ಕೊವಿಡ್​ ಇದ್ದರೂ ಭಾರತದಲ್ಲಿ ಅತ್ಯಧಿಕ ಬುಕ್ಕಿಂಗ್​ ಕಂಡ ಒಯೋ; ಹೊಸದಾಗಿ 85 ಲಕ್ಷ ಗ್ರಾಹಕರು ಸೇರ್ಪಡೆ

ದೆಹಲಿ: ಬಹುತೇಕ ಎಲ್ಲ ಉದ್ಯಮಗಳ ಮೇಲೂ ಕೋವಿಡ್-19 ವ್ಯತಿರಿಕ್ತ ಪರಿಣಾಮ ಬೀರಿದೆ. ಭಾರತದಲ್ಲಿ ಕೊವಿಡ್​ನ ಹೊಡೆತಕ್ಕೆ ಮೊದಲು ಸಿಕ್ಕ ಉದ್ಯಮಗಳ ಪೈಕಿ ಹೊಟೇಲ್​ ಮತ್ತು ಪ್ರವಾಸೋದ್ಯಮವೂ ಇವೆ. ಲಾಕ್​ಡೌನ್​, ಸೀಲ್​ಡೌನ್​ಗಳ ಭರಾಟೆಯಲ್ಲಿ ಜನ ಮನೆಯಿಂದ ಆಚೆ ತಲೆ ಹಾಕದಂತಾಗಿ ಈ ಉದ್ಯಮಗಳು ಅಕ್ಷರಶಃ ನೆಲಕಚ್ಚಿದ್ದವು. ಆದರೆ, ಇದರ ನಡುವೆಯೂ 2020ರಲ್ಲಿ ಒಯೋ (OYO) ಮಾತ್ರ ಬೇರೆಲ್ಲಾ ರಾಷ್ಟ್ರಗಳಿಗಿಂತ ಭಾರತದಲ್ಲೇ ಅಧಿಕ ಗ್ರಾಹಕರನ್ನು ಸೆಳೆದಿದೆ ಎಂಬ ಮಾಹಿತಿ ಬಹಿರಂಗವಾಗಿದೆ.

ಭಾರತದಲ್ಲಿ ಹಂತಹಂತವಾಗಿ ಅನ್​​ಲಾಕಿಂಗ್​ ಆರಂಭವಾದ ಮೇಲೆ ಜನರು ಹೊಟೇಲ್​ ಮತ್ತು ಪ್ರವಾಸಿತಾಣಗಳತ್ತ ಮುಖ ಮಾಡುತ್ತಿದ್ದಾರೆ. ಹಾಗಾಗಿ ವಿಶ್ವದ ಇತರೆ ದೇಶಗಳಿಗೆ ಹೋಲಿಸಿದರೆ ಭಾರತದಲ್ಲಿ ಒಯೋ ಬುಕ್ಕಿಂಗ್​ ಹೆಚ್ಚಿನ ಸಂಖ್ಯೆಯಲ್ಲಿ ಆಗಿದೆ ಎಂದು ವರ್ಷಾಂತ್ಯದ ಒಯೋ ಟ್ರಾವೆಲೋಪಿಡಿಯಾ 2020ರ ವರದಿ ತಿಳಿಸಿದೆ.

ವರದಿಯಲ್ಲಿ ತಿಳಿಸಿರುವಂತೆ 2020ರ ಆರಂಭದಲ್ಲಿ ಜನರು ಅತಿ ಹೆಚ್ಚು ಪ್ರವಾಸ ಮಾಡಿದ್ದು, ಜನವರಿಯಲ್ಲಿ ಒಯೋ ಅತ್ಯಧಿಕ ಬುಕ್ಕಿಂಗ್​​ಗಳನ್ನು ಸ್ವೀಕರಿಸಿದೆ. ಆದರೆ, ಏಪ್ರಿಲ್​ನಲ್ಲಿ ಕೊರೊನಾ ಗಲಾಟೆ ಮತ್ತು ಲಾಕ್​ಡೌನ್ ಹೇರಿಕೆ ಆದ ಕಾರಣ ಬುಕ್ಕಿಂಗ್​ ಹಿಂಪಡೆದವರ ಸಂಖ್ಯೆ ದೊಡ್ಡದಿದೆ. ಲಾಕ್​ಡೌನ್​ ಜಾರಿಯಲ್ಲಿದ್ದ ತನಕ ಸಹಜವಾಗಿ ಯಾವುದೇ ಬುಕ್ಕಿಂಗ್​ಗಳು ಕಂಡುಬಂದಿಲ್ಲ.

