ಲಾಕ್​ಡೌನ್ ಸಮಯದಲ್ಲಿ ಸರ್ಕಾರದ ಜಮೀನು ಪ್ರಭಾವಿಗಳ ಪಾಲು, ಗ್ರಾಮಸ್ಥರ ಆಕ್ರೋಶ

ದಾವಣಗೆರೆ: ಕೊರೊನಾ ಸೋಂಕಿನ ಭಯದಿಂದ ಜನ ಮನೆ ಬಿಟ್ಟು ಹೊರಗೆ ಬರುತ್ತಿಲ್ಲ. ಇಂತಹ ಪರಿಸ್ಥಿತಿಯಲ್ಲಿದ್ದರು ಕೆಲವರು ಮಾಡಬಾರದ ಕಿತಾಪತಿ ಮಾಡಿದ್ದಾರೆ. ಅದು ಅಂತಹ ಇಂತಹ ಕಿತಾಪತಿ ಅಲ್ಲ. ತಲೆತಲಾಂತರಗಳವರೆಗೂ ಮಕ್ಕಳು, ಮರಿ ಮೊಮ್ಮಕ್ಕಳು ಕುಳಿತು ತಿನ್ನುವಂತೆ ಆಸ್ತಿ ಮಾಡಿದ್ದಾರೆ. ಅರೇ ಏನಿದು ಲಾಕ್​ಡೌನ್​ನಿಂದ ಜನ ತುತ್ತು ಅನ್ನಕ್ಕೂ ಪರದಾಡುತ್ತಿದ್ರೆ ಇಲ್ಲಿ ಯಾರೂ ಆಸ್ತಿ ಮಾಡಿದ್ದಾರಲ್ಲ. ಅದು ಹೇಗೆ? ಅಂತ ಯೋಚಿಸ್ತಿದ್ದೀರಾ..

ಇದು ಬಳ್ಳಾರಿ ಜಿಲ್ಲೆಯ ಹರಪನಹಳ್ಳಿ ತಾಲೂಕಿನ ಮಳ್ಳಿಕಟ್ಟೆ ಹಾಗೂ ನಾರಾಯಣಪುರ ಗ್ರಾಮ ವ್ಯಾಪ್ತಿಯ ಸರ್ವೇ ನಂಬರ್​ಗಳಲ್ಲಿ ಸುಮಾರು ಎರಡು ಸಾವಿರ ಎಕರೆ ಸರ್ಕಾರದ ಜಮೀನು ಇತ್ತು. ಇದನ್ನ ಲಾಕ್​ಡೌನ್ ವೇಳೆ ಹತ್ತು ಜನ ಪ್ರಭಾವಿಗಳು ಬೇಸಾಯ ಮಾಡಿ ತಾವೇ ಇಲ್ಲಿ ನೂರಾರು ವರ್ಷಗಳಿಂದ ಉಳಿಮೆ ಮಾಡುತ್ತಿದ್ದೇವೆ ಎಂದು ಹೇಳಿಕೊಂಡಿದ್ದಾರೆ.

ಪ್ರಭಾವಿಗಳ ವಿರುದ್ಧ ಗ್ರಾಮಸ್ಥರ ಆಕ್ರೋಶ:
ಈ ವಿಚಾರ ಜಿಲ್ಲಾಡಳಿತಕ್ಕೆ ಗೊತ್ತಾಗಿದೆ. ಅಲ್ಲದೆ ಇದೇ ಗ್ರಾಮದ ನೂರಾರು ಜನರು ಇವರು ವಿರುದ್ಧ ಹೋರಾಟಕ್ಕೆ ಇಳಿದಿದ್ದಾರೆ. ಪ್ರಭಾವಿಗಳು ಸರ್ಕಾರದ ಜಮೀನನ್ನು ಅಕ್ರಮಿಸಿಕೊಂಡಿದ್ದಾರೆ. ಈ ಜಮೀನಿನಲ್ಲಿ ಗಿಡ ಮರಗಳಿದ್ದವು. ಇವುಗಳನ್ನ ತೆರವು ಗೊಳಿಸಿದ್ದಾರೆ ಎಂದು ಪ್ರತಿಭಟನೆ ಮಾಡಿದ್ದಾರೆ.

ಇದು ತಿಳಿಯುತ್ತಿದ್ದಂತೆ ತಕ್ಷಣವೇ ಎಚ್ಚೆತ್ತುಕೊಂಡ ಬಳ್ಳಾರಿ ಜಿಲ್ಲಾಡಳಿತ, ಹಂಪಿ ಅಭಿವೃದ್ದಿ ಪ್ರಾಧಿಕಾರದ ಆಯುಕ್ತ ಲೋಕೇಶ್ ಎಂಬುವವರನ್ನ ಈ ಪ್ರಕರಣದ ವಿಚಾರಣೆಗೆ ನೇಮಕ ಮಾಡಿದೆ. ಹರಪನಹಳ್ಳಿ ತಹಶೀಲ್ದಾರ್ ಡಾ.ನಾಗವೇಣಿ ಹಾಗೂ ಡಿಎಸ್ಪಿ ಮಲ್ಲೇಶ್ ದೊಡ್ಡಮನಿ ಸೇರಿ ಹಿರಿಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿದ್ದಾರೆ. ಆ ಹತ್ತು ಜನ ಪ್ರಭಾವಿಗಳ ಮೇಲೆ ಹರಪನಹಳ್ಳಿ ಪೊಲೀಸ್ ಠಾಣೆಯಲ್ಲಿ ಕ್ರಿಮಿನಲ್ ಕೇಸ್ ದಾಖಲಿಸಲಾಗಿದೆ. ಸರ್ಕಾರದ ಭೂಮಿ ಬಿಟ್ಟು ಕೊಡಲು ಸಿದ್ಧರಿಲ್ಲದ ಪ್ರಭಾವಿಗಳು ಕೋರ್ಟ್ ಮೆಟ್ಟಿಲೇರಳು ಮುಂದಾಗಿದ್ದಾರೆ. ಇವರಿಗೆ ಇನ್ನಷ್ಟು ಪ್ರಭಾವಿಗಳ ಬೆಂಬಲವಿದೆ ಎಂಬ ವದಂತಿಗಳು ಕೂಡಾ ಕೇಳಿ ಬರುತ್ತಿವೆ.