Home remedies: ಕುರು ಕಡಿಮೆ ಮಾಡಲು ಇಲ್ಲಿದೆ ಸಿಂಪಲ್ ಮನೆಮದ್ದು

ಸಾಮಾನ್ಯವಾಗಿ ಮುಖದಲ್ಲಿ ಮೊಡವೆಗಳಾಗುವುದು ಸಹಜ. ಆದರೆ ಅದೇ ರೀತಿಯಲ್ಲಿ ಚರ್ಮದ ಮೇಲೆ ಕೆಂಪು ಗುಳ್ಳೆಯಾಗಿ ಅದರಲ್ಲಿ ಕೀವು ತುಂಬಿಕೊಳ್ಳುವುದನ್ನು ಕುರ (Carbuncle) ಅಥವಾ ಕುರು (Butt Acne) ಎನ್ನಲಾಗುತ್ತದೆ. ಇದು ಆದಂತಹ ಜಾಗದಲ್ಲಿ ಉರಿ ಮತ್ತು ವಿಪರೀತ ನೋವು ಉಂಟಾಗುತ್ತದೆ. ಈ ರೀತಿಯ ಕುರು ಕಂಡು ಬರುವುದಕ್ಕೆ ಮುಖ್ಯ ಕಾರಣ, ನಮ್ಮ ದೇಹದಲ್ಲಿ ನಂಜಿನ ಅಂಶ ಹೆಚ್ಚಾಗಿರುವುದು ಅಥವಾ ಕೆಟ್ಟ ರಕ್ತವಿದ್ದಾಗ, ನಮ್ಮ ದೇಹ ಆ ಕುರುವಿನ ಮೂಲಕ ಅದನ್ನು ಹೊರಹಾಕಲು ಪ್ರಯತ್ನಿಸುತ್ತದೆ. ಇವು ಹೆಚ್ಚಾಗಿ ತೊಡೆ, ಪೃಷ್ಠದ ಭಾಗದಲ್ಲಿ ಕಂಡುಬರುತ್ತದೆ. ಇದು ಆದ ಸಂದರ್ಭದಲ್ಲಿ ನಡೆದಾಡಲು ಅಥವಾ ಕುಳಿತುಕೊಳ್ಳಲು ಕಷ್ವವಾಗುತ್ತದೆ. ಕೆಲವರಿಗೆ ಈ ನೋವಿನಿಂದ ಜ್ವರವೂ ಬರಬಹುದು. ಹಾಗಾದರೆ ಈ ರೀತಿ ನೋವು ನೀಡುವ ಕುರುವಿನಿಂದ ಮುಕ್ತಿ ಪಡೆಯಲು (prevention method of butt acne) ಏನೆಲ್ಲಾ ಮಾಡಬಹುದು? ಇದನ್ನು ಕಡಿಮೆ ಮಾಡಲು ಯಾವ ರೀತಿಯ ಮನೆಮದ್ದು (Home remedies) ಗಳನ್ನು ಮಾಡಬಹುದು ಎಂಬುದನ್ನು ತಿಳಿದುಕೊಳ್ಳಿ.

