ಚಾಮರಾಜನಗರ: ರಸ್ತೆ, ಬಸ್ ಸಮಸ್ಯೆ ನಡುವೆ ಶಾಲೆಗೆ ಹೋಗಲು ಮಕ್ಕಳಿಗೆ ಚಿರತೆ ಭಯ

ಚಾಮರಾಜನಗರ: ಕೆಲವು ಶಾಲೆಗಳ ಸುತ್ತ ಮುತ್ತ ಬೀದಿ ನಾಯಿಗಳ ಹಾವಳಿ ಹೆಚ್ಚಿರುತ್ತದೆ. ಆದರೆ ಈ ಗಡಿ ಜಿಲ್ಲೆ ಶಾಲೆ ಮಕ್ಕಳಿಗೆ ಕಾಡುತ್ತಿರುವುದು ನಾಯಿಗಳ ಭಯ ಅಲ್ಲ. ಚಿರತೆಗಳಂತಹ ಕಾಡು ಪ್ರಾಣಿಗಳ (Leopard menace) ಭಯ. ಈ ಭಯದ ನಡುವೇವು ಮಕ್ಕಳು ಶಾಲೆಗೆ ಹೋಗುತ್ತಿದ್ದು ಅವರಿಗೆ ಸರಿಯಾದ ರಸ್ತೆ, ಬಸ್ ವ್ಯವಸ್ಥೆ ಕೂಡ ಇಲ್ಲ. ಅದಲ್ಲದೆ ಮಕ್ಕಳು ತಮ್ಮ ಜೀವ ಕೈಯಲ್ಲಿ ಹಿಡಿದು ಕಿಲೋಮೀಟರ್​ಗಳಷ್ಟು ದೂರ ನಡೆದುಕೊಂಡು ಭಯದಲ್ಲಿಯೇ ಶಾಲೆ ಸೇರಬೇಕಿದೆ. ಇದು ಚಾಮರಾಜನಗರದ ಹೊರವಲಯದಲ್ಲಿರುವ ಆದರ್ಶ ವಿದ್ಯಾಲಯದ ಮಕ್ಕಳ ಪರಿಸ್ಥಿತಿ. ಈ ಹಿಂದೆ ಆದರ್ಶ ಶಾಲೆಯ (Adarsha vidyalaya) ಹಿಂಬದಿಯಲ್ಲಿರುವ ಮೆಡಿಕಲ್ ಕಾಲೇಜಿನ ಆವರಣದಲ್ಲಿ ಚಿರತೆ (Leopard spotted) ಕಾಣಿಸಿಕೊಂಡಿದ್ದು, ಬಳಿಕ ಮಕ್ಕಳಲ್ಲಿ ಆತಂಕ, ಭಯ ಹೆಚ್ಚಾಗಿದೆ.

ಪ್ರತಿಭಾನ್ವಿತ ಮಕ್ಕಳಿಗೆ ಉಚಿತ ಹಾಗೂ ಉತ್ತಮ ಶಿಕ್ಷಣ ನೀಡಲೆಂದು ಸರ್ಕಾರ ಆದರ್ಶ ವಿದ್ಯಾಲಯ ತೆರೆದಿದೆ. ಆದರೆ ಚಾಮರಾಜನಗರದ ಹೊರವಲದಲ್ಲಿರುವ ಮಲ್ಲಯ್ಯನ ಪುರ ಗ್ರಾಮದ ಸಮೀಪವಿರುವ ಬೆಟ್ಟದ ತಪ್ಪಲಿನಲ್ಲಿರುವ ಈ ಶಾಲೆಗೆ ಸರಿಯಾದ ಬಸ್ ವ್ಯವಸ್ಥೆ, ರಸ್ತೆ ವ್ಯವಸ್ಥೆ ಇಲ್ಲ. ಸುಮಾರು 400 ಹೆಚ್ಚಿನ ಮಕ್ಕಳು ಈ ಶಾಲೆಗೆ ಪ್ರತಿನಿತ್ಯ ಅಕ್ಕ ಪಕ್ಕದ ಗ್ರಾಮಗಳಿಂದ ಬರುತ್ತಿದ್ದು, ಮಕ್ಕಳಿಗೆ ಕೇವಲ ಎರಡು ಬಸ್​ಗಳು ಮಾತ್ರ ಇದೆ.

