Weight Loss Tips: ಏಲಕ್ಕಿಯಿಂದ ನಿಮ್ಮ ದೇಹದ ಕೊಬ್ಬು ಕರಗಿಸುವುದು ಹೇಗೆ?

ಹಲವು ಯುಗಗಳಿಂದಲೂ ಮನೆಗಳ ಅಡಿಗೆ ಕಪಾಟಿನಲ್ಲಿ ಗಟ್ಟಿ ಸ್ಥಾನ ಪಡೆದಿರುವ ಏಲಕ್ಕಿಯಿಂದ (Elaichi) ಅನೇಕ ಪ್ರಯೋಜನಗಳಿವೆ. ಏಲಕ್ಕಿ ಅಡುಗೆಗೆ ಹೊಸ ಸ್ವಾದ ಮತ್ತು ಸುವಾಸನೆಯನ್ನು ನೀಡುತ್ತದೆ. ಏಲಕ್ಕಿ ಟೀ, ಏಲಕ್ಕಿ ಕಾಫಿಯನ್ನು ಕೂಡ ಮಾಡಿಕೊಂಡು ಸೇವಿಸಬಹುದು. ಯಾವುದೇ ಸಿಹಿ ತಿಂಡಿಯಿರಲಿ ಅದಕ್ಕೆ ಏಲಕ್ಕಿ (Cardamom) ಹಾಕಿದರೆ ಅದರ ರುಚಿ ಇಮ್ಮಡಿಸುತ್ತದೆ. ಈ ಹಸಿರು ಮ್ಯಾಜಿಕ್ ಏಲಕ್ಕಿ ತೂಕ ಇಳಿಸಲು ಕೂಡ ಸಹಾಯಕವಾಗಿದೆ ಎಂಬುದು ಬಹುತೇಕ ಜನರಿಗೆ ತಿಳಿದಿಲ್ಲ.

ತೂಕ ಇಳಿಸಿಕೊಳ್ಳಲು ಪ್ರಯತ್ನಿಸುತ್ತಿರುವವರು ಏಲಕ್ಕಿಯನ್ನು ಏಕೆ ತಿನ್ನಬೇಕೆಂಬುದಕ್ಕೆ 5 ಕಾರಣಗಳು ಇಲ್ಲಿವೆ:

ಚಯಾಪಚಯವನ್ನು ಹೆಚ್ಚಿಸುತ್ತದೆ:

ಏಲಕ್ಕಿಯು ಥರ್ಮೋಜೆನಿಕ್ ಮಸಾಲೆಯಾಗಿದೆ. ಅಂದರೆ, ಇದು ನಿಮ್ಮ ದೇಹದ ಚಯಾಪಚಯ ಕ್ರಿಯೆಯನ್ನು ಹೆಚ್ಚಿಸುತ್ತದೆ. ವಿಶ್ರಾಂತಿ ಮತ್ತು ವ್ಯಾಯಾಮದ ಸಮಯದಲ್ಲಿ ಹೆಚ್ಚಿನ ಕ್ಯಾಲೊರಿಗಳನ್ನು ಬರ್ನ್ ಮಾಡಲು ಇದು ನಿಮಗೆ ಸಹಾಯ ಮಾಡುತ್ತದೆ.

ದೇಹದಿಂದ ನೀರನ್ನು ಹೊರಹಾಕುತ್ತದೆ:

ಏಲಕ್ಕಿ ನೈಸರ್ಗಿಕ ಮೂತ್ರವರ್ಧಕವಾಗಿದೆ. ಅಂದರೆ ಇದು ನಿಮ್ಮ ದೇಹದ ಹೆಚ್ಚುವರಿ ನೀರನ್ನು ಹೊರಹಾಕಲು ಸಹಾಯ ಮಾಡುತ್ತದೆ. ಇದು ಹೊಟ್ಟೆಯ ಉಬ್ಬುವಿಕೆಯನ್ನು ಕಡಿಮೆ ಮಾಡುತ್ತದೆ ಮತ್ತು ತೂಕವನ್ನು ಕಳೆದುಕೊಳ್ಳಲು ಸಹಾಯ ಮಾಡುತ್ತದೆ.

ಇದನ್ನೂ ಓದಿ: ನೈಟ್​ ಶಿಫ್ಟ್​ನಲ್ಲಿ ಕೆಲಸ ಮಾಡುವವರು ಉತ್ತಮ ತೂಕ ಕಾಯ್ದುಕೊಳ್ಳಲು 5 ಟಿಪ್ಸ್​ ಇಲ್ಲಿವೆ

ಜೀರ್ಣಕ್ರಿಯೆಯನ್ನು ಸುಧಾರಿಸುತ್ತದೆ:

