ಕೋಲಾರ: ಹಾಲಿನ ದರದಲ್ಲಿ ಇಳಿಕೆ; ಕೋಚಿಮುಲ್ ನಿರ್ಧಾರದ ವಿರುದ್ಧ ರೈತರ ಆಕ್ರೋಶ

ಕೋಲಾರ: ಕೊರೊನಾ ಎರಡನೇ ಅಲೆಯ ಆತಂಕ ಇಗಷ್ಟೇ ದೂರವಾಗುತ್ತಿದೆ. ಲಾಕ್​ಡೌನ್​ನಿಂದ ತತ್ತರಿಸಿದ ವ್ಯಾಪಾರಿಗಳು, ದಿನಕೂಲಿಕಾರರು, ರೈತರು ಈಗ ಮತ್ತೆ ತಮ್ಮ ಕೆಲಸಕ್ಕೆ ದಾವಿಸುತ್ತಿದ್ದಾರೆ. ಆದರೆ ಇಂತಹ ಸಂಕಷ್ಟದ ಸಮಯದಲ್ಲಿ ಕೈ ಹಿಡಿಯಬೇಕಾದ ಹೈನೋದ್ಯಮ ಗೋಪಾಲಕರನ್ನು ಕೈ ಬಿಟ್ಟಿದೆ. ಕೋಲಾರದಲ್ಲಿ ಹೈನುಗಾರಿಕೆಯನ್ನು ನಂಬಿ ಲಕ್ಷಾಂತರ ಕುಟುಂಬಗಳು ಜೀವನ ಸಾಗಿಸುತ್ತಿವೆ. ಅದರಲ್ಲೂ ಕೋಲಾರ, ಚಿಕ್ಕಬಳ್ಳಾಪುರ ಹಾಲು ಒಕ್ಕೂಟ ಹಾಲು (ಕೋಚಿಮುಲ್) ಉತ್ಪಾದನೆಯಲ್ಲಿ ರಾಜ್ಯದಲ್ಲೇ ಎರಡನೇ ಸ್ಥಾನ ಪಡೆದಿದೆ. ಹೀಗಿರುವಾಗ ಕೋಲಾರ ಹಾಲು ಒಕ್ಕೂಟದಲ್ಲಿ ಪ್ರತಿ ಲೀಟರ್ ಮೇಲೆ 1.50 ರೂಪಾಯಿ ಇಳಿಕೆ ಮಾಡುವ ಮೂಲಕ ಹಾಲಿನ ದರವನ್ನು ಕಡಿತ ಮಾಡಿ ಗೋಪಾಲಕರನ್ನು ಸಂಕಷ್ಟಕ್ಕೆ ಗುರಿ ಮಾಡಿದೆ.

ಕೋಲಾರ ಮತ್ತು ಚಿಕ್ಕಬಳ್ಳಾಪುರ ಜಿಲ್ಲೆಯ ಲಕ್ಷಾಂತರ ಕುಟುಂಬಗಳು ಅಂತರ್ಜಲ ಕುಸಿದರೂ ಹೈನುಗಾರಿಕೆಯನ್ನು ನಂಬಿ ಜೀವನ ಸಾಗಿಸುತ್ತಿವೆ. ಆದರೆ ಕೊರೊನಾ ಸೋಂಕಿನಿಂದಾಗಿ ರಾಜ್ಯದ ವಿವಿಧೆಡೆ ಹಾಲು ಸರಬರಾಜು ಮಾಡಲಾಗುತ್ತಿಲ್ಲ, ಜತೆಗೆ ಮಾರುಕಟ್ಟೆ ವ್ಯವಸ್ಥೆ ಮಾಡಲು ಕಷ್ಟಕರವಾಗಿದೆ. ಈ ಹಿನ್ನಲೆಯಲ್ಲಿ ಕೆಎಂಎಫ್ ಈಗ ಪ್ರತಿ ಲೀಟರ್ ಮೇಲೆ 1.50 ರೂಪಾಯಿಗಳನ್ನು ಕಡಿಮೆ ಮಾಡಿದೆ. ಕೋಚಿಮುಲ್ ತನ್ನ ಹಾಲು ಉತ್ಪಾದಕರಿಗೆ ಪ್ರತಿ ಲೀಟರ್​ಗೆ 27 ರೂಪಾಯಿಗಳನ್ನು ನೀಡುತ್ತಿತ್ತು. ಆದರೆ ಈಗ ಪ್ರತಿ ಲೀಟರ್ ಮೇಲೆ 1.50 ರೂಪಾಯಿ ಕಡಿಮೆ ಮಾಡುವ ಮೂಲಕ ಲೀಟರ್​ಗೆ 25.50 ಪೈಸೆ ರೂಪಾಯಿ ನೀಡುತ್ತಿದೆ ಎಂದು ಕೋಲಾರ ಮತ್ತು ಚಿಕ್ಕಬಳ್ಳಾಪುರ ಹಾಲು ಒಕ್ಕೂಟ ಅಧ್ಯಕ್ಷ ನಂಜೇಗೌಡ ತಿಳಿಸಿದ್ದಾರೆ.

