Women’s Day: ಬೆಂಗಳೂರಿನ ಮಹಿಳೆಯರಿಗೆ ಕೆಲಸದ ಸ್ಥಳದಲ್ಲಿ ಇನ್ನೂ ಇದೆ ಲಿಂಗ ತಾರತಮ್ಯ!
Gender Discrimination: ಅಂತಾಷ್ಟ್ರೀಯ ಮಹಿಳಾ ದಿನಾಚರಣೆ ಸಂದರ್ಭದಲ್ಲಿಯೇ ಬೆಂಗಳೂರಿನ ವೇತನದಾರ ಮಹಿಳೆಯರು ಕೆಲಸದ ಸ್ಥಳದಲ್ಲಿ ಅನುಭವಿಸುತ್ತಿರುವ ಲಿಂಗತಾರತಮ್ಯದ ಕುರಿತು ಸಮೀಕ್ಷಾ ವರದಿಯೊಂದು ಪ್ರಕಟಗೊಂಡಿದೆ. ಬೆಂಗಳೂರು ಮಾತ್ರವಲ್ಲದೆ ದೇಶದ ಯಾವ ನಗರಗಳಲ್ಲಿ ಮಹಿಳೆಯರು ಹೆಚ್ಚು ತಾರತಮ್ಯ ಅನುಭವಿಸುತ್ತಿದ್ದಾರೆ, ಎಲ್ಲಿ ಇದು ಕಡಿಮೆ ಇದೆ ಎಂಬ ಆಸಕ್ತಿದಾಯಕ ವಿಚಾರ ವರದಿಯಲ್ಲಿದೆ.
Updated on: Mar 07, 2024 | 7:45 AM
ಬೆಂಗಳೂರು, ಮಾರ್ಚ್ 7: ಬೆಂಗಳೂರಿನ ಶೇಕಡಾ 30 ರಷ್ಟು ವೇತನದಾರ ಮಹಿಳೆಯರು ಕೆಲಸದ ಸ್ಥಳದಲ್ಲಿ ಲಿಂಗ ತಾರತಮ್ಯ ಅಥವಾ ಪಕ್ಷಪಾತವನ್ನು (Gender Bias) ಅನುಭವಿಸುತ್ತಿದ್ದಾರೆ ಎಂದು ಸಮೀಕ್ಷಾ ವರದಿಯೊಂದು ತಿಳಿಸಿದೆ. ಇದು ಲಿಂಗ ತಾರತಮ್ಯಕ್ಕೆ ಸಂಬಂಧಿಸಿದ ರಾಷ್ಟ್ರೀಯ ಸರಾಸರಿ 16 ಶೇಕಡಾಕ್ಕಿಂತ ಹೆಚ್ಚಾಗಿದೆ. ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆಗೆ (International Women’s Day) ಮುನ್ನವೇ ಈ ವರದಿ ಬಹಿರಂಗಗೊಂಡಿದೆ. ದೇಶದ ಹತ್ತು ನಗರಗಳಲ್ಲಿ 800 ಮಂದಿ ವೇತನದಾರ ಮತ್ತು ಸ್ವಯಂ ಉದ್ಯೋಗಿ ಮಹಿಳೆಯರನ್ನು ಸಮೀಕ್ಷೆಗೆ ಒಳಪಡಿಸಲಾಗಿತ್ತು. ಕ್ರಿಸಿಲ್ (CRISIL) ಮತ್ತು ಡಿಬಿಎಸ್ ಬ್ಯಾಂಕ್ ಇಂಡಿಯಾ (DBS Bank India) ಜಂಟಿಯಾಗಿ ಸಮೀಕ್ಷೆ ನಡೆಸಿವೆ.
ವೇತನದಲ್ಲಿನ ಲಿಂಗ ಅಸಮಾನತೆಯು ಪ್ರದೇಶವಾರು ಬದಲಾಗುತ್ತವೆ. ದೆಹಲಿಯ ಶೇಕಡಾ 43 ರಷ್ಟು ವೇತನದಾರ ಮಹಿಳೆಯರು ಲಿಂಗ ಅಸಮಾನತೆ ಎದುರಿಸುತ್ತಿರುವುದಾಗಿ ಪ್ರತಿಕ್ರಿಯಿಸಿದ್ದಾರೆ. ಆದರೆ ಕೋಲ್ಕತ್ತಾದಲ್ಲಿ ಈ ಪ್ರಮಾಣ ಕೇವಲ ಶೇಕಡ 4 ರಷ್ಟಿದೆ. ಚೆನ್ನೈನಲ್ಲಿ ಶೇಕಡ 77 ರಷ್ಟು ಮಹಿಳೆಯರು ತಾರತಮ್ಯ ಎದುರಿಸಿಲ್ಲ ಎಂದು ಹೇಳಿದ್ದಾರೆ.
