Numerology Predictions: ಸಂಖ್ಯಾಶಾಸ್ತ್ರ ಪ್ರಕಾರ ಜನ್ಮಸಂಖ್ಯೆಗೆ ಅನುಗುಣವಾಗಿ ಅಕ್ಟೋಬರ್ ಮಾಸಭವಿಷ್ಯ 

ನಿಮ್ಮ ಜನ್ಮಸಂಖ್ಯೆಗೆ ಅನುಗುಣವಾಗಿ ಇಲ್ಲಿ ಮಾಸ ಭವಿಷ್ಯವನ್ನು ನೀಡಲಾಗಿದೆ. ಜನ್ಮಸಂಖ್ಯೆಯನ್ನು ತಿಳಿದುಕೊಳ್ಳುವುದು ಹೇಗೆ ಎಂಬುದಕ್ಕೆ ಇಲ್ಲಿ ಮಾಹಿತಿ ನೀಡಲಾಗಿದೆ. ಜನ್ಮಸಂಖ್ಯೆಯ ಆಧಾರದಲ್ಲಿ ಅಕ್ಟೋಬರ್ ಮಾಸಭವಿಷ್ಯ ಹೇಗಿದೆ ಎಂಬ ಮಾಹಿತಿ ಇಲ್ಲಿದೆ.

ಜನ್ಮಸಂಖ್ಯೆ 1 (ಯಾವುದೇ ತಿಂಗಳಿನ 1, 10, 19, 28ನೇ ತಾರೀಕು ಹುಟ್ಟಿದವರ ಜನ್ಮಸಂಖ್ಯೆ 1)

ಇರುಳು ಕಂಡ ಬಾವಿಗೆ ಹಗಲು ಬಿದ್ದರು ಎಂಬ ಮಾತಿದೆಯಲ್ಲ ಈ ಮಾತು ಈ ಮಾಸ ನಿಮಗೆ ಅನ್ವಯಿಸಲಿದೆ. ಒಬ್ಬ ವ್ಯಕ್ತಿ ಈ ಹಿಂದೆ ತಪ್ಪು ಮಾಡಿದ್ದ ಮತ್ತು ಹಲವರಿಗೆ ಮೋಸ ಮಾಡಿದ್ದ ಎಂಬ ಸಂಗತಿ ಗೊತ್ತಿದ್ದರೂ ಸಹ ಅವನಲ್ಲಿ ಬದಲಾವಣೆಯಾಗಿದೆ ಅಂತಲೋ ಅಥವಾ ಆ ಬದಲಾವಣೆಗೆ ನೀವೇ ಕಾರಣ ಆಗಬೇಕು ಅಂತಲೋ ಮಾಡಿದ ಪ್ರಯತ್ನದಲ್ಲಿ ಸರಿಯಾಗಿಯೇ ಪೆಟ್ಟು ಬೀಳಲಿದೆ. ಉದ್ಯೋಗ ಬದಲಾವಣೆಗಾಗಿ ಪ್ರಯತ್ನ ಮಾಡುತ್ತಿರುವವರು ಸ್ನೇಹಿತರು ಅಥವಾ ಸಂಬಂಧಿಕರಿಂದ ಬರುವಂತಹ ಸಲಹೆಯನ್ನು ಗಂಭೀರವಾಗಿ ಪರಿಗಣಿಸಿ. ಕಡಿಮೆ ಬಡ್ಡಿಗೆ ಸಾಲ ಸಿಗುತ್ತದೆ ಅಂತಲೋ ಅಥವಾ ದೀರ್ಘಾವಧಿಗೆ ಸಮಯ ಕೊಟ್ಟು, ಬಡ್ಡಿ ಕೇಳುವುದಿಲ್ಲ ಅಂತಲೋ ಸಾಲ ಮಾಡಿಕೊಂಡಲ್ಲಿ ಅದನ್ನು ತೀರಿಸುವುದಕ್ಕೆ ಹೈರಾಣಗುತ್ತೀರಿ. ಜೀರ್ಣಾಂಗದ ಸಮಸ್ಯೆ, ತಲೆನೋವು, ಬೆನ್ನುಹುರಿ ಸಮಸ್ಯೆ ಇತ್ಯಾದಿ ಅನಾರೋಗ್ಯ ಸಮಸ್ಯೆಗಳು ಕಾಡುವುದಕ್ಕೆ ಆರಂಭಿಸಿದರೆ ಯಾವುದೇ ಕಾರಣಕ್ಕೂ ಮನೆ ಮದ್ದು ಅಂತ ಮಾಡುವುದಕ್ಕೆ ಹೋಗಬೇಡಿ, ಕಡ್ಡಾಯವಾಗಿ ವೈದ್ಯರನ್ನು ಭೇಟಿ ಮಾಡಿ. ಹೊಸದಾಗಿ ವ್ಯವಹಾರ, ವ್ಯಾಪಾರ ಅಥವಾ ಉದ್ಯಮವನ್ನು ಆರಂಭಿಸಬೇಕು ಅಂದುಕೊಳ್ಳುತ್ತಿರುವವರಿಗೆ ಸ್ನೇಹಿತರು ಕೆಲವು ಸಲಹೆಗಳನ್ನು ನೀಡಲಿದ್ದಾರೆ. ಈ ಪೈಕಿ ಯಾವುದನ್ನು ಅಳವಡಿಸಿಕೊಳ್ಳಬೇಕು ಹಾಗೂ ಯಾವುದನ್ನು ಕಿವಿಯಲ್ಲಿ ಕೇಳಿ, ಅಲ್ಲಿಯೇ ಬಿಟ್ಟುಬಿಡಬೇಕು ಎಂಬುದರ ಬಗ್ಗೆ ವಿವೇಚನೆ ಮುಖ್ಯವಾಗುತ್ತದೆ. ಪ್ರೀತಿ- ಪ್ರೇಮದಲ್ಲಿದ್ದು, ಅದನ್ನು ಮನೆಯಲ್ಲಿ ಪ್ರಸ್ತಾವ ಮಾಡಬೇಕು ಎಂದಿರುವವರು ಈ ತಿಂಗಳಲ್ಲಿ ಗುರುವಾರಗಳಂದು ಮನೆಯವರಿಗೆ ತಿಳಿಸುವುದು ಉತ್ತಮ.

