ಬೆಂಗಳೂರಿನಿಂದ ಮುಂಬೈ, ಹಿಮಾಚಲವರೆಗೂ ನಕಲಿ ಔಷಧ ಜಾಲ! ಕ್ಯಾನ್ಸರ್ ಚಿಕಿತ್ಸೆಯ ದುಬಾರಿ ಔಷಧಗಳೇ ಟಾರ್ಗೆಟ್, ದೇಶಾದ್ಯಂತ ಹೈ ಅಲರ್ಟ್

ಬೆಂಗಳೂರು, ಆಗಸ್ಟ್ 20: ಬೆಂಗಳೂರಿನ (Bengaluru) ಬಳಿ ಪತ್ತೆಯಾದ ನಕಲಿ ಔಷಧ ದಂಧೆಯ ಜಾಲ ದೇಶದ ಹಲವು ರಾಜ್ಯಗಳಿಗೆ ವಿಸ್ತರಿಸಿರುವ ಶಂಕೆ ಇದೀಗ ಮತ್ತಷ್ಟು ಬಲವಾಗಿದೆ. ಕರ್ನಾಟಕದ ಔಷಧ ನಿಯಂತ್ರಣ ಇಲಾಖೆ ನೀಡಿದ ಮಾಹಿತಿಯ ಆಧಾರದ ಮೇಲೆ ದೇಶದ ಎಲ್ಲ ರಾಜ್ಯಗಳ ಔಷಧ ನಿಯಂತ್ರಕರು (Drug Controllers) ಹಾಗೂ ರಾಜ್ಯ ಪರವಾನಗಿ ಪ್ರಾಧಿಕಾರಗಳಿಗೆ (State Licensing Authorities) ಎಚ್ಚರಿಕೆ ನೀಡಲಾಗಿದೆ. ಬೆಂಗಳೂರಿನಿಂದ ಮುಂಬೈ, ತೆಲಂಗಾಣ, ಹಿಮಾಚಲ ಪ್ರದೇಶ ಸೇರಿದಂತೆ ಹಲವು ರಾಜ್ಯಗಳ ನಡುವೆ ನಕಲಿ ಔಷಧ ಜಾಲದ ನಂಟು ಇರುವ ಸಾಧ್ಯತೆ ಇದೆ ಎಂದು ಶಂಕಿಸಲಾಗಿದೆ.

ಕರ್ನಾಟಕದ ಡ್ರಗ್ ಎನ್‌ಫೋರ್ಸ್‌ಮೆಂಟ್ ವಿಂಗ್ ಆಗಸ್ಟ್ 18ರಂದು ಬಿದದಿ ಸಮೀಪದ ನಂ.34 ಕುರುಬರಹಳ್ಳಿ ಗ್ರಾಮದಲ್ಲಿ ಲೈಸೆನ್ಸ್ ಇಲ್ಲದ ಔಷಧ ತಯಾರಿಕಾ ಘಟಕದ ಮೇಲೆ ದಾಳಿ ನಡೆಸಿತ್ತು. ಈ ವೇಳೆ ನಕಲಿ ಔಷಧಗಳು, ಬಲ್ಕ್ ಸ್ಟಾಕ್, ಪ್ಯಾಕೇಜಿಂಗ್ ಯಂತ್ರಗಳು, ಖಾಲಿ ವಯಲ್‌ಗಳು ಹಾಗೂ ನಕಲಿ ಲೇಬಲ್‌ಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ವಶಪಡಿಸಿಕೊಂಡ ವಸ್ತುಗಳ ಒಟ್ಟು ಅಂದಾಜು ಮೌಲ್ಯ 5,05,49,575 ರೂ. ಎಂದು ತಿಳಿದುಬಂದಿದೆ.