ಏಲಕ್ಕಿಯು ಜೀರ್ಣಕಾರಿ ರಸಗಳು ಮತ್ತು ಕಿಣ್ವಗಳ ಉತ್ಪಾದನೆಯನ್ನು ಉತ್ತೇಜಿಸುವ ಮೂಲಕ ಜೀರ್ಣಕ್ರಿಯೆಯನ್ನು ಸುಧಾರಿಸಲು ಸಹಾಯ ಮಾಡುತ್ತದೆ. ಇದು ನಿಮ್ಮ ದೇಹವು ಆಹಾರವನ್ನು ಹೆಚ್ಚು ಪರಿಣಾಮಕಾರಿಯಾಗಿ ಜೀರ್ಣಿಸಿಕೊಳ್ಳಲು ಮತ್ತು ಪೋಷಕಾಂಶಗಳನ್ನು ಸುಲಭವಾಗಿ ಹೀರಿಕೊಳ್ಳಲು ಸಹಾಯ ಮಾಡುತ್ತದೆ.

ಹಸಿವನ್ನು ಕಡಿಮೆ ಮಾಡುತ್ತದೆ:

ಏಲಕ್ಕಿಯು ಹಸಿವನ್ನು ನಿಗ್ರಹಿಸುವ ಗುಣಗಳನ್ನು ಹೊಂದಿದೆ. ಇದರರ್ಥ ಇದು ನಿಮಗೆ ಹೆಚ್ಚು ಸಮಯ ಹೊಟ್ಟೆ ತುಂಬಿದ ಅನುಭವವನ್ನು ನೀಡುತ್ತದೆ. ಹಾಗೇ, ಅನಾರೋಗ್ಯಕರ ಆಹಾರ ಸೇವಿಸುವ ಕಡುಬಯಕೆಗಳನ್ನು ಕಡಿಮೆ ಮಾಡುತ್ತದೆ.

ದೇಹವನ್ನು ನಿರ್ವಿಷಗೊಳಿಸುತ್ತದೆ:

ಏಲಕ್ಕಿಯು ಆಂಟಿಆಕ್ಸಿಡೆಂಟ್‌ಗಳನ್ನು ಹೊಂದಿದ್ದು, ಅದು ದೇಹವನ್ನು ನಿರ್ವಿಷಗೊಳಿಸಲು ಮತ್ತು ಹಾನಿಕಾರಕ ವಿಷವನ್ನು ತೆಗೆದುಹಾಕಲು ಸಹಾಯ ಮಾಡುತ್ತದೆ. ಇದು ಒಟ್ಟಾರೆ ಆರೋಗ್ಯ ಮತ್ತು ಯೋಗಕ್ಷೇಮವನ್ನು ಸುಧಾರಿಸಲು ಸಹಾಯ ಮಾಡುತ್ತದೆ ಮತ್ತು ತೂಕ ಇಳಿಸಿಕೊಳ್ಳಲು ಸಹಾಯ ಮಾಡುತ್ತದೆ.

ತೂಕ ಇಳಿಸಿಕೊಳ್ಳಲು ನಿಮ್ಮ ಆಹಾರದಲ್ಲಿ ಏಲಕ್ಕಿಯನ್ನು ಯಾವ ರೀತಿ ಬಳಸಬೇಕು?:

– ನಿಮ್ಮ ಬೆಳಗಿನ ಕಾಫಿ ಅಥವಾ ಟೀಗೆ 1 ಚಿಟಿಕೆ ಏಲಕ್ಕಿ ಪುಡಿಯನ್ನು ಸೇರಿಸಿ.

– ಮೊಸರು, ಓಟ್ ಮೀಲ್ ಅಥವಾ ಹಣ್ಣಿನ ಮೇಲೆ ಏಲಕ್ಕಿ ಪುಡಿಯನ್ನು ಸಿಂಪಡಿಸಿ.

– ಅಕ್ಕಿ, ಕ್ವಿನೋವಾ ಅಥವಾ ಇತರ ಧಾನ್ಯಗಳ ಜೊತೆಗೆ ನಿಮ್ಮ ಅಡುಗೆ ನೀರಿಗೆ ಏಲಕ್ಕಿ ಕಾಳುಗಳನ್ನು ಸೇರಿಸಿ.

– ಜೀರ್ಣಕ್ರಿಯೆಗೆ ಸಹಾಯ ಮಾಡಲು ಊಟದ ನಂತರ ಏಲಕ್ಕಿ ಬೀಜವನ್ನು ಅಗಿಯಿರಿ.

– ದಿನವಿಡೀ ಆಗಾಗ ಏಲಕ್ಕಿ ನೀರನ್ನು ಕುಡಿಯಿರಿ. ಏಲಕ್ಕಿ ನೀರನ್ನು ತಯಾರಿಸಲು, ಒಂದು ಲೋಟ ನೀರಿಗೆ ಕೆಲವು ಏಲಕ್ಕಿ ಬೀಜಗಳನ್ನು ಹಾಕಿಕೊಳ್ಳಿ. ಅದನ್ನು 30 ನಿಮಿಷಗಳ ಕಾಲ ನೀರಿನಲ್ಲಿ ಬಿಟ್ಟು ನಂತರ ಬಳಸಿ.