ಜನ್ಮಸಂಖ್ಯೆ 2 (ಯಾವುದೇ ತಿಂಗಳಿನ 2, 11, 20, 29ನೇ ತಾರೀಕು ಹುಟ್ಟಿದವರ ಜನ್ಮಸಂಖ್ಯೆ 2)

ಸೈಟು, ಜಮೀನು ಮನೆ ಅಥವಾ ಅಪಾರ್ಟ್ ಮೆಂಟ್ ಖರೀದಿ ಮಾಡಬೇಕು ಎಂದಿರುವವರಿಗೆ ಈ ತಿಂಗಳ ದ್ವಿತೀಯಾರ್ಧದಲ್ಲಿ ಅದರಲ್ಲೂ ಬಹುತೇಕ ನಾಲ್ಕನೇ ವಾರದ ಹೊತ್ತಿಗೆ ನಿಮ್ಮ ಮನಸ್ಸಿಗೆ ಒಪ್ಪುವಂತಹ ಮನೆ ಅಥವಾ ನೀವು ಹುಡುಕುತ್ತಿರುವ ಸ್ಥಳ ದೊರೆಯುವ ಸಾಧ್ಯತೆಗಳು ಹೆಚ್ಚಿವೆ. ಅದಕ್ಕೆ ಸಂಬಂಧಪಟ್ಟ ಬ್ಯಾಂಕಿಂಗ್ ವ್ಯವಹಾರಗಳು ತುಂಬಾ ಸಲೀಸಾಗಿ ಮುಗಿಯಲಿವೆ. ಉದ್ಯೋಗ ಸ್ಥಳದಲ್ಲಿ ಇತರರು ನಿಮ್ಮ ಸಾಮರ್ಥ್ಯ ಹಾಗೂ ಕೆಲಸ ಮುಗಿಸುವಂತಹ ಸಂಕಲ್ಪ ಇದರ ಬಗ್ಗೆ ಏನಾದರೂ ಅನುಮಾನಗಳನ್ನು ಇಟ್ಟುಕೊಂಡಿದ್ದಲ್ಲಿ ಅವರಿಗೆ ಆಶ್ಚರ್ಯ ಆಗುವ ರೀತಿಯಲ್ಲಿ ಕೆಲಸಗಳನ್ನು ಮಾಡಿ ಮುಗಿಸಲಿದ್ದೀರಿ. ಸಣ್ಣ ಮಟ್ಟದ ಬಂಡವಾಳ ಹೂಡಿ, ಮಾಡಿದಂತಹ ವ್ಯಾಪಾರ, ವ್ಯವಹಾರ ಅಥವಾ ಹೂಡಿಕೆಗಳು ತುಂಬಾ ಚೆನ್ನಾಗಿ ಹಾಗೂ ನಿಮ್ಮ ನಿರೀಕ್ಷೆಗೂ ಮೀರಿದಂತಹ ರಿಟರ್ನ್ಸ್ ನೀಡಲಿವೆ. ತಂದೆ- ತಾಯಿಗಳ ತೀರ್ಥಕ್ಷೇತ್ರ ದರ್ಶನಕ್ಕಾಗಿ ಹಣವನ್ನು ಖರ್ಚು ಮಾಡುವಂತಹ ಯೋಗ ನಿಮ್ಮ ಪಾಲಿಗೆ ಒದಗಿ ಬರಲಿದೆ. ಹೀಗೆ ಮಾಡುವುದರಿಂದ ಅವರ ಆಶೀರ್ವಾದವೂ ನಿಮಗೆ ಸಿಗಲಿದೆ. ಈ ತಿಂಗಳು ನಿಮ್ಮ ಪಾಲಿಗೆ ತುಂಬಾ ಪ್ರಮುಖವಾದ ಎಚ್ಚರಿಕೆ ಏನೆಂದರೆ, ಯಾರು ಈಗಾಗಲೇ ಆಪರೇಷನ್ ಮಾಡಿಸಿಕೊಂಡಿರುತ್ತೀರೋ, ಅದು ಯಾವುದಕ್ಕೆ ಆದರೂ ಆಗಿರಬಹುದು, ಅದರ ಫಾಲೋ ಅಪ್ ಸರಿಯಾಗಿ ಮಾಡುವುದರ ಕಡೆ ಗಮನ ಕೊಡಿ. ಸಮಯ ಇಲ್ಲ ಅಂತಲೋ ಅಥವಾ ಆರೋಗ್ಯವಾಗಿದ್ದೀನಿ, ಫಾಲೋ ಅಪ್ ಮಾಡುವ ಅಗತ್ಯ ಇಲ್ಲ ಅಂತಲೋ ಅಂದುಕೊಂಡಲ್ಲಿ ಆ ನಂತರ ಪರಿತಪಿಸುವಂತಾಗುತ್ತದೆ.

