ಶೇ 28 ರಷ್ಟು ಜಿಎಸ್ಟಿ ಏರಿಕೆಗೆ ಕೇಂದ್ರ ಸರ್ಕಾರದ ವಿರುದ್ಧ ಆನ್ಲೈನ್ ಗೇಮಿಂಗ್ ಸಂಸ್ಥೆಗಳ ಅಸಮಾಧಾನ
ಕೇಂದ್ರ ಸರ್ಕಾರ ಆನ್ಲೈನ್ ಗೇಮಿಂಗ್ ಮೇಲೆ ಶೇ 28 ರಷ್ಟು ಜಿಎಸ್ಟಿ ವಿಧಿಸಿದ ಬೆನ್ನಲ್ಲೇ 120ಕ್ಕೂ ಹೆಚ್ಚು ಆನ್ಲೈನ್ ಗೇಮಿಂಗ್ ಸಂಸ್ಥೆಗಳು ಪ್ರಧಾನಿಮಂತ್ರಿ ಕಚೇರಿ ಮತ್ತು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯಕ್ಕೆ ಪತ್ರ ಬರೆದಿವೆ.
Updated on: Jul 18, 2023 | 8:34 AM
ಬೆಂಗಳೂರು: ಕೇಂದ್ರ ಸರ್ಕಾರ ಆನ್ಲೈನ್ ಗೇಮಿಂಗ್ (Online Gaming) ಮೇಲೆ ಶೇ 28 ರಷ್ಟು ಜಿಎಸ್ಟಿ (GST) ವಿಧಿಸಿದ ಬೆನ್ನಲ್ಲೇ 120ಕ್ಕೂ ಹೆಚ್ಚು ಆನ್ಲೈನ್ ಗೇಮಿಂಗ್ ಸಂಸ್ಥೆಗಳು ಪ್ರಧಾನಿಮಂತ್ರಿ ಕಚೇರಿ (Prime Minister Office) ಮತ್ತು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯಕ್ಕೆ (Ministry of Electronics and Information Technology) ಪತ್ರ ಬರೆದಿವೆ. ಶೇ 28 ರಷ್ಟು ಜಿಎಸ್ಟಿ ವಿಧಿಸುವುದರಿಂದ ಆನ್ಲೈನ್ ಗೇಮಿಂಗ್ ಸಂಸ್ಥೆಗಳ ಮೇಲೆ ಭಾರಿ ಹೊರೆಯಾಗಲಿದೆ. ಹೀಗಾಗಿ ಈ ನಿರ್ಧಾರವನ್ನು ಮರುಪರಿಶೀಲಿಸುವಂತೆ ಮನವಿ ಮಾಡಿವೆ.
ಆನ್ಲೈನ್ ಗೇಮಿಂಗ್ ಮೇಲೆ ಶೇ 28 ರಷ್ಟು ಜಿಎಸ್ಟಿ ವಿಧಿಸುವುದರಿಂದ ನಾವು ಸಂಕಷ್ಟಕ್ಕೆ ಸಿಲುಕುತ್ತೇವೆ. ಪ್ರಸ್ತುತ ನಾವು ಜಿಜಿಆರ್/ ಪ್ಲಾಟ್ಫಾರ್ಮ್ ಶುಲ್ಕದ ಮೇಲೆ ಶೇ 18 ರಷ್ಟು ಜಿಎಸ್ಟಿ ಪಾವತಿಸುತ್ತಿದ್ದೇವೆ. ಇದೀಗ ಪ್ಲಾಟ್ಫಾರ್ಮ್ ಶುಲ್ಕದ ಬದಲಿಗೆ ಸಂಪೂರ್ಣ ಹೂಡಿಕೆ ಮೌಲ್ಯದ ಮೇಲೆ ಜಿಎಸ್ಟಿ ವಿಧಿಸುವುದರಿಂದ 6 ತಿಂಗಳೊಳಗೆ ಗೇಮಿಂಗ್ ಉದ್ಯಮ ಶೇ 99 ರಷ್ಟು ಬಿದ್ದುಹೋಗುತ್ತದೆ. ಇದರಿಂದ ಸಾಕಷ್ಟು ಜನರು ಉದ್ಯೋಗ ಕಳೆದುಕೊಳ್ಳುತ್ತಾರೆ ಮತ್ತು ಉದ್ಯಮ ಸಂಪೂರ್ಣವಾಗಿ ಸ್ಥಗಿತಗೊಳ್ಳುತ್ತದೆ ಎಂದು ಪತ್ರದಲ್ಲಿ ಬರೆಯಲಾಗಿದೆ.
