ಸ್ಕಂದಗಿರಿ ಬೆಟ್ಟದಲ್ಲಿ ಟ್ರಕ್ಕಿಂಗ್‍ಗೆ ಹೋಗಿ ಕಾಲು ಮುರಿದುಕೊಂಡ ಖಾಸಗಿ ಕಂಪನಿ ಉದ್ಯೋಗಿ, ಹೊತ್ತುಕೊಂಡ ಬಂದ ಗೈಡ್‍ಗಳು!

ಚಿಕ್ಕಬಳ್ಳಾಪುರ, ಮಾರ್ಚ್​ 1: ಹೇಳಿ-ಕೇಳಿ ಅದು ಟ್ರಕ್ಕಿಂಗ್‍ಗೆ ಖ್ಯಾತಿಯಾಗಿರುವ ಬೆಟ್ಟ. 1450 ಮೀಟರಿನಷ್ಟು ಎತ್ತರದಲ್ಲಿದೆ. ಆ ಬೆಟ್ಟಕ್ಕೆ ಟ್ರಕ್ಕಿಂಗ್ (Trekking) ಬಂದ ಖಾಸಗೀ ಕಂಪನಿಗಳ ಉದ್ಯೋಗಿಯೋರ್ವ (private company employee) ಬೆಟ್ಟದಲ್ಲಿ ಬಿದ್ದು, ಕಾಲು ಊನ ಮಾಡಿಕೊಂಡಿದ್ದಾನೆ. ನಡೆಯಲಾಗದೇ ಪರದಾಡುತ್ತಿದ್ದ ಕಾರಣ ನೇಚರ್ ಗೈಡ್‍ಗಳು ಗಾಯಾಳುನನ್ನು ಸುಮಾರು 2 ಕೀಲೊ ಮೀಟರ್ ನಷ್ಟು ಬೆಟ್ಟದ ಮೇಲಿನಿಂದ ಹೊತ್ತುಕೊಂಡು ಬಂದ ಪ್ರಸಂಗ ನಡೆದಿದೆ. ಅಷ್ಟಕ್ಕೂ ಅದೆಲ್ಲಿ ಅಂತೀರಾ ಈ ವರದಿ ನೊಡಿ!!

ಗಾಯಗೊಂಡ ಟ್ರಕ್ಕಿಂಗ್​​ ವ್ಯಕ್ತಿಯನ್ನು ಭುಜದ ಮೇಲೆ ಹೊತ್ತುಕೊಂಡು ಹರಸಾಹಸಪಡುತ್ತಾ, ಬೆಟ್ಟದ ಮೇಲಿನಿಂದ ಕೆಳಗಿಳಿಯುತ್ತಿರುವುದು ಚಿಕ್ಕಬಳ್ಳಾಪುರ (Chikkaballapur) ತಾಲ್ಲೂಕಿನ ಕಳವಾರ ಗ್ರಾಮದ ಬಳಿ ಇರುವ ಸ್ಕಂದಗಿರಿ ಬೆಟ್ಟದಲ್ಲಿ (Skandagiri hills). 1450 ಮೀ. ನಷ್ಟು ಎತ್ತರದಲ್ಲಿರುವ ಸ್ಕಂದಗಿರಿ ಬೆಟ್ಟ ಚಾರಣಕ್ಕೆ ಖ್ಯಾತಿ. ಇನ್ನು ಸ್ಕಂದಗಿರಿ ಬೆಟ್ಟದಲ್ಲಿ ಚಾರಣ ಮಾಡಲು ಇಂದು ಶುಕ್ರವಾರ ಬೆಂಗಳೂರು ಮೂಲದ ಖಾಸಗೀ ಕಂಪನಿಯ ಉದ್ಯೋಗಿ ರವೀಶ್ ಹಾಗೂ 8 ಜನರ ತಂಡ ಆಗಮಿಸಿತ್ತು. ಅತ್ಯುತ್ಸಾಹದಿಂದ ಬೆಟ್ಟ ಹತ್ತಿದ್ದ ರವೀಶ್, ಬೆಟ್ಟದಲ್ಲಿ ಕಾಲುಜಾರಿ ಬಿದ್ದು, ಕಾಲು ಮುರಿದುಕೊಂಡಿದ್ದ. ಇದರಿಂದ ಬೆಟ್ಟದಿಂದ ಕೆಳಗಿಳಿಯಲಾಗದೇ ನರಳುತ್ತಿದ್ದ ಕಾರಣ ಅರಣ್ಯ ಇಲಾಖೆಯ ನೇಚರ್ ಗೈಡ್ಸ್ ರವೀಶ್‍ನನ್ನು ಹೊತ್ತುಕೊಂಡು ಬೆಟ್ಟ ಇಳಿದ ಪ್ರಸಂಗ ನಡೆಯಿತು.