ಇದನ್ನೂ ಓದಿ: ಚಿರತೆ ಭೀತಿ: ದೊಣ್ಣೆ ಹಿಡಿದುಕೊಂಡು ಬೆಳೆ ಕಟಾವು ಮಾಡುತ್ತಿರುವ ಗಂಡ-ಹೆಂಡತಿ

ಇರುವ ಎರಡು ಬಸ್​ಗಳು ಕೂಡ ಶಾಲೆಯ ಸಮೀಪ ಹೋಗದೆ ಶಾಲೆಯಿಂದ ಒಂದು ಕಿ.ಮೀ. ದೂರವಿರುವ ಮಲ್ಲಯ್ಯನ ಪುರ ಗ್ರಾಮದ ಸಮೀಪಕ್ಕಷ್ಟೆ ಸೀಮಿತವಾಗಿದೆ. ಅಲ್ಲಿಂದ ಮಕ್ಕಳು ಕಾಲ್ನಡಿಗೆಯಲ್ಲಿ ಶಾಲೆ ಸೇರುವುದು ಅನಿವಾರ್ಯವಾಗಿದೆ. ಹೀಗೆ ಹೋಗುವ ಮಕ್ಕಳು ಚಿರತೆ ಭಯದಿಂದಲೇ ಶಾಲೆಗೆ ಹೋಗುತ್ತಿದ್ದಾರೆ. ಆದ್ದರಿಂದ ಸಂಬಂಧಪಟ್ಟವರು ಮಕ್ಕಳಿಗೆ ಬಸ್, ರಸ್ತೆಗಳಂತಹ ಮೂಲಭೂತ ಸೌಕರ್ಯಗಳನ್ನಾದರೂ ಕಲ್ಪಿಸಿ ಎಂದು ಪೋಷಕರು ಜನಪ್ರತಿನಿಧಿಗಳಲ್ಲಿ ಮತ್ತು ಅಧಿಕಾರಿಗಳಲ್ಲಿ ಮನವಿ ಮಾಡಿಕೊಳ್ಳುತ್ತಿದ್ದಾರೆ.

ಇನ್ನೂ ಚಾಮರಾಜನಗರ ಅಂದರೆ ಅತಿ ಹೆಚ್ಚು ಅರಣ್ಯ ಸಂಪತ್ತು ಹೊಂದಿರುವ ಜಿಲ್ಲೆಯಾಗಿದ್ದು, ಕಾಡುಪ್ರಾಣಿಗಳು ಸಹಜವಾಗಿ ಹೆಚ್ಚಾಗಿಯೇ ಇವೆ. ಅವುಗಳ ಆತಂಕದಲ್ಲಿಯೇ ಜೀವನ ನಡೆಸಲು ಕಷ್ಟ. ಶಾಲಾ ಮಕ್ಕಳು ಕಾಡು ಪ್ರಾಣಿಗಳು ಭಯದಲ್ಲಿಯೇ ಶಾಲೆಗೆ ಹೋಗುತ್ತಿದ್ದಾರೆ. ಬಸ್ ವ್ಯವಸ್ಥೆ ಇಲ್ಲದ ಕಾರಣ ಅದರಲ್ಲಿಯೂ ತುಂಬಾ ಕಷ್ಟ ಪಟ್ಟು ವಿದ್ಯಾರ್ಥಿಗಳು ಬರುತ್ತಿದ್ದು ಒಂದು ಕಿಲೋಮೀಟರ್ ದೂರದಲ್ಲಿಯೇ ಬಸ್ ಇಳಿದು ಶಾಲೆಗೆ ನಡೆದುಕೊಂಡು ಬರಬೇಕಿದೆ. ಭಾರದ ಬ್ಯಾಗ್ ಹೊತ್ತು ಶಾಲೆಗೆ ಹೋಗಲು ಇನ್ನೂ ಕಷ್ಟವಾಗಿತ್ತಿದೆ. ಅಲ್ಲದೇ ಕಳೆದ ಕೆಳ ತಿಂಗಳ ಹಿಂದೆ ಆದರ್ಶ ಶಾಲೆಯ ಹಿಂಬದಿಯಲ್ಲಿರುವ ಮೆಡಿಕಲ್ ಕಾಲೇಜಿನ ಆವರಣದಲ್ಲಿ ಚಿರತೆ ಕಾಣಿಸಿಕೊಂಡಿದ್ದು ಮಕ್ಕಳಿಗೆ ಇನ್ನಷ್ಟು ಭಯ ಹೆಚ್ಚು ಮಾಡಿದೆ. ಆದ್ದರಿಂದ ನಮ್ಮ ಶಾಲೆಗೆ ರಸ್ತೆ ಸಂಪರ್ಕ ಹಾಗೂ ಬಸ್ ವ್ಯವಸ್ಥೆ ಕಲ್ಪಿಸಿ ನಮ್ಮಿಂದ ಭಯ ದೂರ ಮಾಡಿ ಎಂದು ವಿದ್ಯಾರ್ಥಿಗಳು ಹೇಳುತ್ತಿದ್ದಾರೆ.