ಗೇಮ್ಸ್‌ಕ್ರಾಫ್ಟ್ ಟೆಕ್ನಾಲಜೀಸ್, ನಜಾರಾ ಟೆಕ್ನಾಲಜೀಸ್ ಸೇರಿದಂತೆ ಗೇಮಿಂಗ್ ಪ್ಲಾಟ್‌ಫಾರ್ಮ್‌ಗಳು ಮತ್ತು ಆಲ್ ಇಂಡಿಯಾ ಗೇಮಿಂಗ್ ಫೆಡರೇಶನ್, ಇ-ಗೇಮಿಂಗ್ ಫೆಡರೇಶನ್ ಮತ್ತು ಫೆಡರೇಶನ್ ಆಫ್ ಇಂಡಿಯಾ ಫ್ಯಾಂಟಸಿ ಸ್ಪೋರ್ಟ್ಸ್ ಸೇರಿದಂತೆ ಫೆಡರೇಶನ್‌ಗಳು ಪತ್ರಕ್ಕೆ ಸಹಮತ ವ್ಯಕ್ತಪಡಿಸಿವೆ.
ಇದನ್ನೂ ಓದಿ: ಆನ್ಲೈನ್ ಗೇಮಿಂಗ್ಗೆ ಶೇ. 28ಜಿಎಸ್ಟಿ; 2023-24ರಲ್ಲಿ 20,000 ಕೋಟಿ ರೂ ತೆರಿಗೆ ಸಂಗ್ರಹ ನಿರೀಕ್ಷೆ
2020ರಲ್ಲಿ ಆನ್ಲೈನ್ ಗೇಮರ್ಗಳ ಸಂಖ್ಯೆ 360 ಮಿಲಿಯನ್ ಇತ್ತು. ಇದೀಗ 420 ಮಿಲಿಯನ್ಗೆ ಏರಿಕೆಯಾಗಿದೆ. ಭಾರತದ ಆನ್ಲೈನ್ ಗೇಮಿಂಗ್ ಉದ್ಯಮ ಸದ್ಯ 1.5 ಬಿಲಿಯನ್ ಡಾಲರ್ನಷ್ಟು ಬೃಹತ್ತಾಗಿದೆ. ಅಂದರೆ 12,000 ಕೋಟಿ ರೂ ಮೊತ್ತದ ಉದ್ಯಮ ಇದು. 2014 ರಿಂದ 2020ರ ನಡುವೆ ಆನ್ಲೈನ್ ಗೇಮಿಂಗ್ನಲ್ಲಿ 500 ಮೀಲಿಯನ್ ಡಾಲರ್ನಷ್ಟು ವಿದೇಶಿ ಬಂಡವಾಳ ಹೂಡಿಕೆಯಾಗಿದೆ. ಇನ್ನು 2023ರ ಜನವರಿಯಿಂದ ಜೂನ್ವರೆಗೆ 1.5 ಶತಕೋಟಿಗೂ ಹೆಚ್ಚು ಡಾಲರ್ ಹೂಡಿಕೆಯಾಗದೆ.
ಭಾರತವು ಪ್ರಸ್ತುತ ಜಾಗತಿಕ ಗೇಮಿಂಗ್ ಮಾರುಕಟ್ಟೆಯಲ್ಲಿ ಶೇ 1 ರಷ್ಟು ಪಾಲನ್ನು ಹೊಂದಿದೆ. ಯುಎಸ್ ಮತ್ತು ಚೀನಾ ಶೇ 23 ಮತ್ತು 26 ರಷ್ಟು ಪಾಲು ಹೊಂದಿವೆ. ಕಳೆದ 5 ವರ್ಷಗಳಲ್ಲಿ 15 ಬಿಲಿಯನ್ ಮೊಬೈಲ್ ಗೇಮ್ಗಳನ್ನು ಡೌನ್ಲೋಡ್ ಮಾಡಲಾಗಿದೆ. ಭಾರತವು ಜಾಗತಿಕವಾಗಿ ಅತಿ ಹೆಚ್ಚು ಗೇಮ್ಗಳನ್ನು ಡೌನ್ಲೋಡ್ ಮಾಡಿದೆ. ಮುಂದಿನ ದಿನಗಳಲ್ಲಿ ಭಾರತವು ಗೇಮಿಂಗ್ ಪವರ್ಹೌಸ್ ಆಗಿ ಹೊರಹೊಮ್ಮಬಹುದು.
ಭಾರತದ ಆನ್ಲೈನ್ ಗೇಮಿಂಗ್ ಉದ್ಯಮ ಸದ್ಯ 1.5 ಬಿಲಿಯನ್ ಡಾಲರ್ನಷ್ಟು ಬೃಹತ್ತಾಗಿದೆ. ಅಂದರೆ 12,000 ಕೋಟಿ ರೂ ಮೊತ್ತದ ಉದ್ಯಮ ಇದು. ಡ್ರೀಮ್11 ಸೇರಿದಂತೆ ಸಾವಿರಕ್ಕೂ ಹೆಚ್ಚು ಗೇಮಿಂಗ್ ಸ್ಟಾರ್ಟಪ್ಗಳಿವೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