ಎಲ್ಲ ರಾಜ್ಯಗಳಿಗೆ ಅಲರ್ಟ್

ಈ ಪ್ರಕರಣ ಅಂತರರಾಜ್ಯ ಮಟ್ಟದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಶಂಕೆ ಹಿನ್ನೆಲೆಯಲ್ಲಿ ಕರ್ನಾಟಕದ ಔಷಧ ಗುಣಮಟ್ಟ ಇಲಾಖೆ ದೇಶದ ಎಲ್ಲ ರಾಜ್ಯಗಳ ಔಷಧ ನಿಯಂತ್ರಕರಿಗೆ ಪತ್ರ ಬರೆದಿದೆ. ತಮ್ಮ ರಾಜ್ಯದಲ್ಲೂ ಅನುಮಾನಾಸ್ಪದ ಲೇಬಲಿಂಗ್ ಹೊಂದಿರುವ ಔಷಧಗಳು ಅಥವಾ ಕರ್ನಾಟಕದಲ್ಲಿ ಬ್ಯಾನ್ ಮಾಡಿರುವ ಬ್ಯಾಚ್‌ಗಳ ಔಷಧಗಳು ಪತ್ತೆಯಾದರೆ ತಕ್ಷಣ ಮಾಹಿತಿ ನೀಡುವಂತೆ ಸೂಚಿಸಲಾಗಿದೆ.

ಖಾಸಗಿ ಆಸ್ಪತ್ರೆಗಳು, ಮೆಡಿಕಲ್ ಸ್ಟೋರ್‌ಗಳಿಗೂ ಎಚ್ಚರಿಕೆ

ರಾಜ್ಯದ ಖಾಸಗಿ ಆಸ್ಪತ್ರೆಗಳು, ಮೆಡಿಕಲ್ ಸ್ಟೋರ್‌ಗಳು ಹಾಗೂ ಔಷಧ ವಿತರಕರಿಗೂ ಎಚ್ಚರಿಕೆ ನೀಡಲಾಗಿದ್ದು, ಬ್ಯಾನ್ ಮಾಡಿರುವ ಬ್ಯಾಚ್‌ಗಳ ಔಷಧಗಳು ಬಳಕೆಯಾಗುತ್ತಿವೆಯೇ ಎಂಬುದನ್ನು ಪರಿಶೀಲಿಸುವಂತೆ ಸೂಚಿಸಲಾಗಿದೆ.

ಬೆಂಗಳೂರು, ತೆಲಂಗಾಣ, ಹಿಮಾಚಲದಿಂದ ಮುಂಬೈವರೆಗೂ ನಂಟು?

ಅಪರ ಔಷಧ ನಿಯಂತ್ರಕ ಡಾ. ಉಮೇಶ್ ನೀಡಿರುವ ಮಾಹಿತಿಯ ಪ್ರಕಾರ, ಪ್ರಮುಖ ಹೋಲ್‌ಸೇಲ್ ಔಷಧ ಮಾರುಕಟ್ಟೆ, ಡಿಸ್ಟ್ರಿಬ್ಯೂಷನ್ ಹಬ್ ಮತ್ತು ರಿಟೇಲ್ ಮೆಡಿಕಲ್ ಶಾಪ್‌ಗಳಲ್ಲಿ ದಿಢೀರ್ ತಪಾಸಣೆ ನಡೆಸುವಂತೆ ಬೇರೆ ರಾಜ್ಯಗಳಿಗೆ ಸೂಚಿಸಲಾಗಿದೆ.

ವಿಶೇಷವಾಗಿ Pfizer ಹೆಸರಿನಲ್ಲಿ ಅನುಮಾನಾಸ್ಪದ ಅಥವಾ ದಾಖಲೆಗಳಿಲ್ಲದ ಔಷಧ ಸ್ಟಾಕ್ ಇದೆಯೇ ಎಂಬುದನ್ನು ಪರಿಶೀಲಿಸಲು ಸೂಚಿಸಲಾಗಿದೆ. ದುಬಾರಿ ಔಷಧಗಳನ್ನು ಮಾರಾಟ ಮಾಡುವ ಡಿಸ್ಟ್ರಿಬ್ಯೂಟರ್‌ಗಳ Purchase Invoice, Batch Records ಮತ್ತು ಔಷಧದ ಮೂಲದ ದಾಖಲೆಗಳನ್ನು ಪರಿಶೀಲಿಸುವಂತೆ ಸೂಚನೆ ನೀಡಲಾಗಿದೆ.