ಆಯುರ್ವೇದದ ಪ್ರಕಾರ ಪಿತ್ತ ಮತ್ತು ವಾತದೋಷದಿಂದ, ದೇಹದಲ್ಲಿ ಕಲ್ಮಶವಿದ್ದರೆ ಪದೇ ಪದೇ ಕುರು ಉಂಟಾಗುತ್ತದೆ. ಆಗ ರಕ್ತಶುದ್ಧೀಕರಣ ಮಾಡುವುದು ಅಗತ್ಯವಾಗಿರುತ್ತದೆ. ಕೆಲವು ಕುರುಗಳು ಕೇವಲ ಚರ್ಮದ ಮೇಲೆ ಕೆಂಪು ಗುಳ್ಳೆಗಳಾಗುತ್ತವೆ. ಇನ್ನು ಕೆಲವು ಕೀವು ತುಂಬಿಕೊಂಡ ಕುರುಗಳಾಗುತ್ತವೆ. ಎರಡೂ ಕೂಡ ಅತೀವ ನೋವನ್ನು ನೀಡುತ್ತವೆ. ಹಾಗಾಗಿ ಇದನ್ನು ಕಡಿಮೆ ಮಾಡುವುದರ ಜೊತೆಗೆ ದೇಹದಲ್ಲಿನ ಕಲ್ಮಶ ಹೊರಹಾಕಲು ಮತ್ತು ರಕ್ತ ಶುದ್ದೀಕರಿಸಲು ಸಹಾಯ ಮಾಡುವ ಆಹಾರಗಳನ್ನು ಕೂಡ ಸೇವನೆ ಮಾಡಬೇಕಾಗುತ್ತದೆ. ಹಾಗಾದರೆ ಈ ರೀತಿ ಕುರು ಕಂಡು ಬಂದಾಗ ಮನೆಯಲ್ಲಿಯೇ ಯಾವ ರೀತಿಯ ಮನೆಮದ್ದುಗಳನ್ನು ಮಾಡಬಹುದು ಎಂಬುದನ್ನು ತಿಳಿದುಕೊಳ್ಳಿ.

ಕುರು ಕಡಿಮೆ ಮಾಡಲು ಇಲ್ಲಿದೆ ಮನೆಮದ್ದು;