ಜನ್ಮಸಂಖ್ಯೆ 3 (ಯಾವುದೇ ತಿಂಗಳಿನ 3, 12, 21, 30ನೇ ತಾರೀಕು ಹುಟ್ಟಿದವರ ಜನ್ಮಸಂಖ್ಯೆ 3)

ಕಡಿಮೆ ಬೆಲೆಗೆ ಸಿಗುತ್ತಿದೆ ಎಂಬ ಕಾರಣಕ್ಕೆ ನಿಮಗೆ ಬೇಡದಿರುವ ವಸ್ತುಗಳನ್ನು ಸಹ ಖರೀದಿಸುವುದಕ್ಕೆ ಮುಂದಾಗಲಿದ್ದೀರಿ. ಹಳೇ ಸ್ನೇಹವನ್ನು ಮುಂದು ಮಾಡಿಕೊಂಡು, ಈಗ ನಿಮಗೆ ಹತ್ತಿರವಾಗುವುದಕ್ಕೆ ಪ್ರಯತ್ನಿಸುವವರಿಂದ ಬಹಳ ಎಚ್ಚರಿಕೆಯಿಂದ ಇರಬೇಕು. ಇತರರು ಒಪ್ಪಿದರು ಎಂಬ ಕಾರಣಕ್ಕೆ ನಿಮಗೆ ಇಷ್ಟವಿಲ್ಲದಿದ್ದರೂ ಸಹ ಕೆಲವು ಸಂಗತಿಗಳನ್ನು ನೀವೂ ಒಪ್ಪಿಕೊಳ್ಳಬೇಕಾಗುತ್ತದೆ. ದೂರದ ಪ್ರಯಾಣಗಳನ್ನು ಯಾವುದೇ ಕಾರಣಕ್ಕೂ ದಿಢೀರ್ ಎಂದು ನಿರ್ಧಾರ ಮಾಡಿ ಹೊರಡುವುದಕ್ಕೆ ಸಿದ್ಧರಾಗಬೇಡಿ. ನಿಮ್ಮ ಹಳೆ ಅನುಭವಗಳು ಈ ತಿಂಗಳಲ್ಲಿ ಸಹಾಯಕ್ಕೆ ಬರುವುದಿಲ್ಲ. ಹೇಗಾದರೂ ಸರಿ, ನಾನು ಅದನ್ನು ಗಡುವಿನ ಒಳಗೆ ಮುಗಿಸಿಕೊಂಡು ಬಂದೇ ಬರುತ್ತೇನೆ ಎಂಬ ಅತಿಯಾದ ವಿಶ್ವಾಸದಿಂದ ಯಾರಿಗೂ ಮಾತು ಕೊಡುವುದಕ್ಕೆ ಹೋಗಬೇಡಿ. ಕಡಿಮೆ ಮೊತ್ತದಲ್ಲಿ ದೊರೆಯುತ್ತದೆ ಎಂಬ ಕಾರಣಕ್ಕೆ ಸೆಕೆಂಡ್ ಹ್ಯಾಂಡ್ ವಾಹನಗಳನ್ನು ಅಥವಾ ಗ್ಯಾಜೆಟ್ ಗಳನ್ನು ಖರೀದಿಸಿದಲ್ಲಿ ಆ ನಂತರ ಪರಿತಪಿಸುವಂತಾಗುತ್ತದೆ, ಹಣವನ್ನು ಕಳೆದುಕೊಂಡಂತಾಗುತ್ತದೆ. ಯಾರದೋ ಸಂಕೋಚಕ್ಕೆ ಬಿದ್ದು, ಕೆಲಸ ಮಾಡಿಕೊಡುತ್ತೇನೆ ಎಂದು ಒಪ್ಪಿಕೊಂಡುಬಿಟ್ಟಲ್ಲಿ ಆ ನಂತರ ಅದನ್ನು ಸಮಯಕ್ಕೆ ಸರಿಯಾಗಿ ಮುಗಿಸಲಿಕ್ಕೆ ಸಾಧ್ಯವಾಗದೆ ಅವಮಾನಕ್ಕೆ ಗುರಿಯಾಗುತ್ತೀರಿ. ಎಲ್ಲಿ ಹೂಂ ಎನ್ನಬೇಕು ಹಾಗೂ ಯಾರಿಗೆ ಇಲ್ಲ ಎನ್ನಬೇಕು ಎಂಬುದರ ಬಗ್ಗೆ ಸ್ಪಷ್ಟತೆ ಇಟ್ಟುಕೊಂಡಿದ್ದರೆ ಗೊಂದಲಗಳು ಉಂಟಾಗುವುದಿಲ್ಲ. ಈ ತಿಂಗಳು ಪ್ರತಿ ಶುಕ್ರವಾರ ದುರ್ಗಾದೇವಿಯ ಆರಾಧನೆಯನ್ನು ಮಾಡುವುದರಿಂದ ನಿಮ್ಮ ಬಹುತೇಕ ಕೆಲಸಗಳು ಸಲೀಸಾಗಿ ಆಗಲಿವೆ.

ಜನ್ಮಸಂಖ್ಯೆ 4 (ಯಾವುದೇ ತಿಂಗಳಿನ 4, 13, 22, 31ನೇ ತಾರೀಕು ಹುಟ್ಟಿದವರ ಜನ್ಮಸಂಖ್ಯೆ 4)

