ನಿಮ್ಮ ವಾಹನದ ಡಾಕ್ಯುಮೆಂಟ್ಗಳನ್ನು ಇನ್ನು ಡಿಜಿ ಲಾಕರ್ ಮತ್ತು ಎಂ-ಪರಿವಾಹನ್ ಌಪ್ಗಳಲ್ಲಿ ತೋರಿಸಬಹುದು!
ಸಾರಿಗೆ ಇಲಾಖೆಯವರಾಗಲೀ, ಟ್ರಾಫಿಕ್ ಪೊಲೀಸರಾಗಲೀ ವಾಹನಗಳನ್ನು ತಪಾಸಣೆ ಮಾಡುವಾಗ ವಾಹನದ ಡಾಕ್ಯುಮೆಂಟ್ಗಳನ್ನು ಡಿಜಿ ಲಾಕರ್ ಮತ್ತು ಎಂ-ಪರಿವಾಹನ್ ಌಪ್ಗಳ ಮೂಲಕ ಕೇಂದ್ರ ಸರ್ಕಾರ ಬಹಳ ಹಿಂದೆಯೇ ಹೇಳಿದೆ.
Updated on: Jul 08, 2021 | 10:03 PM
ಬೆಂಗಳೂರು: ನೀವು ಬೈಕ್ ಅಥವಾ ಕಾರಿನಲ್ಲಿ ಪ್ರತಿದಿನ ಬೆಂಗಳೂರಿನ ರಸ್ತೆಗಳಲ್ಲಿ ಸಂಚರಿಸುತ್ತಿದ್ದರೆ ಟ್ರಾಫಿಕ್ ಪೊಲೀಸರ ಕಾಟ ಖಂಡಿತವಾಗಿಯೂ ಎದುರಾಗಿರುತ್ತದೆ. ನೀವು ಹೆಲ್ಮೆಟ್ ಧರಿಸಿ ಬೈಕ್ ಓಡಿಸುತ್ತಿದ್ದರೂ ಟ್ರಾಫಿಕ್ ಕಾಪ್ಗಳು ತಡೆದು ನಿಮ್ಮ ಡಿಎಲ್, ವಾಹನದ ದಾಖಲೆಗಳನ್ನು ತೋರಿಸಿ ಅಂತಾರೆ. ಅವುಗಳನ್ನು ಡಿಕ್ಕಿಯಲ್ಲಿ ಇಟ್ಟುಕೊಂಡಿದ್ದರೆ ನೀವು ಬಚಾವಾದಂತೆ. ಇಲ್ಲದಿದ್ದರೆ, ಭಾರೀ ಪ್ರಮಾಣದ ದಂಡ ತೆರಲು ಸಿದ್ಧರಾಗಬೇಕಾಗುತ್ತದೆ. ಹಾಗೆ ನೋಡಿದರೆ, ಈ ಡಾಕ್ಯುಮೆಂಟ್ಗಳನ್ನು ಪ್ರತಿದಿನ ಕ್ಯಾರಿ ಮಾಡುವುದು ಕರೆಕರೆಯ ಕೆಲಸವೇ. ಮಳೆಯಲ್ಲಿ ಅವು ನೆನೆಯುವ ಭಯ ಇದ್ದೇ ಇರುತ್ತದೆ. ಹಲವಾರು ಜನ ಅವು ನೆನೆಯದಂತೆ ಪ್ಲಾಸ್ಟಿಕ್ ಚೀಲದಲ್ಲಿ ಇಟ್ಟುಕೊಂಡಿರುತ್ತಾರೆ . ಪೊಲೀಸರು ವಾಹನವನ್ನು ಅಡ್ಡಹಾಕಿದಾಗ ಅವುಗಳನ್ನು ತೆಗೆದು ತೋರಿಸುವುದು ತಾಪತ್ರಯ ಅಂತ ಬಹಳ ಸಲ ನಾವು ಅಂದುಕೊಂಡಿರುತ್ತೇವೆ.
ಈ ತಾಪತ್ರಯವನ್ನು ದೂರ ಮಾಡಲೆಂದೇ ಕೇಂದ್ರ ಸರ್ಕಾರ ಡಿಜಿ ಲಾಕರ್ ಮತ್ತು ಎಂ-ಪರಿವಾಹನ್ ಌಪ್ಗಳನ್ನು ಲಾಂಚ್ ಮಾಡಿರುವುದು ಬಹಳಷ್ಟು ಜನಕ್ಕೆ ಗೊತ್ತಿರಬಹುದು ಮತ್ತು ಕೆಲವರ ಅರಿವಿಗೆ ಅದು ಬಂದಿರಲಿಕ್ಕಿಲ್ಲ. ಅದು ಅಪರಾಧವೇನೂ ಅಲ್ಲ ಬಿಡಿ. ಹಾಗಂತ ದಯವಿಟ್ಟು ಯಾಮಾರಬೇಡಿ. ಯಾಕೆಂದರೆ ಈ ಌಪ್ಗಳ ಮೂಲಕವೇ ನಿಮ್ಮ ಗಾಡಿಯ ದಾಖಲೆ ಪತ್ರಗಳನ್ನೂ ಪೊಲೀಸರಿಗೆ ತೋರಿಸಬಹುದು.