ಹೈದರಾಬಾದ್‌ನಲ್ಲಿ ಶೇಕಡ 41 ರಷ್ಟು ಮಹಿಳೆಯರು ವೇತನ ವಿಚಾರದಲ್ಲಿ ಲಿಂಗ ತಾರತಮ್ಯ ಎದುರಿಸುತ್ತಿದ್ದಾರೆ. ದೇಶಾದ್ಯಂತ ಒಟ್ಟಾರೆಯಾಗಿ ಸುಮಾರು ಶೇಕಡ 42 ರಷ್ಟು ಮಹಿಳೆಯರು ಸಂಬಳದ ವಿಚಾರದಲ್ಲಿ ತೊಂದರೆಗಳನ್ನು ಎದುರಿಸಿದ್ದಾರೆ. ಏತನ್ಮಧ್ಯೆ, ಕೋಲ್ಕತ್ತಾದ ಶೇಕಡ 96 ರಷ್ಟು ಮಹಿಳೆಯರು ವೇತನದ ವಿಚಾರದಲ್ಲಿ ಯಾವುದೇ ಸಮಸ್ಯೆ ಎದುರಿಸಿಲ್ಲ. ಆದರೆ ಅಹಮದಾಬಾದ್‌ನಲ್ಲಿ ಶೇಕಡ 33 ರಷ್ಟು ಮಹಿಳೆಯರು ತಾರತಮ್ಯ ಅನುಭವಿಸಿದ್ದಾಗಿ ಹೇಳಿದ್ದಾರೆ.
“ಮಹಿಳೆ ಮತ್ತು ಹಣಕಾಸು” ಎಂಬ ಶೀರ್ಷಿಕೆಯಡಿ ಸಮೀಕ್ಷೆ ವರದಿ ಪ್ರಕಟಗೊಂಡಿದ್ದು, ಮಹಿಳೆಯರು ವಾರ್ಷಿಕವಾಗಿ ಪಡೆದುಕೊಂಡ ವಿರಾಮದ ಅವಧಿಯ ಬಗ್ಗೆಯೂ ಮಾಹಿತಿ ಕಲೆಹಾಕಿದೆ ಎಂದು ‘ದಿ ಹಿಂದೂ’ ವರದಿ ತಿಳಿಸಿದೆ.
ಇದನ್ನೂ ಓದಿ: ಸಾವಯವ ಕೃಷಿಗೆ ಉಸಿರಾದ ಪ್ರೇಮಾ ಶಂಕರ ಗಾಣಿಗೇರ, ಇವರು ಮಹಿಳೆಯರಿಗೆ ಸ್ಫೂರ್ತಿ
ಕೋಲ್ಕತ್ತಾದ ನಂತರ (ಶೇ 55), ಮುಂಬೈನಲ್ಲಿ (ಶೇ 50) ಮಹಿಳೆಯರಿಗೆ ಹೆಚ್ಚಿನ ವಿರಾಮದ ಸಮಯ ದೊರೆತಿದೆ. ದಕ್ಷಿಣದ ರಾಜ್ಯಗಳ ಪೈಕಿ, ಬೆಂಗಳೂರಿನಲ್ಲಿ ಶೇಕಡಾ 47 ರಷ್ಟು ಮಹಿಳೆಯರು ಕಳೆದ ವರ್ಷದಲ್ಲಿ ಮೂರಕ್ಕಿಂತ ಹೆಚ್ಚು ವಿರಾಮವನ್ನು ತೆಗೆದುಕೊಂಡಿದ್ದಾರೆ. ಹೈದರಾಬಾದ್‌ನಲ್ಲಿ ಶೇಕಡಾ 15 ರಷ್ಟು ಮಹಿಳೆಯರು ವಿರಾಮದ ಅವಧಿಯನ್ನು ಪಡೆದಿದ್ದಾರೆ. ಅಹಮದಾಬಾದ್‌ನ ಶೇಕಡ 30 ರಷ್ಟು ಮಹಿಳೆಯರೊಂದಿಗೆ ಹೋಲಿಸಿದರೆ ದೆಹಲಿಯಲ್ಲಿ ಸುಮಾರು ಶೇಕಡ 38 ರಷ್ಟು ಮಹಿಳೆಯರು ಮೂರಕ್ಕಿಂತ ಹೆಚ್ಚು ವಿರಾಮ ಪ್ರವಾಸಗಳನ್ನು ಕೈಗೊಂಡಿದ್ದಾರೆ ಎಂದು ವರದಿ ತಿಳಿಸಿದೆ.
ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