ಅಡುಗೆ ಕಾಂಟ್ರಾಕ್ಟ್ ತೆಗೆದುಕೊಳ್ಳುವವರು ಮುಂಚಿತವಾಗಿಯೇ ಅಡ್ವಾನ್ಸ್ ಪಡೆದು, ಆ ನಂತರವೇ ಕೆಲಸವನ್ನು ಮಾಡಿಕೊಡುವುದಕ್ಕೆ ಆದ್ಯತೆಯನ್ನು ನೀಡಿ. ಒಂದು ವೇಳೆ ಹೇಗಿದ್ದರೂ ಪರಿಚಿತರು ಹೇಳಿದ್ದಾರಲ್ಲ ಅಥವಾ ನಿಮಗೆ ಕಾಂಟ್ರಾಕ್ಟ್ ನೀಡಿರುವವರೇ ಪರಿಚಿತರು ಎಂದು ಯಾವುದೇ ಅಡ್ವಾನ್ಸ್ ಪಡೆದುಕೊಳ್ಳದೆ ಕೆಲಸ ಮಾಡಿಕೊಟ್ಟಲ್ಲಿ ಆ ನಂತರ ಅದನ್ನು ವಸೂಲಿ ಮಾಡುವುದರಲ್ಲಿ ಸಾಕು ಬೇಕಾಗುತ್ತದೆ. ನಿಮಗೆ ಹೊಸದಾಗಿ ಪರಿಚಯವಾಗುವಂಥವರು ಬೆಟ್ಟಿಂಗ್, ಜೂಜು ಅಥವಾ ಇಂಥದ್ದನ್ನು ಆಡುವಂತೆ ಪುಸಲಾಯಿಸಬಹುದು. ಆರಂಭದಲ್ಲಿ ನಿಮಗೆ ಇದರಿಂದ ಲಾಭ ಸಹ ಬರಬಹುದು. ಆದರೆ ನೆನಪಿನಲ್ಲಿಡಿ, ದೀರ್ಘಾವಧಿಯಲ್ಲಿ ಇದರಿಂದಲೇ ಬಹಳ ಅವಮಾನಗಳನ್ನು ಎದುರಿಸುತ್ತೀರಿ. ಇತರರ ಕೆಲಸಗಳು ಆಗುವ ಸಲುವಾಗಿ ನೀವು ಮಾಡಿದ ಶಿಫಾರಸ್ಸಿನಿಂದ ಅನುಕೂಲ ಆಗಲಿದೆ. ರಾಜಕಾರಣಿಗಳಿಗೆ ಮಹತ್ವದ ಜವಾಬ್ದಾರಿಗಳು ಹೆಗಲೇರಲಿವೆ. ಇದೇ ವೇಳೆ ಪದೋನ್ನತಿಯನ್ನು ಸಹ ನಿರೀಕ್ಷೆ ಮಾಡಬಹುದು. ಯಾರು ಆಸ್ತಿಯನ್ನು ಅಥವಾ ಮನೆ ಅಥವಾ ಸೈಟು ಇಂಥದ್ದನ್ನು ಮಾರಾಟಕ್ಕೆ ಇಟ್ಟಿದ್ದೀರಿ ಅಂತಹವರಿಗೆ ನಿರೀಕ್ಷಿತ ಬೆಲೆ ದೊರೆಯುವಂತಹ ಅವಕಾಶಗಳು ತುಂಬಾ ಹೆಚ್ಚಾಗಿವೆ. ಪುಸ್ತಕ ಮುದ್ರಕರು ಅಥವಾ ವ್ಯಾಪಾರಿಗಳು ತಮ್ಮ ವ್ಯಾಪಾರ ಅಥವಾ ಉದ್ಯಮವನ್ನು ವಿಸ್ತರಣೆ ಮಾಡುವುದಕ್ಕೆ ಬ್ಯಾಂಕ್ ಗಳಲ್ಲಿ ಸಾಲಕ್ಕಾಗಿ ಪ್ರಯತ್ನವನ್ನು ಮಾಡಲಿದ್ದೀರಿ ಮತ್ತು ಇದರ ಸಲುವಾಗಿ ಪ್ರಭಾವಿಗಳು ನಿಮಗೆ ಅನುಕೂಲ ಮಾಡಿಕೊಡಲಿದ್ದಾರೆ. ಮಕ್ಕಳ ಸಲುವಾಗಿ ಒಡವೆ, ವಸ್ತ್ರ ಅಥವಾ ಬೆಳ್ಳಿ ವಸ್ತುಗಳನ್ನು ಖರೀದಿ ಮಾಡಲಿದ್ದೀರಿ.

ಜನ್ಮಸಂಖ್ಯೆ 5 (ಯಾವುದೇ ತಿಂಗಳಿನ 5, 14, 23ನೇ ತಾರೀಕು ಹುಟ್ಟಿದವರ ಜನ್ಮಸಂಖ್ಯೆ 5)