ತೆಲಂಗಾಣ, ಹಿಮಾಚಲ ಪ್ರದೇಶದಿಂದ ಬರುತ್ತಿತ್ತು ಕಡಿಮೆ ಬೆಲೆ ಔಷಧ

ತೆಲಂಗಾಣ ಮತ್ತು ಹಿಮಾಚಲ ಪ್ರದೇಶದ ಮ್ಯಾನುಫ್ಯಾಕ್ಚರಿಂಗ್ ಹಬ್‌ಗಳಿಂದ ಕಡಿಮೆ ಬೆಲೆಯ ಜೆನೆರಿಕ್ ಔಷಧಗಳನ್ನು ಪಡೆದು, ಅವುಗಳನ್ನು ಕರ್ನಾಟಕದ ಲೈಸೆನ್ಸ್ ಇಲ್ಲದ ಘಟಕದಲ್ಲಿ ಹೊಸ ವಯಲ್‌ಗಳಿಗೆ ತುಂಬಿ, ನಕಲಿ ಲೇಬಲ್ ಅಂಟಿಸಿ ದುಬಾರಿ ಆಮದು ಔಷಧಗಳಂತೆ ಮಾರಾಟ ಮಾಡಲಾಗುತ್ತಿತ್ತೆಂಬುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.

ಕ್ಯಾನ್ಸರ್ ಚಿಕಿತ್ಸೆಯ ದುಬಾರಿ ಔಷಧಗಳೇ ಟಾರ್ಗೆಟ್!

ಈ ಜಾಲದಲ್ಲಿ ಕ್ಯಾನ್ಸರ್ ಸೇರಿದಂತೆ ಗಂಭೀರ ಕಾಯಿಲೆಗಳ ಚಿಕಿತ್ಸೆಯಲ್ಲಿ ಬಳಸುವ ಹೈ-ವ್ಯಾಲ್ಯೂ ಇಂಜೆಕ್ಷನ್‌ಗಳೂ ಟಾರ್ಗೆಟ್ ಆಗಿರುವುದು ಆತಂಕಕ್ಕೆ ಕಾರಣವಾಗಿದೆ. ನಕಲಿ ಔಷಧಗಳು ರೋಗಿಗಳ ಜೀವಕ್ಕೆ ನೇರ ಅಪಾಯ ಉಂಟುಮಾಡುವ ಸಾಧ್ಯತೆ ಇರುವ ಹಿನ್ನೆಲೆಯಲ್ಲಿ ಆಸ್ಪತ್ರೆಗಳು ಮತ್ತು ವೈದ್ಯರಿಗೆ ವಿಶೇಷ ಎಚ್ಚರಿಕೆ ನೀಡಲಾಗಿದೆ.

ಆಂಕಾಲಜಿಸ್ಟ್‌ಗಳು, ವೈದ್ಯರು ಮತ್ತು ಫಾರ್ಮಸಿಗಳು ದುಬಾರಿ ಆಮದು ಔಷಧಗಳ ಪ್ಯಾಕೇಜಿಂಗ್‌ನ Authenticity Features ಪರಿಶೀಲಿಸುವಂತೆ ಸೂಚಿಸಲಾಗಿದೆ. ಅನುಮಾನಾಸ್ಪದ ಪ್ಯಾಕೇಜಿಂಗ್, ಬ್ಯಾಚ್ ದಾಖಲೆಗಳ ಕೊರತೆ ಅಥವಾ ಅನುಮಾನಾಸ್ಪದ ಮೂಲದ ಸ್ಟಾಕ್ ಕಂಡುಬಂದರೆ ತಕ್ಷಣ ವಶಪಡಿಸಿಕೊಳ್ಳುವಂತೆ ನಿರ್ದೇಶಿಸಲಾಗಿದೆ.

