Elderline: ವಯೋವೃದ್ಧರೇ ಗಮನಿಸಿ, ನಿಮಗಾಗಿಯೇ ಇದೆ ಉಚಿತ ಸಹಾಯವಾಣಿ 14567
ಕೊವಿಡ್ ಲಾಕ್ಡೌನ್ನಿಂದ ಆರೋಗ್ಯದಲ್ಲಿ ಬದಲಾವಣೆ ಅಥವಾ ತೊಂದರೆ, ಔಷಧದ ಕುರಿತು ಮಾಹಿತಿ ಇಲ್ಲದೇ, ಮನೆಯಿಂದ ಹೊರಬೀಳಲೂ ಸಾಧ್ಯವಿಲ್ಲದೇ ಇದ್ದಂತಹ ವಯೋವೃದ್ಧರ ಪಾಲಿಗೆ 14567 ಸಹಾಯವಾಣಿ ಅತ್ಯಂತ ಉಪಯೋಗಕಾರಿಯಾಗುವುದಂತೂ ಖಚಿತ.
Updated on: May 18, 2021 | 6:50 AM
ದೇಶದಲ್ಲಿ ಕೊವಿಡ್ ಸೋಂಕು ತೀವ್ರವಾಗಿ ಹೆಚ್ಚಳವಾಗುತ್ತಿರುವ ಹೊತ್ತಲ್ಲೇ ಕೇಂದ್ರ ಸರ್ಕಾರ ವಯೋವೃದ್ಧರ ಸಹಾಯಕ್ಕಾಗಿ ವಿಶೇಷ ಸಹಾಯವಾಣಿ ಆರಂಭಿಸಿದೆ. ಕೊವಿಡ್ ಆಸ್ಪತ್ರೆ, ಬೆಡ್, ಆಕ್ಸಿಜನ್, ಊಟ, ಮಾಹಿತಿ ಸೇರಿದಂತೆ ಅಗತ್ಯ ಮಾಹಿತಿ ಒದಗಿಸಲು ಉಚಿತ ಸಹಾಯವಾಣಿ ಆರಂಭಿಸಲಾಗಿದೆ. ವಯೋವೃದ್ಧರು ಬೆಳಗ್ಗೆ 9:30ರಿಂದ ಸಂಜೆ 5:30ರ ಒಳಗೆ 14567 ಕ್ಕೆ ಕರೆ ಮಾಡಿದರೆ ಅಗತ್ಯ ಇರುವ ಮಾಹಿತಿಯನ್ನು ಸಿಬ್ಬಂದಿ ದೂರವಾಣಿ ಮೂಲಕವೇ ಒದಗಿಸಲಿದ್ದಾರೆ.
ವಯೋವೃದ್ಧರಿಗೆ ವೈದ್ಯಕೀಯ ತುರ್ತು ಅಗತ್ಯಗಳಿದ್ದಲ್ಲಿ, ಕಾನೂನು ಸೇವೆ, ಆಸ್ತಿ ಮೋಸ, ಮಕ್ಕಳಿಗೆ ಆಸ್ತಿ ಹಂಚಿಕೆಯಂತಹ ಮಾಹಿತಿಯನ್ನೂ ಸೇರಿ ಯಾವುದೇ ಬಗೆಯ ಮಾಹಿತಿಯನ್ನು ಸಹ ಪರಿಣಿತರು ತಿಳಿಸಿಕೊಡಲಿದ್ದಾರೆ. ಮಾಹಿತಿಯೊಂದೇ ಅಲ್ಲದೇ, ಯಾವುದೇ ವಯೋವೃದ್ಧರಿಗೆ ನೇರವಾಗಿ ಸಹಾಯ ಅಗತ್ಯ ಇದ್ದಲ್ಲಿ ಫೀಲ್ಡ್ ರೆಸ್ಪಾನ್ಸ್ ಅಧಿಕಾರಿಗಳು ವಯೋವೃದ್ಧರ ನೆರವಿಗೆ ಧಾವಿಸಲಿದ್ದಾರೆ. ಕೇಂದ್ರ ಸರ್ಕಾರದ ಜತೆ ನೈಟಿಂಗೇಲ್ಸ್ ಮೆಡಿಕಲ್ ಟ್ರಸ್ಟ್ ಸಹಯೋಗದಲ್ಲಿ ಈ ಸಹಾಯವಾಣಿ ಕಾರ್ಯನಿರ್ವಹಿಸಿದೆ. ಸದ್ಯ ಪ್ರಾಯೋಗಿಕವಾಗಿ ಈ ಸಹಾಯವಾಣಿಯನ್ನು ಆರಂಭಿಸಲಾಗಿದ್ದು, ಮುಂದಿನ ಕೆಲವೇ ದಿನಗಳಲ್ಲಿ ಈ ಸಹಾಯವಾಣಿ ಸಂಪೂರ್ಣವಾಗಿ ಕಾರ್ಯನಿರ್ವಹಿಸಲಿದೆ.
ಕೊವಿಡ್ ಲಾಕ್ಡೌನ್ನಿಂದ ಆರೋಗ್ಯದಲ್ಲಿ ಬದಲಾವಣೆ ಅಥವಾ ತೊಂದರೆ, ಔಷಧದ ಕುರಿತು ಮಾಹಿತಿ ಇಲ್ಲದೇ, ಮನೆಯಿಂದ ಹೊರಬೀಳಲೂ ಸಾಧ್ಯವಿಲ್ಲದೇ ಇದ್ದಂತಹ ವಯೋವೃದ್ಧರ ಪಾಲಿಗೆ 14567 ಸಹಾಯವಾಣಿ ಅತ್ಯಂತ ಉಪಯೋಗಕಾರಿಯಾಗುವುದಂತೂ ಖಚಿತ.
ಇದನ್ನೂ ಓದಿ: ಬೆಂಗಳೂರು ದಕ್ಷಿಣ ಭಾಗದವರು ಆಕ್ಸಿಜನ್ ಬೇಕಿದ್ದಲ್ಲಿ 080- 61914960ಕ್ಕೆ ಕರೆ ಮಾಡಿ: ಸಂಸದ ತೇಜಸ್ವಿ ಸೂರ್ಯ
(Elderline helpline 14567 started by centre govt)