ಈ ವ್ಯಕ್ತಿ ಇವರೇನಾ ಎಂದು ಇತರರು ಅನುಮಾನ ಪಡುವ ಮಟ್ಟಿಗೆ ಹೆಚ್ಚು ಆಕ್ರಮಣಕಾರಿಯಾಗಿ ಆಲೋಚನೆ ಮಾಡುವುದಕ್ಕೆ ಈ ತಿಂಗಳು ನೀವು ಆರಂಭ ಮಾಡಲಿದ್ದೀರಿ. ನಿಮಗೆ ಬರಬೇಕಾದ ಹಣ ಅದು ಸಾಲವೇ ಇರಬಹುದು ಅಥವಾ ಈಗಾಗಲೇ ಕೆಲಸ ಮಾಡಿಯೂ ಹಣ ಬಾರದೆ ಇದ್ದ ಸಂದರ್ಭದಲ್ಲಿ ಸರಿಯಾಗಿಯೇ ಪ್ರಯತ್ನವನ್ನು ಮಾಡಿ, ಅದನ್ನು ವಸೂಲಿ ಮಾಡುವಲ್ಲಿ ಯಶಸ್ವಿಯಾಗಲಿದ್ದೀರಿ. ಯೂಟ್ಯೂಬರ್ ಗಳು, ಸ್ಟ್ಯಾಂಡ್ ಅಪ್ ಕಾಮಿಡಿಯನ್ ಗಳು, ಮೆಜಿಷಿಯನ್ ಗಳು ಅಥವಾ ಕಲಾವಿದರಿಗೆ ಆದಾಯದಲ್ಲಿ ಹೆಚ್ಚಳ ಮಾಡಿಕೊಳ್ಳುವ ಎಲ್ಲಾ ಅವಕಾಶವು ತೆರೆದುಕೊಳ್ಳಲಿವೆ. ಯಾರು ಗೃಹ ಸಾಲದ ಟಾಪ್ ಅಪ್ ಗಾಗಿ ಪ್ರಯತ್ನ ಪಡುತ್ತಿದ್ದೀರಿ ಅಂತಹವರಿಗೆ ಒಂದು ವೇಳೆ ಇಲ್ಲಿಯ ತನಕ ಅಡೆತಡೆಗಳು ಎದುರಾಗಿದ್ದರೆ ಈ ತಿಂಗಳಲ್ಲಿ ಅದು ನಿವಾರಣೆಯಾಗಿ, ಸಾಲ ದೊರೆಯುವ ಅವಕಾಶಗಳು ಜಾಸ್ತಿ ಇವೆ. ಮಾರ್ಕೆಟಿಂಗ್ ಅಥವಾ ಮಾರಾಟ ವಿಭಾಗದಲ್ಲಿ ಕೆಲಸ ಮಾಡುತ್ತಿರುವವರಿಗೆ ನಿರೀಕ್ಷಿತ ಸಮಯಕ್ಕಿಂತ ಅಥವಾ ನೀಡಿರುವ ಸಮಯಕ್ಕಿಂತ ಬಹಳ ಬೇಗ ಗುರಿ ಈಡೇರಲಿದೆ. ಈ ತಿಂಗಳು ಯಾವುದೇ ಕಾರಣಕ್ಕೂ ಹೊಸದಾಗಿ ಪರಿಚಯ ಆದವರ ಮೇಲೆ ಹೆಚ್ಚಿನ ನಂಬಿಕೆ ಇಟ್ಟು, ಅಂತರಂಗದ ವಿಷಯಗಳನ್ನು ಹಂಚಿಕೊಳ್ಳಲು ಹೋಗಬೇಡಿ. ಹೀಗೆ ಮಾಡುವುದರಿಂದ ನೀವು ಅವಮಾನಕ್ಕೆ ಗುರಿಯಾಗುವ ಸಾಧ್ಯತೆಗಳು ಹೆಚ್ಚಿರುತ್ತವೆ. ಸೋದರ ಸಂಬಂಧಿಗಳು ನಿಮ್ಮ ಬಗ್ಗೆ ಅಪಪ್ರಚಾರ ಮಾಡುತ್ತಿದ್ದಾರೆ ಎಂದು ಕೆಲವರು ಚಾಡಿ ಹೇಳಬಹುದು, ಇಂಥ ಮಾತುಗಳನ್ನು ನಂಬುವ ಮೊದಲು ಸತ್ಯವನ್ನು ಪರಾಮರ್ಶಿಸಿ, ಆ ನಂತರ ಮುಂದಕ್ಕೆ ಹೆಜ್ಜೆ ಇಡುವುದು ಒಳ್ಳೆಯದು.

ಜನ್ಮಸಂಖ್ಯೆ 6 (ಯಾವುದೇ ತಿಂಗಳಿನ 6, 15, 24ನೇ ತಾರೀಕು ಹುಟ್ಟಿದವರ ಜನ್ಮಸಂಖ್ಯೆ 6)ನೀ

ವು ಯಾರನ್ನು ಗುರುಗಳನ್ನಾಗಿ ಭಾವಿಸಿದ್ದೀರೋ ಅಥವಾ ಗುರು ಸಮಾನರಾಗಿ ಇದ್ದಾರೋ ಅಂತಹವರು ಹೇಳುವಂತಹ ಮಾತುಗಳನ್ನು ಗಂಭೀರವಾಗಿ ಪರಿಗಣಿಸಿ, ಅವರು ನೀಡುವಂತಹ ಸಲಹೆಗಳನ್ನು ಪಾಲಿಸಿದರೆ ಉದ್ಯೋಗ- ವೃತ್ತಿ, ವ್ಯಾಪಾರ- ಉದ್ಯಮ ಯಾವುದರಲ್ಲೇ ಆದರೂ ಉತ್ತಮವಾದಂತಹ ಫಲಿತಾಂಶವನ್ನು ಕಾಣುವುದಕ್ಕೆ ಸಾಧ್ಯವಾಗುತ್ತದೆ. ಸಂಘ- ಸಂಸ್ಥೆ ಅಥವಾ ಸಂಘಟನೆಗಳಲ್ಲಿ ಪ್ರಮುಖವಾದಂತಹ ಹುದ್ದೆಯಲ್ಲಿ ಇರುವಂತಹವರಿಗೆ ಸನ್ಮಾನಗಳು ಆಗುವಂಥ ಯೋಗಗಳಿವೆ. ಯಾರು ತಾತ್ಕಾಲಿಕ ಕೆಲಸಗಳನ್ನು ಮಾಡುತ್ತಿದ್ದೀರಾ ಅಂತಹವರಿಗೆ ಹುದ್ದೆ ಕಾಯಂ ಆಗುವ ಹಾಗೂ ಅದೇ ವೇಳೆ ವೇತನ ಹೆಚ್ಚಾಗುವ ಮತ್ತು ಉದ್ಯೋಗ ಭದ್ರತೆ ಸಿಗುವ ಯೋಗಗಳಿವೆ. ಈ ತಿಂಗಳು ತಾಳ್ಮೆ ಮತ್ತು ಸಂಯಮ ಬಹಳ ಮುಖ್ಯವಾಗುತ್ತದೆ. ನಿಮ್ಮ ಮೇಲಧಿಕಾರಿಗಳ ಜೊತೆಗೆ ಯಾವುದೇ ಕಾರಣಕ್ಕೂ ವ್ಯಾಜ್ಯ ಅಥವಾ ವಾಗ್ವಾದಗಳನ್ನು ಮಾಡಿಕೊಳ್ಳಲು ಹೋಗಬೇಡಿ. ನಾಲಗೆ ಮೇಲೆ ನಿಯಂತ್ರಣವನ್ನು ಇಟ್ಟುಕೊಳ್ಳಿ. ನಿಮ್ಮನ್ನು ಹೊಗಳಿದರು ಅಂತಲೋ ಅಥವಾ ವಿಪರೀತ ಗೌರವದಿಂದ ನೋಡಿದರು ಎಂಬ ಕಾರಣಕ್ಕೆ ಯಾವ ವಿಚಾರವನ್ನು ಇತರರು ನಿಮ್ಮ ಬಳಿ ರಹಸ್ಯ ಎಂದು ಹೇಳಿದ್ದರೋ ಅದನ್ನು ಸಹ ಹೇಳಿಬಿಡುವ ಸಾಧ್ಯತೆಗಳಿವೆ. ಆದ್ದರಿಂದ ಈ ಎಚ್ಚರಿಕೆಯನ್ನು ಗಂಭೀರವಾಗಿ ಪರಿಗಣಿಸಿ. ನಿಮ್ಮಿಂದ ಸಾಧ್ಯವಾದಲ್ಲಿ ವಿಷ್ಣು ಸಹಸ್ರನಾಮ ಪಠಣವನ್ನು ಮಾಡಿ, ಒಂದು ವೇಳೆ ಮಾಡಲಿಕ್ಕೆ ಸಾಧ್ಯವಿಲ್ಲ ಅಂತ ಆದರೆ ಕನಿಷ್ಠ ಪಕ್ಷ ಶ್ರವಣವನ್ನಾದರೂ ಮಾಡಿ, ಅಂದರೆ ಕೇಳಿಸಿಕೊಳ್ಳಿ.