ಬಿದದಿ ಸಮೀಪದ ಘಟಕದಲ್ಲಿ ಏನೆಲ್ಲ ಸಿಕ್ಕಿತ್ತು?

ದಾಳಿಯ ವೇಳೆ ಬಹುರಾಷ್ಟ್ರೀಯ ಔಷಧ ಕಂಪನಿಗಳ ಹೆಸರನ್ನು ಬಳಸಿಕೊಂಡು ಸಿದ್ಧಪಡಿಸಲಾಗಿದ್ದ ನಕಲಿ ಔಷಧಗಳು ಪತ್ತೆಯಾಗಿವೆ. ವಿಶೇಷವಾಗಿ Pfizer Ltd. ಹೆಸರಿನಲ್ಲಿ ನಕಲಿ ಔಷಧಗಳನ್ನು ಸಿದ್ಧಪಡಿಸಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.

ವಶಪಡಿಸಿಕೊಂಡ ಪ್ರಮುಖ ಔಷಧಗಳಲ್ಲಿ Aztreonam-Avibactam – EMBLAVEO – 1.5g/0.5g, Ceftazidime & Avibactam Injection – CEFIAVIGE NT-2.5 – 2.5g, Tigecycline for Injection USP – TIGYNT – 50mg, Midazolam Injection HIZLAM 2, ಇದರ ಜತೆಗೆ Ceftazidime 2g + Avibactam 0.5g ಹೆಸರಿನ ಖಾಲಿ ವಯಲ್‌ಗಳು ಹಾಗೂ Zavicefta ಸೇರಿದಂತೆ ವಿವಿಧ ಬ್ರ್ಯಾಂಡ್‌ಗಳ ನಕಲಿ ಲೇಬಲ್‌ಗಳು ಪತ್ತೆಯಾಗಿವೆ. Xavitaz, Trezam, AztraQ ಸೇರಿದಂತೆ ಇತರ ಬ್ರ್ಯಾಂಡ್‌ಗಳ ಖಾಲಿ ಲೇಬಲ್ ಮತ್ತು ವಯಲ್‌ಗಳನ್ನೂ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.

ಇದರಿಂದ ಔಷಧಗಳನ್ನು ನಕಲಿಯಾಗಿ ತಯಾರಿಸುವುದಷ್ಟೇ ಅಲ್ಲದೆ, ಅವುಗಳಿಗೆ ನಕಲಿ ಪ್ಯಾಕೇಜಿಂಗ್ ಮತ್ತು ಲೇಬಲಿಂಗ್ ಮಾಡುವ ವ್ಯವಸ್ಥೆಯೂ ಘಟಕದಲ್ಲಿ ಇತ್ತು ಎಂಬ ಅನುಮಾನ ಬಲಗೊಂಡಿದೆ.

ರಾಜ್ಯಾದ್ಯಂತ ತಪಾಸಣೆಗೆ ಸೂಚನೆ

ಪ್ರಕರಣದ ತನಿಖೆ ಮುಂದುವರಿದಿರುವ ಬೆನ್ನಲ್ಲೇ ದೇಶದ ವಿವಿಧ ರಾಜ್ಯಗಳಲ್ಲಿ ಮಾರುಕಟ್ಟೆ ತಪಾಸಣೆ ನಡೆಸಿ, ಅದರ ವರದಿ ಹಾಗೂ ಮಾಹಿತಿಯನ್ನು ಪರಸ್ಪರ ಹಂಚಿಕೊಳ್ಳುವಂತೆ ಸೂಚಿಸಲಾಗಿದೆ. ಇದರ ಮೂಲಕ ನಕಲಿ ಔಷಧ ಜಾಲದ ಸಂಪೂರ್ಣ ಸಂಪರ್ಕವನ್ನು ಪತ್ತೆಹಚ್ಚಲು ಸಮನ್ವಯಿತ ಕಾರ್ಯಾಚರಣೆ ನಡೆಸಲು ಔಷಧ ನಿಯಂತ್ರಣ ಇಲಾಖೆ ಮುಂದಾಗಿದೆ.

ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