• ದೇಹದಲ್ಲಿ ಯಾವ ಭಾಗದಲ್ಲಿಯಾದರೂ ಕುರು ಕಂಡು ಬಂದರೆ ಮೊದಲು ಯಾವುದಾದರೂ ಹೂವಿನ ಮೊಗ್ಗನ್ನು ಅರೆದು ಆ ಕುರುವಿನ ಮೇಲೆ ಹಚ್ಚಿ. ಈ ರೀತಿ ಮಾಡುವುದರಿಂದ ಎರಡೇ ದಿನದಲ್ಲಿ ಕುರು ಮತ್ತು ನೋವು ಎರಡೂ ಕೂಡ ಕಡಿಮೆಯಾಗುತ್ತದೆ.
• ಕುರು ಆದಾಗ ಬೇವಿನ ಎಲೆಗಳ ಬಳಕೆಯನ್ನು ಹೆಚ್ಚಿಸಬೇಕು. ಆ ಎಲೆಗಳ ಪೇಸ್ಟ್‌ ತಯಾರಿಸಿ ಕುರುವಾದ ಜಾಗದಲ್ಲಿ ಹಚ್ಚಿದರೆ ಒಂದೆರಡು ದಿನದಲ್ಲಿ ನೋವು, ಗುಳ್ಳೆ ಎರಡೂ ಕೂಡ ಶಮನವಾಗುತ್ತದೆ. ಅಥವಾ ನೀವು ಬೇವಿನ ಎಲೆಗಳ ಜ್ಯೂಸ್‌ ತಯಾರಿಸಿ ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ 5 ಎಂಎಲ್‌ ಸೇವನೆ ಮಾಡಬಹುದು ಇದು ದೇಹದಲ್ಲಿನ ಕಲ್ಮಶವನ್ನು ಹೊರಹಾಕಲು ಸಹಾಯ ಮಾಡುತ್ತದೆ.
• ಇನ್ನು ಕುರು ಆದಾಗ ಬಸಳೆ ಸೊಪ್ಪನ್ನು ಅರೆದು ಹಚ್ಚುವುದರಿಂದಲೂ ಕೂಡ ನೋವು, ಗುಳ್ಳೆ ಎರಡೂ ಕಡಿಮೆಯಾಗುತ್ತದೆ. ಬಸಳೆ ದೇಹಕ್ಕೆ ತಂಪು ನೀಡುವುದರಿಂದ ಉರಿ ಕೂಡ ಕಡಿಮೆಯಾಗುತ್ತದೆ.
• ಹಾಗಲಕಾಯಿ ರಕ್ತ ಶುದ್ಧೀಕರಣ ಮಾಡುವಲ್ಲಿ ಸಹಾಯ ಮಾಡುತ್ತದೆ. ಇದರಿಂದಾಗಿ ಕುರು ಉಂಟಾಗುವುದಿಲ್ಲ. ಹಾಗಾಗಿ ಪ್ರತಿದಿನ 5 ಎಂಎಲ್‌ ಅಥವಾ 10 ಎಂಎಲ್‌ನಷ್ಟು ಹಾಗಲಕಾಯಿ ರಸವನ್ನು ಸೇವನೆ ಮಾಡುವುದು ದೇಹಕ್ಕೆ ಬಹಳ ಒಳ್ಳೆಯದು. ಆದರೆ ಇದನ್ನು ಸೇವನೆ ಮಾಡುವ ಮೊದಲು ವೈದ್ಯರ ಸಲಹೆ ಪಡೆದುಕೊಳ್ಳುವುದನ್ನು ಮರೆಯಬೇಡಿ.
• ಸಾಧ್ಯವಾದಷ್ಟು ನೀರನ್ನು ಕುಡಿಯಿರಿ. ಇದು ದೇಹದಲ್ಲಿನ ಕಲ್ಮಶಗಳನ್ನು ಶೋಧಿಸಿ ಮೂತ್ರದ ಮೂಲಕ ಹೊರಹಾಕುವ ಕೆಲಸವನ್ನು ಮೂತ್ರಪಿಂಡಗಳು ಮಾಡುವುದರಿಂದ ರಕ್ತವೂ ಶುದ್ಧಿಯಾಗುತ್ತದೆ, ಕುರು ಅಥವಾ ಇನ್ನಿತರ ಸಮಸ್ಯೆಗಳೂ ಕೂಡ ಪದೇ ಪದೇ ಬಾಧಿಸುವುದಿಲ್ಲ.
• ಪ್ರತಿನಿತ್ಯ ವಿವಿಧ ರೀತಿಯ ಹಣ್ಣುಗಳ ಸೇವನೆ ಮಾಡಿ. ವಿಟಮಿನ್‌ ಸಿ ಇರುವ ಹಣ್ಣುಗಳನ್ನು ಸೇವಿಸುವುದರಿಂದ ನಮ್ಮ ದೇಹ ಆರೋಗ್ಯವಾಗಿರುತ್ತದೆ. ಜೊತೆಗೆ ರಕ್ತ ಕೂಡ ಕ್ಲೀನ್‌ ಆಗುತ್ತದೆ. ಅದಕ್ಕಾಗಿಯೇ ಪ್ರತಿನಿತ್ಯ ಸೇಬು, ಕಿತ್ತಳೆ, ಅನಾನಸ್‌ನಂತಹ ಹಣ್ಣುಗಳನ್ನು ಸೇವನೆ ಮಾಡಿ. ಜೊತೆಗೆ ದ್ರವ ಅಂಶ ಹೆಚ್ಚಾಗಿರುವ ಹಣ್ಣು, ತರಕಾರಿಗಳು ಕೂಡ ದೇಹದಲ್ಲಿನ ವಿಷಕಾರಿ ಅಂಶವನ್ನು ಹೊರಹಾಕಲು ಸಹಾಯ ಮಾಡುತ್ತದೆ.

ಸೂಚನೆ: ಸಲಹೆ ಸೇರಿದಂತೆ ಈ ವಿಷಯವು ಸಾಮಾನ್ಯ ಮಾಹಿತಿಯನ್ನು ಮಾತ್ರ ಒದಗಿಸುತ್ತದೆ. ಇದು ಯಾವುದೇ ರೀತಿಯಲ್ಲಿ ಅರ್ಹ ವೈದ್ಯಕೀಯ ಸಲಹೆಗೆ ಪರ್ಯಾಯವಲ್ಲ. ಹೆಚ್ಚಿನ ಮಾಹಿತಿಗಾಗಿ ಯಾವಾಗಲೂ ತಜ್ಞರನ್ನು ಅಥವಾ ನಿಮ್ಮ ವೈದ್ಯರನ್ನು ಸಂಪರ್ಕಿಸುವುದನ್ನು ಮರೆಯಬೇಡಿ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