ್‌ಗಳನ್ನು ಆಡುತ್ತ ಒಂದೇ ಜಾಗದಲ್ಲಿ ಗಂಟೆಗಟ್ಟಲೆ ಕಳೆಯುವುದರಿಂದ ಕೈಫೋಸಿಸ್ ಹೆಚ್ಚಾಗಿ ಉಂಟಾಗುತ್ತದೆ. ಇದು ಸ್ವಲ್ಪಮಟ್ಟಿಗೆ “ಗೂನು ಬೆನ್ನಿನ” ನೋಟವನ್ನು (ವೈದ್ಯಕೀಯ ಪರಿಭಾಷೆಯಲ್ಲಿ ಕೈಫೋಸಿಸ್) ಸೃಷ್ಟಿಸುತ್ತದೆ. ಇದರಲ್ಲಿ ಬೆನ್ನುಮೂಳೆಯು ಸಹಜವಾಗಿ ಇರುವ ವಕ್ರರೇಖೆಗಿಂತ ಅತಿಯಾಗಿ ದುಂಡಾಗಿರುತ್ತದೆ. ಇದರ ಬಗ್ಗೆ ಒಂದು ಅಧ್ಯಯನವನ್ನು ನಡೆಸಿ, ಇದೀಗ ಈ ಸಮಸ್ಯೆಗೆ ಒಂದು ಪರಿಹಾರವನ್ನು ಬೆಂಗಳೂರಿನ ಹಳೆಯ ವಿಮಾನ ನಿಲ್ದಾಣ ರಸ್ತೆಯ ಮಣಿಪಾಲ್ ಆಸ್ಪತ್ರೆ ವೈದ್ಯರ ತಂಡ ಕಂಡುಕೊಂಡಿದೆ.

ವಿಭಿನ್ನ ವಯೋಮಾನದವರ ಮೇಲೆ ಇದು ಹೇಗೆ ಪರಿಣಾಮ ಬೀರುತ್ತದೆ?

ಕೈಫೋಸಿಸ್ ಸಮಸ್ಯೆ ಅಥವಾ ಬೆನ್ನುಮೂಳೆಯು ಅತಿಯಾಗಿ ಮುಂದಕ್ಕೆ ಬಾಗಿರುವ ಸಮಸ್ಯೆಯು ವಯೋಮಾನಕ್ಕೆ ಅನುಗುಣವಾಗಿ ವಿಭಿನ್ನವಾಗಿ ಕಂಡುಬರುತ್ತದೆ. ಅಸಮ ಕಶೇರುಖಂಡಗಳ ಬೆಳವಣಿಗೆಯಿಂದಾಗಿ ಸ್ಕುವರ್‌ಮನ್ ಕಾಯಿಲೆಯು 10-15 ವರ್ಷ ವಯಸ್ಸಿನ ಮಕ್ಕಳ ಮೇಲೆ ಪರಿಣಾಮ ಬೀರುತ್ತದೆ. ಹದಿಹರೆಯದವರು ಸಾಮಾನ್ಯವಾಗಿ ಕೆಟ್ಟ ಭಂಗಿಯಲ್ಲಿ ಕುಳಿತುಕೊಳ್ಳುವುದರಿಂದ, ವಿಶೇಷವಾಗಿ ದೀರ್ಘಕಾಲದವರೆಗೆ ಮೊಬೈಲ್, ಕಂಪ್ಯೂಟರ್ ಸ್ಕ್ರೀನ್ ವೀಕ್ಷಿಸುತ್ತ ಕಾಲ ಕಳೆಯುವುದರಿಂದ ಪೋಸ್ಚರ್ ಕೈಫೋಸಿಸ್ (ಭಂಗಿ ಆಧರಿತ ವಿರೂಪತೆ) ಯಿಂದ ಬಳಲಬಹುದು. ವಯಸ್ಕರಲ್ಲಿ, ಇದು ಬೆನ್ನುಮೂಳೆಯ ಗಾಯ ಅಥವಾ ಡಿಸ್ಕ್ ಕ್ಷೀಣತೆಯಿಂದ ಉಂಟಾಗಬಹುದು. ಹಿರಿಯರು – ವಿಶೇಷವಾಗಿ ಋತುಬಂಧಕ್ಕೊಳಗಾದ ಮಹಿಳೆಯರು – ಆಸ್ಟಿಯೊಪೊರೋಸಿಸ್ ಅಥವಾ ಸಂಧಿವಾತದಿಂದ ಬಳಲುವವರಲ್ಲಿ ಗೂನು ಬೆನ್ನಿನ ಸಮಸ್ಯೆ ಕಾಡಬಹುದು. ನ್ಯಾಷನಲ್ ಲೈಬ್ರರಿ ಆಫ್ ಮೆಡಿಸಿನ್ ಪ್ರಕಾರ, ಶಾಲಾ ಮಕ್ಕಳ ಭಾರವಾದ ಚೀಲಗಳು ಭಾರತದ ವಿದ್ಯಾರ್ಥಿಗಳಲ್ಲಿ ಬೆನ್ನುನೋವಿಗೆ ಪ್ರಮುಖ ಕಾರಣವಾಗಿವೆ.