ಜನ್ಮಸಂಖ್ಯೆ 7 (ಯಾವುದೇ ತಿಂಗಳಿನ 7, 16, 25ನೇ ತಾರೀಕು ಹುಟ್ಟಿದವರ ಜನ್ಮಸಂಖ್ಯೆ 7)

ಮಾಧ್ಯಮ ಕ್ಷೇತ್ರದಲ್ಲಿ ಕಾರ್ಯ ನಿರ್ವಹಿಸುವವರಿಗೆ ಉದ್ಯೋಗ ಬದಲಾವಣೆಗಾಗಿ ಅವಕಾಶಗಳು ಹುಡುಕಿಕೊಂಡು ಬರಲಿವೆ. ಈ ಬಗ್ಗೆ ಯಾವುದೇ ಗೊಂದಲವನ್ನು ಇಟ್ಟುಕೊಳ್ಳದೆ ಸೂಕ್ತ ನಿರ್ಧಾರವನ್ನು ತೆಗೆದುಕೊಂಡಲ್ಲಿ ಭವಿಷ್ಯದಲ್ಲಿ ದೊಡ್ಡ ಅನುಕೂಲ ಆಗಲಿದೆ. ಮನೆಯಲ್ಲಿ ದೇವತಾ ಕಾರ್ಯಗಳು, ಶುಭ ಕಾರ್ಯಗಳು ನಡೆಯುವುದರ ಮೂಲಕ ಮನಸ್ಸಿನಲ್ಲಿ ನೆಮ್ಮದಿ ನೆಲೆಸಲಿದೆ. ಇಷ್ಟು ಸಮಯ ನಿಮಗೆ ಹೇಳಲಿಕ್ಕೆ ಆಗದೆ ಮನಸ್ಸಿನಲ್ಲೇ ಇಟ್ಟುಕೊಂಡಿದ್ದ ವಿಚಾರವೊಂದನ್ನು ಸಂಬಂಧಪಟ್ಟವರ ಎದುರಿಗೆ ಹೇಳಲಿದ್ದೀರಿ. ಯಾರು ವಿವಾಹ ವಯಸ್ಕರಾಗಿದ್ದೀರಿ ಮತ್ತು ಮದುವೆಗಾಗಿ ಪ್ರಯತ್ನ ಪಡುತ್ತಿದ್ದೀರಿ ಅಂತಹವರಿಗೆ ಸೂಕ್ತ ಸಂಬಂಧಗಳು ದೊರೆಯುವಂತಹ ಅವಕಾಶಗಳು ಹೆಚ್ಚಿವೆ. ಮ್ಯಾಟ್ರಿಮೋನಿ ವೆಬ್ ಸೈಟ್ ಮೂಲಕ ಯಾರು ಪ್ರಯತ್ನ ಪಡುತ್ತಿದ್ದೀರಿ ಅಂತಹವರಿಗೆ ಸಾಧ್ಯತೆಗಳು ಮತ್ತೂ ಹೆಚ್ಚಾಗಿವೆ. ಕುಟುಂಬದ ವ್ಯವಹಾರ ಅಥವಾ ಉದ್ಯಮವನ್ನೇ ಮುಂದುವರಿಸಿಕೊಂಡು ಬಂದಂತಹವರು ಅದರ ವಿಸ್ತರಣೆಗಾಗಿ ಬ್ಯಾಂಕ್ ಗಳಿಂದ ಸಾಲ ಪಡೆಯುವುದಕ್ಕೆ ಪ್ರಯತ್ನಿಸಲಿದ್ದೀರಿ. ಕುಟುಂಬದ ಒಳಗೆ ಒಂದೇ ಸಲಕ್ಕೆ ಅನೇಕ ಬೆಳವಣಿಗೆಗಳು ಆಗಲಿವೆ. ನಿಮ್ಮಲ್ಲಿ ಕೆಲವರು ಮನೆ ಬದಲಾಯಿಸುವುದಕ್ಕೆ ಅಥವಾ ಈಗಿರುವುದಕ್ಕಿಂತ ದೊಡ್ಡ ಮನೆಯೊಂದನ್ನು ಖರೀದಿ ಮಾಡುವುದರ ಸಲುವಾಗಿ ಹುಡುಕಾಡುವುದಕ್ಕೆ ಶುರು ಮಾಡಲಿದ್ದೀರಿ. ನೆನಪಿನಲ್ಲಿಡಿ, ಇದ್ಯಾವುದನ್ನು ಮಾಡುವುದಕ್ಕೆ ಮುನ್ನ ಕುಟುಂಬ ಸದಸ್ಯರ ಜತೆಗೆ ಚರ್ಚೆ ಮಾಡಿ. ಇಲ್ಲದಿದ್ದಲ್ಲಿ ಅಭಿಪ್ರಾಯ ಭೇದಗಳು ಬಂದು, ಮನೆಯಲ್ಲಿ ಶಾಂತಿಯಿಲ್ಲದಂತೆ ಆಗುತ್ತದೆ.

