ನಕಲಿ ನೋಟು ದಂಧೆ: ಬೆಂಗಳೂರು ಮೂಲದ ಮಹಿಳೆ ಅಪರಾಧ ಸಾಬೀತು, ಇಂದು ಶಿಕ್ಷೆ ಪ್ರಕಟ
2018 ರಲ್ಲಿ ನಡೆದಿದ್ದ ನಕಲಿ ನೋಟು ದಂಧೆಯಲ್ಲಿ ತೊಡಗಿದ್ದ ಮಹಿಳೆ ತಪ್ಪಿತಸ್ಥರೆಂದು ಸಾಬೀತು ಆಗಿದೆ. ಶಿಕ್ಷೆಯ ಪ್ರಮಾಣವನ್ನು ಇಂದು ಕೋರ್ಟ್ ಪ್ರಕಟಿಸಲಿದೆ. ಈ ಪ್ರಕರಣವನ್ನು 2018ರಲ್ಲಿ NIA ಭೇದಿಸಿ ನಂತರ ತನಿಖೆ ನಡೆಸಿ ದೋಷಾರೋಪ ಪಟ್ಟಿ ಸಲ್ಲಿಸಿತು. ಈ ಹಿಂದೆ ವನಿತಾ ಮತ್ತು ಆಕೆಯ ಆರು ಸಹಚರರನ್ನು ಮಾದನಾಯಕನಹಳ್ಳಿ ಪೊಲೀಸರು 2018ರ ಮಧ್ಯದಲ್ಲಿ ಬಂಧಿಸಿ 2,000 ರೂಪಾಯಿ ಮುಖಬೆಲೆಯ 6,84,000 ರೂಪಾಯಿಗಳ ನಕಲಿ ನೋಟುಗಳನ್ನು ವಶಪಡಿಸಿಕೊಂಡಿದ್ದರು.
Updated on: Sep 12, 2023 | 7:21 AM
ಬೆಂಗಳೂರು,ಸೆ.12: ರಾಷ್ಟ್ರೀಯ ತನಿಖಾ ಸಂಸ್ಥೆ (NIA) ದಾಖಲಿಸಿದ ನಕಲಿ ನೋಟು ದಂಧೆ ಪ್ರಕರಣಕ್ಕೆ ಸಂಬಂಧಿಸಿ ವಿಶೇಷ ನ್ಯಾಯಾಲಯವು ಸೋಮವಾರ ಬೆಂಗಳೂರು ಮೂಲದ ಮಹಿಳೆಯೊಬ್ಬರನ್ನು ತಪ್ಪಿತಸ್ಥೆ ಎಂದು ಆದೇಶ ನೀಡಿದೆ. 2018 ರಲ್ಲಿ ನಡೆದಿದ್ದ ನಕಲಿ ನೋಟು ದಂಧೆಯಲ್ಲಿ(Counterfeit Currency Racket) ತೊಡಗಿದ್ದ ಮಹಿಳೆ ತಪ್ಪಿತಸ್ಥರೆಂದು ಸಾಬೀತು ಆಗಿದೆ. ಶಿಕ್ಷೆಯ ಪ್ರಮಾಣವನ್ನು ಇಂದು ಕೋರ್ಟ್ ಪ್ರಕಟಿಸಲಿದೆ. ಈ ಪ್ರಕರಣವನ್ನು 2018ರಲ್ಲಿ NIA ಭೇದಿಸಿ ನಂತರ ತನಿಖೆ ನಡೆಸಿ ದೋಷಾರೋಪ ಪಟ್ಟಿ ಸಲ್ಲಿಸಿತು. ಇನ್ನು ರಾಮಚಂದ್ರಾಪುರದ ಜೆ ವನಿತಾ ಅಲಿಯಾಸ್ ತಂಗಂ (53) ಅವರ ಶಿಕ್ಷೆಯ ಪ್ರಮಾಣವನ್ನು ನ್ಯಾಯಾಲಯ ಮಂಗಳವಾರ(ಸೆ.12) ಪ್ರಕಟಿಸಲಿದೆ.
ವನಿತಾ ಅವರು ಆಗಸ್ಟ್ 2018 ರಿಂದ ಬೆಂಗಳೂರು ಕೇಂದ್ರ ಕಾರಾಗೃಹದಲ್ಲಿ ನ್ಯಾಯಾಂಗ ಬಂಧನದಲ್ಲಿದ್ದಾರೆ. ವನಿತಾ ಮತ್ತು ಆಕೆಯ ಆರು ಸಹಚರರನ್ನು ಮಾದನಾಯಕನಹಳ್ಳಿ ಪೊಲೀಸರು 2018ರ ಮಧ್ಯದಲ್ಲಿ ಬಂಧಿಸಿ 2,000 ರೂಪಾಯಿ ಮುಖಬೆಲೆಯ 6,84,000 ರೂಪಾಯಿಗಳ ನಕಲಿ ನೋಟುಗಳನ್ನು ವಶಪಡಿಸಿಕೊಂಡಿದ್ದರು.
ವನಿತಾ ಮತ್ತು ಇತರ ಆರೋಪಿಗಳ ವಿರುದ್ಧ ಭಾರತೀಯ ದಂಡ ಸಂಹಿತೆ-489B (ನಕಲಿ ಕರೆನ್ಸಿ ಬಳಸುವುದು), 489C (ನಕಲಿ ಕರೆನ್ಸಿ ಸ್ವಾಧೀನ), 120B (ಕ್ರಿಮಿನಲ್ ಪಿತೂರಿ), 34 (ಸಾಮಾನ್ಯ ಉದ್ದೇಶ) ಸೆಕ್ಷನ್‌ಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿತ್ತು. ನಂತರ, ಪ್ರಕರಣವನ್ನು ಸೆಪ್ಟೆಂಬರ್ 2018 ರಲ್ಲಿ ಎನ್ಐಎಗೆ ಹಸ್ತಾಂತರಿಸಲಾಯಿತು. ಬಳಿಕ ಇನ್ನೂ ಇಬ್ಬರು ಶಂಕಿತರನ್ನು ಎನ್‌ಐಎ ಬಂಧಿಸಿತ್ತು.
ಡಿಸೆಂಬರ್ 2020 ರಲ್ಲಿ, ಸಜ್ಜದ್ ಅಲಿ, ಎಂಜಿ ರಾಜು ಮತ್ತು ಅಬ್ದುಲ್ ಖಾದಿರ್ ಎಂಬ ಮೂವರು ಆರೋಪಿಗಳು ತಪ್ಪೊಪ್ಪಿಕೊಂಡರು ಮತ್ತು ವಿಶೇಷ ನ್ಯಾಯಾಲಯವು ಫೆಬ್ರವರಿ 2021 ರಲ್ಲಿ ಅವರಿಗೆ ಆರು ವರ್ಷಗಳ ಸಾದಾ ಜೈಲು ಶಿಕ್ಷೆಯನ್ನು ವಿಧಿಸಿತು. ಇನ್ನಿಬ್ಬರು ಆರೋಪಿಗಳಾದ ಗಂಗಾಧರ ರಾಮಪ್ಪ ಕೋಖರ್ ಮತ್ತು ಸಬ್ರುದ್ದೀನ್ ಅವರಿಗೆ ಆರು ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಗಿದೆ.
ಅಪರಾಧ ಸುದ್ದಿಗಳನ್ನು ಓದಲು ಇದರ ಮೇಲೆ ಕ್ಲಿಕ್ ಮಾಡಿ