ಲಕ್ಷಣಗಳು:

ಬೆನ್ನು ಬಾಗಿರುವುದು, ಕೂರುವ ಭಂಗಿಯ ಸಮಸ್ಯೆಗಳು, ಆಯಾಸ, ಉಸಿರಾಟದ ತೊಂದರೆ, ಮರಗಟ್ಟುವಿಕೆ ಅಥವಾ ಬೆನ್ನಿನ ಕೆಳಭಾಗದಲ್ಲಿ ನೋವು ಮುಂತಾದ ಕೆಟ್ಟ ಭಂಗಿಯಿಂದ ಉಂಟಾಗುವ ಲಕ್ಷಣಗಳನ್ನು ನಿರ್ಲಕ್ಷಿಸಬಾರದು. ಪ್ರತಿ 6ರಿಂದ 12 ತಿಂಗಳಿಗೊಮ್ಮೆ ನಿಯಮಿತ ಎಕ್ಸ್-ರೇಗಳನ್ನು ಮಾಡಿಸಿಕೊಳ್ಳುವುದರಿಂದ ಬೆನ್ನುಮೂಳೆಯ ವಕ್ರರೇಖೆಯ ಪ್ರಗತಿಯನ್ನು ಮೇಲ್ವಿಚಾರಣೆ ಮಾಡಬಹುದು. ಆರಂಭದಲ್ಲೇ ಪತ್ತೆ ಮಾಡಿದರೆ ಫಿಸಿಯೋಥೆರಪಿ, ವ್ಯಾಯಾಮ ಅಥವಾ ಕಟ್ಟುಪಟ್ಟಿಗಳ ಮೂಲಕ ಈ ಸಮಸ್ಯೆಯನ್ನು ಪರಿಹಾರ ಮಾಡಲು ಸಾಧ್ಯವಾಗಿಸುತ್ತದೆ. ದೀರ್ಘಕಾಲೀನ ಬೆನ್ನುಮೂಳೆ ಸಮಸ್ಯೆಯನ್ನು ತಡೆಗಟ್ಟಲು ಆರೋಗ್ಯಕರ ತೂಕವನ್ನು ಕಾಯ್ದುಕೊಳ್ಳುವುದು, ಶಾಲೆಯಲ್ಲಿ ಸರಿಯಾದ ಆಸನ ವ್ಯವಸ್ಥೆ ಮತ್ತು ಕುಳಿತುಕೊಳ್ಳುವ ಭಂಗಿಯನ್ನು ಅಭ್ಯಾಸ ಮಾಡಿಕೊಳ್ಳುವುದು, ಮತ್ತು ಮಕ್ಕಳ ಬೆನ್ನಿಗೆ ಅತಿಯಾದ ಭಾರವನ್ನು ಹೊರಿಸದಿರುವುದು ಸುಲಭದ ವಿಧಾನವಾಗಿದೆ.

ಚಿಕಿತ್ಸೆ:

