ಶಾಸಕ ಗೂಳಿಹಟ್ಟಿ ಶೇಖರ್​ಗೆ ಸೇರಿದ 8 ಕೋಟಿ ಮೌಲ್ಯದ ಸೈಟ್​ ಅನ್ಯರ ಪಾಲು, 8 ಜನರ ವಿರುದ್ಧ ಎಫ್​ಐಆರ್

ಬೆಂಗಳೂರು: ಸಿಲಿಕಾನ್ ಸಿಟಿಯಂತಹ ದೊಡ್ಡ ನಗರದಲ್ಲಿ ಭೂಗಳ್ಳರು ಬಡವರ ಸೈಟ್​ಗಳನ್ನು ಕಂಡ ಕಂಡವರಿಗೆ ಮಾರಾಟ ಮಾಡಿ, ಮೋಸ ಮಾಡೋದು ಸಾಮಾನ್ಯವಾಗಿದೆ. ಬೆಂಗಳೂರಿನಲ್ಲಿ ನಕಲಿ ದಾಖಲೆ ಸೃಷ್ಟಿ ಮಾಡೋದು ಎಲ್ಲರಿಗೂ ತಿಳಿದಿರುವ ವಿಚಾರ. ಆದ್ರೀಗ, ರಾಜ್ಯದ ಶಾಸಕರುಗಳಿಗೆ ಮಂಜೂರಾದ ನಿವೇಶನಗಳನ್ನೂ ಭೂಗಳ್ಳರು ಬಿಟ್ಟಿಲ್ಲ. ನಕಲಿ ದಾಖಲೆ‌ ಸೃಷ್ಟಿಸಿ ತಮ್ಮ ಹೆಸರಿಗೆ ಖಾತೆ ಮಾಡಿಸಿಕೊಂಡಿದ್ದಾರೆ. ಶಾಸಕ ಗೂಳಿಹಟ್ಟಿ ಶೇಖರ್(Goolihatti Shekar) ಅವರಿಗೆ ಇಂತಹ ಮಹಾ ಮೋಸವಾಗಿದ್ದು ಈ ಸಂಬಂಧ 8 ಜನರ ವಿರುದ್ಧ ಎಫ್​ಐಆರ್ ದಾಖಲಾಗಿದೆ.

ಬೆಂಗಳೂರು.. ಇಲ್ಲಿ‌ ಒಂದಿಡಿ ಜಾಗಕ್ಕೂ ಚಿನ್ನದ ಬೆಲೆಯಿದೆ ಇಂತಹ ಚಿನ್ನದ ಬೆಲೆಯ ಭೂಮಿಯನ್ನ ಎಗರಿಸಲು ಭೂಗಳ್ಳರು ಸಾಲು ಸಾಲು ನಿಂತಿದ್ದಾರೆ. ಅದೇಷ್ಟೋ ಜನರ ಸೈಟ್ ಗಳನ್ನ ಯಾರಿಗೂ ತಿಳಿಯದೆ ಕಂಡವರಿಗೆ ಸೇಲ್ ಮಾಡಿದುಂಟು. ಅಂತಹದೆ ಒಂದು ಅನುಭವ ಎಂಎಲ್​ಎಗಳಿಗೂ ಆಗಿದೆ. ಹೊಸದುರ್ಗ ಕ್ಷೇತ್ರದ ಶಾಸಕ ಗೂಳಿಹಟ್ಟಿ ಶೇಖರ್ ಅವರಿಗೆ ಮಂಜೂರಾಗಿದ್ದ ಬಿಡಿಎ ಜಿ ಕೆಟಗರಿ ಸೈಟ್ ನ ಭೂಗಳ್ಳರು ನಕಲಿ ದಾಖಲೆ ಸೃಷ್ಟಿಸಿ ತಮ್ಮ ಹೆಸರಿಗೆ ಖಾತೆ ಮಾಡಿಸಿಕೊಂಡಿದ್ದಾರೆ. ನಕಲಿ ದಾಖಲೆಗಳ ಆಧಾರದ ಮೇಲೆ ಬ್ಯಾಟರಾಯನಪುರ ಸಬ್ ರಿಜಿಸ್ಟರ್ ಆಫೀಸ್ ನಲ್ಲಿ ನೋಂದಣಿ ಮಾಡಿಸಿಕೊಟ್ಟಿದ್ದಾರೆ.