ಕೋಲಾರ, ಚಿಕ್ಕಬಳ್ಳಾಪುರ ಎರಡು ಜಿಲ್ಲೆಗಳಲ್ಲಿ ಒಟ್ಟು 1800 ಹಾಲು ಉತ್ಪಾದಕರ ಸಹಕಾರಿ ಸಂಘಗಳಿದ್ದು, ಪ್ರತ್ಯಕ್ಷ ಹಾಗೂ ಪರೋಕ್ಷವಾಗಿ ಹೈನೋದ್ಯಮವನ್ನು ನಂಬಿ ಲಕ್ಷಾಂತರ ಕುಟುಂಬಗಳು ಜೀವನ ನಡೆಸುತ್ತಿವೆ. ಪ್ರತಿ ದಿನ ಕೋಚಿಮುಲ್​ನಲ್ಲಿ ಸುಮಾರು 11.50 ಲಕ್ಷ ಲೀಟರ್ ಹಾಲು ಸಂಗ್ರಹಣೆಯಾಗುತ್ತಿದೆ. ಅಂತರ್ಜಲ ಕುಸಿದಿದ್ದರೂ ಸಹ ಇಲ್ಲಿನ ಗೋಪಾಲಕರು ಹಾಲಿನ ಕ್ಷೀರವನ್ನು ಹರಿಸಿದ್ದಾರೆ. ಆದರೆ ಕೊರೊನಾ ಕರಿನೆರಳು ಹೈನುಗಾರಿಕೆ ಮೇಲೂ ಸಹ ಬಿದ್ದಿರುವುದರಿಂದ ಗೋಪಾಲಕರು ತೊಂದರೆ ಅನುಭವಿಸುತ್ತಿದ್ದಾರೆ.

ಕೊರೊನಾ ಸಂದರ್ಭದಲ್ಲಿ ಜಿಲ್ಲೆಯ ಗೋಪಾಲಕರು ಹೈನೋದ್ಯಮವನ್ನು ನಂಬಿ ಜೀವನ ನಡೆಸುತ್ತಿದ್ದಾರೆ. ಈ ಸಂದರ್ಭದಲ್ಲಿ ಗೋಪಾಲಕರ ಕೈ ಹಿಡಿಯಬೇಕಾದಂತಹ ಕೋಚಿಮುಲ್ ಗೋಪಾಲಕರನ್ನು ಕೈ‌ಬಿಡುವ ಮೂಲಕ‌ ಮತ್ತಷ್ಟು ಸಂಕಷ್ಟವನ್ನು ತಂದೊಡ್ಡಿದೆ. ಪಶು ಆಹಾರದ ಬೆಲೆ ಕೂಡ ಗಗನಕ್ಕೇರಿರುತ್ತಿದ್ದು, ಕೂಡಲೇ ಕೋಚಿಮುಲ್ ಮತ್ತು ಸರ್ಕಾರ ನೆರವಿಗೆ ಬಂದು ಹಾಲು ಖರೀದಿ ದರವನ್ನು ಮತ್ತೆ ಏರಿಸಬೇಕು‌ ಇಲ್ಲದಿದ್ದರೆ ಜಾನುವಾರಗಳ ಸಮೇತ ಕೋಚಿಮುಲ್ ಮುಂದೆ ಪ್ರತಿಭಟನೆ ನಡೆಸುವುದಾಗಿ ರೈತ ಮುಖಂಡ ನಾರಾಯಣ ಗೌಡ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಒಟ್ಟಾರೆ ಬರದ ನಾಡಿನ ರೈತರ ಬೆನ್ನೆಲುಬು ಹೈನುಗಾರಿಕೆ. ಆದರೆ ಕೋಚಿಮುಲ್ ಹಾಲಿನ ದರ‌ ಕಡಿತ ಮಾಡಿ ಗೋಪಾಲರನ್ನು ಸಂಕಷ್ಟಕ್ಕೆ ದೂಡಿದೆ. ಅದಕ್ಕಾಗಿ ಒಕ್ಕೂಟ ಮತ್ತು ಸರ್ಕಾರ ಅಗತ್ಯ ಕ್ರಮಗಳನ್ನು ತೆಗೆದುಕೊಂಡು ಗೋಪಾಲಕರ ನೆರವಿಗೆ ನಿಲ್ಲಬೇಕು ಎನ್ನುವುದು ಸದ್ಯ ಜನರ ಮನವಿಯಾಗಿದೆ.

ಇದನ್ನೂ ಓದಿ: ಲಾಕ್​ಡೌನ್​ ನಂತರ ಗೋಪಾಲಕರಿಗೆ ಗುಡ್​ ನ್ಯೂಸ್​: ಕೋಲಾರ, ಚಿಕ್ಕಬಳ್ಳಾಪುರ ಹಾಲು ಒಕ್ಕೂಟದಿಂದ ಹಾಲಿನ ದರ ಹೆಚ್ಚಳ

ಜೂನ್,ಜುಲೈ ತಿಂಗಳಲ್ಲಿ ಸರ್ಕಾರಿ ಶಾಲೆಯ ವಿದ್ಯಾರ್ಥಿಗಳಿಗೆ ಕೆನೆಭರಿತ ಹಾಲಿನ ಪುಡಿ ವಿತರಣೆಗೆ ಅನುದಾನ ಬಿಡುಗಡೆ