ಕೈಫೋಸಿಸ್ ನಿರ್ವಹಣೆ ಮತ್ತು ಪರಿಹಾರವು ಅದರ ತೀವ್ರತೆಯನ್ನು ಆಧರಿಸಿದೆ. ಭಂಗಿಯನ್ನು ಸರಿಪಡಿಸಲು ಮತ್ತು ವಿರೂಪಗೊಳ್ಳುವಿಕೆ ಹೆಚ್ಚುವುದನ್ನು ಕುಂಠಿತಗೊಳಿಸಲು ಭಂಗಿ ಚಿಕಿತ್ಸೆ, ನೋವು ನಿರ್ವಹಣೆ ಮತ್ತು ಬ್ರೇಸಿಂಗ್ ಅಳವಡಿಕೆ ಅಗತ್ಯವಾಗಬಹುದು. ಹೆಚ್ಚಿನ ಬೆನ್ನುಮೂಳೆಯ ವಕ್ರರೇಖೆ ಅಥವಾ ತೀವ್ರ ಲಕ್ಷಣಗಳು ಕಾಣಿಸಿಕೊಂಡ ಸಂದರ್ಭಗಳಲ್ಲಿ, ಸುಧಾರಿಸಲು ಮತ್ತು ನೋವನ್ನು ಕಡಿಮೆ ಮಾಡಲು ಬೆನ್ನುಮೂಳೆಯನ್ನು ನೇರಗೊಳಿಸಲು ಮತ್ತು ಸ್ಥಿರಗೊಳಿಸಲು (ಸ್ಪೈನಲ್ ಫ್ಯೂಶನ್ ಅಥವಾ ಬೆನ್ನುಮೂಳೆಯ ಸಮ್ಮಿಳನ) ಶಸ್ತ್ರಚಿಕಿತ್ಸೆಯನ್ನು ಮಾಡಬಹುದು.

ಉಲ್ಬಣಗೊಂಡ ಕೈಫೋಸಿಸ್‌ ಪ್ರಕರಣಗಳಲ್ಲಿ, ಬೆನ್ನುಮೂಳೆಯ ಶಸ್ತ್ರಚಿಕಿತ್ಸೆಯೇ ಅಂತಿಮ ಮಾರ್ಗವಾಗಿದೆ. ಒಂದು ಕಾಲದಲ್ಲಿ ಕ್ರಿಯಾಶೀಲ ಹಾಗೂ ಚುರುಕಿನ ಮಗುವಾಗಿದ್ದ ಮೊಹಮ್ಮದ್ ಸಮನ್ ಬನಗನಪಲ್ಲಿ, ಹೆಚ್ಚುತ್ತಿರುವ ಕೈಫೋಸಿಸ್‌ ಸಮಸ್ಯೆಯಿಂದಾಗಿ ತೀವ್ರವಾದ ಬೆನ್ನು ನೋವು ಮತ್ತು ಭಂಗಿ ವಿರೂಪತೆಯಿಂದ ಬಳಲತೊಡಗಿದ. ಅನೇಕ ಸಮಾಲೋಚನೆಗಳ ನಂತರ, ಅವನನ್ನು ಬೆಂಗಳೂರಿನ ಹಳೆಯ ವಿಮಾನ ನಿಲ್ದಾಣ ರಸ್ತೆಯ ಮಣಿಪಾಲ್ ಆಸ್ಪತ್ರೆಯ ಬೆನ್ನುಮೂಳೆಯ ಶಸ್ತ್ರಚಿಕಿತ್ಸೆಯ ಅಧ್ಯಕ್ಷರು ಮತ್ತು ಮುಖ್ಯಸ್ಥರಾದ ಡಾ. ಎಸ್. ವಿದ್ಯಾಧರ ಅವರ ಬಳಿಗೆ ಕಳುಹಿಸಲಾಯಿತು.

ಡಾ. ವಿದ್ಯಾಧರ ಮತ್ತು ಅವರ ತಂಡವು ಪೆಡಿಕಲ್ ಸ್ಕ್ರೂ ಅಳವಡಿಕೆ, ಮೂರು-ಕಾಲಮ್ ಆಸ್ಟಿಯೋಟಮಿಗಳು, ಕಶೇರುಕ ಕಾಲಮ್ ಛೇದನಗಳು ಮತ್ತು ವಿಸ್ತರಿಸಬಹುದಾದ ಟೈಟಾನಿಯಂ ಜಾಲರಿಯ ಪಂಜರದ ನಿಯೋಜನೆಯನ್ನು ಒಳಗೊಂಡ ಸಂಕೀರ್ಣವಾದ ರೋಬೋಟಿಕ್ ಬೆನ್ನುಮೂಳೆಯ ಶಸ್ತ್ರಚಿಕಿತ್ಸೆ ನಡೆಸಿತು. ರೋಬೋಟಿಕ್ ನೆರವಿನ ವಿಧಾನವು ಹೆಚ್ಚಿನ ನಿಖರ ಚಿಕಿತ್ಸೆಗೆ ಅವಕಾಶ ಮಾಡಿಕೊಟ್ಟಿತು. ಇದು ಮೊಹಮ್ಮದ್ ಅವರ ಬೆನ್ನುಮೂಳೆಯ ವಿರೂಪತೆಯ ತೀವ್ರತೆಯನ್ನು ಕಡಿಮೆ ಮಾಡುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿತು.