ಶಾಸಕ ಗೂಳಿಹಟ್ಟಿ ಶೇಖರ್ ಗೆ ಬಿಡಿಎ 50*80 ವಿಸ್ತೀರ್ಣದ ಜಿ ಕೆಟಗೇರಿ ಸೈಟ್ ಮಂಜೂರಾಗಿತ್ತು. ಲೊಟ್ಟೆಗೊಲ್ಲಹಳ್ಳಿ ಅಂದ್ರೆ ಸಂಜಯನಗರದ ಆರ್ ಎಂವಿ 2 ಸ್ಟೇ ನಲ್ಲಿ ನಿವೇಶನ ಸಂಖ್ಯೆ 3 ಹಂಚಿಕೆ ಆಗಿತ್ತು. ಇದಕ್ಕೆ ಬೇಕಾದ ಬಿಡಿಎ ಸಂಪೂರ್ಣ ದಾಖಲೆಗಳು ಶಾಸಕರ ಬಳಿಯಿತ್ತು. ಸದ್ಯ ಮಾರ್ಕೆಟ್ ಬೆಲೆ ಪ್ರಕಾರ ಹತ್ತತ್ರಾ 7-8 ಕೋಟಿ ಬೆಲೆಯ ಸೈಟು. ಇಂತಹ ಸೈಟ್ ನ ರಾಮಮೂರ್ತಿ ಅಲಿಯಾಸ್ ಮಣಿವನನ್, ಅನುರಾಧಾ, ದೀಪಿಕಾ ಸೇರಿದಂತೆ 10 ಜನ ಡೆವಲಪರ್ಸ್ ಹಾಗೂ ಬಿಲ್ಡರ್ಸ್ ಹಾಗೂ ಇನ್ನಿತರು ಸೇರಿಕೊಂಡು ನಕಲಿ ದಾಖಲೆ ಸೃಷ್ಟಿಸಿ ಬ್ಯಾಟರಾಯನಪುರ ಸಬ್ ರಿಜಿಸ್ಟರ್ ಕಚೇರಿಯಲ್ಲಿ ನೋಂದಣಿ ಮಾಡ್ಕೊಂಡಿದ್ದಾರೆ. ಅಷ್ಟೇ ಅಲ್ಲದೆ ಶಾಸಕ ಗೊಳ್ಳಿಹಟ್ಟಿ ಶೇಖರ್ ಗೆ ಸೇರಿದ ಜಾಗವಕ್ಕೆ ಬೇಲಿ ಕೂಡಾ ಹಾಕಿದ್ರಂತೆ. ಈ ಬಗ್ಗೆ ಶಾಸಕರಿಗೆ ಮಾಹಿತಿ ಬರ್ತಿದ್ದಂಗೆ ಕಳೆದ ತಿಂಗಳು ಸಂಜಯನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಪೊಲೀಸ್ ಠಾಣೆ ಯಲ್ಲಿ ಐಪಿಸಿ ಸೆಕ್ಷನ್ 420,465,468,471 ಸೇರಿದಂತೆ ಇತರೆ ಸೆಕ್ಷನ್ ಅಡಿ ಎಫ್​ಐಆರ್ ದಾಖಲಾಗಿದೆ. ಶಾಸಕರಿಗೆ ಮಂಜೂರಾಗಿದ್ದ ಸೈಟ್ ನ ಶಾಸಕರಿಗೆ ಗೊತ್ತಿಲ್ಲದೆ ನಕಲಿ ದಾಖಲೆಗಳ ಆಧಾರದ ಮೇಲೆ ಕಂಡವರಿಗೆ ಸಬ್ ರಿಜಿಸ್ಟರ್ ನೊಂದಣಿ ಮಾಡಿಕೊಟ್ಟಿದ್ದಾರಂತೆ