ಜನ್ಮಸಂಖ್ಯೆ 8 (ಯಾವುದೇ ತಿಂಗಳಿನ 8, 17, 26ನೇ ತಾರೀಕು ಹುಟ್ಟಿದವರ ಜನ್ಮಸಂಖ್ಯೆ 8)

ಅಕ್ಟೋಬರ್ ತಿಂಗಳ ದ್ವಿತೀಯಾರ್ಧದಲ್ಲಿ ನಿಮ್ಮ ಸಹಾಯ ಕೇಳಿಕೊಂಡು ಬರುವಂಥವರ ಪ್ರಮಾಣ ಹೆಚ್ಚಾಗಲಿದೆ. ಒಂದು ವೇಳೆ ನಿಮ್ಮ ಆಪ್ತರು ಅಥವಾ ಹತ್ತಿರದ ಸ್ನೇಹಿತರು ಹಣಕಾಸಿನ ಸಹಾಯವನ್ನು ಕೇಳಿಕೊಂಡು ಬಂದಲ್ಲಿ, ನಿಮ್ಮಿಂದ ಸಾಧ್ಯವೂ ಆದರೆ ಅವರಿಗೆ ನೆರವನ್ನು ನೀಡಿ. ದೊಡ್ಡ ಅಳತೆಯ ಟೀವಿ, ಹೋಮ್ ಥಿಯೇಟರ್, ವರ್ಚುವಲ್ ರಿಯಾಲಿಟಿ ಸೆಟ್ ಇಂಥವುಗಳ ಖರೀದಿಗಾಗಿ ಹಣವನ್ನು ಖರ್ಚು ಮಾಡಲಿದ್ದೀರಿ. ಸರ್ಕಾರದ ಪ್ರಮುಖ ಹುದ್ದೆಯಲ್ಲಿ ಇರುವಂಥವರಿಗೆ ತಾತ್ಕಾಲಿಕವಾಗಿ ಹೆಚ್ಚುವರಿಯಾದ ಜವಾಬ್ದಾರಿಯನ್ನು ನೀಡಬಹುದು. ಕೆಲಸದ ಒತ್ತಡದಲ್ಲಿ ಸಿಲುಕಿಕೊಂಡು ಕುಟುಂಬದ ವಿಚಾರಗಳ ಬಗ್ಗೆ ಹೆಚ್ಚು ನಿಗಾ ಮಾಡುವುದಕ್ಕೆ ಸಾಧ್ಯವಾಗದಿರಬಹುದು. ನಲವತ್ತು ವರ್ಷಕ್ಕಿಂತ ಹೆಚ್ಚು ವಯಸ್ಸಾದವರಲ್ಲಿ ಆರೋಗ್ಯದ ಬಗ್ಗೆ ಕಾಳಜಿ ಹೆಚ್ಚಾಗಲಿದೆ. ಈ ಕಾರಣಕ್ಕೆ ಜಿಮ್, ಪ್ರಾಣಾಯಾಮ, ಯೋಗ ಅಥವಾ ಧ್ಯಾನ ಕಲಿಕೆಯಂಥದ್ದಕ್ಕೆ ಸೇರಿಕೊಳ್ಳುವ ಸಾಧ್ಯತೆಗಳಿವೆ. ಸಾವಯವ ಉತ್ಪನ್ನಗಳ ಮಾರಾಟ ಮಾಡುವಂಥವರಿಗೆ ದೊಡ್ಡ ಪ್ರಮಾಣದ ಆರ್ಡರ್ ದೊರೆಯುವ ಸಾಧ್ಯತೆಗಳಿವೆ ಮತ್ತು ಒಂದೊಳ್ಳೆ ಮೊತ್ತವನ್ನು ಅಡ್ವಾನ್ಸ್ ಆಗಿ ನೀಡುವ ಅವಕಾಶಗಳು ಇವೆ. ವಕೀಲರು, ಚಾರ್ಟರ್ಡ್ ಅಕೌಂಟೆಂಟ್ ಗಳು ಅಥವಾ ವೈದ್ಯರಾಗಿ ಕಾರ್ಯ ನಿರ್ವಹಿಸುತ್ತಿರುವವರು ಹೊಸ ಹಾಗೂ ವಿಲಾಸಿ ವಾಹನವನ್ನು ಖರೀದಿ ಮಾಡುವಂಥ ಯೋಗ ಇದೆ. ಈ ತಿಂಗಳು ನಿಮ್ಮಿಂದ ಸಾಧ್ಯವಾದಲ್ಲಿ ಮಂಗಳವಾರಗಳಂದು ನರಸಿಂಹದೇವರ ಆರಾಧನೆಯನ್ನು ಅಥವಾ ಪೂಜೆಯನ್ನು ಮಾಡುವುದರಿಂದ ಮನಸ್ಸಿಗೆ ನೆಮ್ಮದಿ ದೊರೆಯಲಿದೆ.