ಶಸ್ತ್ರಚಿಕಿತ್ಸೆಯ ನಂತರ, ಮೊಹಮ್ಮದ್ ಮರುದಿನ ಇತರರ ಬೆಂಬಲದ ಸಹಾಯದಿಂದ ನಡೆಯಲು ಸಾಧ್ಯವಾಯಿತು. ಅಲ್ಲದೇ, ಅವರನ್ನು ಮೂರು ದಿನಗಳಲ್ಲಿ ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಯಿತು. ನಿಯಮಿತ ಫಿಸಿಯೋಥೆರಪಿ ಮತ್ತು ಬಲವಾದ ಬೆಂಬಲ ವ್ಯವಸ್ಥೆಯೊಂದಿಗೆ, ಮೊಹಮ್ಮದ್ ಒಂದು ತಿಂಗಳೊಳಗೆ ಶಾಲೆಗೆ ಮರಳಿ, ಶೈಕ್ಷಣಿಕ ಚಟುವಟಿಕೆಗಳನ್ನು ಪುನರಾರಂಭಿಸಿದ. ಆತ ತನ್ನ ನೆಚ್ಚಿನ ಕೆಲವು ಕ್ರೀಡೆಗಳನ್ನು ಆಡಲು ಸಾಧ್ಯವಾಗದಿದ್ದರೂ, ಶಸ್ತ್ರಚಿಕಿತ್ಸೆ ಆತನ ದೈಹಿಕ ಭಂಗಿ ಮತ್ತು ಸಾಮಾಜಿಕ ವಿಶ್ವಾಸವನ್ನು ಮರುಸ್ಥಾಪಿಸಲು ಸಹಾಯ ಮಾಡಿತು, ಇದು ಆತನ ಬಾಲ್ಯವನ್ನು ಮರಳಿ ಪಡೆಯಲು ಅವಕಾಶ ಮಾಡಿಕೊಟ್ಟಿತು.

ಇದನ್ನೂ ಓದಿ: ಮುಟ್ಟಿದರೆ ಮುನಿಯುವ ನಾಚಿಕೆ ಮುಳ್ಳು ಆರೋಗ್ಯಕ್ಕೆ ಎಷ್ಟು ಪ್ರಯೋಜನಕಾರಿ ಗೊತ್ತಾ

ಕೊನೆಯದಾಗಿ ಇದನ್ನು ತಿಳಿಯಲೇಬೇಕು:

ರೋಬೋಟಿಕ್ ಬೆನ್ನುಮೂಳೆಯ ಶಸ್ತ್ರಚಿಕಿತ್ಸೆಯು ಸಂಕೀರ್ಣ ಕಾರ್ಯವಿಧಾನಗಳಲ್ಲಿ ಶಸ್ತ್ರಚಿಕಿತ್ಸಕರಿಗೆ ಸಹಾಯ ಮಾಡುವ ಮೂಲಕ ನಿಖರತೆ ಮತ್ತು ಸುರಕ್ಷತೆಯನ್ನು ಹೆಚ್ಚಿಸುತ್ತದೆ. ಇದು ಸ್ಕ್ರೂಗಳು ಮತ್ತು ಇಂಪ್ಲಾಂಟ್‌ಗಳ ನಿಖರವಾದ ನಿಯೋಜನೆಗೆ ಅನುವು ಮಾಡಿಕೊಡುತ್ತದೆ, ಅಂಗಾಂಶ ಹಾನಿಯನ್ನು ಕಡಿಮೆ ಮಾಡುತ್ತದೆ. ಶಸ್ತ್ರಚಿಕಿತ್ಸೆಯ ಸಮಯವನ್ನು ಕಡಿಮೆ ಮಾಡುತ್ತದೆ ಮತ್ತು ವೇಗವಾಗಿ ಚೇತರಿಸಿಕೊಳ್ಳುವುದನ್ನು ಉತ್ತೇಜಿಸುತ್ತದೆ. ತೀವ್ರವಾದ ಬೆನ್ನುಮೂಳೆಯ ವಿರೂಪಗಳಿಗೆ ಚಿಕಿತ್ಸೆ ನೀಡುವಲ್ಲಿ ಮತ್ತು ರೋಗಿಯ ಫಲಿತಾಂಶಗಳನ್ನು ಸುಧಾರಿಸುವಲ್ಲಿ ಈ ತಂತ್ರಜ್ಞಾನವು ವಿಶೇಷವಾಗಿ ಪ್ರಯೋಜನಕಾರಿಯಾಗಿದೆ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