Kolar News: ಲಾಕ್​ಡೌನ್​ನಿಂದಾಗಿ ಅಬಕಾರಿ ಇಲಾಖೆಗೆ ನಷ್ಟ; ಮದ್ಯ ಮಾರಾಟದಲ್ಲಿ ಕುಸಿತ

ಕೋಲಾರ: ಕೊರೊನಾ ಎರಡನೇ ಅಲೆಯ ತೀವ್ರತೆಯನ್ನು ಕಡಿಮೆ ಮಾಡಲು ಲಾಕ್​ಡೌನ್​ ಜಾರಿಗೆ ತರಲಾಗಿತ್ತು. ಆದರೆ ಕೊರೊನಾ ಮೊದಲ ಅಲೆಯಲ್ಲಿ ಆದ ನಷ್ಟವನ್ನು ಅರಿತ ರಾಜ್ಯ ಸರ್ಕಾರ ಈ ಬಾರಿಯ ಲಾಕ್​ಡೌನ್​ ಸಂದರ್ಭದಲ್ಲಿ ಮದ್ಯ ಮಾರಾಟಕ್ಕೆ ಅವಕಾಶ ನೀಡಿತ್ತು. ಆದರೆ ಈ ಬಾರಿ ಮದ್ಯ ಮಾರಾಟಕ್ಕೆ ಅವಕಾಶ ಕೊಟ್ಟರೂ ಮೇ ಮತ್ತು ಜೂನ್​ ತಿಂಗಳ ಲಾಕ್​ಡೌನ್ ಅವಧಿಯಲ್ಲಿ ಅಬಕಾರಿ ಇಲಾಖೆಗೆ ಸಾಕಷ್ಟು ನಷ್ಟವಾಗಿದೆ. ಅಬಕಾರಿ ಇಲಾಖೆಯ ಪ್ರಕಾರ ಮೇ ತಿಂಗಳ ಮದ್ಯ ಮಾರಾಟದಲ್ಲಿ ಶೇಕಡಾ 35 ರಷ್ಟು ನಷ್ಟವಾಗಿದ್ದರೆ, ಜೂನ್​ ತಿಂಗಳಲ್ಲಿ ಶೇಕಡಾ 15 ರಷ್ಟು ಮದ್ಯ ಮಾರಾಟದಲ್ಲಿ ಕುಸಿತ ಕಂಡು ಬಂದಿದೆ.

ಲಾಕ್​ಡೌನ್​ಗೆ ಮೊದಲು ತಿಂಗಳಿಗೆ ಸುಮಾರು 1,90,000 ಬಾಕ್ಸ್​ ಮದ್ಯ ಮಾರಾಟವಾಗಿತ್ತು. ಆದರೆ ಮೇ ನಲ್ಲಿ ಕೇವಲ 1,30,000 ಬಾಕ್ಸ್​, ಹಾಗೂ ಜೂನ್​ನಲ್ಲಿ 1,75,000 ಬಾಕ್ಸ್​ ಮದ್ಯ ಮಾರಾಟವಾಗಿದೆ. ಇದಕ್ಕೆ ಜನರಿಗೆ ಸಮಯಕ್ಕೆ ಸರಿಯಾಗಿ ಮದ್ಯ ಸಿಗದಿರುವುದು ಒಂದು ಕಾರಣವಾದರೆ, ಜನರಿಗೆ ಕೆಲಸವಿಲ್ಲದೆ ಕುಡಿಯಲು ಹಣ ಸಿಗದೆ ಇರುವುದು ಒಂದು ಕಾರಣ ಆಗಿದೆ ಎಂದು ಅಬಕಾರಿ ಡಿಸಿ ರವಿಶಂಕರ್​ ತಿಳಿಸಿದ್ದಾರೆ.