ಸಾರಿಗೆ ಇಲಾಖೆಯವರಾಗಲೀ, ಟ್ರಾಫಿಕ್ ಪೊಲೀಸರಾಗಲೀ ವಾಹನಗಳನ್ನು ತಪಾಸಣೆ ಮಾಡುವಾಗ ವಾಹನದ ಡಾಕ್ಯುಮೆಂಟ್ಗಳನ್ನು ಡಿಜಿ ಲಾಕರ್ ಮತ್ತು ಎಂ-ಪರಿವಾಹನ್ ಌಪ್ಗಳ ಮೂಲಕ ಕೇಂದ್ರ ಸರ್ಕಾರ ಬಹಳ ಹಿಂದೆಯೇ ಹೇಳಿದೆ. ಈ ಌಪ್ಗಳಲ್ಲಿ ದಾಖಲೆಗಳನ್ನು ತೋರಿಸಿದರೆ, ‘ನಮ್ಮ ಬೆಂಗಳೂರು’ ಪೊಲೀಸರು ಅದನ್ನು ಮಾನ್ಯ ಮಾಡುತ್ತಿರಲಿಲ್ಲ. ಅವರಿಗೆ ಕಾಗದಗಳನ್ನು ಭೌತಿಕವಾಗಿಯೇ ತೋರಿಸಬೇಕು. ಜನರ ಗಮನಕ್ಕೆ ಈ ಸಂಗತಿ ಬಂದಿರಬಹುದು.
ಆದರೆ. ಇನ್ನು ಮಂದೆ ಈ ಕಿರಿಕಿರಿ ತಪ್ಪಲಿದೆ. ಬೆಂಗಳೂರಿನ ಸಂಚಾರಿ ವಿಭಾಗದ ಹೆಚ್ಚುವರಿ ಆಯುಕ್ತ ರವಿಕಾಂತೇಗೌಡ ಅವರು ಕೇಂದ್ರ ಸರ್ಕಾರದ ಡಿಜಿ ಲಾಕರ್, ಪರಿವಾಹನ್ ಆ್ಯಪ್ ಬಳಸಿ ಡ್ರೈವಿಂಗ್ ಲೈಸೆನ್ಸ್ ಹಾಗೂ ಆರ್ಸಿ ಬುಕ್ ಸೇರಿದಂತೆ ಹಲವು ದಾಖಲೆಗಳನ್ನ ಡಿಜಿ ಲಾಕರ್ನಲ್ಲಿ ತೋರಿಸಬಹುದು ಎಂದು ಗುರುವಾರ ಬೆಂಗಳೂರಿನಲ್ಲಿ ಹೇಳಿದ್ದಾರೆ. ಜನರು ಡಿಜಿ ಲಾಕರ್, ಎಂ-ಪರಿವಾಹನ್ ಆ್ಯಪ್ಗಳನ್ನು ಬಳಸಿ ನಿರ್ಭಯದಿಂದ ತಮ್ಮ ವಾಹನಗಳ ಕಾಗದಪತ್ರಗಳನ್ನು ತೋರಿಸಿಬಹುದೆಂದು ಅವರು ಹೇಳಿರುವುದು ವಾಹನ ಓಡಿಸುವವರಲ್ಲಿ ನಿರಾಳತೆ ಉಂಟು ಮಾಡಿರಲಿಕ್ಕೂ ಸಾಕು.
ಮುಂದಿನ ದಿನಗಳಲ್ಲಿ ಡಾಕ್ಯುಮೆಂಟ್ಗಳನ್ನು ಪೊಲೀಸರಿಗೆ ಭೌತಿಕವಾಗಿ ತೋರಿಸುವ ಅಗತ್ಯವಿಲ್ಲ, ವಿಷಯಕ್ಕೆ ಸಂಬಂಧಿಸಿದಂತೆ ಪೊಲೀಸರಿಗೂ ಸೂಚನೆ ನೀಡಲಾಗಿದೆ, ಭೌತಿಕವಾಗೇ ಅವುಗಳನ್ನು ತೋರಿಸಲು ಒತ್ತಾಯಿಸಿದ್ರೆ ಅವರ ವಿರುದ್ಧ ಕ್ರಮ ಜರುಗಿಸಲಾಗುವುದೆಂದು ರವಿಕಾಂತೇಗೌಡ ಹೇಳಿದ್ದಾರೆ. ವಾಹನ ಚಾಲಕರು ಈ ಆ್ಯಪ್ಗಳ ಸದುಪಯೋಗ ಮಾಡಿಕೊಳ್ಳಬೇಕು ಎಂದು ಅಯುಕ್ತರು ಒತ್ತಾಯಿಸಿದ್ದಾರೆ.
ಇದನ್ನೂ ಓದಿ: DigiLocker: ಡಿಜಿಲಾಕರ್ ಬಳಸಿ ಪಾಸ್ಪೋರ್ಟ್ಗೆ ಅರ್ಜಿ ಸಲ್ಲಿಸಲು ಸುಲಭ ವಿಧಾನ ಇಲ್ಲಿದೆ