ಇದನ್ನೂ ಓದಿ: ತೂಕ ಇಳಿಸಿಕೊಳ್ಳಲು ನಿಂಬೆ ಜ್ಯೂಸ್ ಕುಡಿಯುತ್ತೀರಾ? ಈ ಅಭ್ಯಾಸ ಬಿಟ್ಟುಬಿಡಿ

ಇದೆಲ್ಲದರ ಜೊತೆಗೆ ಏಲಕ್ಕಿಯಿಂದ ಆರೋಗ್ಯಕ್ಕೆ ಆಗುವ ಇತರೆ ಪರಿಣಾಮಗಳು ಹೀಗಿವೆ. ಏಲಕ್ಕಿ ಬೀಜಗಳ ಎಣ್ಣೆಯು ಬ್ಯಾಕ್ಟೀರಿಯಾ ಮತ್ತು ಶಿಲೀಂಧ್ರಗಳನ್ನು ಕೊಲ್ಲುತ್ತದೆ. ಕೆಲವು ಬ್ಯಾಕ್ಟೀರಿಯಾಗಳ ಜೀವಕೋಶದ ಪೊರೆಯನ್ನು ಹಾನಿಗೊಳಿಸುವ ಸಾಮರ್ಥ್ಯವನ್ನು ಏಲಕ್ಕಿ ಹೊಂದಿದೆ. ಏಲಕ್ಕಿಯು ಮೆಟಬಾಲಿಕ್ ಸಿಂಡ್ರೋಮ್‌ನ ಕೆಲವು ಅಂಶಗಳಿಗೆ ಸಹಾಯ ಮಾಡುತ್ತದೆ. ಮೆಟಾಬಾಲಿಕ್ ಸಿಂಡ್ರೋಮ್ ಎನ್ನುವುದು ಆರೋಗ್ಯ ಸ್ಥಿತಿಗಳ ಒಂದು ಗುಂಪಾಗಿದ್ದು, ಅದು ಹೃದ್ರೋಗ ಮತ್ತು ಟೈಪ್ 2 ಮಧುಮೇಹಕ್ಕೆ ಕಾರಣವಾಗಬಹುದು. ಬೊಜ್ಜು, ಅಧಿಕ ಮಧುಮೇಹ, ಅಧಿಕ ರಕ್ತದೊತ್ತಡ, ಹೆಚ್ಚಿನ ಟ್ರೈಗ್ಲಿಸರೈಡ್​ಗಳು, ಅಧಿಕ ಕೊಲೆಸ್ಟ್ರಾಲ್​ ನಿಯಂತ್ರಿಸುತ್ತದೆ.

ಹೃದಯದ ಆರೋಗ್ಯಕ್ಕೆ ಏಲಕ್ಕಿ ಸಹಕಾರಿ. ಏಲಕ್ಕಿಯು ಹೃದಯಾಘಾತದಿಂದ ನಿಮ್ಮನ್ನು ರಕ್ಷಿಸಲು ಸಹಾಯ ಮಾಡುತ್ತದೆ. ಏಲಕ್ಕಿಯಲ್ಲಿನ ಉತ್ಕರ್ಷಣ ನಿರೋಧಕ ಅಂಶ ಹೃದಯದ ಕಾರ್ಯವನ್ನು ಸುಧಾರಿಸಲು ಸಹಾಯ ಮಾಡುತ್ತದೆ. ಅನೇಕ ಜನರು ಪುದೀನ ಮತ್ತು ದಾಲ್ಚಿನ್ನಿಯನ್ನು ಮೌತ್​ ಫ್ರೆಶನರ್‌ಗಳೆಂದು ಭಾವಿಸಿದ್ದಾರೆ. ಆದರೆ, ಅದರ ಜೊತೆಗೆ ಜನರು ಹಲವು ಶತಮಾನಗಳಿಂದ ಏಲಕ್ಕಿಯನ್ನು ಬಾಯಿಯ ಕೆಟ್ಟ ವಾಸನೆಯನ್ನು ಹೋಗಲಾಡಿಸಲು ಬಳಸುತ್ತಿದ್ದಾರೆ. ಕೇವಲ ಸುವಾಸನೆಗೆ ಮಾತ್ರವಲ್ಲದೆ ಏಲಕ್ಕಿ ಬಾಯಿಯಲ್ಲಿರುವ ಬ್ಯಾಕ್ಟೀರಿಯಾದ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತದೆ. ಈ ಬ್ಯಾಕ್ಟೀರಿಯಾ ಬಾಯಿಯ ದುರ್ವಾಸನೆ, ಒಸಡಿನ ಕಾಯಿಲೆಗೆ ಕಾರಣವಾಗಿದೆ.

ಇನ್ನಷ್ಟು ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