Also Read: ಬೆಂಗಳೂರು ಮತ್ತು ಅಂಕೋರ್ ವಾಟ್ ದೇವಾಲಯವಿರುವ ಕಾಂಬೋಡಿಯಾಕ್ಕೆ ಶೀಘ್ರವೇ ಬೇಕಿದೆ ನೇರ ವಿಮಾನ ಸಂಪರ್ಕ, ಕಾರಣಗಳು ಹೀಗಿವೆ

ಇನ್ನು ಸ್ಕಂದಗಿರಿ ಬೆಟ್ಟದಲ್ಲಿ ಹತ್ತಿಳಿಯುವುದಕ್ಕೆ ಮೆಟ್ಟಿಲು ಇಲ್ಲವೇ ರಸ್ತೆಯಾಗಲೀ ಇಲ್ಲ. ಕಲ್ಲು ಗುಡ್ಡ, ಬಂಡೆ, ಮರಗಳ ಮದ್ಯೆ ದಾರಿ ಮಾಡಿಕೊಂಡು ಹತ್ತಿ ಇಳಿಯಬೇಕು. ಇಂತಹದರಲ್ಲಿ ಅರಣ್ಯ ಇಲಾಖೆಯ ನೇಚರ್ ಗೈಡ್ಸ್ ಮಾನವೀಯತೆಯಿಂದ ಗಾಯಾಳು ಚಾರಣಿಗನನ್ನು ಹೊತ್ತುಕೊಂಡು ಕೆಳಗೆ ಬಂದದ್ದು ಸಾಹಸವೇ ಸರಿ.

ಇನ್ನು ಸ್ಕಂದಗಿರಿ ಚಾರಣಕ್ಕೆ ಬರುವ ಚಾರಣಿಗರಿಂದ ಪ್ರವೇಶ ಶುಲ್ಕವಾಗಿ ರೂ. 300/- ರಿಂದ 600/-ಗಳನ್ನು ತಲಾ ಒಬ್ಬರಿಗೆ ಹಣ ವಸೂಲಿ ಮಾಡಲಾಗುತ್ತಿದೆ. ಆದರೆ ಈ ರೀತಿಯ ಅವಘಡ, ಅಪಘಾತಗಳು ಆದಾಗ ವೈದ್ಯಕೀಯ ಸೌಲಭ್ಯಗಳಾಗಲೀ, ಕನಿಷ್ಠ ಅಂಬ್ಯುಲೆನ್ಸ್ ವ್ಯವಸ್ಥೆಯಾಗಲೀ ಇಲ್ಲ. ಸ್ಕಂದಗಿರಿ ಬೆಟ್ಟದಲ್ಲಿ ಸ್ವಲ್ಪ ಯಡುವಟ್ಟುಗಳಾದರೆ ಗೈಡ್‍ಗಳು ಕಾಪಾಡಬೇಕು, ಇಲ್ಲವೇ ದೇವರೇ ಕಾಪಾಡಬೇಕು.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 5:11 pm, Fri, 1 March 24