ಅನ್​ಲಾಕಿಂಗ್​ ನಂತರ ಹೆಚ್ಚಿದ ಉತ್ಸಾಹ ಅನ್​ಲಾಕಿಂಗ್​ ಶುರುವಾದ ನಂತರ ಡಿಸೆಂಬರ್​ ಅತ್ಯಂತ ಬೇಡಿಕೆಯ ತಿಂಗಳಾಗಿ ಕಂಡುಬಂದಿದ್ದು, ಜನರು ಪ್ರವಾಸಿ ತಾಣಗಳತ್ತ ಹೋಗಲು ಉತ್ಸುಕರಾಗಿದ್ದಾರೆ ಎಂದು ಮಾಹಿತಿ ಲಭಿಸಿದೆ. ಲಾಕ್​ಡೌನ್​ ನಂತರ ಅಕ್ಟೋಬರ್​ 2 ರಂದು ಹೆಚ್ಚು ಬುಕ್ಕಿಂಗ್​ ಸ್ವೀಕರಿಸಿದ್ದನ್ನು ಹೊರತುಪಡಿಸಿದರೆ ಕ್ರಿಸ್​ಮಸ್​ ಅವಧಿಯ ತನಕ ಭಾರೀ ಬೇಡಿಕೆ ಕಂಡುಬಂದಿಲ್ಲ.

ಈ ವರ್ಷದಲ್ಲಿ ಒಯೋ ಆ್ಯಪ್​ ಮತ್ತು ವೆಬ್​ಸೈಟ್​ ಒಟ್ಟು 85 ಲಕ್ಷ ಹೊಸ ಗ್ರಾಹಕರನ್ನು ಸೆಳೆದಿದೆ. ಧಾರ್ಮಿಕ ಕ್ಷೇತ್ರಗಳ ಪೈಕಿ ಪುರಿ ಅತಿ ಹೆಚ್ಚು ಜನರನ್ನು ಸೆಳೆದಿದೆ. ಪುರಿಯ ನಂತರ ಬೃಂದಾವನ, ತಿರುಪತಿ, ಶಿರಡಿ ಮತ್ತು ವಾರಣಾಸಿ ಕ್ಷೇತ್ರಗಳಿವೆ. ಅಧಿಕ ಪ್ರವಾಸಿಗರನ್ನು ಸೆಳೆದಿರುವ ಬೀಚ್​ಗಳ ಪಟ್ಟಿಯಲ್ಲಿ ಗೋವಾ ಮೊದಲ ಸ್ಥಾನದಲ್ಲಿದ್ದರೆ ನಂತರದಲ್ಲಿ ಕೊಚ್ಚಿ, ವಿಶಾಖಪಟ್ಟಣಂ ಮತ್ತು ಪುದುಚೆರಿ ಇವೆ. ವ್ಯಾವಹಾರಿಕ ಉದ್ದೇಶಗಳಿಗಾಗಿ ಜನರು ದೆಹಲಿ, ಬೆಂಗಳೂರು ಮತ್ತು ಹೈದರಾಬಾದ್​ಗಳಿಗೆ ಅತಿ ಹೆಚ್ಚು ಭೇಟಿ ನೀಡಿದ್ದಾರೆಂದು ಒಯೋ ಹೇಳಿದೆ.

ಕೊವಿಡ್​ ಪೂರ್ವಕ್ಕಿಂತಲೂ ಈಗ ಒಯೋ ಹೆಚ್ಚೆಚ್ಚು ಪರಿಚಿತಗೊಳ್ಳುತ್ತಿದೆ ಮತ್ತು ಸದೃಢವಾಗಿ ಬೆಳೆಯುತ್ತಿದೆ. ಡಿಸೆಂಬರ್​ 31ರಂದು ಈ ವರ್ಷದ ಅತ್ಯಧಿಕ ಬುಕ್ಕಿಂಗ್​ಗಳಿಗೆ ಸಾಕ್ಷಿಯಾಗಬಹುದು ಎಂಬ ಭರವಸೆ ಇದೆ ಎಂದು ಒಯೋ ಸಂಸ್ಥೆಯ ಭಾರತ ಮತ್ತು ದಕ್ಷಿಣ ಏಷ್ಯಾ ಪ್ರಾಂತ್ಯದ ಸಿಇಓ ರೋಹಿತ್​ ಕಪೂರ್​ ತಿಳಿಸಿದ್ದಾರೆ.