ಇದನ್ನೂ ಓದಿ: ಬೀದಿನಾಯಿಗಳ ಅಟ್ಟಹಾಸಕ್ಕೆ ನಲುಗಿದ ಬಳ್ಳಾರಿ ಜನರು, ಗಣಿನಾಡಿನ ಆಸ್ಪತ್ರೆಯಲ್ಲೂ ಸಿಗತ್ತಿಲ್ಲ ಚುಚ್ಚುಮದ್ದು!

ಆದರ್ಶ ವಿದ್ಯಾಲಯದ ಕಡೆಗೆ ಎರಡೇ ಬಸ್ ಇದೆ. ಈ ಎರಡು ಬಸ್​ಗಳಲ್ಲಿ ಸುಮಾರು 400 ಮಕ್ಕಳು ಬರಬೇಕು. ಇಷ್ಟೊಂದು ಮಕ್ಕಳು ಎರಡು ಬಸ್​ಗಳನ್ನು ಹೋಗಲು ಸಾಧ್ಯವಿಲ್ಲ. ಇಂತಹ ಸಮಸ್ಯೆ ನಡುವೆ ಇಲ್ಲಿ ಕಾಡು ಪ್ರಾಣಿಗಳ ಭಯ ಇದೆ. ಹೀಗಾಗಿ ಇನ್ನೊಂದು ಎರಡು ಬಸ್​ಗಳ ವ್ಯವಸ್ಥೆಯನ್ನು ಕಲ್ಪಿಸಬೇಕು ಎಂದು ವಿದ್ಯಾರ್ಥಿನಿ ಸಾತ್ವಿಕ ಮನವಿ ಮಾಡಿಕೊಂಡಿದ್ದಾಳೆ.

ಒಟ್ಟಾರೆ ಮಕ್ಕಳು ಪ್ರತಿನಿತ್ಯ ಭಯದಿಂದಲೇ ಶಾಲೆಗೆ ಹೋಗುತ್ತಿದ್ದು ಯಾವ ಸಂದರ್ಭದಲ್ಲಿ ಚಿರತೆಗಳಂತಹ ಕಾಡು ಪ್ರಾಣಿಗಳು ತಮ್ಮ ದಾಳಿ ನಡೆಸುತ್ತವೆ ಎನ್ನುವ ಭಯ ಮಕ್ಕಳಲ್ಲಿ ಕಾಡುತ್ತಲೇ ಇದೆ. ಇನ್ನಾದರೂ ಸಂಬಂಧಪಟ್ಟವರು ಎಚ್ಚೆತ್ತುಕೊಂಡು ಮಕ್ಕಳು ನೆಮ್ಮದಿಯಿಂದ ಶಾಲೆಗೆ ಹೋಗಿ ಬರಲು ಒಳ್ಳೆಯ ವ್ಯವಸ್ಥೆ ಕಲ್ಪಿಸಲಿ ಎನ್ನುವುದೇ ನಮ್ಮ ಆಶಯ.

ವರದಿ: ದಿಲೀಪ್ ಚೌಡಹಳ್ಳಿ, ಟಿವಿ9 ಚಾಮರಾಜನಗರ

ಮತ್ತಷ್ಟು ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