ಜನ್ಮಸಂಖ್ಯೆ 9 (ಯಾವುದೇ ತಿಂಗಳಿನ 9, 18, 27ನೇ ತಾರೀಕು ಹುಟ್ಟಿದವರ ಜನ್ಮಸಂಖ್ಯೆ 9)

ಶುಭ ಕಾರ್ಯಗಳ ಓಡಾಟಕ್ಕೆ ಹೆಚ್ಚಿನ ಸಮಯ ಮೀಸಲಿಡಬೇಕಾಗುತ್ತದೆ. ಷೇರು, ಮ್ಯೂಚುವಲ್ ಫಂಡ್ ಗಳಲ್ಲಿ ಮಾಡಿರುವಂಥ ಹೂಡಿಕೆಯನ್ನು ಹಿಂತೆಗೆದುಕೊಳ್ಳಬೇಕಾಗಲಿದೆ. ಇದರ ಜತೆಗೆ ಒಂದು ವೇಳೆ ಫಿಕ್ಸೆಡ್ ಡೆಪಾಸಿಟ್ ಏನಾದರೂ ಇದ್ದಲ್ಲಿ ಮುರಿಸಬೇಕಾದ ಸನ್ನಿವೇಶ ಎದುರಾಗಲಿದೆ. ತಂದೆ ಅಥವಾ ತಂದೆಗೆ ಸಮಾನರಾದವರ ಆರೋಗ್ಯದಲ್ಲಿ ವ್ಯತ್ಯಯವಾಗಿ ಗಾಬರಿ ಆಗುವಂತಾಗುತ್ತದೆ. ಇನ್ನು ಯಾರು ಕಾಲು ಅಥವಾ ನರಕ್ಕೆ ಸಂಬಂಧಿಸಿದ ಸಮಸ್ಯೆಗಳಿಂದ ಬಳಲುತ್ತಿದ್ದೀರೋ ಅಂಥವರಿಗೆ ಅನಾರೋಗ್ಯ ಸಮಸ್ಯೆ ಉಲ್ಬಣ ಆಗಬಹುದು. ಆದ್ದರಿಂದ ನಿಮ್ಮ ಓಡಾಟ, ಕೆಲಸ- ಕಾರ್ಯಗಳ ಮಧ್ಯೆ ಯಾವುದೇ ಕಾರಣಕ್ಕೂ ಆಹಾರ ಪಥ್ಯದಲ್ಲಿ ನಿರ್ಲಕ್ಷ್ಯ ಮಾಡಬೇಡಿ. ನಿಮ್ಮಲ್ಲಿ ಕೆಲವರಿಗೆ ಈಗಿರುವ ಹುದ್ದೆಗಿಂತ ಮೇಲ್ಮಟ್ಟದ ಹುದ್ದೆಗೆ ಪ್ರತಿಷ್ಠಿತ ಸಂಸ್ಥೆಗಳಿಂದ ಕರೆ ಬರಬಹುದು ಅಥವಾ ಈಗ ಕೆಲಸ ಮಾಡುತ್ತಿರುವ ಕಡೆಯೇ ಪದೋನ್ನತಿ ಆಗಬಹುದು. ನಿಮ್ಮ ಕೈ ಕೆಳಗೆ ಕೆಲಸ ಮಾಡುವವರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳಿ. ಸಣ್ಣ- ಪುಟ್ಟ ತಪ್ಪುಗಳಾದಲ್ಲಿ ಕೂಗಾಟ- ಕಿರುಚಾಟ ಮಾಡಲಿಕ್ಕೆ ಹೋಗಬೇಡಿ. ಸೋದರ ಸಂಬಂಧಿಗಳು ಪಿತ್ರಾರ್ಜಿತ ಆಸ್ತಿ ವಿಚಾರವಾಗಿ ಮಾತುಕತೆ ನಡೆಸುವುದಕ್ಕೆ ಮುಂದಾಗಬಹುದು. ಚರ್ಚೆಯಲ್ಲಿ ಭಾವನಾತ್ಮಕ ಸಂಗತಿಗಳು ಹೆಚ್ಚಿರಲಿವೆ. ಆದರೆ ಈ ಕಾರಣದಿಂದ ನಿರ್ಧಾರಗಳು ತಪ್ಪಾಗದಂತೆ ಎಚ್ಚರಿಕೆಯನ್ನು ವಹಿಸಿ. ಮಕ್ಕಳ ಶಿಕ್ಷಣದ ವಿಚಾರವಾಗಿ ಸಂಗಾತಿ ಜತೆಗೆ ಗಂಭೀರವಾದ ಚರ್ಚೆ ನಡೆಸಲಿದ್ದೀರಿ. ಬಹಳ ಸಮಯದಿಂದ ನೀವು ಪ್ರಯತ್ನಿಸುತ್ತಿದ್ದ ದಾಖಲೆ ಪತ್ರಗಳು ದೊರೆಯುವ ಅವಕಾಶಗಳಿವೆ. ಮುಖ್ಯವಾದ ಕೆಲಸಗಳಿಗೆ ಮನೆಯಿಂದ ಹೋಗುವಾಗ ಭೂ ವರಾಹ ಸ್ವಾಮಿಯನ್ನು ಮನಸ್ಸಿನಲ್ಲಿ ಸ್ಮರಿಸಿ.

ಮತ್ತಷ್ಟು ಜ್ಯೋತಿಷ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