ಎರಡು ತಿಂಗಳ ಲಾಕ್​ಡೌನ್​ ಅವಧಿಯಲ್ಲಿ ಮದ್ಯ ಮಾರಾಟ ಕುಸಿದಿದೆ ಎನ್ನುವುದು ಒಂದು ವಿಚಾರವಾದರೆ ಈ ಅವಧಿಯಲ್ಲಿ ಮದ್ಯವನ್ನು ಎಂಆರ್​ಪಿ ಬೆಲೆಗಿಂತ ಹೆಚ್ಚಿನ ಬೆಲೆಗೆ ಮಾರಾಟ ಮಾಡಿರುವುದು ಕಂಡು ಬಂದಿದೆ. ಅಷ್ಟೇ ಅಲ್ಲ ಅಕ್ರಮ ಮದ್ಯ ಸಾಗಾಟ, ಸಾರ್ವಜನಿಕ ಸ್ಥಳಗಳಲ್ಲಿ ಮದ್ಯ ಸೇವನೆ, ಪ್ರಕರಣಗಳು ಈ ಅವಧಿಯಲ್ಲಿ ಹೆಚ್ಚಾಗಿವೆ.

ಮೇ ಮತ್ತು ಜೂನ್​​ ತಿಂಗಳಲ್ಲಿ ಕೋಲಾರ ಜಿಲ್ಲೆಯಲ್ಲಿ ಅಧಿಕ ಬೆಲೆಗೆ ಮದ್ಯ ಮಾರಾಟ ಮಾಡಿದ ಹಿನ್ನೆಲೆ 109 ಪ್ರಕರಣ ದಾಖಲು ಮಾಡಿದ್ದಾರೆ. ಅಕ್ರಮ ಮದ್ಯ ಸಾಗಾಟಕ್ಕೆ ಸಂಬಂಧಿಸಿದಂತೆ 22 ಪ್ರಕರಣ ದಾಖಲು ಮಾಡಿ 1445 ಲೀಟರ್ ಮದ್ಯ, 195 ಲೀಟರ್ ಬಿಯರ್​ ಹಾಗೂ ಅದಕ್ಕೆ ಸಂಬಂಧಿಸಿದಂತೆ 15 ವಾಹನಗಳನ್ನು ಜಪ್ತಿ ಮಾಡಿದ್ದಾರೆ. ಇನ್ನು ನಿಯಮ ಉಲ್ಲಂಘನೆ ಮಾಡಿದ 54 ಸನ್ನದುಗಳ ಮೇಲೆ ಪ್ರಕರಣ ದಾಖಲು ಮಾಡಲಾಗಿದೆ ಎಂದು ಅಬಕಾರಿ ಡಿಸಿ ರವಿಶಂಕರ್​ ಹೇಳಿದ್ದಾರೆ.

ಅಲ್ಲದೆ 3 ಸನ್ನದುಗಳನ್ನು ಅಮಾನತು ಮಾಡಲಾಗಿದ್ದು, ಲಾಕ್​ಡೌನ್​ ಸಂದರ್ಭದಲ್ಲಿ ಸಾರ್ವಜನಿಕ ಸ್ಥಳಗಳಲ್ಲಿ ಮದ್ಯ ಸೇವನೆ ಮಾಡಿರುವವರ ಮೇಲೆ 125 ಪ್ರಕರಣಗಳನ್ನು ದಾಖಲು ಮಾಡಿ 145 ಜನರನ್ನು ದಸ್ತಗಿರಿ ಮಾಡಲಾಗಿದೆ. ಈ ಮೂಲಕ ಲಾಕ್​ಡೌನ್​ ಸಂದರ್ಭದಲ್ಲಿ ಮದ್ಯ ಮಾರಾಟ ಕುಸಿತದ ಜತೆಗೆ ಅಕ್ರಮಗಳು ಕೂಡಾ ಹೆಚ್ಚಾಗಿವೆ ಎಂದು ಅಬಕಾರಿ ಡಿಸಿ ರವಿಶಂಕರ್​ ತಿಳಿಸಿದ್ದಾರೆ.

ಇದನ್ನೂ ಓದಿ:

ಬಾಗಲಕೋಟೆಯಲ್ಲಿ ಮದ್ಯದಂಗಡಿ ಆರಂಭಕ್ಕೆ ವಿರೋಧ; ಡಿಸಿ ಕಚೇರಿ ಎದುರು ಮಹಿಳೆಯರಿಂದ ಪ್ರತಿಭಟನೆ

ರಾಯಚೂರಿನಲ್ಲಿ ಅಕ್ರಮ ಮದ್ಯ ಮಾರಾಟ ತಡೆಯಲು ಆಗ್ರಹಿಸಿ ಮಹಿಳೆಯರ ಪ್ರತಿಭಟನೆ