Namma Metro: ಮೆಟ್ರೋ ಇಳಿದವರು ಸರಾಗವಾಗಿ ಕಚೇರಿ ತಲುಪಿ; ಪ್ರತ್ಯೇಕ ಪಾದಚಾರಿ ರಸ್ತೆ ನಿರ್ಮಿಸಿಕೊಳ್ಳಲು ಐಟಿ ಕಂಪನಿಗಳಿಗೆ ಹೊಸ ಆಫರ್
Ring Road: ಮೆಟ್ರೋ ನಿಗಮದ ವ್ಯವಸ್ಥಾಪಕ ನಿರ್ದೇಶಕ ಅಂಜುಂ ಪರ್ವೇಜ್ ಈ ವಿಷಯವನ್ನು ಇತ್ತೀಚೆಗೆ ನಡೆದ ಹೊರವರ್ತುಲ ಸಂಘಗಳ ಜೊತೆಗಿನ ಸಮಾಲೋಚನ ಸಭೆಯಲ್ಲಿ ಬಹಿರಂಗಪಡಿಸಿದ್ದಾರೆ.
Updated on:Oct 27, 2022 | 12:49 PM
ಬೆಂಗಳೂರು: ನಮ್ಮ ಮೆಟ್ರೋ ನಿಗಮವು (Bengaluru Metro Rail Corporation Limited – BMRCL) ಐಟಿ ಕಂಪನಿಗಳ ಎದುರು ಮಹತ್ವದ ಪ್ರಸ್ತಾವವೊಂದನನ್ನು ಇರಿಸಿದೆ. ಅದರಂತೆ ನಗರದ ಹೊರವಲಯದ ರಸ್ತೆಗಳಲ್ಲಿ (Ring Road) ಮುಂದಿನ ದಿನಗಳಲ್ಲಿ ನಿರ್ಮಾಣವಾಗುವ ಮೆಟ್ರೋ ನಿಲ್ದಾಣಗಳಿಂದ ಐಟಿ ಕಂಪನಿಗಳು ತಮ್ಮ ಕಚೇರಿಗಳಿಗೆ ನೇರ ಸಂಪರ್ಕ ಕಲ್ಪಿಸಿಕೊಳ್ಳಲು ಅವಕಾಶ ಮಾಡಿಕೊಡಲಾಗಿದೆ. ಮೆಟ್ರೋ ನಿಗಮದ ವ್ಯವಸ್ಥಾಪಕ ನಿರ್ದೇಶಕ ಅಂಜುಂ ಪರ್ವೇಜ್ ಈ ವಿಷಯವನ್ನು ಇತ್ತೀಚೆಗೆ ನಡೆದ ಹೊರವರ್ತುಲ ಸಂಘಗಳ ಜೊತೆಗಿನ ಸಮಾಲೋಚನ ಸಭೆಯಲ್ಲಿ ಬಹಿರಂಗಪಡಿಸಿದ್ದಾರೆ.
ದೇವನಹಳ್ಳಿ ಸಮೀಪದ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಿಲ್ಕ್ಬೋರ್ಡ್ ಜಂಕ್ಷನ್ನಿಂದ ಸಂಪರ್ಕ ಕಲ್ಪಿಸುವ ಹೊಸ ಮಾರ್ಗವನ್ನು ಮೆಟ್ರೋ ನಿರ್ಮಿಸುತ್ತಿದೆ. ಹೆಬ್ಬಾಳ-ಸಿಲ್ಕ್ಬೋರ್ಡ್ ನಡುವೆಯೂ ಈ ಮಾರ್ಗವು ಸುಲಭ ಸಂಪರ್ಕ ಬೆಸೆಯುತ್ತದೆ. ಈ ಮಾರ್ಗದಲ್ಲಿ ಬರಲಿರುವ 23 ನಿಲ್ದಾಣಗಳ ಪೈಕಿ ಯಾವುದೇ ನಿಲ್ದಾಣದಿಂದ ಯಾವುದೇ ಕಂಪನಿ ಪ್ರತ್ಯೇಕ ಪಾದಾಚಾರಿ ಮಾರ್ಗಗಳನ್ನು ನಿರ್ಮಿಸಿಕೊಳ್ಳಲು ಇಚ್ಛಿಸಿದರೆ ಅನುಮತಿ ನೀಡಲಾಗುವುದು ಎಂದು ಮೆಟ್ರೋ ನಿಗಮವು ಭರವಸೆ ನೀಡಿದೆ.