ಇದನ್ನೂ ಓದಿ: ಅತ್ತ ಮೋದಿ ಬಿಗ್ ಗಿಫ್ಟ್, ಇತ್ತ ಮಲೆನಾಡಿಗೆ ದೊಡ್ಡ ನಿರಾಸೆ: ದಶಕಗಳ ಸಮಸ್ಯೆಗೆ ಸಿಗದ ಪರಿಹಾರ

ಇನ್ನೂ ಶಾಸಕ ಗೊಳಿಹಟ್ಟಿ ಶೇಖರ್ ಅವರು ನೀಡಿರುವ ದೂರಿನಲ್ಲಿ ಬೆಳಗಾವಿ ಶಾಸಕ ಅಭಯ್ ಪಾಟೀಲ್ ಅವರ ನಿವೇಶನ ಬಗ್ಗೆನೂ ಉಲ್ಲೇಖ ಮಾಡಲಾಗಿದೆ. ಶಾಸಕ ಅಭಯ್ ಪಾಟೀಲ್ ಅವರಿಗೆ ಮಂಜೂರ್ ಆಗಿರುವ ನಿವೇಶನವನ್ನು ಯಾರೋ ಗುಪ್ತಾ ಅನ್ನೋರು ಸೈಟ್ ನಮ್ಮದು ಅಂತಾ ಕಾಂಪೌಂಡ್ ಹಾಕಿದ್ದಾರಂತೆ. ಸದ್ಯ ನಕಲಿ‌ ದಾಖಲೆ ಆಧಾರದ ಮೇಲೆ ಶಾಸಕರ ಸೈಟ್ ನ ಖಾಸಗಿ ವ್ಯಕ್ತಿ ಹೆಸರಿಗೆ ನೋಂದಣಿ ಮಾಡಿಕೊಟ್ಟ ಅಧಿಕಾರಿಗಳ ವಿರುದ್ಧ ಇಲಾಖಾ ತನಿಖೆ ಶುರುವಾಗಿದೆಯಂತೆ. ಸಚಿವ ಅಶೋಕ್ ಅವರ ನಿರ್ದೇಶನದ ಮೇರೆಗೆ ತನಿಖೆ ಶುರುವಾಗಿದೆಯಂತೆ.

ಶಾಸಕರ ಸೈಟ್ ಗಳನ್ನೇ ನಕಲಿ ದಾಖಲೆ ಸೃಷ್ಟಿಮಾಡಿ ಎಗರಿಸುವ ಖದೀಮರ ತಂಡಗಳು ಎಂಟ್ರಿಯಾಗಿದ್ದು ಸದ್ಯ ಶಾಸಕರ ದೂರಿನ ಆಧಾರದ ಮೇಲೆ‌ ಕೆಲ ಬಿಲ್ಡರ್​ಗಳನ್ನ ಪೊಲೀಸ್ರು ಅರೆಸ್ಟ್ ಮಾಡಿದ್ದಾರೆ ಎನ್ನಲಾಗ್ತಿದೆ. ಆದರೆ ನಕಲಿ ದಾಖಲೆಗಳ ಆಧಾರದ ಮೇಲೆ ಹೇಗೆ ನೊಂದಣಿ ಮಾಡಿಕೊಟ್ರು ಎನ್ನುವ ಪ್ರಶ್ನೆ ಕಾಡ್ತಿದೆ.

ವರದಿ: ಮುತ್ತಪ್ಪ ಲಮಾಣಿ, ಟಿವಿ9 ಬೆಂಗಳೂರು

ಪ್ರಮುಖ ಸುದ್ದಿಗಳನ್ನು ಓದಲು ಇದರ ಮೇಲೆ ಕ್ಲಿಕ್ ಮಾಡಿ

Published On - 10:07 am, Fri, 20 January 23