ಪಾದಚಾರಿ ಮಾರ್ಗ ನಿರ್ಮಾಣದ ಕಾರ್ಯಸಾಧ್ಯತೆಯನ್ನು ಪರಿಶೀಲಿಸಿ ಅನುಮತಿ ನೀಡುವವರೆಗೆ ಮಾತ್ರ ಮೆಟ್ರೋ ನಿಗಮದ ಜವಾಬ್ದಾರಿ ಇರುತ್ತದೆ. ಆದರೆ ನಂತರದ ದಿನಗಳಲ್ಲಿ ಅಂಥ ಕಾಮಗಾರಿಯ ಅನುಷ್ಠಾನದ ಹೊಣೆ ಸಂಪೂರ್ಣ ಆಯಾ ಕಂಪನಿಗಳದ್ದೇ ಆಗಿರಲಿದೆ. ಮೆಟ್ರೋದ ಕಂಬಗಳಿಗೆ ಬಣ್ಣ ಬಳಿಯುವ ಹಾಗೂ ಮೆಟ್ರೋ ಮಾರ್ಗದ ಅಡಿಯಲ್ಲಿ ಕಿರು ಉದ್ಯಾನ ನಿರ್ಮಾಣಕ್ಕೆ ಖಾಸಗಿ ಸಹಭಾಗಿತ್ವ ಸ್ವೀಕರಿಸುವ ಚಿಂತನೆ ಮೆಟ್ರೋ ನಿಗಮಕ್ಕೆ ಇದೆ. ಇಂಥ ಚಟುವಟಿಕೆಗಳಲ್ಲಿ ಆಸಕ್ತಿಯಿರುವ ಕಂಪನಿಗಳು ಮುಂದೆ ಬರಬೇಕು ಎಂದು ನಿಗಮವು ಕೋರಿದೆ.
ಬೈಯಪ್ಪನಹಳ್ಳಿ-ವೈಟ್ಫೀಲ್ಡ್ ಸಂಪರ್ಕ
ಮೆಟ್ರೋ ನಿಗಮವು ಇತ್ತೀಚೆಗಷ್ಟೇ ಬೈಯಪ್ಪನಹಳ್ಳಿ-ವೈಟ್ಫೀಲ್ಡ್ ಮಾರ್ಗದಲ್ಲಿ ಪ್ರಾಯೋಗಿಕವಾಗಿ ರೈಲು ಸಂಚಾರ ನಡೆಸಿತು. ಈ ಮಾರ್ಗವು ಪೂರ್ಣಪ್ರಮಾಣದಲ್ಲಿ ಕಾರ್ಯರೂಪಕ್ಕೆ ಬಂದ ನಂತರ ಕೆಂಗೇರಿ-ವೈಟ್ಫೀಲ್ಡ್ ನಡುವೆ ಸಂಪರ್ಕ ಸುಲಭವಾಗುತ್ತದೆ. ಈ ಮಾರ್ಗದಲ್ಲಿ ರೈಲುಗಳನ್ನು ಪ್ರಯಾಣಿಕರಿಗೆ ಮುಕ್ತಗೊಳಿಸಲು ಡಿಸೆಂಬರ್ 2022ರ ಗಡುವು ಇರಿಸಿಕೊಳ್ಳಲಾಗಿದೆ.
ನೇರಳೆ ಮಾರ್ಗದಲ್ಲಿ ಸಂಚರಿಸುವ ರೈಲುಗಳು ಬಹುತೇಕ ಭರ್ತಿಯಾಗಿರುತ್ತವೆ. ಈ ಮಾರ್ಗದಲ್ಲಿ ಸಂಚರಿಸುವ ರೈಲುಗಳಿಗೆ ಬೋಗಿಗಳ ಸಂಖ್ಯೆ ಹೆಚ್ಚಿಸಬೇಕು ಎಂಬ ಬೇಡಿಕೆಯು ಪ್ರಯಾಣಿಕರಿಂದ ಬಂದಿದೆ. ಬೋಗಿಗಳನ್ನು ಹೆಚ್ಚಿಸುವ ಬದಲು, ರೈಲುಗಳ ಆವರ್ತನ ಹೆಚ್ಚಿಸಲು, ಪ್ರತಿ ರೈಲಿನ ನಡುವಣ ಸಮಯದ ಅಂತರ ಕಡಿಮೆ ಮಾಡಲು ನಿಗಮವು ಚಿಂತನೆ ನಡೆಸಿದೆ.
ಇದನ್ನೂ ಓದಿ: ಮೆಟ್ರೋ ಪ್ರಯಾಣಿಕರಿಗೆ ಗುಡ್ ನ್ಯೂಸ್: ಬರಲಿದೆ ಕ್ಯೂಆರ್ ಕೋಡ್ ಆಧಾರಿತ ಟಿಕೆಟ್ ವ್ಯವಸ್ಥೆ
Published On - 12:48 pm, Thu, 27 October 22
